रेम्बेट्मिडिम ल्वा 20 - थुलुङ राईको धु़म सङ थ 1 मेकोतिमा कोले पाह्रीचो़ पाह्रीलामका योक्ताम ल्वाउतो। उ फार मेडार्सिमिम पोलु़मकु चाबी गुनुङ बाइडा मा उ ल्वाड्डा डोक्पु सेलरिवा जेथाड्डु़। 2 गुका मे डोमिफु चु़म्डु़मा को धु़म सङ थसम्म बड्डु़। डोमिफु ने माकेम ब्लो लोवो मुनाङपेलकु हप लोवो शैतान सो़। 3 को धु़म सङ थ मेहुक्थु़मसम्म मे डोमिफुका मु़चु़मिमलाई ताङताहेरथो़ मेलनु़मी र्वाक्साका मे पाह्रीचो़का मेरामलाई उ फार मेडार्सिमिम पोलु़म गोयु़ छाघ्रोक्तु़मा चक्तु़ मा मेरामडला छाप ओप्डु़। को धु़म सङ थ हुमा मेरामलाई घरिकोङकाम लागि डिडु़। 4 मेम्मा निया बोमु साखाम ग्वाक्मा मु़चु़मिम साखाम थो़पा गन्खोपमिमडा गन्तासिट्पा गो ल्वाउतोमी। मेम्मा येशूका थेसिथेन्बेट्मिडिम सीसि नुङ माम्चु़नीकु सिजेम जेम्डिमका उनी बुइ क्रिप्साका सेट्मिडिम मेर्मिमकु पेल वो गो ल्वाउतो। मेर्मिमका मे हादीबारा ना उ ङाटा हाम वो सेव साट्मिडिम मेबायावा, मा उनी कुप्पीडा ना ल्वाड्डा मेरामकु छाप मेरमिवाम बाइडा। मेर्मिम नु़मबम्डी मा ख्रीष्टनुङ को धु़म सङ थ साखाम थो़ट्मिडी। 5 सिपा वाङमिम ने को धु़म सङ थ मेहुक्थु़मसम्म सिमुलाम मेबक्मिवा। ओराम ङादोम सिमुलाम बक्सी सो़। 6 सिमुलाम ङादोम बग्गेसीडा बक्पामिम आलाकाम नुङ सेपामिम सो़। ननोम सिमुलामकाम हाम वो यु़म मेर्मिमडला मेदु़म, लावो मेर्मिम माम्चु़नी नुङ ख्रीष्टकु डु़म्लाचो़ दु़म्मी मा मेर्मिमका ख्रीष्टनुङ को धु़म सङ थ साखाम थो़मी। शैतान पुयु़लुस्ताम 7 को धु़म सङ थ हु मा बड्डु़म शैतान पाह्रीचो़का डिडु़, 8 मा मे शैतानका गोग नुङ मागोग र्वाक्मा सुबुडाम खोत्ले नेब्दीडाम मु़चु़मिमलाई ताङताहेरथो़ लमी मा क्वाल्बा बोमु लागि मेर्मिमलाई खोप्मी। मेर्मिम ने दिरिदिनकु सो़पडाम सेक्रे कोतिङा ङार्मु मेझापा दु़म्मी। 9 सुबुडाम खोत्लेथो़ मेर्मिम फोन्सिम्डी मा माम्चु़नीकु मु़चु़मिमकु बाखोप नुङ गुमीका द्वामिमिम शहर उर्मिडी। लावो पाह्रीलामका मु योक्ता मा मेर्मिमलाई बुक्तु़रु़ ख्याक्तु़। 10 मेम्मा मु़चु़मिमलाई ताङताहेरथो़ लक्पा शैतान गन्धक वाक्तोङा बेपा मुकु भुल्मु गोनो कोङनिमका छाघ्रोक्तु़, मेगोनो मे हादीबारा नुङ माम्चु़नीलाम जेपा लिसिक्पा वो घ्रोक्मा बाच्ची। मेर्मिमका नेम्फु सिन्था हेल्लो लोवो उनी थो़मबोक बिपा दु़खा ल्वामिमिम बुमी। हुम-दडाम इन्साफ 11 मेम्मा कोले डोक्पु साखाम थो़पा बुबुयाम गन्खोप नुङ मेडला गन्तासिट्पालाई गो ल्वाउतो। उनी ङादोलामका सुबु नुङ धामु स्वाच्ची मा मेर्चिपकाम लागि बान्थो़ वो खोम मेबायावा। 12 मेकोतिमा याक्के नुङ डोक्पु सिपामिम मे साखाम थो़पा गन्खोप ङादोडा येम्तासिट्पा ल्वाउतो मा पाह्रीचो़का खाजेममिम होर्रु़। कोङमी खाजेम वो होर्रु़, मेराम त्वारो़मकु खाजेम सो़। मे सिपामिमकाम निया ने मेर्मिमका हाम बेम्डिम र्वाक्साका खाजेममिमडा र्याक्मा होम्साका दु़स्ता। 13 दिरिदिनका मेसिन्डा सिपामिमलाई ख्लोक्सोकु़। सिमु नुङ खादीका वो मेर्चिपकाडा बाट्पा सिपामिमलाई ख्लोक्सोक्तु़मी। मेम्मा मेर्मिमका हाम बेम्डिम मेराम होम्साका मेर्मिमकु निया दु़स्ता। 14 मेम्मा सिमु नुङ खादी मुकु भुल्मु गोडा छाघ्रोसिक्ची। मे मुकु भुल्मु ननोम सिमु सो़। 15 उहेमकु नङ त्वारो़मकु खाजेमडा र्याक्मा मेबायावा, मेराम मु़चु़लाई कोङनिमका मुकु भुल्मु गोनो छाघ्रोक्तु़। |
© Wycliffe Bible Translators, Inc. All rights reserved.
Wycliffe Bible Translators, Inc.