रेम्बेट्मिडिम ल्वा 11 - थुलुङ राईमाम्चु़नीकु दुथाम सो़पाचिप 1 मेम्मा नार होप्माम कोङ थो़म्खोप डु़लु़म्चो़ कोङनिमका गोलाई ग्वाङ्डी, मा र्वाक्ता, “लक्सा, मा माम्चु़नीकु सो़रनेम नुङ सासेन्खोप थो़प्डा मा मेसिन्डा सो़रलोले बेपामिम ङारामी। 2 लावो सो़रनेमकु पाखालाममिम देलफु ने डिडा, मेराम मेथो़प्डा, हेङालोने मेराम वाङसामामिमलाई ग्वाक्मा बु। मेर्मिमका ब्ल-न मुनामसम्म मे सेपा शहर देम्मी। 3 मेम्मा आमा ल्वा सो़पाचिपलाई यु़म ग्वाक्पुची, मा को-न सङ रु धु़म (१,२६०) नेमसम्म जिलेम फसिक्साका मेर्चिप गोलामका जेची।” 4 ओर्चिप ने सु़म्दिसेरडा साखाम थो़पा ङाचो़कु ङादोडा नले जैतूनकु धक्सा नुङ नले धिप्री जु़ल्खोपचिप सो़। 5 कोङनिमका ओर्चिपलाई दु़खा ग्वामु माल्लु़ माला ओर्चिपकु सिलामका मु लुमा मे उची स्वाक्चिमोमिमलाई छो़रो़प बु़मी। मेम्साकाङा ओर्चिपलाई दु़खा ग्वामु माल्पामिम ने खोत्ले सेन्ला सो़सिमी। 6 ओर्चिप मु़चु़नुङ धामु ड्याक्पा यु़म बु, मेम्साका ओर्चिपका माम्चु़नीलाम जेचिमिम थारीसम्म व मेयो। मेम्मा ओर्चिपका न बोचिमिम थारीका कु सिसि दु़म्बेन्मु नुङ सुबुडा मु़चु़लाई सेट्पा खोत्ले खालकाम दु़खा रेट्पा यु़म ओर्चिपनुङ बु। 7 माम्चु़नीका मेर्चिपलाई र्वाबेट्मिडिम ल्वा सो़मु डु़म्चिमा घ्लु़म्पा पोलु़मयु़म हादीबारा लु मा चोघ्रु़म्साका घ्ल्वासु़चिमा सेडु़ची। 8 मेर्चिपकु सिपा मिरो़म मु़चु़मिमका उनी ङाचो़ येशूलाई क्रूसडा चेट्मिडिम डोक्पु शहरडाम डोक्पु लाम्दीबाडे चार्जो़ल्मिमिम दु़म। मेराम शहरकाम रेम्बेपा छेखोप सदोम नुङ मिश्र र्वामी। 9 मेर्चिपकु सिपा रो़म ने नेब्दीमिम, दोचो़मिम, खोत्ले ल्वा जेपा मु़चु़मिम नुङ सामाडाम मु़चु़मिम खोत्लेका सुलेम नुङ को नेम्फुसम्म रेम्मी, मा मेर्चिपलाई क्लु़म्मु मेबिम्सिमी। 10 सुबुडा बाट्पा मु़चु़मिम ओर्चिप सिच्चिमका भ्रम्सिमी मा कोरमा थु़र्बेबेसाका गेर्सिमी। हेङालोने सुबुडा बाट्पामिमलाई माम्चु़नीलाम जेपा ओर्चिपका दु़खा ग्वाक्चिमिम बाइडा। 11 लावो सुलेम नुङ को नेम्फु चङडा मेर्चिप गोडा माम्चु़नीलाममिम त्वारो़म ल्वापा साम हुङडा। मेम्मा मेर्चिप उची खेलका येम्सिट्ची मा मेर्चिपलाई ल्वापा मु़चु़मिम छो़म ङिम्डी। 12 मेम्मा मेर्चिपलाई पाह्रीलामका कोङ डोक्पु लो़लामका आरे र्वाक्ताम थो़च्ची, “आला गेची।” मेर्चिपकु स्वाक्चिमोमिमका रेप्मिडी होङङा खासेडलामका पाह्रीला लक्ची। 13 मेराम थारीकाङा डोक्पु सुबु रुक्सी लस्ता मा को धु़म फ्वाकु को फ्वा शहर झार्स्ता। मेम्मा येत धु़मसङ (७,०००) मु़चु़मिम सुबु रुक्सीडा सिम्डी। मेसिपा वाङमिम मु़चु़मिम ङिम्डी मा मु़चु़मिमका पाह्रीलाम माम्चु़नी यु़मनुङमा बुमी र्वाम्डी। 14 ननोम ङिमलु़पा ल्वा हुक्ता, सुनोम ङिमलु़पा ल्वा रोक्तोङा लेडु़। येतनोम भुम 15 येतनोम पाह्रीचो़का उ भुम डु़प्डु़, मा पाह्रीला आरे र्वाक्पा डोक्पु लो़लाममिम येम्डी, “सु़म्दिसेरडला साखाम थो़पा यु़म इकीमा ङाचो़ नुङ उनीमा ख्रीष्टकाम दु़स्ता, मा गुमीका हेल्लो लोवो साखाम थो़मिम बुमिमिम दु़म।” 16 मेम्मा माम्चु़नीकु ङादोडा त्वाकु गन्खोपडा गन्तासिट्पा मे न-ब्ल ङाउ-डु़म्लाचो़मिमका कुम्सिक्साका माम्चु़नीलाई सेव साट्मिडी, 17 मा आरे र्वाम्डी, “मिप्रङमा माम्चु़नी खोत्लेडलाम साखामनुङमा, गानी ओम्लो वो बुनी मा ङादो वो बान्नी, गानीलाई गुकु आलासो़ र्वाकु। हेङालोने गानी इनीमा डोक्पु यु़म रन्निम बु मा साखाम थो़मु चो़म्निम बु। 18 थो़र मेलु़पा मु़चु़मिमकाम उनी छोक्चो बक्ता, मा गानी छोक्चो बेपा थारी रोक्ता। सिपा मु़चु़मिमकु निया बेपा थारी रोक्ताम बु। गानीलाम जेपामा इनीमा लाले-पाङके बेपामिमलाई, इनीमा सेपा मु़चु़मिमलाई, इनीमा नङ डोक्पु बेपामिम याक्के लोवो डोक्पु लोवो खोत्लेलाई पुरस्कार ग्वाक्पा थारी रोक्ताम बु। लावो सुबु पुयु़लुबेट्पालाई ने पुयु़लुबेट्पा थारी रोक्ताम बु।” 19 मेम्मा पाह्रीला माम्चु़नीकु सो़रनेम कोङनिमका होल्लु़ मा उनीमा सो़रनेम गोनो उनीमा सो़रख्रेप्सीकु बाकस दो़स्ता। ब्ल्याक्ची बु़डु़, बुलु़लु़ बु़डु़, गुडुमाक्सी जेस्ता। सुबु रुड्डु़ मा डोक्पुतो लोसु़ योक्ता। |
© Wycliffe Bible Translators, Inc. All rights reserved.
Wycliffe Bible Translators, Inc.