रेम्बेट्मिडिम ल्वा 14 - थुलुङ राईभेन्दाचो़ नुङ को-ब्ल सङसङ ब्ल धु़मसङ (१,४४,०००) मु़चु़मिम 1 मेकोतिमा गो रेप्तो, मा आमा ङादोनो सियोन पोप्चङडला भेन्दाचो़ येम्तासिट्मिडिम बाइडा, मा गुमीनुङ को-ब्ल सङसङ ब्ल धु़मसङ मु़चु़मिम बाम्डी। मेर्मिमकु कुप्पीडा उनीमा नङ नुङ उनीमा पापकु नङ र्याक्मा बाइडा। 2 मेम्मा पाह्रीलामका छेकुमेर्कु येपा होङङा मा डोक्पु बुलु़लु़ होङङा र्वाक्पा थो़उतो। गो थो़उतोम मे लो़लाम कामसोर डु़पामिमका उनी कामसोर डु़प्मिडिम होप्माम बाइडा। 3 मेम्मा को-ब्ल सङसङ ब्ल धु़मसङ मु़चु़मिमका मे हपकु गन्खोप, ब्लले सामनुङमा नुङ ङाउ-डु़म्लाचो़मिमकु ङादोडा कोले लाले काम्सो बेम्डी। माम्चु़नीका मेर्मिमलाई सुबुलामका थि सोक्साका सेल्मिडिम बाइडा, मेर्मिमडाम वाङमिम सु़का वो मे लाले काम्सो सीम्सिमु मेचाप्मिवा। 4 मेर्मिम मु़चु़ मेसेममिमनुङ मेअम्मिवाम बाइडा हेङालोने मेर्मिमका उनी त्वापलाई सेपा दु़म्बेन्थाट्मिडिम बाइडा। भेन्दाचो़ बान्थो़ लम्डी मेनो-मेनो उनी चङचङ मेर्मिम लम्डी। माम्चु़नी नुङ भेन्दाचो़लाई ग्वामु लागि ङादो सिट्पा मामिम होङङा मु़चु़मिमकु थेतेलामका थि सोक्साका मेर्मिमलाई वाङ बेम्डिम बाइडा। 5 मेर्मिमका हाम वो लिमा मेथेट्मिवा, मेर्मिम मुमा मेबेडिमिम बुमी। सुले पाह्रीचो़मिम 6 मेम्मा कोङमी पाह्रीचो़ धामुकु थेतेडा हुट्पाम बाट्पा गो ल्वाउतो। सुबुडा बाट्पा खोत्ले नेब्दीमिम, दोचो़, ल्वा जेपामिम नुङ मु़चु़मिमलाई थो़बेन्मु हेल्लो लोवो बाट्पाम बाट्पा जो़पा-सेला गुनुङ बाइडा। 7 गुका डोक्पु लो़लामका आरे र्वाक्ता, “माम्चु़नीकु ङिम जु़ल्नी मा गुमी डोक्पु बुमी र्वाक्नी, हेङालोने गुमीका निया बेपा थारी रोक्ताम बु। सुबु, पाह्री, दिरिदिन नुङ कुकु पुन्खोपमिम प्रङपा गुमीलाई सेव साट्नी।” 8 मेम्मा ङादोम पाह्रीचो़कु चङडा ननोम पाह्रीचो़ रोक्ता मा र्वाक्ता, “झार्स्ताम बु! झार्स्ताम बु! डोक्पु बेबिलोन शहर झार्स्ताम बु। मेरामका सु़म्दिसेरडाम मु़चु़मिमलाई अङ्गूरकु बिलामका सेन्बेड्डु़मिम होङङा नाम्सु़रु़ बेसीका सेन्बेड्डु़मिम बु।” 9 मेम्मा सुनोम पाह्रीचो़ मेर्चिपकु चङडा रोक्ता मा डोक्पु लो़लामका आरे र्वाक्ता, “कोङनिमका मे हादीबारा नुङ उ ङाटालाई सेव साड्डु़ मा मेरामकु छाप उ कुप्पीडा लोवो उ ल्वाडा लोवो रङडु़ माला, 10 मेरामका माम्चु़नीकु ङिमलु़पा छोक्चोकाम अङ्गूरकु बिलाम डुमु बासी। माम्चु़नीकु छोक्चोकु कान्चु़रेडाम मेराम अङ्गूरकु बिलाम अमी। मेराम मु़चु़का सेपा पाह्रीचो़मिम नुङ भेन्दाचो़कु ङादोडा वाक्पा गन्धकका उ थो़म्बोक पिपा कोतिम दु़खा ल्वासु़। 11 मेर्मिमकु थो़म्बोक पिपा कोतिम दु़खा ग्वाक्पा वाक्पा गन्धककु कुइकु हेल्लो लोवो गेले लहोमङा बु। मे हादीबारा नुङ उ ङाटा सेव साट्पा मा मेरामकु नङकु छाप रपामिमका नेम्फु सिन्थाङा ङेम्सिमु मेल्वामी।” 12 मेम्मिमका माम्चु़नीका र्वामिमिम होङङा बेपा मा येशूडा थो़रलु़इमिम दु़म्साका बाट्पा माम्चु़नीकु सेपा मु़चु़मिमका थो़मतेर्सीडा इम्साका बुमु बासी। 13 मेम्मा पाह्रीलाम कोङ लो़लामका आरे र्वाक्ताम गो थो़उतो, “ओराम र्याका: आथाडा आनो ङाचो़डा थो़र बु़डु़मका सिपामिम आलाकाम सो़।” माम्चु़नी-पेलका र्वाम्डी, “आच्छाङा सो़, मेर्मिमका उनी ब्राम्दु़ल्वा बेसीडाम ङेम्सिमु ल्वामी, हेङालोने मेर्मिमका बेम्डिम जो़पा खारीकाम पुरस्कार ल्वामी।” सु़म्दिसेरकु चङडाम निया 14 मेम्मा गो रेप्तो मा आमा ङादोडा बुबुयाम खासे बाइडा, मा मेडला मिनीचो़ होप्माम कोले गन्तासिट्मिडी। उनीमा बुइडला सो़नाकु मुकुट खुम्तासिम्डी, मा उनीमा ल्वाडा हन्पा कोले बन बाइडा। 15 मेम्मा कोङमी पाह्रीचो़ सो़रनेमलामका पाखा लुक्ता मा खासेडला गन्तासिट्पा गुमीलाई डोक्पु लो़लामका र्वाक्ता, “इनीमा बन जेट्नी मा हिप्नी, हेङालोने हिम्मु थारी रोक्ताम बु, सुबुडाम मा-के थोक्ताम बु।” 16 आरेसाका खासेडला गन्तासिट्पाका सुबुडा उनी बन मोम्डी मा सुबुडाम मा-के हिप्मिडी। 17 मेम्मा कोङमी पाह्रीचो़ पाह्रीलाम सो़रनेमलामका पाखा लुक्ता। गुनुङ वो हन्पा कोले बन बाइडा। 18 मेम्मा मु उमा ल्वाड्डा बेपा कोङमी पाह्रीचो़ सासेन्खोपलाम रोक्ता। गु मेलाम रोक्तामा मे हन्पा बन जेथाक्पालाई डोक्पु लो़लामका आरे बु़डु़, “हन्पा इमा बन जेडा मा सुबुडाम अङ्गूरकु झुम्पामिम खोप्डामी, हेङालोने सुबुडाम अङ्गूर थोक्ता।” 19 मे पाह्रीचो़का उ बनका अङ्गूरमिम खोप्डु़ मा माम्चु़नीकु छोक्चोकु अङ्गूर देम्साका खाल्पा डोक्पु खोमडा मे अङ्गूरमिम घ्रोक्तु़। 20 शहरकु पाखालाम अङ्गूर देम्साका खाल्पा खोमडा मे अङ्गूरमिम खाल्सिम्डी, मा मे अङ्गूर खाल्पा खोमलामका सिसि हास्तामा लुक्ता। मे सिसि घोडाकु लगाम घ्लु़म्पा मा सु सङ किलोमिटर कोकोनोसम्म रोक्थिड्डाम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.