रेम्बेट्मिडिम ल्वा 12 - थुलुङ राईमेसेम नुङ डोमिफु 1 पाह्रीला कोङ डोक्पु नुङ हेल्लो वो मेल्वाम्मा छेखोप दो़स्ता, मेराम कोङ मेसेमका नेम्सुङ फतासिट्पा बाइडा। उ खेल गोयु़ ख्लो़मु बाइडा मा को-न सोरलुङमिमकु मुकुट उ बुइडला खुतासिड्डा। 2 गु गोजु़मे बाइडा मा चो़च्चो़ कक्पा हिम्बा खेड्डु़मा येस्ताम बाइडा। 3 मेकोतिमा पाह्रीला कोङमी छेखोप दो़स्ता, मेराम ने येतले बुइ नुङ को धु़म रङनुङमा कोले डोक्पु लालाम डोमिफु बाइडा। मेरामका येतले उ बुइडला येतले मुकुट खुतासिड्डा। 4 उ मेरका धामुलाम सु फ्वाकु को फ्वा सोरलुङमिम बोखोप्डु़मा मेर्मिमलाई सुबुडा छाघ्रोक्तु़। मे मेसेमकु चो़ ग मेडे क्लिडोमु लागि चो़च्चो़ कमु खापा मे मेसेमकु ङादोडा मे डोमिफु बक्ता। 5 हपका मोक्पा होप्माम सेलकु डु़लु़म्चो़का खोत्ले नेब्दीडा साखाम थो़पा कोले तारापाचो़ मे मेसेमका कस्तु़। मेम्मा मे तारापाचो़ पाह्रीचो़का माम्चु़नीकाला मा उनीमा साखाम थो़पा गन्खोपला लडु़। 6 मे मेसेम र्याङगो-र्याङगोथो़ स्वाङडा, मेसिन्डा को-न सङ रु धु़म नेमसम्म उमा चापे-डुपे दु़म्नु़ र्वाक्साका माम्चु़नीका मेरामकाम लागि खोम बनेबेम्डिम बाइडा। 7 मेकोतिमा पाह्रीला क्वाल्बा दु़स्ता। मिखाएल नुङ गुनुङ बाट्पा पाह्रीचो़मिमका मे डोमिफु नुङ मेरामकु सेनामिमनुङ क्वाल्बा बेम्डी। 8 लावो मे डोमिफु सो़ड्डा मा पाह्रीला मेर्मिम बुमु मेल्वापा दु़म्मिडी। 9 मिखाएल नुङ गुनुङ बाट्पा पाह्रीचो़मिमका मे डोमिफु धाली छाघ्रोम्सोम्डी। मेराम ने माके आथाममिम ब्लो, सु़म्दिसेर खोत्लेलाई ताङताहेरथो़ लक्पा मुनाङमिमकु ङाउ, शैतान सो़। गुलाई सुबुडा घ्रोम्सोम्डी मा गुनुङ बाट्पा सेनामिम वो गुनुङङा घ्रोम्सोम्डी। 10 मेम्मा कोङ डोक्पु लो़लामका पाह्रीला आरे र्वाक्ताम गो थो़उतो, “आथा ने इकीमा माम्चु़नीका मु़चु़मिम सेल्मी, गुमीका उनीमा यु़म मोमी, मा हपका होङङा साखाम थो़मी, मा उनीमा ख्रीष्टकु साखाम रोक्ताम बु। इकीमा वा-ल्वाकमिमकु बुइडला मेजो़पा ल्वा उट्पा, मेरामका इकीमा माम्चु़नीकु ङादोडा नेम्फु सिन्था मेर्मिमकु बुइडला मेजो़पा ल्वा उडु़, मेराम डस्ताम बु। 11 भेन्दाचो़कु सिसिका नुङ मेर्मिमका सो़म्डिम सिजेमका मेराम मुनाङडला घ्ल्वाम्डिम बु। मेर्मिम सिमुङा बासिक्पा लोवो सिमु मेङिपा बाम्डी। 12 मेम्मिमका पाह्रीला नुङ मेला बाट्पामिम भ्रन्सिट्नी। लावो सुबु नुङ दिरिदिनडा बाट्पामिम ने हाउरेमा! हेङालोने उमा थारी कति दु़पा बु र्वाक्पा चक्साका मुनाङमिमकु ङाउ छो़म उ छोक्चोनुङमा इनीमायु़ योक्ताम बु।” 13 मे डोमिफुका गु त्वाप सुबुडा डस्ताम चडु़ मा तारापाचो़ कक्पा मे मेसेमलाई खाड्डु़। 14 लावो मे मेसेमलाई मे डोमिफुका मेडार्रु़नु़ र्वाक्साका उमा लागि झो़म्सिबेन्जो़ल्मा र्याङगो-र्याङगोडाम खोमनो हुन्मुमा लमु कोङनिमका गुलाई खिरिजङमाकु नले लाप्तेर ग्वाक्तु़। मेसिन्डा सु-थ रु मुनाम उमा चापे-डुपे दु़म्नु़ र्वाक्साका झो़म्सिबेन्जो़ल्मा बाइडा। 15 मेकोतिमा मे मेसेमलाई सेपबक्ल्याट्नु़ र्वाक्साका ब्लोकु होप्माम कु मे डोमिफुका उमा सिलामका फोस्ता। 16 लावो सुबुका उ सि ह्वाक्तु़मा मे डोमिफुका उ सिलामका फोस्ताम ब्लोकु सो़रो़ फिप्डु़मा मे मेसेमलाई ख्लो़यु़डु़। 17 मेम्मा डोमिफु मे मेसेमडाम उ छोक्चोका इप्ल्याड्डु़। मेम्मिमका माम्चु़नीका र्वामिमिम होङङा खारी बेपामिम मा येशूका थेसिथेन्बेट्मिडिम सीसि होङङा दोपामिमकु कोर्थो़लाम क्वाल्बा बेप्डा मे मेसेमकु वाङमिम उ चो़मिमकाडा लस्ता। 18 मेम्मा मे डोमिफु दिरिदिनकु सो़पडा येम्सिड्डा। |
© Wycliffe Bible Translators, Inc. All rights reserved.
Wycliffe Bible Translators, Inc.