रेम्बेट्मिडिम ल्वा 22 - थुलुङ राईत्वारो़म ग्वाक्पा ब्लोकु 1 मेकोतिमा बिल्लौर लुङ कोतिम छ्याङलो-छ्याङलोम त्वारो़म ग्वाक्पा कुकु ब्लोकु पाह्रीचो़का गोलाई रेम्बेट्ङिडी। मेराम ब्लोकु माम्चु़नी नुङ भेन्दाचो़कु साखाम थो़खोप खोमलामका लुक्योक्साका 2 मे शहरकु डोक्पु लाम्दीकाम थेतेभाल ओन्पा बाइडा। ब्लोकुकु होनोलाममिम फार नुङ आथो़लाममिम फारडा त्वारो़म ग्वाक्पा धक्सामिम बाम्डी। मेर्मिमकाम को थका को-न खेप मा सिथाल्लु़, हेङालोने मुनाम-मुनामका को-न खालकाम मा सिथाल्लु़। मेम्मा मे धक्साकु ब्लाममिमका ने मु़चु़मिम सबेडु़मी। 3 मेसिन्डा आथा ने हाम्सी वो वाइतो मेदु़म। माम्चु़नी नुङ भेन्दाचो़कु साखाम थो़पा खोम मेराम शहरडा दु़म, मा माम्चु़नीकु लाले-पाङकेचो़मिमका माम्चु़नीकु सो़रलोले बोमी। 4 मेर्मिमका माम्चु़नीकु ङाली ल्वामी, मा उनीमा नङ मेर्मिमकु कुप्पीडा दु़म। 5 मेसिन्डा आथा ने सिन्था मेदु़म। मेर्मिमलाई धिप्रीकु ओल, नेम्सुङकु ओल मेबासी, हेङालोने मिप्रङमा माम्चु़नीकाङा मेर्मिमलाई ओल ग्वामी। मेम्मा मेर्मिमका हेल्लो लोवो साखाम थो़मिमङा बुमी। 6 मे पाह्रीचो़का गोलाई आरे र्वाक्ता, “गानालाई र्वाक्मा ओर्मिम खोत्ले ल्वा थो़रलु़इमिम नुङ आच्छाङाकाम बु सो़। दु़म्मुङा खापा ल्वामिम उनी डु़ल्चो़मिमलाई रेमबेन्मु गुमीलाम जेपा मु़चु़मिमलाई न ग्वाक्पा मिप्रङमा माम्चु़नीका उनी पाह्रीचो़ थु़र्मिडी।” येशू योमु खाप्मी 7 “रेप्नी, गो येशू योमुङा खापुमिम बु। उहेम मु़चु़का ओराम खाजेमडा रेम्बेम्मा ल्वा होम्साका बु़, मेराम मु़चु़ आलाकाम सो़।” 8 ओर्मिम ल्वा ल्वापा नुङ थो़पा गो यूहन्ना। हाङकोलो ओर्मिम ल्वा ल्वाउतो, थो़उतो ओर्मिम ल्वा गोलाई रेम्बेट्पा पाह्रीचो़कु खेलयु़ सेव सान्मु कुम्सिङडो। 9 लावो गुका गोलाई आरे बेङ्डी, “आरे ने मेबे! गो ने गाना, माम्चु़नीलाम जेपा इमा वा-ल्वाकमिम नुङ ओराम खाजेमडाम सिजेममिम होम्साका दोपामिम होप्माम माम्चु़नीकु डु़ल्चो़ कोङङा सो़। माम्चु़नीलाई सेव साडा।” 10 मेम्मा गुका आरे बेङ्डी, “ओराम खाजेमडा बाट्पा माम्चु़नीलाम जेम्मा सिजेममिमडला छाप मेओप्डा, हेङालोने थारी रोक्फाड्डाम बु। 11 उहेम मु़चु़का मेजो़पा खारी बु़, मेरामका मेजो़पा खारीङा बु़नु़म बुनु़, उहेम मु़चु़का घ्राम्लु़पा खारी बु़, मेरामका घ्राम्लु़पा खारीङा बु़नु़म बुनु़, उहेम मु़चु़का जो़पा खारी बु़, मेरामका जो़पा खारीङा बु़नु़म बुनु़ मा उहेम मु़चु़का उ त्वाप माम्चु़नीलाई ग्वाकु़, गु मेम्साकाङा लाम्दिनु़म बुनु़।” 12 “रेप्नी, गो येशू योमुङा खापुमिम बु। पुरस्कार आमाडा बु मा मु़चु़का बु़डु़म खारी होङङा गो ग्वाक्पु। 13 अल्फा नुङ ओमेगा, ङादोम नुङ चङनोम, चो़म्पा नुङ हुक्पा गोङा। 14 “त्वाकु ब्लाङमा सो़ल्पा मु़चु़मिम आलाकाम सो़। त्वारो़म ग्वाक्पा धक्साकु मा पोमु मुलु़ मेर्मिमका ल्वामी मा शहर गोनो हुमु ल्वामी। 15 मे शहरकु पाखानो ने ख्लेबामिम, मुनाङका थो़पा सो़र्मुनुङमामिम, मु़चु़ सेट्पामिम, ङाटा सेव साट्पामिम, नुङ लिमा थेन्मु द्वाक्पामिम मा मेमङा बेपाम बाट्पामिम दु़म्मी। 16 “गो, येशूका, मण्डलीमिमकाम लागि ओराम ल्वा सो़मु आमा पाह्रीचो़ इमाडा थु़र्तोम बु। दाऊदकु फ्रु़प नुङ चो़-चु़सु़, नुङ नेमछेमुकु झ्वाक्पा सोरलुङ गोङा सो़।” 17 माम्चु़नी पेल नुङ लारेमाका आरे र्वामी, “योक्नी।” मेम्मा उहेमका थो़सु़ मेरामका “योक्नी” र्वानु़। सु़ कोरा सिपा बु, मेराम रोनु़, मा सु़का न बु़, त्वारो़म ग्वाक्पा कु मेरामका मेडेङा डुङ्नु़। 18 ओराम खाजेमडा बाट्पा माम्चु़नीलाम जेम्मा सिजेममिम थो़पा खोत्ले मु़चु़लाई गो ङिमसाट्पुमी: कोङनिम मु़चु़का मेर्मिम सिजेमडला कोङनिम ल्वा काप्डु़ माला ओराम खाजेमडा र्वाक्मा मु़चु़ सेट्पा दु़खा थारीमिम माम्चु़नीका मेराम मु़चु़डला काम्सामी। 19 मेम्मा कोङनिम मु़चु़का माम्चु़नीलाम जेम्मा ओराम खाजेमगोडाम कोङनिम सिजेम क्रिप्डु़ माला ओराम खाजेमडा र्वाक्मा त्वारो़म ग्वाक्पा धक्सा नुङ सेपा शहर गोडा गुका ल्वापा उमा दो़दो़वा माम्चु़नीका रोन्मी। 20 ओर्मिम ल्वामिम र्वाक्पाका आरे र्वामी, “आच्छाङा, गो योमुङा खापुमिम बु।” आमेन, ङाचो़ येशू योक्नीका। 21 ङाचो़ येशूकु दिदाम माम्चु़नीकु मु़चु़मिमनुङ दु़म्नु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.