फिलेमोन 1 - थुलुङ राईपावलकु सेव 1 ख्रीष्ट येशूकु जो़पा-सेला थो़बेत्तोमिलो चसिङडोम गो पावल नुङ इकीमा ल्वाक तिमोथीका, आकीमा द्वादीबुङ ङोप्सो़ मा गुकुनुङ खारी बेपा फिलेमोनलाई ओराम सेलाखाजेम र्याक्चोकोम बु। 2 मेम्मा इकीमा रिचो़ अप्फिया, छो़म मेझापातो खारी बेपा सिपाही होप्माम गुकुनुङ खारी बेपा अर्खिप्पस नुङ इमा नेमडा खोम्सिक्पा मण्डलीलाई वो ओराम सेलाखाजेम र्याक्चोकोम बु। 3 माम्चु़नी इकीमा पाप नुङ ङाचो़ येशू ख्रीष्टका उनी दिदामका सानिमिनु़, मा इनी न-भ्रसी बेन्मिनु़! आलासो़ नुङ सो़म्दी 4 गो गानालाई सो़म्दीडा मिम्निलो आमा माम्चु़नीलाई हेल्लो लोवो आलासो़ ग्वाक्पु, 5 हेङालोने ङाचो़ येशूडला बेन्नाम इमा थो़र नुङ माम्चु़नीकु मु़चु़मिमलाई बेत्तोङा लेनामिम रिखामकु दुथाम गो थो़उतोम बु। 6 इमा थो़रकु दुथाम सो़मु चापा गाना दु़म्सा, मेम्साका गुइ ख्रीष्टडा बाट्पामिमनुङ बाट्पा खोत्ले जो़पा ल्वामिम छ्याङलो-छ्याङलो गाना थेसिथेनानु़ र्वाक्साका गो सो़म्दी बेउ। 7 आमा ल्वाक, थो़रलु़पामिमलाई बेन्नाम इमा रिखामका गोलाई छो़म भ्रसिबेट्ङिडी, मा आमा सो हन्डा, हेङालोने माम्चु़नीकु मु़चु़मिमलाई गाना गेर्सी बेट्नामिम बु। पावलका फिलेमोनलाई ओनेसिमस रङा बु़डु़म 8 गो ङाचो़ येशूकु थु़र्मा दु़म्ङोडोमका गाना हाम बोमु बासी र्वाक्साका गो र्वामु चापु लोवो, 9 गुची रिखाम बेबोचिमिमका गो याक्के दु़म्साका गानालाई छो़म र्वाङु, गो ङावा पावल ख्रीष्ट येशूकाम लागि ओम्लो चतासिक्पा, 10 ओराम चसिखोपगोडा गो ओनेसिमसलाई येशू ख्रीष्टडा थो़र लु़बेत्तोमका गु आमा तारापाचो़ होप्पाम दु़स्ताम बु। मेम्मिमका गुडला न-थो़म रेम्बे र्वाक्साका छो़म र्वाङु। 11 ङादो गु इमा लागि पारिमिम होप्माम बाइडा, लावो ओम्लो ने इमा नुङ आमा निफिकाम लागिङा ख्लो़मु चापा दु़स्ताम बु। 12 गु छो़म आमा थो़मका रु़ट्पा मु़चु़ सो़, गुलाई इमाडाङा ख्लोक्तोङा लेट्पु। 13 जो़पा-सेला थो़बेत्तोमिमका गो चसिक्पा बुङुलो गुलाई आसिन्डा गोनुङङा जेन्मु न बाइडा, मा इमा खोमडा गुका ख्लो़ङिवा। 14 लावो गाना मेबिसिक्थु़म ने गो हाम वो मेबेउवा। वाङमिमका क्र्वाक्नामिमका मेएँ, गाना इमा नका ख्लो़या-बाया बे र्वाक्पा आमा न बु। 15 हेल्लो लोवो गानानुङ बुमु लागि ओनेसिमस घरिकोङ गानाडाम फ्वास्ताम रोओ। 16 लावो डु़ल्चो़ होङङा मेएँ, ओनेसिमस ने डु़ल्चो़डाम वो डोक्पु सो़। गु आमा लागि द्वादीबुङ ल्वाक, लावो इमा लागि ने मेरामडाम हापा, हेङालोने ङाचो़ येशूडा मेराम कोङ मु़चु़ नुङ थो़रलु़पा ल्वाक होङङा सो़। 17 गानानुङ कोयोङा खारी बेपा ङोप्सो़ र्वाक्साका गोलाई मिम्ङी माला गोलाई होम्साकाङा गुलाई वो रङा। 18 गुका गानाडला मेजो़पा खारीमिम बु़डु़म बु लोवो इमा जेर पु़डु़म बु लोवो गोलाई सोबेट्ङी। 19 गो पावल आमा ल्वाकाङा ओराम र्याक्तोङा लेट्पु। मे ओनेसिमसकु जेर गो ङा सोन्सानी। इमा त्वारो़मकाम लागि गाना आमा जेर हुन्नाम बु र्वाक्साका ने गो गानालाई र्वामु आमा न मिबु। 20 आमा द्वादीबुङ ल्वाक, ङाचो़ येशूकाम लागि ओराम ख्लो़ङी। ख्रीष्टडा आमा न-गो भ्रसिबेडा। 21 गो र्वाङ्डोमडाम वो हापा बोना र्वाक्साका थो़रलु़ङडोम बु। मेम्मिमका गानालाई गो ओराम सेलाखाजेम र्याक्तोङा लेट्पु। 22 मेम्मा आथावो कोङमी ल्वा: गो बुमु लागि बाखोप बनेबेजो़ला, हेङालोने माम्चु़नीका इमा सो़म्दी थो़मी, मा दालाङा इमाडा ख्लोम्सिमु ग्वाङमी र्वाक्पा न बेउहोम बुङु। पावलकु हुम-दडाम सेव 23 येशू ख्रीष्टकु दुथाम गोनुङ चसिक्पा इपाफ्रासका गानालाई सेव र्वाक्ताम बु। 24 मेम्साकाङा गोनुङ कोयोङा खारी बेपामिम: मर्कूस, अरिस्तार्खस, डेमास नुङ लूकाका वो सेव र्वाम्डिम बु। 25 ङाचो़ येशू ख्रीष्टकु दिदाम गानी खोत्लेकाडा दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.