मर्कूस 6 - थुलुङ राईनासरतडा येशू नाप्छु़ट्मिडिम ( मत्ती १३:५३-५८ ; लूका ४:१६-३० ) 1 येशू मेलामका उनी त्वाकु देलडा लम्डी, मा उनी सीसिपामिम वो गुमीनुङङा लम्डी। 2 ङेम्सिमुनेम घ्रो़म्दीनेमडा गुमीका सीमु चो़म्मिडी, मा मेराम थो़पा खोत्लेङा ङाङाया दु़म्तोङा र्वाम्डी, “ओरामका ने हे-हेप्माम यु़म-खारी डे बु़ रेछा! ओरामका ओर्मिम बान्थो़ डे ल्वास्तु़? हेप्माम डे ओरामकु नेप्ची ने! 3 ओराम ने मे मरियमकु चो़ याकूब, योसेफ, यहूदा, नुङ सिमोनमिमकु वा, मे सङ बनेबेपाङा मेएँ मा? ओरामकु रिचो़मिम गुइनुङ ङा बुमिम मेएँ?” र्वाम्डिमा गुमीलाई नाप्छु़ट्मिडी। 4 मेकोतिमा येशूका मेर्मिमलाई र्वाम्डी, “माम्चु़नीलाम-जेपा मु़चु़ उमा त्वाकु देलगुथाडा, उमा त्वाकु मु़चु़मिमगोडा, मा उमा नेमगोडा कोङङा नाप्छु़न्मी।” मेरामडाम वाङथो़ खोत्लेथो़ गुमीलाई डोक्पु बोमी। 5 गुमीका मेसिन्डा कोङ-कोङ नो़पामिमडला ल्वा जु़ल्साका सबेट्मिडिमडाम वाङमी यु़म-खारी हाम वो बोमु मेचाप्मिवा। 6 मेर्मिम थो़र मेलु़मिवामडाम येशू ङाङाया दु़म्मिडी। मेकोतिमा गुमी देलबाडे सीत्तोङा लम्डी। येशूका सीसिपामिमलाई जो़पा-सेला सो़प्डा थु़र्मीडिम ( मत्ती १०:५-१५ ; लूका ९:१-६ ) 7 गुमीका को-न (१२) सीसिपामिमलाई उनीमाडा येट्मिडी, मा मेर्मिमलाई न-नले बेसाका थु़र्मिडी। मेर्मिमलाई मुनाङपेल ख्लुक्पा साखाम वो ग्वाम्डिमी। 8 गुमीका मेर्मिमलाई र्वाम्डी, “गानी लाम्दीडा लनिलो कोङ डु़लु़म्चो़ डाम वाङमी सो़बेम, फाजी, खउलुङ हाम वो मेकुर्नी। 9 सो़लो़प ख्लु़सिट्नी लावो इनीमा रो़मडाम फतासिनिमिम येडाम वाङमिम ये-सेम मेकुर्नी।” 10 गुमीका मेर्मिमलाई आथावो र्वाम्डी, “गानी उहेम नेमडा हुनी, मेराम देल मेडिथु़म मेराम नेमडाङा बानी। 11 गानी उहेम देलडा लनी मेसिन्डाममिमका जो़होमका मेरनिमिवा मा गानी र्वानिमिम मेथो़मिवा माला, गानी मेलामका लुनिलो माम्चु़नीका मेर्मिमलाई मेद्वामी मा देन्दे ग्वामी र्वाक्पा रेम्बोमु इनीमा फेमखेलडाम फुर्कु वो थेप्जो़ल्नी।” 12 मेकोतिमा मेर्मिम लम्डिमा मु़चु़मिम उनी छु़ललामका ख्लोसिमिनु़ र्वाक्तो जो़पा-सेला सो़मु चो़म्मिडी। 13 मेर्मिमका छो़म सेर्पा मुनाङमिम ख्लुम्डी, मा सेर्पा नो़पामिम वो तेलका क्लक्साका सबेट्मिडी। कु-रु़दु़म ग्वाक्पा यूहन्ना उ बुइ क्रिप्साका सेट्मिडिम ( मत्ती १४:१-१२ ; लूका ९:७-९ ) 14 हेरोद हपका येशूकु दुथाम थो़स्तु़, हेङालोने उनीमा नङ खोत्लेथो़ फोन्स्ताम बाइडा। मेम्लोका कोङ-कोङका र्वाम्डी, “ओ ने कु-रु़दु़म ग्वाक्पा यूहन्ना डे सिमुलाम बक्गेड्डाम रोओ, मा डे आरेप्माम यु़म-खारी बु़।” 15 वाङमिमका र्वाम्डी, “ओराम ने एलिया डे रोओ।” आथावो वाङमिमका र्वाम्डी, “माके-माकेम माम्चु़नीलाम-जेपा मु़चु़मिम होप्मामङा कोले डे रोओ!” 16 हेरोदका ओराम थो़स्तु़मा र्वाक्ता, “हना, गो उ बुइ क्रिम्बेत्तोमिम यूहन्ना सिमुलामका बक्गेड्डाम?” 17 हेरोदका उ ल्वाक फिलिपकु नाइमे हेरोदियासकु दुथाम यूहन्ना चु़म्बेड्डु़मिमा झ्यालखानडा चबेड्डु़मिम बाइडा। हेङालोने हेरोदका हेरोदियास लडु़म बाइडा। 18 यूहन्नाका हेरोदलाई, “गानी इनी ल्वाक देल्मी जु़ल्सिमेनु़” र्वाक्थाल्लाम बाइडा। 19 हेरोदियास यूहन्नाडाम उ छोक्छोका इप्ल्याड्डु़म बाइडा, मा मेरामलाई सेन्मु न बु़थाल्लु़म बाइडा। लावो सेन्मु मेचाप्थिङा बाइडा। 20 हेङालोने यूहन्ना जो़पा-नगोनुङमा नुङ सेपा मु़चु़ र्वाक्साका हेरोद गुनुङ ङिस्थाल्लाम बाइडा। मेम्मिमका गुका जो़होमका जु़ल्लु़म बाइडा। यूहन्नाकु सिजेम थो़स्थाल्लु़लो उ नडा हाम बोमु हाम बोमु दु़स्थाल्ला, लावो गेर्सिसाका ङा थो़स्थाल्लु़। 21 हेरोदका गु गस्ताम-नेम मिम्मुकु दुथाममिम ग्रुला उमा डोक्पु मु़चु़मिम, सेनाडाम डोक्पु मु़चु़मिम नुङ गालीलडाम डोक्पु मु़चु़मिमलाई ग्वाक्तु़मिलो ङा हेरोदियासकु न होप्माम थारी रोक्फाड्डा। 22 हेङालोने हेरोदियासकु मेसेम चो़ मेगोनो हुङडामा छो़म्डा, मा मेरामका हेरोद नुङ उ बोच्चो़मिम खोत्लेङा गेर्सिबेड्डु़मी। मेम्मिमका हपका मेरामलाई र्वाक्ता, “गाना हाम बिमु न बोना बिया, गो मेरामङा ग्वानी।” 23 गुका ससि बु़डु़मा मे मेसेमलाई र्वाक्ता, “गाना गोनुङ हाम बिना, गो को फ्वाक्चो़ल आमा किब्दी ङा लोवो ग्वानी।” 24 मेकोतिमा मेराम पाखानो लुक्तामा उ मामनुङ हिलाबु़डु़, “गो हाम बिमु?” उमा मामका र्वाक्ता, “कु-रु़दु़म ग्वाक्पा यूहन्नाकु बुइ बिया।” 25 मेकोतिमा मेराम मेसेम हपकाडा ख्लोल्यासिड्डा, मा आरे र्वाक्तोङा बियु़डु़, “गोलाई ओम्लोङा कु-रु़दु़म ग्वाक्पा यूहन्नाकु बुइ कोङ सोजामडा रेट्निमा ग्वाक्ङिनी र्वाक्पा न बेउ।” 26 ओराम ल्वाका हपकु गो छो़म नो़डा। लावो मे गुका बु़डु़म ससि नुङ बोच्चो़मिमकु दुथाम मे मेसेमलाई मेएँ र्वामु मेचाप्सु़वा। 27 मेकोतिमा हपका कोले मु़चु़ सेट्पा सिपाहीलाई यूहन्नाकु बुइ क्रिप्डामा फिडा र्वाक्साका थु़र्ल्याड्डु़। मेकोतिमा मेराम झ्यालखानगोनो लस्तामा यूहन्नाकु बुइ क्रिप्डु़, 28 मा मे यूहन्नाकु बुइ कोङ सोजामडा जु़ल्लु़मा मे मेसेमकु ल्वाडा ग्वाक्तु़, मा मेरामका उमा मामलाई ग्वाक्तु़। 29 यूहन्नाकु सीसिपामिमका ओराम ल्वा थो़म्डी। मेकोतिमा मेर्मिम रोम्डिमा यूहन्नाकु सिप्ल्याक्पा रो़म लम्डिमा सु़लु़मगोनो जु़ल्मिडी। येशूका ङो धु़मसङ मु़चु़मिमलाई पोमु ग्वाम्डिमिम ( मत्ती १४:१३-२१ ; लूका ९:१०-१७ ; यूहन्ना ६:५-१३ ) 30 मे थु़र्मामिम येशूकाडा ख्लोम्सीम्डिमा रोम्डी। मेकोतिलो मेर्मिमका हा-हाम बेम्डिम, सीट्मिडिम मेर्मिम खोत्ले ङा गुमीनुङ सो़म्डी। 31 गुमीका मेर्मिमनुङ र्वाम्डी, “गानी वो गोनुङ मेल्वाखोपडा लाम्दिनी, मा घरिकोङ ङेन्सिट्नी।” हेङालोने मेसिन्डा रोक्पा-लक्पामिम छो़म सेर्पा बाम्डी। मेम्मिमका मेर्मिमका पोमु वो मेयु़ट्मिवाम बाइडा। 32 मेकोतिमा येशू नुङ उनी सीसिपामिम मेल्वाहोमका उनी त्वाप कोङङा कुबी-बोक्साडा हुम्डिमा मेल्वाखोप्डा लम्डी। 33 लावो छो़म सेर्पा मु़चु़मिमका येशूनुङ उनी सीसिपामिम लक्तोङा बेपा ल्वाम्डी, मा छेट्मिडी वो। मेम्मिमका खोत्ले शहरलामका दाला-दाला ओन्तो लम्डी, मा येशू नुङ उनी सीसिपामिमडाम वो ङादो रोम्थिम्डी। 34 येशू कुबी-बोक्सालामका पाखाथो़ लुम्डिलो मेसिन्डा छो़म सेर्पा मु़चु़मिम ल्वाम्डी। मेर्मिम ल्वाम्डिमा छो़म उनी थो़म भ्रो़स्ता, हेङालोने मेर्मिम रेपा-क्रिपा मु़चु़ मान्थिम भेन्दामिम होप्माम बाम्डी। मेकोतिमा मेर्मिमलाई छो़म सेर्पा ल्वामिम सीमु चो़म्मिडी। 35 नेम्था दु़म्मु खाप्डु़लो येशूकु सीसिपामिम उनीमाडा रोम्डिमा र्वाम्डी, “गुइ सु़ वो मेबाट्पा खोमडा बुइ, मा आथा ने दुङमा वो र्यामु दु़म्स्तु़। 36 मेम्मिमका ओर्मिम मु़चु़मिमलाई थु़र्सोट्निमी, मा मेर्मिम होनो-आथो़म देलबाडे लमिनु़मा उनी त्वाका पेपा हाम-हुम भ्रेमिनु़।” 37 लावो गुमीका मेर्मिमलाई र्वाम्डी, “गानी ङा ओर्मिमलाई हाम-हुम पोमु ग्वाक्निमी।” मेर्मिमका गुमीनुङ र्वाम्डी, “हाम गुकु ङा लमुमा न सङ दिनारकु थिकाम सो़बेम भ्रेमुमा ओर्मिमलाई पोमु ग्वामुमि मा?” 38 गुमीका मेर्मिमलाई र्वाम्डी, “लक्निमा रेप्नी! गानीनुङ हाले सो़बेम बु?” मेर्मिमका रेप्मिडिमा र्वाम्डी, “ङोले सो़बेम नुङ नले ङो बु।” 39 मेकोतिमा गुमीका मे मु़चु़मिमलाई गिगियाम जेम बाट्पा येडा तङ-तङका गन्बेट्मिडी। 40 मेकोतिमा मेर्मिम ङो धु़म, ङो धु़म नुङ को सङ, को सङ दु़म्साका तङ-तङका गन्मिडी। 41 येशूका मे ङोले सो़बेम नुङ नले ङो रम्डिमा पाह्रीथो़ रेप्मिडी, मा जि ग्वाम्डी। मेकोतिमा मे सो़बेममिम चम्डी, मा मु़चु़मिमलाई दो़न्साट्नी र्वाक्साका उनी सीसिपामिमलाई ग्वाम्डी। मेम्मा मे नले ङो वो गुमीका मेर्मिम खोत्लेनुङ दो़म्डी। 42 मेकोतिमा खोत्लेका पेम्डी, मा खोम्डी। 43 मेम्मा मे घ्लेट्पा सो़बेम नुङ ङोकु फ्वाक्चो़लमिम सीसिपामिमका खोप्मिडिलो को-न (१२) खचा दु़स्ता। 44 मेसिन्डा सो़बेम पेपा मु़चु़मिम ङो धु़मसङ कोति बाम्डी। येशू कुकु थेम-थेम लाम्दिम्डिम ( मत्ती १४:२२-३६ ; यूहन्ना ६:१५-२१ ) 45 मे मु़चु़मिम मेलामका थु़र्तो बेम्डिलो ङा येशूका उनी सीसिपामिमलाई कुबी-बोक्साडला हुबेट्मिडी, मा गुमीडाम ङादोङा होनो होम्बुनोम बेथसेदाथो़ थु़र्ल्याम्डी। 46 मे सेर्पा मु़चु़मिमनुङ ब्र्वाम्सिम्डिमा गुमी पोप्चङडला सो़म्दी बेप्डा लम्डी। 47 ने-नेमथाका मे कुबी-बोक्सा दिरिदिनकु थेत्तेनो बाइडा, मा गुमी ने आथो़होम्बुडा उनी त्वाप ङा बाम्डी। 48 मेर्मिमका कुबी-बोक्सा मेचाप्तो ङादोथो़ लक्तोङा बेम्डिम गुमीका ल्वाम्डी, हेङालोने ब्लोजु़ उनी कोर्थो़लामका फुत्तोङा बु़डु़म बाइडा। गुमी सिन्था सु जेस्तालो दिरिदिनडलाङा लाम्दित्तो बिक्तोङा बेम्डी, मा मेर्मिमडाम लाम बमु ङा खाप्मिडिम बाइडा। 49 मेर्मिमका गुमीलाई दिरिदिनडला लाम्दित्तोङा बेपा ल्वाम्डिमका “गुमी ने मुनाङ रोओ!” र्वाक्पा मिम्सिम्डिमा मेर्मिम येम्डी। 50 येशू ल्वाम्डिलो मेर्मिम खोत्लेङा ङिम्डी। मेम्मिमका गुमीका मेर्मिमलाई र्वाम्डी, “गो डे! मेङिनी! इनी लो़ मेदाम्नु़!” 51 मेकोतिमा गुमी मेर्मिम बाट्पा कुबी-बोक्साडा हुम्डी मेडे ब्लोजु़ वो फुन्मु डिथाड्डु़। मेम्मिमका मेर्मिम ङाङाया दु़म्मिडी। 52 हेङालोने मेर्मिमका सो़बेमकु दुथाम हाम वो थेसिथेट्मिडिम मेबायावा। लावो मेर्मिमकु नगो लुङ होप्माम दु़स्ताम बाइडा। 53 येशू नुङ उनीमा सीसिपामिम दिरिदिन होम्बुनो लुम्डिमा गनेसरेत देलडा रोम्फाम्डी। मेकोतिमा मेर्मिमका कुबी-बोक्सा पाखानो ख्लुम्डी मा बट्मिडी। 54 गुमी कुबी-बोक्साडलाम पाखा लुम्डी मेडे मु़चु़मिमका येशू छेम्थाम्डी। 55 मेकोतिमा मेर्मिम होनो-आथो़म खोत्ले देलबाडे मेराम ल्वा थो़बेड्डा ओन्ल्याम्डी, मा येशू बान्थो़ बुमी र्वाक्पा थो़म्डी मेनो-मेनोङा नो़पामिम वो उनी प्लाननुङ ङा रेन्मु चो़म्मिडी। 56 मेम्मा गुमी शहर, देलगुथाबाडे बा-बान्थो़ लम्डी, मु़चु़मिमका नो़पामिम मेनो-मेनो ङा, बजारबाडे वो जु़ल्मिडी। मेकोतिमा किचो़ उनी हुम-ये कोङङा लावो लु़म्मु ल्वाकुनु़ र्वाक्तो मेर्मिमका गुमीनुङ र्वाम्डिम-र्वाम्डिमङा बेम्डिम बाम्डी, मा मे उनीमा हुम-ये लु़पामिम खोत्लेङा सम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.