रेम्बेट्मिडिम ल्वा 1 - थुलुङ राईङादोम र्वामु सि 1 ओराम खाजेमडा दालाङा हाम दु़म्मिम मेराम ल्वा येशू ख्रीष्टका रेम्बेम्डिम बु। त्वाकु लाले-पाङके बेपा डु़ल्चो़मिमका दालाङा ओराम ल्वाकु दुथाम चमिनु़ र्वाक्साका माम्चु़नीका ओराम रेम्बेट्मिडम ल्वा येशूलाई ग्वाम्डी। मेम्मा ओराम ल्वाकु दुथाम सो़मु लागि येशूका कोले पाह्रीचो़लाई उनीमा त्वाकु डु़ल्चो़ यूहन्नाकाडा थु़र्मिडी। 2 यूहन्नाका मिक्सीलाम ल्वास्तु़म खोत्ले सो़मु खाप्डु़म बु, मेराम, माम्चु़नीकु सिजेम नुङ येशू ख्रीष्टका रेम्बेट्मिडिम आच्छाङाकाम ल्वाकु दुथाम सो़। 3 ओम्लो नुङ दिफु दु़म्पा ल्वाकु दुथाम जेम्मा ओराम सिजेम उहेम मु़चु़का डाडु़ मेरामलाई माम्चु़नीका जि-वा ग्वामी। मेम्मा ओराम सिजेम सु़का थो़सु़ मा ओराम सिजेमका र्वामिम होङङा बु़, मेरामलाई गुमीका जि-वा ग्वामी, हेङालोने ओर्मिम खोत्ले दु़म्पा थारी रोम्फामु खाप्डु़म बु। येतले मण्डलीलाई यूहन्नाकु सेव नुङ येशू ख्रीष्टकु नङ कोक्सी 4 एशिया क्षेत्रडा बाट्पा गानी येतले मण्डलीमिमलाई गो यूहन्नाका ओराम सेलाखाजेम र्याक्तोङा लेट्पु। ओम्लो वो बुमी, ङादो वो बाम्डी मा आथावो चक्थो़ योक्पा माम्चु़नीलाम नुङ उनीमा साखाम थो़खोपकु ङादोडाम येतले पेलमिमलाम दिदाम नुङ न-भ्रसी ल्वानिनु़। 5 माम्चु़नीकु दुथाम सो़मुडा थो़रलु़इमिम, सिमुलाम बग्गेट्पामिमगोडाम खोत्लेडाम ङादोम, मा सुबुडाम हपमिमडला साखाम थो़पा येशू ख्रीष्टलाम वो दिदाम नुङ न-भ्रसी ल्वानिनु़। येशू ख्रीष्ट, उहेमका गुइलाई रिखाम बेसामी मा गुमी सिम्डिम उनीमा सिसिका गुइलाई इकी छु़लमिमलाम वाङ बेसाड्डामी, 6 मा उनीमा पाप नुङ माम्चु़नीकाम किब्दीगोडा लाले-पाङके बोमु लागि हपकु डु़म्लाचो़मिम दु़म्बेसाड्डामी। खोत्लेडाम डोक्पु नुङ उनीमा यु़म हेल्लो लोवो बाट्पा ख्रीष्टकु नङ कोसिनु़। आमेन! 7 रेप्नी, येशू खासेडलामका योमुङा खाप्मी, मेम्मा खोत्ले मु़चु़मिमका गुमीलाई मिक्सीका ल्वामी। गुमीलाई क्रूसडला चेट्पामिमका वो गुमीलाई ल्वामी। मेम्मा सुबुडाम खोत्ले दोचो़गोडाम मु़चु़मिम गुमीडाम खोर्सेक्तो ख्राम्मि-दुमी। आरेङा दु़म्नु़। आमेन। 8 खोत्लेडाम घ्ल्वापा मिप्रङमा माम्चु़नीका आरे र्वामी, “खोत्ले चो़म्सी बेट्पा नुङ हुक्सोक्पा अल्फा नुङ ओमेगा गोङा सो़। गो ओम्लो वो बुङु, ङादो वो बाङडो मा रोमु खापु।” मिनीचो़ रेम्बेम्सिम्डिम 9 गानी खोत्लेकु वा गो यूहन्ना। येशूडा गुइ बुइमिमका गानी होङङा दु़खामिम गो वो इम्तोङा बेउ। उनीमा रोक्पा किब्दी गानी लन्थानिमिम होङङा गो वो लथाक्पु मा थो़मतेर्सी लोवो इम्तोङा लेट्पु। माम्चु़नीकु सिजेम नुङ येशूका थेसिथेन्बेट्ङिडिमिम सीसिकु दुथाम सो़उतोमका पत्मोस र्वाक्मा टापुडा गो चसिङडोम बाङडो। 10 ङाचो़कु नेम माम्चु़नी-पेललाम गो लु़न्सिङडो मा गो आमा चङलामका भुम होप्माम डोक्पु लो़लाम थो़उतो। 11 मेराम लो़लामका आरे र्वाम्डी, “गाना इमा मिक्सीका हाम ल्वाना, मेराम कोले खाजेमडा र्याका मा ओर्मिम येतले मण्डलीमिमकाडा थु़रा: एफिसस, स्मुर्ना, पर्गामम, थिआटीरा, सार्डिस, फिलाडेल्फिया नुङ लाउडिकियाकाडा।” 12 गोनुङ जेपा सु़ रेछा र्वाक्साका रेमु लागि गो ख्लोङ्सिङडोलो मेसिन्डा सो़नाकाम येतले धिप्री चाखोप ल्वाउतो, 13 मा मे धिप्री चाखोपमिम गोडा “मिनीचो़” होप्माम कोले बाम्डी। गुमीका उनीमा खेलफारसम्म ताम्सिक्पा हुम-ये फम्तासिम्डी, मा सो़नाकु फिता उनीमा धक्चीधाली बन्थाम्डी। 14 उनीमा बुइडाम सेम बोलुङ नुङ फोमु होप्माम बुबुयाम बाइडा मा उनीमा मिक्सी मुकु भुल्मु होप्माम बाइडा। 15 उनीमा फेमखेल मुकु भुल्मु गोडा चासाका टल्केबेम्मा बुलु होप्माम बाइडा। मेम्मा उनीमा लो़लाम ने ब्लोकु येपा होप्माङा बाइडा। 16 उनीमा जो़प ल्वालाम येतले सोरलुङमिम जेन्थाम्डी, मा उनीमा सिलामका नलेलाम फल्खोप बाट्पा हन्पा कातु़रु़ लुक्ता। उनीमा ङाली नेम्फुम नेम्सुङ होप्माम छो़म झ्वाक्पा बाइडा। 17 गो गुमीलाई ल्वाउतो मा आमा सामङा लक्पा होङङा दु़म्ङोडोमा उनीमा खेल फारयु़ कुम्सिङ्डो। मेम्मा गोडला गुमीका उनीमा जो़प ल्वा जु़ल्मिडिमा र्वाम्डी, “मेङिसा, हुम-द नुङ चो़म-द गोङा सो़। 18 नु़पा ने गोङा सो़, गो सिङ्डोम बाइडा, लावो रेप्नी, गो हेल्लो लोवो नु़ङुम बुङु। मेम्मा सिमुलाम नुङ सिपा मु़चु़मिम बाखोप खादी ल्वाडा बेपा चाबीमिम गोनुङ बु। 19 “मेम्मिमका गाना इमा मिक्सीका ल्वान्नाम ओम्लो दु़म्तोङा लेट्पा ल्वा नुङ दिफु दु़म्पा ल्वामिम र्याका। 20 गाना आमा जो़प ल्वालाम ल्वान्नाम येतले सोरलुङ नुङ येतले सो़नाकु धिप्री चाखोपमिमकु दुथाम थक्मा ल्वा ओरामङा सो़: येतले सोरलुङमिम ने येतले मण्डलीकु पाह्रीचो़मिम, मा येतले धिप्री चाखोपमिम ने येतले मण्डलीमिम सो़।” |
© Wycliffe Bible Translators, Inc. All rights reserved.
Wycliffe Bible Translators, Inc.