रेम्बेट्मिडिम ल्वा 10 - थुलुङ राईपाह्रीचो़ नुङ याक्के दिल्मा खाजेम 1 मेम्मा यु़मनुङमा कोङमी पाह्रीचो़ पाह्रीलामका योक्तोङा बेपा ल्वाउतो। गु खासेका दिल्तासिट्पा बाइडा, उ बुइडला नाङगुम बाइडा, उ ङाली नेम्सुङ होप्माम बाइडा, मा उ खेलचिप मुकु थाम होप्माम बाइडा। 2 मेरामका याक्के दिल्मा खाजेम होर्थाक्साका उ ल्वाडा जेथाड्डु़। गुका उ जो़पखेलका दिरिदिनडा मा उ पेखेलका बायडा देम्थाड्डु़। 3 मेम्मा धेन्द्रा क्रुमिम होङङा गु डोक्पु लो़लामका येस्ता। गु येस्तामा येतले बुलु़लु़मिम बु़डु़। 4 येतले बुलु़लु़मिम बु़डु़म ल्वा गो र्यामु खाप्तोम बाइडा, लावो पाह्रीलामका कोङ लो़लामका आरे र्वाक्ताम गो थो़उतो, “मे येतले बुलु़लु़मिमका र्वाम्डिम ल्वा मेर्याका, लावो नगोडा जु़ला।” 5 मेम्मा दिरिदिनडा नुङ बायडा येम्सिक्पा गो ल्वाउतोम पाह्रीचो़का उ जो़पल्वा पाह्रीथो़ कोस्तु़। 6 मेम्मा गुका पाह्री नुङ मेगोला बाट्पा खोत्ले, सुबु नुङ मेगोडा बाट्पा खोत्ले, मा दिरिदिन नुङ मेगोयु़ बाट्पा खोत्लेलाई प्रङ्मिडिम गुमी, उहेम ने हेल्लो लोवो बुमिम बुमी। मेरामका उनीमा नङडा कसम पेसाका आरे र्वाक्ता, “आथा ने हाङको वो मेछु़। 7 लावो येतनोम पाह्रीचो़का उ भुम डु़पा थारी रो, मा माम्चु़नीलाम जेपा उनीमा डु़ल्चो़नुङ त्वाकाङा सो़म्डिम मेल्वाम्मा ल्वा रोथी।” 8 मेम्मा गो थो़उतोम पाह्रीलाममिम लो़लामका गोलाई आथावो आरे बेङडी: “लक्सा, दिरिदिन नुङ सुबुडा येम्सिक्पा मे पाह्रीचो़कु ल्वाडा बाट्पा मेराम होर्थाट्मा याक्के दिल्मा खाजेम रङा।” 9 गो मेराम पाह्रीचो़काडा लङडो मा मे याक्के खाजेम बिउतो। गुका गोनुङ र्वाक्ता, “ओराम रङा, मा पे, ओरामका इमा ख्वाचेप जु़र्बेडु़, लावो इमा सिड्डा ओराम खुदो कोतिम लेम्पा दु़म।” 10 मे पाह्रीचो़कु ल्वाडाम याक्के खाजेम गो रउतो मा मेराम पेउतो। आमा सिड्डा मेराम खुदो कोतिम लेम्डा, लावो मेराम पेउतोमा आमा ख्वाचेप जु़र्डा। 11 मेम्मा कोङनिमका गोनुङ आरे र्वाक्ता, “गाना हापा मु़चु़मिमलाई, नेब्दीमिमलाई, वाङ-वाङ ल्वा जेपामिमलाई मा हपमिमलाई मेर्मिमकु दुथाम आथावो माम्चु़नीलाम जेमु बासी।” |
© Wycliffe Bible Translators, Inc. All rights reserved.
Wycliffe Bible Translators, Inc.