रेम्बेट्मिडिम ल्वा 3 - थुलुङ राईसार्डिसडाम मण्डलीलाई सेलाखाजेम 1 “सार्डिस मण्डलीडाम पाह्रीचो़लाई ओराम ल्वा र्याका: माम्चु़नीकु येतले पेलमिम नुङ येतले सोरलुङमिम जेथाक्पाका आरे र्वामी, गाना बेन्नाम इमा खारीमिम गो चक्पु। गाना नु़पा बुना र्वाक्साका इमा नङ दोस्ताम बु लोवो गाना सिन्नाम बु। 2 ङोसा! गानानुङ बाट्पा दाम्मु खापा इमा थो़र सोनुङमा दु़म्बेडा। हेङालोने आमा माम्चु़नीकु ङादोडा गाना बेन्सोट्नाम इमा खारी गो डार्तोम मिबु। 3 मेम्मिमका गाना हाम ल्वान्नाम नुङ थो़न्नाम सीसि मिम्डा। गानालाई सीट्मा ल्वा होम्साका लाम्दिया मा मेजो़पा लाम्दीलाम ख्लोसा। गाना ङोसिक्साका मेबानावा माला ने खुचु़वा रोमिम होङङा गो लिबावा रोङु मा बामथारीका गो इमाडा रोङु मेराम गाना मेचना। 4 लावो सार्डिसडा बाट्पा गानीगोडाम कोले-नले मु़चु़का उनीमा ये-सेम घ्रामलु़पा बेम्डिम मिबु। मेर्मिम मु़चु़ बुबुयाम ये-सेम फसिक्साका गोनुङ लाम्दिमी, हेङालोने मेर्मिम गोनुङ लाम्दिमुका घ्रेट्पा बुमी। 5 उहेम मु़चु़का मेजो़पाडला घ्ल्वा, मेरामलाई गो आरेसाकाङा बुबुयाम ये-सेम फसिबेट्पु, मा त्वारो़मकु खाजेमडा र्याक्मा मेरामकु नङ गो मेपारु। आमा पाप नुङ उनीमा पाह्रीचो़मिमकु ङादोडा गो मेराम मु़चु़लाई छेपु र्वाङु। 6 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी, मेरामका थो़सु़नु़। फिलाडेल्फिया मण्डलीलाई सेलाखाजेम 7 “फिलाडेल्फिया मण्डलीडाम पाह्रीचो़लाई ओराम ल्वा र्याका: सेपा नुङ आच्छाङाकाम, उहेमका दाऊदकु चाबी जेन्थामी, गुमीका आरे र्वामी, गुमीका हाम होल्मी मेराम सु़का वो ख्लु़न्मु मेचाप्सु़ मा गुमीका हाम ख्लु़न्मी मेराम सु़का वो होल्मु मेचाप्सु़। 8 इमा खारीमिम गो चक्पु। रेप्डा, इमा लागि गो लाम्चोको होल्साट्निम बु, मेराम सु़का वो ख्लु़न्मु मेचाम्मी। गानानुङ कि-कि यु़म बु मेम मावो आमा सिजेम होङङा गाना लाम्दिन्नाम बु मा गाना थो़रलु़इमिम दु़म्नाम बु। 9 शैतानकु घ्रो़म्दीनेमडाम मु़चु़मिम उहेमका उनी त्वापलाई यहूदी र्वामी लावो यहूदी ने मेएँ मेर्मिम ने लिमाचो़मिम सो़। मेर्मिमलाई गो इमाडा रेट्पुमी मा इमा खेल चु़म्बेसाका सेव सान्बेट्पुमी। मेम्मा गो गानालाई रिखाम बोनी र्वाक्पा मेर्मिमका चमी। 10 गो र्वाङ्डोम होङङा गाना इम्सिक्साका बेन्ना। मेम्मिमका रोमु खापा दु़खा थारीडाम गो गानालाई बोनी-थार्नी। मेराम दु़खा ने सु़म्दिसेरडा बाट्पामिम खोत्लेडला रो। 11 गो दालाङा योङु। गानानुङ बाट्पा आच्छाङाकाम सीसि जो़होमका जेथाडा। मेम्मा इमा मुकुट सु़का वो रोन्मु मेचाप्सु़नु़। 12 मेजो़पाडला सु़ घ्ल्वा, गुलाई गो आमा माम्चु़नीकु सो़रनेमकु खाँबा होप्माम दु़म्बेट्पु। मेम्मा मेलामका गु हाम्सी वो मेल। गो गुडला आमा माम्चु़नीकु नङ नुङ उनीमा लाले शहर यरूशलेमकु नङ र्याक्पु। मेराम शहर पाह्रीलाम माम्चु़नीलाम यो। मेम्मा गुडला आमा लाले नङ वो र्याक्पु। 13 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी मेरामका थो़सु़नु़। लाउडिकियाडाम मण्डलीलाई सेलाखाजेम 14 “लाउडिकिया मण्डलीडाम पाह्रीचो़लाई ओराम ल्वा र्याका: ओराम सिजेम आमेन र्वाक्पा, थो़रलु़इमिम, माम्चु़नीकु आच्छाङाकाम ल्वा सो़पा, मा उहेमलामका माम्चु़नीका खोत्ले प्रङ्मिडी, मेरामका आरे र्वामी। 15 इमा खारीमिम गो चक्पु, गाना छक्पा वो मेबुना घ्रु़पा वो मेबुना। गाना ने छक्पा लोवो घ्रु़पा लोवो दु़म्मु बासावा। 16 हेङालोने गाना दिमदिमवाम बुना। छक्पा वो मेबुना घ्रु़पा वो मेबुना। गो गानालाई आमा सिलामका ओल्सोनी। 17 ‘गो खाप्चीचो़ बुङु, गोनुङ हापा खाप्ची बु मा गोलाई हाम वो मेबासी’ र्वाक्साका गाना र्वाना। लावो गाना इमा न-गो नो़पा, नाम्नाम्चो़ लु़इमिम, हाम वो मेबाट्पा, मिक्सीका मेल्वापा मा खालिन्ते बुनामिम मेचना। 18 मुड्डा चासाका जो़पा बेम्मा सो़ना आमालामका भ्रेया मा गाना खाप्चीचो़ दु़म्ना, फम्सिमु लागि बुबुयाम ये-सेम आमालामका भ्रेया मा इमा क्रो़मलु़पा खालिन्ते ख्रेमु चाम्ना, मा इमा मिक्सीडा फिमु दबाई आमालाम भ्रेया मा इमा मिक्सीका ल्वामु चाम्ना र्वाक्साका गो गानालाई मुलु़ ग्वानी। 19 उहेम-उहेमलाई गो रिखाम बेउमी, मेर्मिमलाई गो भुरुमी मा सीमु लागि यालु़मी। मेम्मिमका इमा सो हन्बेडा, मेजो़पा खारी बोमु डिसाका माम्चु़नीथो़ ख्लोसा। 20 थो़सा, गो लाम्चोकोडा येम्सिङुमा हेला बेउ। कोङनिमका आमा लो़लाम थो़सु़मा लाम्चोको होलु़ माला गो मेगोनो बिङु मा गुनुङ पोचुकु-डुचुकु मा गुका गोनुङ पु़। 21 गो घ्ल्वाङडोमा माम्चु़नी पापनुङ उनीमा गन्खोपडा गन्पा साखाम ल्वाउतोम होङङा मेजो़पाडला घ्ल्वापामिमलाई गोनुङङा हप गन्खोपडा गन्मु ग्वाक्पुमी। 22 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी मेरामका थो़सु़नु़।” |
© Wycliffe Bible Translators, Inc. All rights reserved.
Wycliffe Bible Translators, Inc.