रेम्बेट्मिडिम ल्वा 13 - थुलुङ राईदिरिदिनलामका लुक्ताम हादीबारा 1 मेम्मा दिरिदिनलामका कोले हादीबारा लुक्ताम गो ल्वाउतो। मेरामकाम को धु़म रङमिम नुङ येतले बुइमिम बाइडा। मेरामकु रङमिमडला को धु़म मुकुटमिम बाइडा, मा मेरामकु खोत्ले बुइडला माम्चु़नीलाई डक्पा नङ बाइडा। 2 गो आ मिक्सीका ल्वाउतोम मे हादीबारा रेचेरे होङङा बेपा बाइडा, लावो उ खेल होमुकाम होप्माम बाइडा, मा उ सि धेन्द्राकाम होप्माम बाइडा। मे डोमिफुका उ यु़म, हप होङका उ गन्खोप नुङ डोक्पु साखाम मे हादीबारालाई ग्वाक्तु़। 3 मे हादीबाराकु कोले बुइडला ङिमलु़पा पार होप्माम ल्वासिक्पा बाइडा, लावो मे ङिमलु़पा ल्वासिक्पा पार सस्ता। मेम्मा सु़म्दिसेरडाम खोत्ले ओरामडाम ङाङाया दु़म्मिडी मा मे हादीबाराकु चङचङ लाम्दिम्डी। 4 मु़चु़मिमका मे डोमिफु सेव साट्मिडी, हेङालोने मेरामका हादीबारालाई साखाम ग्वाक्तु़म बाइडा। मेर्मिमका मे हादीबारालाई वो सेव साट्मिडी मा र्वाम्डी, “ओ हादीबारा होप्माम सु़ बु, मा ओरामनुङ सु़का क्वाल्बा बोमु चाप्सु़?” 5 डोक्पु लिसिक्साका जेपा नुङ माम्चु़नीलाई डक्साका जेपा सि मे हादीबाराका रङ्डु़, मा ब्ल-न मुनामसम्म साखाम थो़मु ल्वास्तु़। 6 मेरामका माम्चु़नीलाई डक्साका जेमु लागि उमा सि होर्डु़, मा माम्चु़नीकु नङ, गुमी बाट्पा खोम नुङ पाह्रीला बाट्पामिमकु दुथाम सेम्ला बेत्तो मेजो़पा जेस्ता। 7 मेरामका माम्चु़नीकु मु़चु़मिमकु कोर्थो़लाम क्वाल्बा बोमु यु़म ल्वासाका मेर्मिमलाई घ्ल्वामु ल्वास्तु़। मेरामका खोत्ले दोचो़मिम, ल्वा जेपामिम, मु़चु़मिम नुङ नेब्दीडला साखाम थो़मु चो़म्डु़। 8 मेम्मा सेट्मिडिम भेन्दाचो़कु त्वारो़मकु खाजेमडा सु़म्दिसेर प्रङ्सिमु ङादोङा नङ मेर्यासिट्पामिम खोत्लेका मे हादीबारालाई सेव सान्मी। 9 उहेमकाम नोफ्ला बु मेरामका थो़सु़नु़– 10 चला सो़म्सिमुङा बासिट्पा मु़चु़ चला सो़सी। कातु़रु़का सेन्सिमु बासिट्पा मु़चु़ कातु़रु़का सेन्ला सो़सी। मेम्मिमका माम्चु़नीकु सेपा मु़चु़मिमका उनी थो़मतेर्सीडा हाम वो मेर्वाक्साका इम्मु बासी मा थो़रलु़इमिम दु़म्मुम बुमु बासी। सुबुलाम लुक्ताम हादीबारा 11 मेकोतिमा सुबुलामका लुक्ताम कोङमी हादीबारा गो ल्वाउतो। भेन्दाचो़काम होप्माम मेरामकाम नले रङ बाइडा, लावो मेराम डोमिफु होङङा जेस्ता। 12 मेरामका कोनोम हादीबाराकु खोमडा खोत्ले साखाम थो़ड्डु़ मा ङिमलु़पा पार सस्ताम कोनोम हादीबाराकु नङडा सुबु नुङ मेसिन्डा बाट्पा मु़चु़मिमलाई मेरामका सेव सान्बेड्डु़मी। 13 मेम्मा मेरामका डोक्पुतो नुङ ङाङाया दु़म्सीमिम छेखोपमिम रेम्बु़डु़। मु़चु़मिमकु ङादोडा पाह्रीलामका सुबुडा मुङा वो योबेड्डु। 14 मे कोनोम हादीबाराकु खोमडा मेराम हादीबाराका छेखोपमिम रेम्बेपा यु़म डार्स्तु़म बाइडा। मेराम खारीलामका सुबुडा बाट्पा मु़चु़मिमलाई ताङताहेरथो़ लडु़मी। कातु़रु़का फल्साका रावा सिडामा वो नु़पा दु़स्ताम मे कोनोम हादीबारालाई डोक्पु मिम्मु लागि मेरामका ङाटा बनेबेबेड्डु़मी। 15 मेराम हादीबाराका कोनोम हादीबाराकु ङाटालाई साम फिक्साका जेमु यु़म ल्वास्तु़ मा मे ङाटा सेव सान्मु मेबिसिक्पामिम खोत्लेलाई सेन्बेड्डु़मी। 16 मेरामका डोक्पु नुङ याक्के, खाप्चीचो़ नुङ खाप्ची मान्थिम, डु़ल्चो़ नुङ वाङ दु़म्पा मु़चु़लाई मेर्मिमकु जो़पल्वाडा लोवो कुप्पीडा लोवो छाप रबेड्डु़मी, 17 मेम्साका मेराम छाप मेरथु़मसम्म सु़का वो भ्रेमु, भ्रेन्मु मेल्वापा दु़म्मिडी। मेराम छेखोप ने मे हादीबाराकु नङ मेएँ माला मेरामकु नङकु सेर्सी सो़। 18 ननुङमा मु़चु़का ओराम र्वाक्मा थेसिथेन्मु बासी। उहेम मु़चु़काम नेप्ची बु, मेरामका मे हादीबाराकु सेर्सीका हाम रेम्बु़ र्वाक्पा थेसिथेट्नु़, हेङालोने मेराम ने कोङ मु़चु़कु सेर्सी सो़। मेरामकु सेर्सी ने रु सङ रु-रु। |
© Wycliffe Bible Translators, Inc. All rights reserved.
Wycliffe Bible Translators, Inc.