रेम्बेट्मिडिम ल्वा 16 - थुलुङ राईमाम्चु़नीकु छोक्चोकु येतले कान्चु़रेमिम 1 मेकोतिमा सो़रनेमलाममिम कोङ डोक्पु लो़लामका येतले पाह्रीचो़मिमलाई आरे बु़डु़मिम गो थो़उतो, “लक्नी, मा माम्चु़नीकु छोक्चोकु येतले कान्चु़रेमिम सुबुडला अनी।” 2 कोनोम पाह्रीचो़ लस्ता मा बायडला उ कान्चु़रे अयु़डु़, मा मे हादीबाराकु छाप बाट्पा नुङ मेरामकु ङाटा सेव साट्पा मु़चु़मिमडला घ्राम्लु़पा मा छो़म नो़पा पारमिम जो़स्ता। 3 मेकोतिमा ननोम पाह्रीचो़का दिरिदिनडा उ कान्चु़रे अयु़डु़, मा मेराम कु सिपा मु़चु़कु सिसि होप्माम दु़स्ता। मेम्मा दिरिदिनडा बाट्पा खोत्ले सामनुङमामिम सिम्डी। 4 सुनोम पाह्रीचो़का ब्लोकुमिमडा नुङ कु पुन्खोपबाडे उ कान्चु़रे अयु़डु़, मा मेर्मिम खोत्ले सिसि दु़स्ता। 5 मेम्मा कु रेपा खारी ल्वापा पाह्रीचो़का आरे र्वाक्ताम गो थो़उतो, “गानी सेपा माम्चु़नी, गानी ओम्लो वो बुनी, ङादो वो बान्नी, गानी जो़पा निया बेन्नी, 6 हेङालोने मेर्मिमका इनीमा मु़चु़मिम नुङ गानीलाम जेपामिमकु सिसि हाट्मिडिम बु, मा गानी मेर्मिमलाई सिसि डुमु ग्वाक्निमी बु। मेम बोमुका घ्रेट्पा मेर्मिम सो़।” 7 मेम्मा सासेन्खोपलाममिम लो़लामका आरे र्वाक्ताम गो थो़उतो: “मेमङा सो़, मिप्रङमा माम्चु़नी खोत्लेडलाम यु़मनुङमा, इनीमा निया आच्छाङाकाम नुङ जो़पा बु।” 8 मेम्मा ब्लनोम पाह्रीचो़का नेम्सुङडला उ कान्चु़रे अयु़डु़ मा मु़चु़मिमलाई मुका घ्रु़बेट्पा साखाम नेम्सुङका ल्वास्तु़। 9 छो़म चापा नेम्सुङका मेर्मिम घ्रु़म्डी मा मेर्मिम दु़खामिम त्वाकु ल्वाडा बेपा माम्चु़नीकु नङलाई मेर्मिमका वाइतो बेट्मिडी। मेर्मिम उनी छु़ललाम ख्लोम्सिमु नुङ माम्चु़नी डोक्पु बुमी र्वामु मेबिम्सिप्मिवा। 10 मेम्मा ङोनोम पाह्रीचो़का मे हादीबाराकु साखाम थो़पा गन्खोपडला उ कान्चु़रे अयु़डु़, मा मेरामकु किब्दी तुकुम्चिम गोनो दु़स्ता। मु़चु़मिमका उनी थो़म्बोकडा दुपा दु़खा ल्वाम्डिमका लेम ख्रेट्मिडिम बाम्डी, 11 मा मेर्मिमका उनी थो़म्बोकडा दुपा दु़खा ल्वाम्डिमका नुङ पार दु़स्तामका पाह्रीलाम माम्चु़नीलाई वाइतो बेट्मिडी। लावो मेर्मिमका बेम्डिम मेजो़पा खारीलाम माम्चु़नीथो़ ख्लोम्सिमु मेबिम्सिप्मिवा। 12 रुनोम पाह्रीचो़का डोक्पु ब्लोकु यूफ्रेटिसडा उ कान्चु़रे अयु़डु़, मा नेम्सुङ ओपालाम बिक्पा हपमिमकाम लाम्दी झो़म्सिबेन्मु मेसिन्डाम कु साड्डा। 13 मेम्मा बोरोमिम होङङा बेपा सुले मुनाङपेलमिम गो ल्वाउतो, मेर्मिम मे डोमिफुकु सिलामका, हादीबाराकु सिलामका मा माम्चु़नीलाम जेपालिसिक्पाकु सिलामका लुम्डिम बाइडा। 14 मेर्मिम ने हेल्लो वो मेल्वाम्मा छेखोपमिम रेम्बेपा मुनाङमिमकु पेल सो़। खोत्ले सु़म्दिसेरडाम हपमिमकाडा मेर्मिम लमी मा खोत्लेडलाम यु़मनुङमा माम्चु़नीका डोक्पु निया बोमिमिम नेम क्वाल्बा बोमु लागि मे हपमिमलाई खोम्मी। 15 “रेप्नी, गानी इनी नड्डा वो मेमिम्निम थारीका खुचु़वा होङका गो रोङु। चङचङया बाट्पा मा ये-सेम त्वापनुङ जु़ल्पा मु़चु़ आलाकाम सो़, मेम्साका गु खालिन्ते मेल, मा मु़चु़मिमका उ क्रो़म मेल्वामी।” 16 मेम्मा मे सुले मुनाङपेलमिमका हपमिमलाई कोले खोमडा खोप्मिडी, मेराम खोम हिब्रू ल्वाडा आर-मागेड्डोन र्वामी। 17 मेम्मा येतनोम पाह्रीचो़का जुडला उ कान्चु़रे अयु़डु़, मा सो़रनेमडाम हप गन्खोपलामका आरे र्वाक्पा कोङ डोक्पु लो़लाम लुक्ता, “लु, हुक्ता।” 18 मेकोतिमा ब्ल्याक्ची ओप्डु़, बुलु़लु़ बु़डु़, गुडुमाक्सी जेस्ता मा ङिमलु़पा सुबु रुड्डु़। सुबुडा मु़चु़ प्रङ्सिम्डिलो आथाम मेप्माम हेल्लो वो ङिमलु़पा सुबु रुड्डु़म मेबायावा। 19 मेकोतिमा मेराम डोक्पु शहर बेबिलोन सु फ्वाक्चो़ल दु़स्तामा बिडा, मा नेब्दीमिमकु शहर स्याकारिस्ता। माम्चु़नीका डोक्पु बेबिलोन मिम्मिडी, मा उनीमा छो़म छोक्चोकु कान्चु़रेडा अङ्गूरकु बिलामका देम्बेट्मिडिमा मेराम शहरलाई थो़ट्मिडी। 20 खोत्ले टापुमिम दाम्मिडी, मा पोप्चङ नुङ भ्र्वामिम वो दाम्मिडी। 21 ङो धु़म, ङो धु़म किलोग्राम कोकोवाम डोक्पुतो लोसु़मिम धामुलामका मु़चु़मिमडला आल्मिडी। लोसु़कु दु़खा ल्वाम्डिमका मेर्मिमका माम्चु़नीलाई वाइतो बेट्मिडी, हेङालोने मेराम दु़खा ने छो़म ङिमलु़पा बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.