मर्कूस 9 - थुलुङ राई1 मेकोतिमा गुमीका मेर्मिमलाई र्वाम्डी, “आच्छाङा गो गानीलाई र्वाङु, आसि येम्तासिट्पामिमडाम याङ-याङका माम्चु़नीकु किब्दी यु़मनुङ योक्पा मेल्वाथु़म उनीमा साम मेल।” येशूकु ङाली ख्लोसिड्डाम ( मत्ती १७:१-१३ ; लूका ९:२८-३६ ) 2 मेरामकु रुलेम चङडा येशूका पत्रुस, याकूब नुङ यूहन्नालाई लम्डिमा कोङ येप्पा पोप्चङडला लम्डी। मेडला येशू नुङ सुले उनी सीसिपामिमडाम वाङमी सु़ वो मेबामिवा, मा मेर्मिमका रेप्मिडी होङङा येशूकु ङाली ख्लोसिड्डा। 3 मेकोतिमा उनीमा ये ने मिक्सीकु तु़रु़ङा थु़ट्पा कोत्तिम बुबुयाम दु़स्ता। ओराम सुबुडा सो़प्साका सु़का वो मेकोत्ति छो़म बुबुयाम बोमु मेचाप्मिम बाइडा। 4 मेसिन्डा मेर्मिमकाडा एलिया नुङ मोशा रेम्बेसिच्ची, मा मेर्चिपका येशूनुङ जेत्तो बेच्चिम बाइडा। 5 पत्रुसका येशूनुङ र्वाक्ता, “रब्बी, गुकु आसिन्डा बात्तोकोम छो़म जो़पा दु़स्ता। गुकु आसिन्डा सुले बाखोप बनेबोकु, कोले इनीमा, कोले मोशाकाम मा कोले एलियाकाम।” 6 मेर्मिम छो़म ङिम्डिमका हाम र्वामु बासिट्पा पत्रुसका हाम वो मेचवा। 7 मेकोतिमा मेसिन्डा खासे रोक्तामा मेर्मिमलाई हुप्डु़मी, मा खासेलामका कोङ लो़लामका र्वाम्डी, “ओराम गो छो़म द्वाक्पुमिम आमा चो़, ओरामका र्वामिम थो़नी।” 8 मेकोतिलो ङा मेर्मिमका होनो-आथो़ रेप्मिडिलो येशूडाम वाङमिम सु़ वो मेल्वामिवा। 9 पोप्चङडलामका योक्तोङा बेम्डिलो येशूका उनीमा सीसिपामिमनुङ र्वाम्डी, “मामा सो़! मिनीचो़ सिमुलाम मेबग्गेथु़म गानी हाम ल्वान्निम बाइडा, मेराम सु़नुङ वो मेसो़नी वो।” 10 मेर्मिमका मेराम ल्वा उनीमा नडा ङा जु़ल्थाम्डी। लावो, “सिमुलाम बमु र्वाक्मा हाम डे?” र्वाक्तो उनी त्वाप-त्वापगोनो हिलाहिसी बेबोमु चो़म्मिडी। 11 मेर्मिमका गुमीनुङ हिला बेम्डी, “हेङा डु़म्ला सीपा पातु़म्रीमिमका एलिया ङादो योमु बासी र्वामिमिम?” 12 येशूका मेर्मिमलाई र्वाम्डी, “आच्छाङा, एलिया ङा ङादो योमु बासी, मा खोत्ले ङादोम होप्माम ङा बु़जो़लु़। लावो मिनीचो़का छो़म दु़खा ल्वामु नुङ खोत्लेलामका नाप्छु़न्ला सो़म्सिमु बासी र्वाक्साका हेङा र्याक्मा?” 13 लावो गो गानीनुङ र्वाङु, “एलिया ने योमु दु़म्स्तु़म बु, मा उमा दुथाम र्याक्मा होम्साका ङा मेर्मिमका उनी हा-हाम बे-बे द्वाक्ता मेमङा बेम्डी।” मुनाङपेलका हुपा कोले वोस्चो़ येशूका सबेट्मिडिम ( मत्ती १७:१४-२३ ; लूका ९:३७-४५ ) 14 येशू नुङ उनी सीसिपामिम वाङमिम उनी सीसिपामिमकाडा रोम्फाम्डिलो, मेर्मिमकु होनोलाम-आथो़लाम छो़म सेर्पा मु़चु़मिम बाम्डी, मा यहूदीमिमकु डु़म्ला सीपा पातु़म्रीमिमनुङ हिलाहिसी बे-बेत्तो लेट्मिडिम बाइडा। 15 मे सेर्पा मु़चु़मिमका गुमीलाई ल्वाम्डी मेडे ङाङाया दु़म्मिडी, मा ओन्तो लम्डिमा सेव साट्मिडी। 16 मेकोतिमा येशूका उनी सीसिपामिमनुङ हिलाबेम्डी, “गानी मेर्मिमनुङ हाम र्वाबेत्तो बेन्नी?” 17 मे सेर्पा मु़चु़मिमगोडाम कोले मु़चु़का येशूनुङ र्वाक्ता, “ङाचो़, आमा तारापाचो़लाई जेमु मेग्वाक्पा मुनाङपेलका हुप्डु़म बु, मेम्मिमका इनीमाडा रेत्तोम बु। 18 मेरामका हुप्डु़लो क्वायु़ लेप्बोकु़, उ सिलामका जाजाब्लु़म पारु़, उ लि पु़, मा काकार्या दु़म्ल्या। मेम्मिमका गो इनीमा सीसिपामिमलाई मुनाङपेल ख्लुबेत्तोमी, लावो मेर्मिमका ख्लुमु मेचाप्मिवा।” 19 येशूका मेर्मिमलाई र्वाम्डी, “ए थो़र मान्थिम मु़चु़नी! गो गानीनुङ हाङको बुङु मा? गो गानीलाई हाङको इम्मु? मेराम वोस्चो़लाई आसि फिट्नी।” 20 मेकोतिमा मेराम चो़च्चो़ येशूकाडा फिट्मिडी। मे मुनाङपेलका गुमीलाई ल्वास्तु़ मेडे मे चो़च्चो़ थि-थि रक्तु़मा क्वायु़ लेप्बोक्तु़। मेकोतिमा मेरामका उ सिलामका जाजाब्लु़म पार्तो पुलिएली बोमु चो़म्डु़। 21 गुमीका मे चो़च्चो़कु पापनुङ हिलाबेम्डी, “हेलो आथाम ओरामलाई आरे दु़स्ताम?” मेरामकु पापका र्वाक्ता, “चो़च्चो़लो आथामङा, 22 ओरामलाई ओराम मुनाङपेलका याङलो मुड्डा, याङलो कुड्डा घ्रोक्साका राप्राङा सेडु़मिम बु, मेम्मिमका गानी हे-हाम बोमु चाम्नी माला, इनीमा नथो़मका ख्लो़किनी।” 23 येशूका मेरामलाई र्वाम्डी, “गाना हेङा चाम्नी माला र्वानामिम? थो़रलु़पाका बोमु मेचाप्सु़मिम ने हाम वो मिबु।” 24 मेकोतिलोङा मे वोस्चो़कु पापका येस्तामा र्वाक्ता, “गो थो़र लु़ङु, लावो आमा थो़रमेलु़सीडा ख्लो़ङिनी।” 25 मे सेर्पा मु़चु़मिम ओन्तो बिक्पा ल्वाम्डिमका येशूका मे मुनाङपेललाई आरे र्वाम्डिमा भुर्मिडी, “ए मेजेबेट्पा नुङ मेथो़बेट्पा मुनाङपेल, गो गानालाई र्वाङु, गाना मेराम वोस्चो़लामका लुक्ल्याडा, मा मेरामकाम गोनो आथाडाम आनो हाम्सी वो मेहुङा।” 26 मेकोतिमा मे मुनाङपेल येस्तामा मे वोस्चो़लाई थि-थि रक्तोङा मेलामका लुक्ल्याड्डा, मा मेराम वोस्चो़ सिपा होप्मामङा दु़स्ता। ओराम ल्वाम्डिमा मेसिन्डा बाट्पामिमका वो ओराम ने सिडा रेछा र्वाक्पा मिम्सिम्डी। 27 लावो येशूका मेरामलाई उमा ल्वाडा जेट्मिडिमा फम्डी, मा मेराम वोस्चो़ बक्ता। 28 मेकोतिमा येशू नेमगोनो बाम्डिम थारीका उनीमा सीसिपामिमका उनी त्वाप ङा बाम्डिलो आरे र्वाम्डिमा हिलाबेम्डी, “हेङा गुकु मेरामलाई ख्लुमु मेचाप्कुवाम?” 29 गुमीका मेर्मिमलाई र्वाम्डी, “आरेप्माम ने सो़म्दीडाम वाङमी हामका वो ख्लुमु मेझाम।” 30 मेकोतिमा येशू नुङ उनी सीसिपामिम मेलामका लुम्डिमा गालील दु़म्तो लम्डी। गुमी बान्थो़ बुमी र्वाक्साका सु़का वो मेथो़मिनु़ र्वाक्पा येशूकु न बाइडा। 31 हेङालोने गुमीका उनीमा त्वाकु सीसिपामिमलाई आरे र्वाक्तोङा सीत्तो बेम्डी, “मिनीचो़ मु़चु़मिमकु ल्वाडा ग्वाला सो़सी, मा मेर्मिमका सेन्मी। लावो सेन्मिमिमकु सुलेम नेम मेराम सिमुलामका ब गे।” 32 लावो गुमीका र्वाम्डिम ल्वा मेर्मिमका थेसिमेथेट्मिवा, मा हिलाबोमु वो ङिम्डी। खोत्लेडाम डोक्पु सु़? ( मत्ती १८:१-५ ; १०:४२ ; लूका ९:४६-५० ) 33 मेकोतिमा येशू नुङ उनीमा सीसिपामिम कफर्नहुम शहरडा रोम्डी, मा कोङ नेमगोनो बाम्डिलो गुमीका उनी सीसिपामिमलाई हिलाबेम्डी, “गानी लाम्दीडा हाम हिलाहिसी बेबेन्निम बान्निम?” 34 लावो मेर्मिम मेजेसाका ङा बाम्डी, हेङालोने लाम्दीडा मेर्मिमका, “उनी त्वाप गोडा खोत्लेडाम डोक्पु सु़?” र्वाक्साका हिलाहिसी बेबेम्डिम बाइडा। 35 मेकोतिमा गुमी गन्मिडी, मा को-न उनीमा सीसिपामिमलाई येट्मिडिमा र्वाम्डी, “उहेम मु़चु़का खोत्लेडाम ङादो दु़म्मु न बु़, मेराम खोत्लेकु चङडा नुङ खोत्लेकु डु़ल्चो़ दु़म्मु बासी।” 36 मेकोतिमा गुमीका कोले चो़च्चो़ रम्डिमा मेर्मिमकु ङादोडा येम्सिबेट्मिडिमा मेरामलाई उनी फेम्ताडा गट्मिडिमा मेर्मिमलाई र्वाम्डी, 37 “उहेमका आमा नङडा आरेप्माम याक्के चो़च्चो़मिमडाम कोले रङु़, मेरामका गोलाई ङा रङी। उहेमका गोलाई रङी, मेरामका गोलाई कोङङा मेएँ, गो थु़र्पालाई ङा रङु़।” 38 यूहन्नाका गुमीनुङ र्वाक्ता, “रब्बी, कोले मु़चु़का इनी नङडा मुनाङ कोल्लु़म गुकु ल्वात्तोको। मेकोतिमा गुकु मेरामलाई मेम बोमु मेग्वाक्कुवा, हेङालोने मेराम गुइनुङ लाम्दिपागोडाम मेबायावा।” 39 लावो गुमीका र्वाम्डी, “मेरामलाई मेम मेबेनी, हेङालोने आमा नङडा यु़म-खारी बेपाका आमा नङडा मेजो़पा मेजेल्या। 40 उहेमका इकीमा नङडा मेजो़पा मेजे, मेराम गुइलामङा बासी। 41 उहेमका गानी ख्रीष्टकु मु़चु़ मिम्सीमा आमा नङडा को कान्चु़रे कु कोङङा लोवो डुमु ग्वानी माला आच्छाङा गो गानीनुङ र्वाङु, मेरामका पुरस्कार ल्वासु़।” सु़लाई वो छु़ल बेबेसिमेनु़ ( मत्ती १८:६-९ ; लूका १७:१-२ ) 42 “गोडला थो़र लु़पा ओर्मिम याक्केमिमगोडाम कोलेलाई उहेमका छु़ल बेबेडु़, मेरामलाई ने उ लक्चाडा कोले डोक्पु खुरुक लुङ चेन्मुमा दिरिदिनगोयु़ घ्रोम्सोमु ङा जो़पा दु़म्सावा। 43 इमा त्वाकु ल्वाकाङा छु़ल बेबेना माला, मेराम क्रिप्डामा घ्रोक्सोका, हेङालोने नले ल्वा बासाका वो खादीयु़म हेल्लो वो मेसिपा मुगोयु़ लमुडाम ल्वा मान्थिम ङा दु़म्साका हेल्लो मेसिपा त्वारो़म ल्वासिमिम पाह्रीगोनो हुमु जो़पा दु़म। 44 [खादीयु़ ने ना मु ङा सि, ना क्रोडिमिम ङा सिमी।] 45 इमा खेलका छु़ल बेबेना माला, मेराम क्रिप्डामा घ्रोक्सोका, हेङालोने नले खेल बासाका वो खादीयु़ घ्रोला सो़म्सिमुडाम ने खेल मान्थिम दु़म्मुमा हेल्लो वो मेसिपा त्वारो़म ल्वासिमिम पाह्रीगोनो हुमु जो़पा दु़म। 46 [खादीयु़ ने ना मु ङा सि, ना क्रोडिमिम ङा सिमी।] 47 इमा मिक्सीका छु़ल बेबेना माला, मेराम वो थासामा घ्रोक्सोका, हेङालोने नले मिक्सी बासाका वो खादीयु़ घ्रोला सो़म्सिमु ने कोले ङा मिक्सीनुङ ङा लोवो माम्चु़नीकु किब्दीगोनो हुमु ङा जो़पा दु़म। 48 खादीयु़ ने ना मु ङा सि, ना क्रोडिमिम ङा सिमी। 49 हेङालोने मुका ङा खोत्लेकाडा यो लु़बेडु़। 50 “यो ने जो़पा ङा दु़म, योड्डा यो मेलु़ माला ने हामका यो लु़ बेन्मु मा? मेम्मिमका गानी इनी त्वाप-त्वापडा ङा यो जु़ल्सिट्नी, मा खोत्लेनुङ इनीमा न-गो भ्रहोम दु़बेट्निमा बानी।” |
© Wycliffe Bible Translators, Inc. All rights reserved.
Wycliffe Bible Translators, Inc.