रेम्बेट्मिडिम ल्वा 4 - थुलुङ राईपाह्रीला बाट्पा साखाम थो़पा गन्खोप 1 आकोतिमा, गो रेप्तो मा पाह्रीला कोले लाम्चोको होल्तासिट्पा ल्वाउतो। मेम्मा ङादो गोनुङ जेपा मेराम लो़लामकाङा भुमकु लो़लामका होङङा गोनुङ आरे र्वाम्डी, “आला गेले गेडा, मा दिफु हाम दु़म, गो रेम्बेनी।” 2 माम्चु़नी-पेलका गो लु़न्सिल्याङ्डो, मा पाह्रीला आमा ङादोडा साखाम थो़पा कोले गन्खोप बाइडा मा मेसिन्डा कोले गन्तासिट्पा बाम्डी। 3 मेसिन्डा गन्तासिट्पा गुमी गिगिम नुङ लालाम सोरलुङ होङङा वाक्पा बाम्डी। वाक्पा सोरलुङ होङङा बेपा नाङगुमका मे हप गन्खोप खिर्थाड्डु़म बाइडा। 4 मेराम साखाम थो़पा गन्खोपकु होनोलाम-आथो़लाम न-ब्ल (२४) साखाम थो़पा वाङमिम गन्खोपमिम बाम्डी। मेसिन्डा न-ब्लले (२४) ङाउ-डु़म्लाचो़मिम गन्तासिम्डी। मेर्मिमका बुबुयाम ये फम्तासिम्डी मा उनी बुइडला सो़नाकु मुकुट खुम्तासिम्डी। 5 मे साखाम थो़पा गन्खोपलामका ब्ल्याक्ची झ्वाक्ताम बाइडा, गुडुमाक्सी र्वाक्साका जेस्ताम बाइडा मा बुलु़लु़ बु़डु़म बाइडा। मे साखाम थो़पा गन्खोप ङादोडा येतले धिप्रीमिम झ्वाम्डिम बाम्डी, मेर्मिम ने माम्चु़नीकु येतले पेलमिम सो़। 6 मे साखाम थो़पा गन्खोपकु ङादोडा स्फटिक सिसा होप्माम छ्याङ्लो-छ्याङ्लोम दिरिदिन बाइडा। ङादोडा नुङ चङडा मिक्सी-मिक्सी बाट्पा ब्लले सामनुङमामिम मे साखाम थो़पा गन्खोपकु होनोलाम-आथो़लाम बाम्डी। 7 कोनोम सामनुङमा ने धेन्द्रा होङङा बेपा बाइडा, नक्नोम सामनुङमा ने बेनो होङङा बेपा बाइडा, सुनोम सामनुङमा ने मु़चु़कु ङाली होङङा बेपा बाइडा, मा ब्लनोम सामनुङमा ने हुट्पा खिरिजङमा होङङा बेपा बाइडा। 8 मे ब्लले सामनुङमामिम खोत्लेकाम रुले-रुले लाप्तेर बाइडा मा मे लाप्तेरकु डलाम गोलाम खोत्लेथो़ मिक्सी-मिक्सी बाइडा। नेम्फु सिन्था मेङेसिक्साका मेर्मिमका आरे र्वामिम बुमी: “सेपा, सेपा, सेपा, खोत्लेडलाम यु़मनुङमा मिप्रङमा माम्चु़नी, गानी ङादो वो बान्नी, ओम्लो वो बुनी मा रोमु खाम्नी।” 9 हाङकोलोका मे ब्लले सामनुङमामिमका हप गन्खोपडा गन्तासिट्पा मा हेल्लो लोवो बाट्पाम बाट्पाकाम नङ कोमी, डोक्पु बोमी मा आलासो़ ग्वामी, 10 मे न-ब्लले (२४) ङाउ-डु़म्लाचो़मिमका हप गन्खोपडा गन्तासिट्पाकु ङादोडा खुम्बु बोमी। मेम्मा हेल्लो लोवो बाट्पाम बाट्पा गुमीलाई सो़रलोले बोमी। मेर्मिमका उनीमा सो़नाकु मुकुटमिम मे हप गन्खोप ङादोडा जु़ल्मी मा आरे र्वामी: 11 “आकीमा ङाचो़ नुङ माम्चु़नी, डोक्पु बोमु, नङ कोमु मा यु़म रमुका घ्रेट्पा गानी, हेङालोने खोत्ले गानी प्रङ्निमी मा इनीमा नका मेर्मिम प्रङ्सिम्डी मा मेर्मिमका त्वारो़म ल्वाम्डिम बु।” |
© Wycliffe Bible Translators, Inc. All rights reserved.
Wycliffe Bible Translators, Inc.