रेम्बेट्मिडिम ल्वा 17 - थुलुङ राईनङ धोपा छो़लो़मा मेसेम नुङ हादीबारा 1 येतले कान्चु़रे अपा पाह्रीचो़मिमगोडाम कोले आमाडा योक्तामा र्वाक्ता, “बिका, हापा ब्लोकुमिम फार्डा गन्तासिट्पा नङ धोपा छो़लो़मा मेसेमडला रोमुखापा देन्दे गो रेम्बेनी। 2 सु़म्दिसेरडाम हपमिम मेराम मेसेमनुङ अम्मिडिम बु मा सुबुडाम मु़चु़मिम डु़का सेट्पा होङङा मेरामकु नाम्सु़रु़ बेसीका सेड्डु़मिम बु।” 3 मेकोतिमा माम्चु़नी-पेलका गो लु़न्सिल्याङ्डो, मा पाह्रीचो़का गोलाई कोङ र्याङगो-र्याङगोडा लङ्डी। मेसिन्डा गो कोङ झ्वाक्पा लालाम हादीबाराडला गन्तासिड्डाम कोले मेसेम ल्वाउतो। मेराम हादीबारा माम्चु़नीकु नङ डक्पा नङमिमनुङमा मा येतले बुइ नुङ को धु़म रङमिमनुङमा बाइडा। 4 मे मेसेमका बैजनी रङकाम नुङ झ्वाक्पा लालाम ये फतासिड्डा, मा सो़ना, सोरलुङ नुङ दिरिल्यमिमका झ्वाक्पा बाइडा। मेराम मेसेमका उ नाम्सु़रु़ बेसीकु घ्राम्लु़पा नुङ मेजो़पा ल्वामिमका देम्पा सो़नाकु कान्चु़रे जेथाड्डु़। 5 मेराम मेसेमकु कुप्पीडा ओराम नङ र्याक्मा बाइडा, मा ओराम नङकु दुथाम थेसिथेन्मु मेझापा बाइडा: “सुबुडाम छो़लो़मामिमकाम नुङ घ्राम्लु़पा खारी बेपामिमकु माम डोक्पु बेबिलोन।” 6 मे मेसेम माम्चु़नीकु मु़चु़मिमकु सिसि नुङ येशूडा थो़र बेम्डिमका सेट्मिडिम मु़चु़मिमकु सिसिका सेड्डु़म गो ल्वाउतो। मेराम मेसेमलाई ल्वाउतोमा गो छो़म ङाङाया दु़म्ङोडो। 7 मेम्मा पाह्रीचो़का गोलाई आरे बेङ्डी, “गाना हेङा ङाङाया दु़म्नामिम? मे मेसेम नुङ गु हुपा येतले बुइमिम नुङ को धु़म रङमिमनुङमा मे हादीबाराकु दुथाम थक्मा ल्वा गो गानानुङ सो़उ। 8 गाना ल्वान्नाम मे हादीबारा कोबिलि सामनुङमा बाइडा, लावो ओम्लो ने मिबु मा दिफु गु छु़ट मान्थिम घ्लु़म्पा पोलु़मलाम लुगे, मा उमा लागि र्वाक्मा होङङा पुयु़ ल। मेम्मा सुबुडाम मु़चु़मिम उहेममिमकु नङ सु़म्दिसेर प्रङ्सिमु ङादोङा त्वारो़मकु खाजेमडा र्यास्ताम मिबु मेर्मिमका मे हादीबारा ल्वामिमा ङाङाया दु़म्मी, हेङालोने मेराम कोबिलि बाइडा, ओम्लो ने मिबु मा दिफु रो। 9 “नेप्चीनुङमा दु़म्साका थेसिथेन्मु बासी। येतले बुइमिम ने मे मेसेम गन्तासिट्पा येतले पोप्चङमिम। 10 मेर्मिम ने येतले हपमिम वो सो़। मेरामडा ङोले हपमिम ने सिम्ल्याम्डिम बाइडा, कोले बु, मा कोङमी आथावो रोक्ताम मिबु, लावो गु रो लोवो किचो़ कोङङा गु बुमु बासी। 11 कोबिलि बाट्पा मा ओम्लो मिबुमिम मे हादीबारा लेतनोम हप दु़म सो़, लावो मेराम येतलेमिमगोडाम कोले वो सो़, मा गु पुयु़लुमु खाप्सु़। 12 “गाना ल्वान्नामिम मे को धु़म रङमिम ने को धु़म हपमिम सो़, मेर्मिमका आथावो साखाम थो़मु चो़म्मिडिम मिबु। लावो मेर्मिमका कति धु़पा थारीकाम लागि मे हादीबारानुङमा साखाम थो़पा यु़म ल्वामी। 13 मेर्मिम कोले नकाम बुमी मा मेर्मिमका उनी यु़म नुङ साखाम मे हादीबारालाई ग्वामी। 14 मेर्मिमका भेन्दाचो़डला क्वाल्बा बोमी, लावो भेन्दाचो़ मेर्मिमडला घ्ल्वामी, हेङालोने खोत्ले ङाचो़गोडाम गुमीङा डोक्पु ङाचो़ मा खोत्ले हपमिमगोडाम गुमीङा डोक्पु हप। मेम्मा भेन्दाचो़नुङ बाट्पा ने मेर्मिम सो़, उहेममिमलाई माम्चु़नीका येट्मिडिम, थुट्मिडिम मा गुमीडा थो़रलु़इमिम सो़।” 15 मेम्मा मे पाह्रीचो़का गोलाई र्वाक्ता, “मे छो़लो़मा गन्तासिट्पा गाना ल्वान्नाम मे ब्लोकुमिम ने मु़चु़मिम, सामामिम, नेब्दीमिम मा ल्वा जेपामिम सो़। 16 गाना ल्वान्नाम मे को धु़म रङमिम नुङ हादीबाराका मे छो़लो़मालाई मेद्वामी। मेर्मिमका मेराम मेसेमकु खाप्चीमिम लम्सामी मा खालिन्ते बनेबोमी, मेर्मिमका मेरामकु सो़ पोमी, मा मुड्डा चाम्सोप्मी। 17 हेङालोने माम्चु़नीकु सिजेम होम्साका मेरोक्थिथु़मसम्म मेर्मिम कोले नकाम दु़म्साका साखाम थो़पा उनी यु़म मे हादीबारालाई ग्वाक्साका माम्चु़नीकु न होङङा बोम्सोमु गुमीका मेर्मिमकु नडा ओराम ल्वा फिम्साम्डी। 18 गाना ल्वान्नाम मे मेसेम ने सुबुडाम हपमिमडला साखाम थो़पा डोक्पु शहर सो़।” |
© Wycliffe Bible Translators, Inc. All rights reserved.
Wycliffe Bible Translators, Inc.