रेम्बेट्मिडिम ल्वा 19 - थुलुङ राईहल्लेलूयाह! 1 आकोतिमा पाह्रीला हापा सेर्पामिमका येपा होप्माम लो़लाम थो़उतो, मेर्मिमका आरे र्वाम्डी: “हल्लेलूयाह! गुइलाई सेल्पा माम्चु़नी, गुमी खोत्लेकु डला बुमी, मा गुमी यु़मनुङमा बुमी, 2 हेङालोने उनीमा निया आच्छाङाकाम नुङ जो़पा बु। मे छो़लो़माकु नाम्सु़रु़ बेसीका सु़म्दिसेरडाम मु़चु़मिमलाई छो़म मेजो़पा बेबेट्पा मेरामलाई माम्चु़नीका देन्दे ग्वाम्डिम बु। गुमीका उनीमा डु़ल्चो़मिमकु सिसिकाम फुलु़ सो़म्डिम बु।” 3 मेम्मा मेर्मिमका आथावो आरे र्वाक्साका येम्डी: “हल्लेलूयाह! मे डोक्पु शहर ख्याक्पालामका हेल्लो लोवो कुइकु गेले लहोम बु।” 4 मेम्मा मे न-ब्लले ङाउ-डु़म्लाचो़मिम नुङ ब्लले सामनुङमामिम खुम्बु बेम्डिमा साखाम थो़पा गन्खोपडा गन्पा माम्चु़नीलाई आरे र्वाक्तो सेव साट्मिडी: “आमेन, हल्लेलूयाह!” 5 मेकोतिमा साखाम थो़पा गन्खोपलामका कोले लो़लामका आरे र्वाक्ताम बाइडा: “इकीमा माम्चु़नीकु नङ कोक्नी, उनीमा खोत्ले डु़ल्चो़नी, उनीमा ङिम जु़ल्पा डोक्पु याक्केनी।” 6 मेम्मा छो़म सेर्पा मु़चु़मिम होङङा येपा, ब्लोकु होङङा येपा नुङ डोक्पु बुलु़लु़ बु़मिम होप्माम लो़लाम गो थो़उतो, मेरामका आरे र्वाक्ताम बाइडा: “हल्लेलूयाह! हेङालोने इकीमा मिप्रङमा खोत्लेडाम यु़मनुङमा माम्चु़नीका साखाम थो़मी। 7 भ्रसिद्वाकी मा गेर्सिडी मा गुमी डोक्पु बुमी र्वाक्साका र्वाकी, हेङालोने भेन्दाचो़का लालीकुन्दा बेपा थारी रोक्फाड्डा, मा उनी लारेमा उ त्वापङा झो़म्सिड्डा। 8 माम्चु़नीका मे लारेमालाई जो़पा, छेको-छेकोम, झ्वाक्पा नो़ला नो़लाम ये-सेम फम्सिमु ग्वाम्डी।” 9 मेम्मा मे पाह्रीचो़का गोनुङ र्वाक्ता, “ओराम ल्वा र्याका: भेन्दाचो़कु लालीकुन्दाडाम ग्रुलाडा येन्सिक्पा मु़चु़मिम आलाकाम सो़!” मेम्मा गुका आथावो र्वाक्ता, “माम्चु़नीकाम आच्छाङाम सिजेममिम ओर्मिमङा सो़।” 10 मेम्मा गो गुलाई सेव सान्मु उ खेलयु़ कुम्सिङडो। लावो गुका गोनुङ र्वाक्ता, “आरे मेबे। गो ने गाना होङङा माम्चु़नीकु खारी बेपा मा येशूका थेसिथेन्बेट्मिडिम आच्छाङाकाम सीसि होङङा लाम्दिपा थो़र लु़पा इमा वा-ल्वाकमिम होप्माम सो़। माम्चु़नीलाई कोङङा सेव साट्नी। हेङालोने येशूका थेसिथेन्बेट्डिम आच्छाङाकाम सिजेमका माम्चु़नीलाम जेपामिमलाई सो़बेट्मिडी।” बुबुयाम घोडाडला हुपा 11 मेम्मा पाह्री ह्वासिट्पा गो ल्वाउतो मा मेसिन्डा आमा ङादोडा कोले बुबुयाम घोडा बाइडा, मे घोडाडला हुपाकु नङ “थो़रलु़इमिम” नुङ “आच्छाङा” बाइडा। गुमीका जो़पा निया नुङ क्वाल्बा बोमी। 12 उनीमा मिक्सी मुकु भुल्मु होप्माम बाइडा मा उनीमा बुइडला सेर्पा मुकुटमिम बाम्डी। गुमीडा कोले नङ र्याक्मा बाइडा, मेराम गुमी उनी त्वापडाम वाङमिम सु़का वो मेच। 13 गुमीका सीसिडा प्लु़म्मा ब्लाङमा फम्तासिम्डी, मा उनीमा नङ “माम्चु़नीकु सिजेम” बाइडा। 14 पाह्रीलाम सेनामिम उनीमा चङचङ लाम्दिम्डी। मेर्मिम घोडामिमडला बाम्डी। मेर्मिमका जो़पा, छेको-छेकोम, झ्वाक्पा नु़या-नु़याम ये-सेम फम्तासिम्डी। 15 उनी सिलाम हन्पा कातु़रु़ मु़चु़मिमलाई चार्मु लु। “गुमीका मेर्मिमलाई हपका मोकु़मिम होप्माम सेलकु डु़लु़म्चो़का साखाम थो़मी।” गुमीका मेर्मिमलाई खोत्लेडलाम यु़मनुङमा माम्चु़नीकु छोक्चो रेम्बेन्मी। मेराम ने अङ्गूर धेम्साका खाल्पा मु़चु़ होङङा गुमीका उनी मिक्सीकु पिमिमलाई देम्मिमिम सो़। 16 उनीमा ब्लाङमाडा नुङ उनीमा फिलाडा ओराम उनीमा नङ र्याक्मा बाइडा: “हपमिमकु हप नुङ ङाचो़मिमकु ङाचो़।” 17 मेकोतिमा कोले पाह्रीचो़ नेम्सुङडा येम्तासिट्पा गो ल्वाउतो। मेरामका हाला-हाला धामुला हुट्पा खोत्ले चक्पुमिमलाई डोक्पु लो़लामका येस्तामा आरे बु़डु़मी, “रोक्नी, माम्चु़नीकु डोक्पु ग्रुलाडा खोम्सिट्नी, 18 मा हपमिमकाम, सिपाहीमिम नुङ मेर्मिमकु डोक्पुमिमकाम, घोडामिम नुङ मेडला हुपामिमकाम रो़मसो़ मा डु़ल्चो़ नुङ मेडु़ल्चो़काम, याक्के नुङ डोक्पु खोत्लेकाम रो़मसो़ पोमु ल्वानी।” 19 मेम्मा मे बुबुयाम घोडाडला हुपा नुङ उनी सेनामिमडला क्वाल्बा बोमु मे हादीबारा नुङ सु़म्दिसेरडाम हपमिम मा मेर्मिमकु सेनामिम कोदेप खोम्सिम्डिम गो ल्वाउतो। 20 लावो मसीहका मे हादीबारा नुङ माम्चु़नीलाम जेपा लिसिक्पालाई उनी ल्वाड्डा बेम्डी। मे माम्चु़नीलाम जेपा लिसिक्पाका हेल्लो वो मेल्वाम्मा छेखोपमिम मे हादीबाराकु ङादोडा रेम्बु़डु़म बाइडा। ओर्मिम छेखोपमिमलामकाङा मे हादीबाराकु छाप रपा नुङ उ ङाटा सेव साट्पामिमलाई ताङताहेरथो़ लडु़मिम बाइडा। ओर्चिप निफि उची सामनुङमाङा गन्धक वाक्तोङा बेपा छो़म डोक्पु मुकु भुल्मु गोयु़ गुमीका छाघ्रोम्डिची। 21 मेर्मिमगोडाम याङलाई मे बुबुयाम घोडाडला हुपाकु सिलामका लुक्पा कातु़रु़का सेड्डु़मी। मेम्मा खोत्ले चक्पुमिमका मेर्मिमकु रो़मसो़ खोहोम पेम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.