रेम्बेट्मिडिम ल्वा 18 - थुलुङ राईबेबिलोन झार्स्ताम 1 आकोतिमा कोङमी पाह्रीचो़ पाह्रीलामका योक्तोङा बु़डु़म गो ल्वाउतो। गु छो़म साखामनुङमा बाइडा, मा उ झ्वाक्सीका सुबु छ्याङ-छ्याङया दु़स्ता। 2 गुका साखामनुङमा लो़लामका आरे र्वाक्तामा येस्ता: “झार्स्ता, झार्स्ता, डोक्पु शहर बेबिलोन! मुनाङमिमकु नेम मेराम दु़स्ताम बु, मेसेपा खोत्ले पेलमिम, मेसेपा खोत्ले मुनाङमिमकु बाखोप, घ्रामलु़पा खोत्ले चक्पुकु बाखोप दु़स्ताम बु। 3 हेङालोने खोत्ले सामामिम डु़का सेट्पा होङङा मेरामकु नाम्सु़रु़ बेसीका सेड्डु़मिम बु। सु़म्दिसेरडाम हपमिमका गुनुङ नाम्सु़रु़ बेम्डिम बु, मा मेरामकु छो़म रारी बेपा नका सु़म्दिसेरडाम भ्रेपा-भ्रेट्पामिम खाप्चीचो़ दु़म्मिडिम बु।” 4 मेम्मा पाह्रीलामका आरे र्वाक्पा कोङमी लो़लाम थो़उतो, “आमा मु़चु़नी, मेराम शहरलाम लुक्नी, मेम्साका उमा छु़लडा गानी मेङोल्सिनी, मेम्साका मेरामडला रोक्पा सेट्पा दु़खा गानी मेल्वानी। 5 हेङालोने मेराम शहरडाम छु़लमिम पाह्रीसम्म चोसिड्डाम बु, मा मेरामकु मेजो़पा खारीमिम माम्चु़नीका मिम्मिडिम बु। 6 वाङमिमलाई मेरामका बु़डु़मिम होङङा मेरामलाई बेनी, मेरामका बु़डु़म मेजो़पा खारीकाम लागि नक गुणा हापा देन्दे ग्वाक्नी। मेरामका वाङमिमकाम लागि बनेबु़डु़म डु़-ग्वालडाम नक गुणा हापा डुमु मेझापा डु़-ग्वाल ग्वाक्नी। 7 मेराम शहरका हाङको डोक्पु लिसिड्डा मा एलेङगी बु़डु़ मेकोतिङा दु़खा ग्वाक्नी, मेभ्रसी बेट्नी। मेरामका उमा नडा आरे र्वाक्साका डोक्पु लिसी, ‘गो हपमे होङङा गन्तासिङु, गो अर्दोमे मेएँ, मा गो हेल्लो वो मेख्राम्ङु-मेदुङु।’ 8 मेम्मिमका सेट्पा ओर्मिम दु़खामिम गुडला कोलेमका रोमी: सिमुलाम, येसी-दुक्सी नुङ मा-के हुक्पा दु़खा। मुका गु छो़रो़प दु़म, हेङालोने उमा निया बेपा मिप्रङमा माम्चु़नी यु़मनुङमा बुमी।” 9 मेराम शहरनुङ नाम्सु़रु़ बेपा मा मेरामका होङङा रारी बेपा ननुङमा सुबुडाम हपमिमका मेराम घ्रु़पा कुइकु ल्वामिमा मेराम शहरकाम लागि ख्राम्मी, मा येमी-दुमी। 10 मेराम शहरकु दु़खाका मेर्मिम ङिमिमा होनोवा येम्सिप्मिमा आरे र्वाक्तो येमी: “डोक्पु शहर गाना बेबिलोन, यु़मनुङमा शहर, गाना ने हाउरेमा, हाउरेमा! घरिकोङकाङा गाना पुयु़लुक्पा थारी रोक्ल्याड्डा।” 11 सु़म्दिसेरडाम भ्रेपा-भ्रेट्पामिम वो मेराम शहरकु दुथाम ख्राम्मि मा येमी-दुमी, हेङालोने मेर्मिमकु सामान सु़का वो हाम्सी वो मेभ्रेमी। 12 मेर्मिमका रेट्मिडिम सो़ना, मतो, सोरलुङ नुङ दिरिल्यमिम, जो़पा खाबाकु ये-सेम, बैजनी रङकाम ये-सेम, रेशमकाम ये-सेम नुङ झ्वाक्पा लालाम ये-सेम, भ्रपा नेम्पा सङकाम खोत्ले खालकाम सामान नुङ हात्तीकु लिकाम खोत्ले खालकाम सोजाममिम, हापा थिकाम सङ, बुलु, सेल नुङ जो़पा लुङ सु़का वो मेभ्रेमी। 13 पाताराङगी, मसला, धूप, मूर्र, हापा थिकाम धूप, अङ्गूरकु बिलाम, जैतूनकु तेल, जो़पा फुल, जेप्सेर, पितु-मु़सु़मिम, भेन्दामिम, घोडामिम, रथमिम, डु़ल्चो़ दु़म्मु भ्रेन्मिमिम मु़चु़मिम वो सु़का वो मेभ्रेमी। 14 मे भ्रेपा-भ्रेट्पामिमका मेराम शहरलाई र्वामी, “गाना छो़म न बेन्नाम दाम्स्ताम बु। भ्रपा खोत्ले इ पोमु-डुमु नुङ इ जो़प्सी दाम्स्ता, गाना मेर्मिम हेल्लो वो मेल्वाना।” 15 ओर्मिम सामान भ्रेट्पामिमका मेराम शहरलामका खाप्ची डु़प्मिडिम बाइडा, मेर्मिमका उ दु़खा ल्वासाका ङिमिमा होनोवा येम्सिमी मा आरे र्वाक्तो मेर्मिम ख्राम्मी मा येमी-दुमी: 16 “डोक्पु शहर गाना हाउरेमा, हाउरेमा! जो़पा सुतीकु ये-सेम, बैजनी रङकु ये-सेम नुङ झ्वाक्पा लालाम ये-सेम फसिक्पा मा सो़ना, सोरलुङ नुङ दिरिल्यमिमका ब्ल्वासिक्पा। 17 आकोम डोक्पु खाप्ची घरिकोङकाङा छो़रो़प दु़स्ता।” खोत्ले जहाजकु कप्तान, जहाजलाम लाम्दिपा खोत्ले, जहाज थो़पामिम नुङ जहाजडा खारी बेसाका डु़ल्सिक्पामिम होनोवा येम्सिमी। 18 मे शहर घ्रु़पालाम लुक्पा कुइकु मेर्मिमका ल्वामी मा आरे र्वाक्तो येमी, “ओराम डोक्पु शहर होप्माम वाङमिम बाम शहर बाइडा?” 19 मेम्मा मेर्मिमका उनी बुइडला फुर्कु फिमी मा आरे र्वाक्तो ख्राम्मी मा येमी-दुमी, “गाना डोक्पु शहर, हाउरेमा, हाउरेमा! दिरिदिनडा लाम्दिपा जहाजडा बाट्पा खोत्ले मु़चु़मिम ओरामलामका खाप्चीचो़ दु़म्मिडी। घरिकोङकाङा ओराम छो़रो़प दु़स्ता। 20 ए पाह्रीला बाट्पानी, ओरामकाम रसो़म हाट्नी! माम्चु़नीकु मु़चु़नी, थु़र्मानी, माम्चु़नीलाम जेपानी रसो़म हाट्नी। गुका गानीलाई हाम बेन्नी मेम्साकाङा माम्चु़नीका गुलाई देन्दे ग्वाम्डिम बु।” 21 मेकोतिमा यु़मनुङमा कोले पाह्रीचो़का कोले डोक्पु खुरुक होङङा बेपा कोले लुङ कोस्तु़मा दिरिदिनगोयु़ घ्रोक्तु़मा र्वाक्ता: “मे डोक्पु शहर बेबिलोन आरेसाकाङा छो़म सातिका घ्रोसी मा मेराम हेल्लो वो मेडार्सी। 22 कामसोर डु़पामिम नुङ काम्सो बेपामिम, लिउसाम डु़पामिम नुङ भुम डु़पामिमकु लो़लाम हेल्लो वो इमाडा मेथो़सीमिम दु़म। थेट्पा खारीचो़मिम इमा हेल्लो वो मेडार्सिक्पा दु़म। खुरुककु लो़लाम इमाडा मेथो़सीमिम दु़म। 23 धिप्रीकु ओल इमाडा हेल्लो वो मेझ्वा। लारेमा नुङ लारेपाकु लो़लाम इमाडा हेल्लो वो मेथो़सीमिम दु़म। इमा सामान भ्रेपा-भ्रेट्पामिम सु़म्दिसेरडा खोत्लेडाम डोक्पु मु़चु़मिम बाम्डी। इमा जादुका खोत्ले सामामिम ताङताहेरथो़ लम्डिम बु। 24 माम्चु़नीलाम जेपामिम सेट्मिडिम, माम्चु़नीकु मु़चु़मिम सेट्मिडिम नुङ सु़म्दिसेरडा सेट्मिडिम खोत्ले मु़चु़मिमकु दुथाममिम मेजो़पा ल्वा ओरामकु बुइडला उट्मा बाइडा।” |
© Wycliffe Bible Translators, Inc. All rights reserved.
Wycliffe Bible Translators, Inc.