फिलिप्पी 1 - थुलुङ राईपावलकु सेव 1 ख्रीष्ट येशूकु डु़ल्चो़चिप, गुचुकु पावल नुङ तिमोथीका, फिलिप्पी मण्डलीडाम रेपा ङाउमिम, डिकनमिम मा येशू ख्रीष्टडा थो़र लु़पा खोत्ले मु़चु़मिमलाई ओराम सेलाखाजेम र्याक्तोङा बोचुकु। 2 माम्चु़नी इकीमा पाप नुङ ङाचो़ येशू ख्रीष्टका दिदाम नुङ न-भ्रसी ग्वानिमिनु़। पावलका माम्चु़नीलाई आलासो़ ग्वाक्तु़म नुङ सो़म्दी बु़डु़म 3 हेल्लो लोवो गानीलाई मिम्निनिलो गो आमा माम्चु़नीलाई आलासो़ ग्वाक्पु। 4 गानी खोत्लेकाम लागि खोत्ले आमा सो़म्दीमिमडा गो हेल्लो लोवो भ्रसिक्तो सो़म्दी बेउ, 5 ङादो गानी थो़र लु़न्निलो आथाम ओम्लोसम्म जो़पा-सेला थो़बेसीडा गोनुङ दु़म्निमका गो आला-तोमानुङमा बुङु। 6 ओराम ल्वाडा गो छो़म थो़र बेउ, माम्चु़नीका गानीगोडा जो़पा खारी बोमु चो़म्मिडी, मा गुमीकाङा ख्रीष्ट येशू ख्लोम्सिमिमिम नेमसम्मका बोम्सोमी। 7 गानी खोत्लेकु दुथाम आरेसाका मिम्मु जो़पा लु़ङडोम बु, मा गानीलाई आमा नगोडा जु़ल्निनी। हेङालोने गो होम्लो चसिक्पा बुङुलो मा मेचसिथु़म वो जो़पा-सेला थो़बेन्मुनुङ मेरामलाई बोत्तो-थार्तोमडा गानी वो गोनुङङा माम्चु़नीकु दिदाम ल्वान्निम बु। 8 ख्रीष्ट येशूकु रिखामका गो गानीलाई हाङको मिम्निनी मेराम माम्चु़नीका चमी। 9 गो इनीमा लागि ओराम सो़म्दी बेउ: इनीमा रिखाम, नेप्ची, नुङ थेसिथेसी छो़म बर्तो-बर्तो लनु़, 10 मेम्साका खोत्लेडाम जो़पा हाम बु मेराम थेसिथेन्मु चाप्नी, मा येशू ख्रीष्ट योमिमिम नेमसम्म गानी मेजो़पा खारी मेबेपा नुङ मुमा बेन्ला सो़सिक्पा मेदु़म्निनु़। 11 माम्चु़नीलाई डोक्पु बोमु नुङ उनीमा नङ कोमु लागि येशू ख्रीष्टका गानीलाई जो़पा बेसी-दोसी बेपा दु़म्बेनिमिनु़। पावल चसिड्डामका जो़पा-सेला बर्डाम 12 वा-ल्वाकनी, गानीलाई ओराम ल्वा चबेन्मु आमा न बु, गोडला हाम दु़स्ताम बु मेरामका आच्छाङा जो़पा-सेला बर्बेट्पा खारी बु़डु़। 13 ओगानेमकु खोत्ले सिपाहीमिम नुङ खोत्ले मु़चु़मिमकाडा वो ख्रीष्टकाम लागि गोलाई चङडिमिम र्वाक्पा छ्याङलो-छ्याङलो दु़स्ताम बु। 14 गोलाई चङडिमिमका ङाचो़ येशूडा थो़र लु़पामिम हापाका माम्चु़नीकु सिजेम रुकु फिन्साका मा मेङिसाका सो़मु आथावो छो़म सो हन्पा दु़म्मिडिम बु। 15 याङयाङका उनी नो़ मेनु़मिमका नुङ रोचु़म-रोचु़मका, लावो वाङमिमका ने जो़पा नका ख्रीष्टकु दुथाम थो़बेन्मी। 16 जो़पा नका थो़बेट्पामिमका जो़पा-सेला बोमु-थार्मु लागि गो आसिन्डा बुङुमिम र्वाक्पा मिम्साका ओराम खारी रिखामका बोमी। 17 नाचु़र बेपामिमका ने आ चसिखोमडा आथावो आमा थो़मतेर्सामु लागि जो़पा नका मेएँ, त्वाप नु़पा नका ख्रीष्टकु दुथाम थो़बेन्मी। 18 लावो ओराम ने हाम मा? खोत्लेडाम डोक्पु ल्वा ने ओरामङा सो़, मेजो़पा नका दु़म्नु़का आच्छाङाकाम नका, हेसाका लोवो मेर्मिमका ख्रीष्टकु दुथाम थो़बेन्मिमिम बुमी। ओरामकाङा गो भ्रसिद्वाङु। 19 गो आछाङा भ्रसिद्वाङुम बुङु, हेङालोने इनीमा सो़म्दीका नुङ येशू ख्रीष्टकु पेलका ख्लो़ङिमिमिमका गोडला हाम दु़स्ता मेलाम लुङु र्वाक्पा गो चक्पु। 20 गो छो़म बोमु मालुमिम नुङ आमा न ओरामङा सो़, हामता वो आमा क्रो़म लु़मु बासिक्पा मेदु़म्ङु, लावो आमा रुखु छो़म फिन्सिक्पा दु़म, मेम्साका सिङुनु़का बुङुनु़ मेलामका आमा मिरो़मडा हेल्लो लोवो दु़म्मिम होम्साका ओम्लो वो ख्रीष्ट डोक्पु दु़म्मी। 21 हेङालोने आमा लागि नु़मु र्वाक्मा ने ख्रीष्टकाम लागि मा सिमु मेरामडाम वो जो़पा दु़म। 22 गो ओराम सुबुडाङा दु़म्ङुम बुङु माला छो़म मा सिन्बेट्पा ब्राम्दु़ल्वा बेउहोम बुङुमिम दु़म। लावो गो सिमु डे नु़मु उहेम छेपुमिम, मेचक्पु। 23 गो ने हाम बोमु-बोमु दु़म्ङोडोम बु: गो ने भ्र्वाम्सिमुमा ख्रीष्टनुङ दु़म्मु आमा न बु। मेम बोमु ने आमा लागि छो़म जो़पा दु़म, 24 लावो इनीमा लागि ने गो ओराम सुबुडा बुमु बासिट्पा बु। 25 ओराम ल्वा आच्छाङा लु़ङ्डोमका गो नु़पाङा दु़म्ङु, मा गानी थो़र लु़सीडा बर्तो लमु नुङ भ्रम्सिमु लागि गानी खोत्लेनुङ दु़म्ङुम बुङु र्वाक्पा ल्वा गो चक्पु। 26 मेम्मा गो इनीमाडा आथावो रोङुलो आमा दुथाम गानी ख्रीष्ट येशूकु नङ हापा कोमु चापा दु़म्नी। 27 हा-हाम दु़म लोवो मेराम हाम वो मेएँ, लावो इनी बासी-दोसी ख्रीष्टकु जो़पा-सेला घ्रेट्पा दु़म्नु़। मेम्मा गो इनीमाडा रोङु मा क्रो़म्निनी लोवो गो मेरोक्साका इनीमा दुथाम थो़उ कोङङा लोवो, गानी कोले न-गोकाम दु़म्साका भाल-आथो़ न मेहिनी, जो़पा-सेलाडलाम थो़रकाम लागि कोले नकाम दु़म्साका क्वाल्बा बेत्तोङा बोनी, 28 मा इनीमा कोर्थो़लाम बक्पामिमडाम हाङकोवो मेङिनी र्वाक्पा ल्वा थो़मु आमा न बु। इनीमा हेलो लोवो मेङिपा ल्वा ने कोर्थो़लाम बक्पामिमकाम लागि पुयु़लुक्पाकु छेखोप दु़म, लावो इनीमा लागि ने सेल्सिमुकु छेखोप सो़, मा मेराम सेल्सिमु ने माम्चु़नीलाम सो़। 29 गानी ख्रीष्टकाम लागि गुमीडला थो़र लु़मु कोङङा मेएँ, लावो उनीमा लागि दु़खा वो ल्वानी र्वाक्साका गुमीका ग्वाक्निम बु। 30 गोडला दु़स्ताम दु़खा गानी इनीमा मिक्सीका ल्वान्नी, मा ओम्लो वो गोडला दु़खा दु़म्तोङा लेडु़ र्वाक्पा थो़निम बुनी। मेराम दु़खालामङा गानी वो लक्तो बोनी। |
© Wycliffe Bible Translators, Inc. All rights reserved.
Wycliffe Bible Translators, Inc.