रेम्बेट्मिडिम ल्वा 2 - थुलुङ राईएफिससडाम मण्डलीलाई सेलाखाजेम 1 “एफिसस मण्डलीडाम पाह्रीचो़लाई ओराम ल्वा र्याका: येतले सोरलुङमिम उनीमा जो़प ल्वालाम जेथाक्पा मा सो़नाकाम येतले धिप्री चाखोपमिमकु थेतेगोलाम लाम्दिपाका आरे र्वामी। 2 इमा खारीमिम, आमा लागि बेत्तोङा बोनामिम ब्राम्दु़ल्वा मा मेर्वाक्साका थो़मतेर्सी इम्थानामिम गो चक्पु। रु़चो़ मु़चु़मिमकु लिमा सीसि गाना इम्मु मेचाम्ना। येशूकु थु़र्मा मु़चु़ र्वाक्पामिमलाई गाना छाम्मु डु़म्नामी, मेर्मिम आच्छाङा मेएँ मा मेर्मिम लिमाचो़ र्वाक्पा ल्वान्ना, मेराम गो चक्पु। 3 गानी गोडला थो़र बेन्निमका हाम वो मेर्वाक्साकाङा दु़खामिम इम्तोङा लेनी। मेम्मा थो़र बोमु डिट्निम मिबु। 4 लावो इमा दुथाम गो मेद्वाक्पुमिम ओराम ल्वा बु: गाना ङादोम होम्साका गोलाई रिखाम बोमु डिट्नाम बु। 5 मेम्मिमका गाना बालामका धाली आल्सिट्नाम बु मेराम मिम्डा, मा माम्चु़नीथो़ ख्लोसा, मा ङादो बेन्नाम होङङा बे। गाना मेमका मेख्लोन्सिट्नावा माला गो इमाडा रोङुमा इमा धिप्री चाखोपलाई उ खोमलामका होनोवा बेउ। 6 लावो गो द्वाक्पुमिम ओराम ल्वा ने गानानुङ बु: निकोलाइटसमिमकु बेसीमिम गाना मेद्वाना। गो वो मेराम ने मेद्वाक्पु। 7 उहेमकाम नोफ्ला बु, माम्चु़नी-पेलका मण्डलीलाई हाम र्वामी, मेरामका थो़सु़नु़। उहेम मु़चु़ मेजो़पा डला घ्ल्वा, मेरामलाई पाह्रीलाम माम्चु़नी बाखोपला बर्पा नु़बेट्पा धक्साकु मा पोमु साखाम ग्वाक्पु। स्मुर्नाडाम मण्डलीलाई सेलाखाजेम 8 “स्मुर्ना मण्डलीडाम पाह्रीचो़लाई ओराम ल्वा र्याका: चो़म-द नुङ हुम-द, सिपामा बग्गेट्पा गुमीका आरे र्वामी। 9 गो इमा थो़मतेर्सिड्डाम चक्पु, गानानुङ हाम वो मिबुमिम वो चक्पु, लावो पाह्रीला ने गाना खोत्लेका लिट्पा बुना। इमा दुथाम मेजो़पा जेपा मेर्मिम मु़चु़लाई गो छेपुमी। मेर्मिमका उनी त्वाप ने माम्चु़नीकु मु़चु़ यहूदी र्वामी, मेर्मिम यहूदी मेएँ लावो मेर्मिम ने शैतानकु घ्रो़म्दीनेम सो़। 10 गाना ल्वामु खाम्नामिम दु़खाडाम मेङिसा। थो़सा, शैतानका गानीगोडाम कोङनिमलाई मेरामका आच्छाङा थो़र बु़ डे मेएँ र्वाक्साका छाम्मु चखोप गोडा चमु खाप्सु़मिम बु। मेम्मा को धु़म नेम (१०) सम्म इनीमा थो़मतेर्सी। सिमुङा बासी लोवो थो़रलु़इमिम दु़म्निम बानी, मा गो गानीलाई हेल्लो वो मेसिपा त्वारो़मकु मुकुट ग्वानिनी। 11 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी, मेरामका थो़सु़नु़। उहेम मु़चु़ घ्ल्वा, मेराम आथावो चङडा सिमु मेबासी। पर्गाममडाम मण्डलीलाई सेलाखाजेम 12 “पर्गामम मण्डलीडाम पाह्रीचो़लाई ओराम ल्वा र्याका: हन्पा निफिलाम फल्खोपनुङ कातु़रु़ बिम्सिट्पाका ओराम ल्वा र्वामी। 13 गानी बान्ते बुनी गो चक्पु, शैतानका साखाम थो़डु़मिम खोमडा गानी बुनी। मेम्मा वो गानी गोडला थो़रलु़इमिम बुनी। एन्टिपासडला हाम दु़स्ता र्वाक्पा वो गो चक्पु। गु आमा दुथाममिम ल्वा मु़चु़मिमलाई थो़बेन्मुडा थो़रलु़इमिम बाइडा। शैतानकु मेराम शहरडा गुलाई सेट्मिडी लोवो गोडला बेन्निम इनीमा थो़रलामका गानी मेख्लोन्सिट्निवा। 14 मेम्मा वो इनीमा दुथाम गो मेद्वाक्पुमिम ल्वा किचो़ बु: गानीगोडा बालामकु सीसि होङङा बेपा मु़चु़मिम बुमी। मे बालामका इस्राएलीमिमलाई छु़ल बेबेन्मु लागि ङाटाडला सासेट्मा पोमु-डुमु मेर्मिमलाई पेबेन्मु नुङ नाम्सु़रु़ बेबेन्मु बालाकलाई सीड्डु़म बाइडा। 15 मेम्साकाङा निकोलाइटसमिमकु सीसि होम्साका बेपा गानीगोडा याङ बुमी। 16 मेम्मिमका माम्चु़नीथो़ ख्लोन्सिट्नी। मेएँ माला ने गो इमाडा दालाङा रोङु मा आमा सिलामका लुक्पा कातु़रु़का मे निकोलाइटसमिमकु कोर्थो़लाम बङुमा क्वाल्बा बेउ। 17 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी, मेरामका थो़सु़नु़। उहेमका मेजो़पाडला घ्ल्वा, मेरामलाई थक्मा मन्न ग्वाक्पु। मेम्मा लाले नङ र्याक्मा बुबुम लुङ गो मेराम मु़चु़लाई ग्वाक्पु। मेराम लुङ डार्पाडाम वाङमिम सु़का वो मे नङकु दुथाम मेच। थिआटीराडाम मण्डलीलाई सेलाखाजेम 18 “थिआटीरा मण्डलीडाम पाह्रीचो़लाई ओराम ल्वा र्याका: माम्चु़नीकु तारापाचो़, उनीमा मिक्सी मुकु भुल्मु होप्माम मा उनीमा फेमखेल वाबेट्मा बुलुकाम होप्माम बाट्पाका ओराम ल्वा र्वामी। 19 इमा खारीमिम, इमा रिखाम नुङ थो़र, इमा ङोप्सो़मिमलाई ख्लो़नामिमिम नुङ मेचाप्तो इम्थानामिम गो चक्पु। मेम्मा गाना ङादो थो़र लु़न्नालो बेन्नामडाम वो हापा ओम्लो बोनामिम बु। 20 मेमङा लोवो, इमा दुथाम गो मेद्वाक्पुमिम ओराम ल्वा बु: इजेबेल मेसेम, उहेमका गु उ त्वापलाई माम्चु़नीलाम-जेपानिम र्वा, गुलाई गानी उमा लिमा सीसि सीमु ग्वानी। गुका आमा डु़ल्चो़मिमलाई नाम्सु़रु़ बेबेसाका नुङ ङाटाडला सासेट्मा पोमु-डुमु पेबेसाका ताङताहेरथो़ ल। 21 गो गुलाई माम्चु़नीथो़ ख्लोम्सिमु जो़पा थारी ग्वाक्तो, लावो गुका वाङमिम वोस्चो़नुङ अम्मु डिन्मु न मेबु़वा। 22 मेम्मिमका मेराम मेसेमलाई गो छो़म नो़बेट्पु मा गु उ प्लानडाम बमु मेचाप्सु़। मेम्मा गुनुङ अम्पा मु़चु़मिमका गुनुङ अम्मु मेडिरु़ माला मेर्मिमलाई छो़म उनी थो़म्बोक ख्वाक्पा दु़खा ग्वाक्पुमी। 23 मेराम मेसेमकु चङचङ लाम्दिपामिमलाई गो सेट्पुमी। मेम्मा खोत्ले मु़चु़मिमकु न-गोडाम ल्वा चक्पा गोङा सो़ र्वाक्साका खोत्ले मण्डलीका ओराम ल्वा चमी। मेम्मा इनीमा बासी-दोसीलाम हाम ल्वामु घ्रेट्पा बुनी मेराम होम्साका गो गानी खोत्लेलाई ग्वानिनी। 24 उहेमका मेराम मेसेमकु मेजो़पा सीसिडा मेलाम्सिट्निवाम मा शैतानलाममिम थक्साका जु़ल्मा सीसि मेसीन्सिट्निवाम गानी थिआटीरा मण्डलीडा बाट्पा याङ मु़चु़मिमलाई गो र्वाङु, गानी वाङमिम खारी बोमु बासी र्वाक्साका मेकाम्सानिनी। 25 मेम लोवो गानीनुङ बाट्पा आच्छाङाकाम सीसि गो मेरोक्थु़मसम्म जेन्थाट्नी। 26 मेजो़पाडला सु़ घ्ल्वा, मा गो बेबेत्तोम खारी उ हुक्पाथारीसम्म थो़रलु़इमिम दु़म्साका बु़होम बु, मेराम मु़चु़लाई हापा दोचो़डाम मु़चु़मिमडला साखाम थो़मु ग्वाक्पु। 27 आमा पापका गोलाई साखाम ग्वाङडिमिम होङङा ‘सेलकु डु़लु़म्चो़का क्वाकु सोजाम फ्रु़प्सेसी बु़मिम होङका मेराम मु़चु़का मेर्मिम मु़चु़डला साखाम थो़डु़।’ 28 मेराम मु़चु़लाई गो नेमसोसोका धो़पा सोरलुङ ग्वाक्पु। 29 उहेमकाम नोफ्ला बु, माम्चु़नी-पेलका मण्डलीमिमलाई हाम र्वामी, मेरामका थो़सु़नु़। |
© Wycliffe Bible Translators, Inc. All rights reserved.
Wycliffe Bible Translators, Inc.