मर्कूस 7 - थुलुङ राईछेपा नुङ मेछेपाकु दुथाम येशूकु सीसि ( मत्ती १५:१-२० ) 1 कोलेम यरूशलेमलामका योक्पा फरिसीमिम नुङ यहूदीमिमकु डु़म्ला सीपा पातु़म्रीमिम येशूकु होनोलाम-आथो़लाम खोम्सिम्डी। 2 येशूकु कोङ-कोङ सीसिपामिमका, मेसेपा ल्वाका, मेराम र्वाक्मा ल्वा मेसो़ल्साका ङा पेम्डिम मेर्मिमका ल्वाम्डी। 3 हेङालोने फरिसीमिम नुङ खोत्ले यहूदीमिमका उनीमा बेप-पापका बेम्खेम्डिम होम्साका ल्वा मेसोल्थु़म मेपोमी। 4 मेर्मिम बजारलाम रोमिमा मेसो़ल्सिसाका मेपोमी। आरेप्मामङा वाङमी वो हापा ङा बेप-पापलोम बेम्खेम्डिम बु, मेर्मिमका कान्चु़रे, सोजाम-मोजाम नुङ बुलुकु सोजाममिम मेक्लो़थु़म मेपोमी। 5 मेकोतिमा फरिसीमिम नुङ यहूदीमिमकु डु़म्ला सीपा पातु़म्रीमिमका गुमीनुङ हिलाबेम्डी, “हेङा इनीमा सीसिपामिमका बेप-पापका बेम्खेम्डिम होम्साका मेबेसाका मेसेपा ल्वाका ङा पोमिमिम?” 6 मेम्मिमका गुमीका मेर्मिमलाई र्वाम्डी, “गानी मिनी मिक्सीलामडा जो़पा लिसिपामिमकु दुथाम यशैयाका माम्चु़नीलाम जेस्ताम जो़पाङा रेछा। गुका आरेसाका र्याक्तु़म बु: ‘ओर्मिमका गोलाई उनी सिका कोङङा जो़पा बोङिमी, लावो मेर्मिमकु न-गो ने गोडाम होनोङा बु। 7 मेर्मिमका आमा नङ मेडेङा रमी, हेङालोने मेर्मिमकु सीसि मु़चु़मिमका सीट्मिडिम डु़म्ला कोङङा सो़।’ 8 माम्चु़नीका बेनी र्वामिम होङङा मेबेसाका बेप-पापका बेम्खेम्डिम मु़चु़कु बेसी कोङङा गानी बोनी।” 9 गुमीका मेर्मिमलाई र्वाम्डी, “माम्चु़नीकु डु़म्ला कोर्थो़ जु़ल्साका इनीमा बेप-पापका बेम्खेम्डिम होङङा बोमु गानी छो़म थेट्पा बुनी। 10 हेङालोने मोशाका र्वाक्ताम बु, ‘त्वाकु माम-पापलाई जो़होमका रेप्नी, मा उहेमका उमा माम पाप वाइतो बेडु़ मेराम सेन्मुङा बासी।’ 11 लावो गानी, ‘कोलेका उमा माम-पापलाई ग्वामु बासिपा ने कुर्बान दु़स्ताम बु’ (कुर्बान र्वाक्मा ने माम्चु़नीकु नङ बेम्मा।) र्वानु़ र्वाक्पा सीनी, 12 आरेसाका गानी मेरामलाई उ माम-पापकु दुथाम हाम वो बोमु मेग्वानी। 13 आरेसाका गानी इनीमा बेप-पापका बेम्खेम्डिम होम्साका बोनिमा माम्चु़नीकु सिजेम ने हाम ना हामकाम दु़म्बेनी। आरेप्माम ङा वाङमिम वो गानी छो़म बोनी।” 14 गुमीका आथावो मे मु़चु़मिमलाई उनीमाथो़ येट्मिडिमा र्वाम्डी, “गानी खोत्लेका गो र्वाङुमिम ल्वा थो़नी, मा थेसिथेट्नी। 15 पाखालाम मु़चु़कु गोनो हुसाका गुलाई मेसेपा दु़म्बेट्पा हाम वो मिबु, लावो मु़चु़लामका पाखानो लुक्पामिमकाङा गुलाई मेसेपा दु़म्बेडु़। 16 उहेमकाम थो़मु न बु, मेरामका थो़सु़नु़।” 17 मेकोतिमा मे सेर्पा मु़चु़मिम डिट्जो़ल्साका येशू कोङ नेमगोनो हुम्डिलो उनीमा सीसिपामिमका सीसि-सो़म्दीकु दुथाम हिलाबेम्डी। 18 गुमीका मेर्मिमलाई र्वाम्डी, “आकोति वो थेसिमेथेनिमिम? पाखालामका मु़चु़गोनो हुपा हामका वो गुलाई मेसेपा दु़म्मेबेडु़ र्वाक्पा गानी आथावो थेसिमेथेनी? 19 हेङालोने मेराम मु़चु़कु गोगोनो मेएँ ख्वाचेपगोनो ल, मा मेलामका पाखानो लुल्या।” (आरेसाका खोत्ले पोमुथोकमिम सेपाङा दु़म र्वाक्साका गुमीका र्वाम्डी।) 20 गुमीका र्वाम्डी, “मु़चु़लामका पाखानो हाम लु, मेरामका ङा मेसेपा दु़म्बेडु़। 21 हेङालोने मेजो़पा न, नाम्सु़रु़, खुमु, सेन्मु, वाङमिम मेसेमनुङ अम्पा न बोमु, 22 रारी, मेजो़पा बेसी, लिमा, वाङमिम मेसेमनुङ अम्पा न, सु़ङखार, डक्साका जेमु, डोक्पुलिम्सिमु, नेप्ची मान्थिम दु़म्मु ओर्मिम खोत्ले मु़चु़कु गोलामका लुमी। 23 ओर्मिम खोत्ले मेजो़पामिम मु़चु़कु गोलामका लुमी, मा मेर्मिमका ङा मु़चु़लाई मेसेपा दु़म्बेडु़मी।” कोङ वाङसामा मेसेमकु थो़र ( मत्ती १५:२१-२८ ) 24 मेकोतिमा येशू मेलामका बम्डिमा टुरोस नुङ सीदोनथो़ लम्डी, मा कोङ नेमगोनो हुम्डी। ओराम ल्वा सु़का वो मेथो़मिनु़ र्वाक्पा उनी न बाइडा, लावो गुमी मेल्वाला सो़सिसाका बुमु मेचाप्मिवा। 25 मेकोतिलोङा कोङ मेसेमका मेराम ल्वा थो़स्तु़, मेम्मिमका रोक्तामा येशूकु खेल चु़म्डु़मा सेव साड्डु़, हेङालोने मेरामकु याक्के जाउमो चो़ मुनाङपेलका हुप्डु़म बाइडा। 26 मेराम सिरियाकु फोनिकेडा गस्ताम ग्रीक वाङसामा मेसेम बाइडा। मेराम मेसेमका गुमीनुङ, “आमा जाउमो चो़कु रो़मलामका मुनाङपेल कोल्साट्नी” र्वाक्ताम-र्वाक्तामङा बु़डु़होम बाइडा। 27 गुमीका मेराम मेसेमलाई र्वाम्डी, “ङादो त्वाकु चो़च्चो़मिमलाई पोमु ग्वामु बासी, हेङालोने चो़च्चो़मिमकु सो़बेम रोमुमा ख्लेबामिमलाई घ्रोक्सासी मेनु़।” 28 मेराम मेसेमका र्वाक्ता, “मेम ने, मेमङा जो़पा दु़म, लावो टेबलकु गोयु़ बाट्पा ख्लेबामिमका वो चो़च्चो़मिमका डमिम सो़बेमकु प्वाक्चो़लमिम ने पोमी।” 29 गुमीका मेराम मेसेमलाई र्वाम्डी, “गाना आरे र्वानामका ङा इमा नेम लक्सा। इ याक्के जाउमो चो़कु रो़मलामका मुनाङपेल लुम्ल्यामु दु़म्स्तु़म बु।” 30 मेराम मेसेम नेम रोक्थिड्डालो उमा याक्के जाउमो चो़ मुनाङपेलका बासी ङा डिथाड्डु़म बाइडा, मा खाटडला अम्ल्याट्पा बाइडा। येशूका सि मेजेपा नुङ नोफ्लाका मेथो़पालाई सबेट्मिडिम 31 येशू टुरोस शहरलामका लुम्डिमा, सीदोन नुङ डेकापोलिस क्षेत्र दु़म्तो गालील दिरिदिनथो़ लम्डी। 32 मेसिन्डा मु़चु़मिमका नोफ्लाका मेथो़पा नुङ जो़होमका मेजेपा कोले मु़चु़ उनीमाडा रेट्मिडी मा मेर्मिमका, “इनी ल्वा जु़ल्नी” र्वाम्डिम-र्वाम्डिमङा बेम्डिम बाम्डी। 33 गुमीका मेरामलाई मे सेर्पा मु़चु़मिमडाम वाङथो़ ङा लम्डिमा, उनीमा ब्रेप्चो मेरामकु नोफ्लागोनो फिम्डी। मेकोतिमा थक्सीबेम्डिमा मेरामकु लेमडा लु़प्मिडी। 34 मेकोतिमा पाह्रीथो़ रेप्मिडिमा धु़प्पा साम खेत्तोङा मेरामलाई र्वाम्डी, “इफ्फाता” मेराम “होल्ल्यासिडा” र्वाक्मा। 35 मेकोतिलो ङा मेरामकु नोफ्ला होल्यासिट्डा, मा उमा लेम भ्रोल्यासिड्डा, मा मेराम जो़होमका जेमु चो़म्डु़। 36 येशूका मेर्मिमलाई र्वाम्डी, “मामा सो़! ओराम ल्वा सु़नुङ वो मेसो़नी वो।” लावो गुमीका हाङको मेर्मिमलाई मेम बेम्थाल्मिडी, मेकोति छो़म ङा हापा मेर्मिमका मेराम ल्वा सो़म्थाल्मिडी। 37 ओराम ल्वाम्डिमा मु़चु़मिम छो़म ङाङाया दु़म्मिडी। मेकोतिमा र्वाम्डी, “गुमीका बेम्डिम खोत्ले जो़पा नु़पा ङा बु। गुमीका ने मेथो़पालाई थो़पा, मा मेजेपालाई जेमुचापा बनेबोमी रेछा।” |
© Wycliffe Bible Translators, Inc. All rights reserved.
Wycliffe Bible Translators, Inc.