मर्कूस 16 - थुलुङ राईयेशू सिमुलाम बम्गेम्डिम ( मत्ती २८:१-८ ; लूका २४:१-१२ ; यूहन्ना २०:१-१० ) 1 ङेम्सिमु-नेमकु उ दिकाम नेम मरियम मग्दलिनी, याकूबकु माम मरियम नुङ सलोमीका भ्रपा नेम्पा मसला येशूकु रो़मडा क्लमुलाई भ्रेम्डी। 2 नेप्सुङनेम नेप्सुङ पिरिरी धो़स्तालोङा मेर्मिम मेसेम सु़लु़मथो़ लम्डी। 3 मेकोतिमा मेर्मिमका उनी त्वाप-त्वापगोडा ङा र्वाबेम्डी, “गुइलाई मे सु़लु़मकु ख्रेमलुङ सु़का होर्साक्सामिम?” 4 मेकोतिमा मेर्मिमका गेले रेप्मिडिलो सु़लु़मकु ख्रेमलुङ ने होर्थाक्मा ल्वाम्डी। मेराम लुङ छो़म डोक्पु बाइडा। 5 मेम्मा मेर्मिम सु़लु़मगोनो हुम्डिलो कोले स्वाला बुबुयाम ये फतासिट्पामा उनी जो़पलामका येम्तासिट्पा ल्वाम्डी, मा मेर्मिम छो़म ङाङाया दु़म्मिडी। 6 लावो मेरामका र्वाक्ता, “मेङिनी! गानी क्रूसडा चेट्मा नासरतडाम येशूलाई माल्निम बुनिम, मेएँ डे? गुमी ने आसिन्डा मेबुमी, गुमी ने सिमुलाम ख्लोम्सिमु दु़म्मिडिम बु। मेएँ माला रेप्नी, मेर्मिमका गुमीलाई आसिङा जु़ल्मिडिम बाइडा। 7 लक्नी, येशू इनीमा ङादो-ङादो गालीलथो़ ङा लक्तो बोमी र्वाक्साका उनीमा सीसिपामिम नुङ पत्रुसलाई सो़नी। गुमीका ङादो र्वाम्डिम होम्साका ङा गानी मेनो ल्वानिमी।” 8 मेर्मिम मेलामका उनी लो़ दाम्तो लुम्डिमा स्वाम्डी, मा मेराम ल्वा सु़नुङ वो मेसो़मिवा, हेङालोने मेर्मिम छो़म ङिम्डिम बाइडा। येशू मु़चु़मिमकाडा ल्वाला सो़म्सिम्डिम ( मत्ती २८:९-२० ; लूका २४:१३-५३ ; यूहन्ना २०:११-२३ ; थु़र्मा १:४-११ ) 9 [नेप्सुङनेम नेम्सोसोका ङा येशू सिमुलामका बम्गेम्डिमा ङादो मरियम मग्दलिनीकाडा ल्वाला सो़सिम्डी। उहेमलामका येशूका ङादो येतले (७) मुनाङमिम ख्लुम्डिम बाइडा। 10 मरियम लस्तामा ओराम ल्वा येशूकु सीसिपामिमनुङ सो़यु़डु़। मेकोतिलो मेर्मिम येशू सिम्डिमकु दुथाम येत्तो-ख्राप्तोङा बेम्डिम बाम्डी। 11 लावो येशू सिमुलाम बम्गेम्डिमा मरियमकाडा ल्वाला सो़सिम्डिम ल्वा थो़म्डिमा वो मेर्मिम थो़रमेलु़मिवा। 12 मेकोतिमा येशू कोङमीङा ङालीडा देलथो़ लक्तोङा बेपा नले सीसिपाचिपकाडा ल्वाला सो़सिम्डी। 13 मेम्मा मेर्चिम ख्लोसिच्चिमा लक्चिमा मेराम ल्वा वाङमी सीसिपामिमनुङ सो़च्ची, लावो मेर्मिम थो़र मेलु़मिवा। 14 चङडा को-कोङ (११) सीसिपामिम ग्रुला पेप्डा गन्मिडिलो येशू मेर्मिमकाडा ल्वाला सो़सिम्डी। मेकोतिमा लुङ होप्माम मेर्मिमकु नगो नुङ मेर्मिम थो़रमेलु़मिवामडाम गुमी छो़म भुर्मिडी, हेङालोने येशू सिमुलाम बम्गेम्डिमा गुमीलाई ल्वापामिमकु ल्वाडा मेर्मिम थो़र मेलु़मिवाम बाइडा। 15 मेकोतिमा येशूका मेर्मिमनुङ र्वाम्डी, “सु़म्दिसेर खोत्लेथो़ लक्निमा खोत्ले मु़चु़मिमलाई जो़पा-सेला थो़बेट्नी। 16 उहेम-उहेम ओराम जो़पा-सेलाडा थो़र लु़मी, मा कु-रु़दु़म रमी मेर्मिम सेल्सिमी, मा ओराम ल्वाडा थो़र मेलु़पा नुङ कु-रु़दु़म मेरपामिम ने देन्दे ल्वामी। 17 थो़रलु़पामिमनुङ ओर्मिम छेखोपमिम दु़म– मेर्मिमका आमा नङडा मुनाङपेलमिम ख्लुमी, लाले जेसी जेमी। 18 मेर्मिमका ब्लो जेन्मी, मा ङे ङा पोमी-डुमी लावो मेर्मिम हाम वो मेदु़म्मी। मेर्मिमका नो़पामिमडला उनी ल्वा जु़ल्मी, मा नो़पामिम वो सम्ल्याट्मी।” 19 मेर्मिमनुङ जेमु डु़म्मिडिमा येशू पाह्रीथो़ कोम्सिम्डी, मा माम्चु़नीकु जो़पलामका गन्मिडी। 20 मेकोतिमा मे सीसिपामिम खोत्लेथो़ लम्डिमा मु़चु़मिमलाई जो़पा-सेला थो़बेन्मु चो़म्मिडी। मेकोतिलो माम्चु़नीका वो मेर्मिमनुङ दु़म्साका खारी बोमु चो़म्मिडी, मा छेखोपका मेराम ल्वा आच्छाङा रेछा र्वाक्पा रेम्बेम्डी। आमेन] |
© Wycliffe Bible Translators, Inc. All rights reserved.
Wycliffe Bible Translators, Inc.