रेम्बेट्मिडिम ल्वा 15 - थुलुङ राईयेतले पाह्रीचो़मिम नुङ मु़चु़ सेट्पा येतले दु़खा थारीमिम 1 मेम्मा गो पाह्रीला कोङमी डोक्पु नुङ हेल्लो वो मेल्वाम्मा ओराम छेखोप ल्वाउतो। येतले पाह्रीचो़मिमका येतले दु़खा थारीमिम रेट्मिडिम बाइडा। मेर्मिम ने चक्थो़म दु़खामिम बाइडा, हेङालोने ओर्मिम दु़खामिम हुमिम चङडा माम्चु़नीका छोक्चो बोमु डिन्मी। 2 मुनुङ ङोल्सिक्पा सिसाकु दिरिदिन होप्माम गो ल्वाउतो। हादीबारा नुङ उ ङाटाडला मा उ नङकु सेर्सीडला घ्ल्वापामिम मे दिरिदिनडा येम्तासिट्मिडी। माम्चु़नीका ग्वाम्डिम कामसोरमिम मेर्मिमका जेन्थाम्डी। 3 मेम्मा मेर्मिमका माम्चु़नीकु खारी बेपा मोशाकु काम्सो नुङ भेन्दाचो़कु काम्सो आरे र्वाक्तो बेत्तोङा बेम्डी: “मिप्रङमा माम्चु़नी खोत्लेडलाम यु़मनुङमा, इनीमा खारीमिम डोक्पु नुङ ङाङायाम बुमी। सु़म्दिसेरडाम खोत्ले मु़चु़मिमकु हप, इनीमा खारीमिम जो़पा नुङ आच्छाङाकाम बुमी। 4 मिप्रङमा, सु़का इनीमा ङिम मेजु़लु़ मा सु़का गानी डोक्पु नुङ यु़मनुङमा मेर्वा? हेङालोने गानी कोङङा सेपा दु़म्नी। खोत्ले सामामिम इनीमा ङादोडा रोमिमा सेव सानिमी, हेङालोने इनीमा जो़पा खारीमिम दो़स्ताम बु।” 5 आकोतिमा गो रेप्तो मा पाह्रीलाम माम्चु़नीकु सेपा बाखोपडाम सो़रनेम होर्स्ता। 6 येतले पाह्रीचो़मिमका येतले दु़खामिम जेन्थाम्डिमा मे सो़रनेमलामका पाखा लुम्डी। मेर्मिमका छेको-छेकोम नुङ झ्वाक्पा ये फम्तासिम्डी मा उनी धक्चीधाली सो़नाकु फिता बन्थाम्डी। 7 मेम्मा ब्लले सामनुङमामिमगोडाम कोलेका हेल्लो लोवो बाट्पाम बाट्पा माम्चु़नीकु छोक्चोका देम्पा सो़नाकु येतले कान्चु़रेमिम मे येतले पाह्रीचो़मिमलाई ग्वाक्तु़मी। 8 मेम्मा माम्चु़नीका हाङकोम डोक्पु नुङ यु़मनुङमा र्वाक्पा छेखोपकु कुइकुका मे सो़रनेम देम्स्ता। मे येतले पाह्रीचो़मिमकु येतले दु़खामिम मेहुक्थु़मसम्म सु़ वो मे सो़रनेम गोनो हुमु मेचाप्मिवा। |
© Wycliffe Bible Translators, Inc. All rights reserved.
Wycliffe Bible Translators, Inc.