मर्कूस 3 - थुलुङ राईयेशूका ल्वा साट्पा मु़चु़लाई ङेम्सिमुनेम सबेट्मिडिम ( मत्ती १२:९-१४ ; लूका ६:६-११ ) 1 आथावो किचो़ चङडा गुमी घ्रो़म्दीनेमडा लम्डी। मेसिन्डा ल्वा सोक्पा कोङ मु़चु़ बाइडा। 2 येशूकु बुइडला उन्मु लागि कोङ-कोङ मु़चु़का मेजो़पा ल्वा माल्बाल्मिडी। मेम्मिमका मे ल्वा सोक्पा मु़चु़लाई ङेम्सिमुनेम गुमीका सबेन्मी डे मेएँ र्वाक्साका सु़र्बाल्मिडी। 3 येशूका मे ल्वा सोक्पा मु़चु़लाई र्वाम्डी, “आसि खोत्लेकु ङादोडा येम्सा।” 4 मेम्मा गुमीका मेर्मिमलाई र्वाम्डी, “ङेम्सिमुनेम हाम बिइलो नु़, जो़पा डे मेजो़पा, नु़बेन्मु डे सेन्मु?” लावो मेर्मिम वाय-वाय बाम्डी। 5 येशूका मे लुङ होप्माम उनी न ल्वाम्डिमका उनी गो नो़डा, मा उनी छोक्छोका होनो-आथो़ रेप्मिडी। मेम्मा मेरामलाई र्वाम्डी, “इमा ल्वा थङा।” मेकोतिमा मेरामका उमा ल्वा थङडु़, मा उमा ल्वा ङादोम होप्माङा नु़ल्याड्डा। 6 मेकोतिमा फरिसीमिम मेलामका लम्डी, मा येशूलाई हेसाका सेन्मु र्वाक्साका हेरोदीमिमनुङ मुलु़ बोमु चो़म्ल्याम्डी। सेर्पा मु़चु़मिम येशूनुङ ( मत्ती १२:१५-१६ ; लूका ६:१७-१९ ) 7 मेकोतिमा येशू उनीमा सीसिपामिमनुङ दिरिदिनथो़ लम्डी। मेकोतिलो गालीललामका सेर्पा मु़चु़मिम गुमीनुङ लम्डी। 8 यहूदिया, यरूशलेम, इदुमिआ, यर्दन होम्बु, टुरोस नुङ सीदोनबाडेम छो़म सेर्पा मु़चु़मिम गुमीका बेम्डिम खोत्ले खारीमिम थो़म्डिमा उनीमाडा रोम्डी। 9 मे सेर्पा मु़चु़मिमका गुमीलाई मेचिम्मिनु़ र्वाक्साका उनीमा सीसिपामिमलाई कोले कुबी-बोक्सा रेन्बेट्मिडी। 10 हेङालोने येशूका छो़म सेर्पामिमलाई सबेट्मिडिमका खोत्ले नो़पामिमका गुमीलाई लु़म्मु र्वाक्साका क्र्वाम्सिम्डिम बाम्डी। 11 हाङकोलो मुनाङपेलमिमका गुमीलाई ल्वाम्डी मेकोतिलोङा, “गानी माम्चु़नीकु चो़” र्वाक्तो येत्तोङा उनी ङादोडा झार्थाल्मिडी। 12 लावो गुमीका ने गो सु़ र्वाक्साका गानी मा-मा वाङमिमनुङ सो़नी सो़ बेम्डी। येशूका को-न (१२) सीसिपामिम थुट्मिडिम ( मत्ती १०:१-४ ; लूका ६:१२-१६ ) 13 मेसिन्डाममा येशू पोप्चङडला लम्डी, मा गुमीका न बेम्डिम मु़चु़मिमलाई येट्मिडी, मा मेर्मिम वो उनीमाडा रोम्डी। 14 गुमीनुङ बुमु नुङ जो़पा-सेला दो़प्डा थु़र्मु येशूका को-न थु़र्मामिम थुट्मिडी। 15 मेकोतिमा मेर्मिमलाई मुनाङपेल कोल्पा साखाम वो ग्वाम्डी। 16 गुमीका थुट्मिडिम को-न थु़र्मामिम ओर्मिमङा: सिमोन, मेरामकु नङ गुमीका पत्रुस जु़ल्मिडी, 17 जब्दियाकु चो़चिप याकूब नुङ उमा ल्वाक यूहन्ना-मेर्चिपकु नङ ‘बोअनर्गेश’ जु़ल्मिडी। मेराम र्वाक्मा बुलु़लु़कु चो़। (बोअनर्गेश: ओराम र्वाक्मा डोक्पु लो़लामका दाला-दाला जेपा) 18 अन्द्रियास, फिलिप, बारथोलोमाइ, मत्ती, थोमा, अल्फयसकु चो़ याकूब, थेदियस, कनानडाम सिमोन, 19 मा येशूलाई भ्रेट्पा इस्करियोतडाम यहूदा। येशूनुङ बालजिबुल बु र्वाम्डिम ( मत्ती १२:२२-३२ ; लूका ११:१४-२२ ; १२:१० ) 20 मेकोतिमा गुमी नेम लम्डिलो मेसिन्डा सेर्पा मु़चु़मिम आथावो खोम्सिम्डिमका येशूनुङ उनी सीसिपामिमका पोमु वो मेयु़ट्मिवा। 21 उनी नेमडामका ओराम थो़म्डिमा, येशूलाई माल्ला रोम्डी, हेङालोने मु़चु़मिमका “गुमी उनी न मान्थिम बुमी” र्वाम्डिम बाइडा। 22 यरूशलेमलामका योक्पा यहूदीमिमकु डु़म्ला सीपा पातु़म्रीमिमका र्वाम्डी, “मेरामनुङ बालजिबुल मुनाङ बु, मा गुका मुनाङकु ङाउकाङा मु़चु़मिमकु गोलामका मुनाङमिम ख्लुकु़मी।” 23 मेम्मिमका गुमीका मेर्मिमलाई उनीमाथो़ येट्मिडिमा सीसि-सो़म्दीलामका जेमु चो़म्मिडी, “शैतानका शैतान हेसाका ख्लुमु चाप्सु़? 24 कोङ किब्दीगोनो त्वाप-त्वापङा क्वाल्बा बोमिमा मेदु़मी माला मेराम किब्दी मेडेङा दाम्मा ल। 25 मेम्साकाङा कोङ नेम गोनोङा क्वाल्बा बोमिमा मेदु़मी माला मेराम नेम वो मेडेङा दाम्मा ल। 26 शैतान वो उ त्वाप गोनो क्वाल्बा बु़मा मेदु़ माला, गु दाम्ल्या। 27 सोनुङमा मु़चु़ ङादो ङा मेबथु़म, मेरामकु नेम गोनो हुसाका उमा खाप्ची लमु मेचाप्सु़। मे उ सोनुङमा मु़चु़ ङादो बट्जो़लु़मा कोङङा मेरामका मेरामकु खाप्ची लमु चाप्सु़। 28 आच्छाङा गो गानीलाई र्वाङु, मु़चु़मिमकु खोत्ले छु़ल नुङ माम्चु़नीलाई डक्साका जेमिमिम हेम्सिमु चाप्सु़। 29 लावो माम्चु़नी-पेललाई डक्साका जेपामिमकु छु़ल हेल्लो वो मेहेम्सी, मा मेराम हाम्सी वो मेहेम्सिपा छु़ल दु़म।” 30 येशूका आरे र्वाम्डी, हेङालोने मेर्मिमका “गुमीनुङ मुनाङपेल बु” र्वाम्डिम बाइडा। येशूकु माम नुङ ल्वाकमिम ( मत्ती १२:४६-५० ; लूका ८:१९-२१ ) 31 मेकोतिमा येशूकु माम नुङ ल्वाकमिम रोम्डिमा पाखानो येम्सिम्डी, मा मेर्मिमका येशूलाई येड्डा गोनो कोङनिम थु़र्मिडी। 32 मेम्मा मे उनी होनो-आथो़ गन्तासिट्पा सेर्पा मु़चु़मिमका येशूलाई र्वाम्डी, “रेप्नी, इनी माम नुङ ल्वाकमिमका पाखानो गानीलाई येत्तोङा लेनिमी।” 33 मेम्लो येशूका मेर्मिमलाई र्वाम्डी, “सु़ आमा माम नुङ आमा ल्वाकमिम?” 34 मे उनी होनो-आथो़ गन्तासिट्पामिमलाई रेप्तोङा र्वाम्डी, “रेप्नी, ओर्मिम ङा आमा माम नुङ आमा ल्वाकमिम, 35 उहेमका माम्चु़नीकु न होम्साका बोमी, मेर्मिमङा आमा माम नुङ ल्वाक।” |
© Wycliffe Bible Translators, Inc. All rights reserved.
Wycliffe Bible Translators, Inc.