मर्कूस 15 - थुलुङ राईयेशू पिलातसकाडा ( मत्ती २७:१-२ , ११-२६ ; लूका २३:१-५ , १३-२५ ; यूहन्ना १८:२८–१९:१६ ) 1 नेमसोमु दु़म्स्तु़ मेडे ङाउ डु़म्लाचो़मिम, ङाउमिम, यहूदीमिमकु डु़म्ला सीपा पातु़म्रीमिम, नुङ खोत्ले डोक्पु-घ्रो़म्दीडामका उनी त्वापगोनो मुलु़ बेम्डिमा येशूलाई बट्मिडिमा लम्डी, मा पिलातसलाई ग्वाम्डी। 2 मेकोतिमा पिलातसका येशूलाई र्वाक्ता, “हाम गाना ङा यहूदीमिमकु हप?” गुमीका पिलातसलाई र्वाम्डी, “अँ, मे गानी र्वानिमिम होङङा।” 3 ङाउ डु़म्लाचो़मिमका हापा मेजो़पा खारीमिम येशूकु बुइडला उट्मिडी। 4 मेकोतिमा पिलातसका गुमीलाई आथावो ङा आरे र्वाक्तामा हिलाबु़डु़, “हाम गाना हाम वो मेर्वाना? रेप्डा, खोत्ले मेजो़पा खारीमिम मेर्मिमका इमा बुइडला उन्मिमिम बुमी।” 5 लावो येशू को सि वो मेजेमिवा। मेम्मिमका पिलातस ङाङाया दु़स्ता। 6 सेल्सिमु-नेमकु थारीका मु़चु़मिमका र्वामिम होम्साका ङा चु़म्मामा चक्मामिमगोडाम कोलेलाई पिलातसका डिट्थाल्लु़। 7 रिबुसी किट्मिडिम थारीका मु़चु़ सेट्पा रिबुसीचो़मिम चम्डिमा जु़ल्मिडिम बाइडा। मेर्मिमगोडाम बारब्बा नङकाम कोले मु़चु़ वो मेगोडा बाइडा। 8 सेर्पा मु़चु़मिम पिलातसकाडा रोम्डिमा ङादोम गुका बु़थाल्लु़म होम्साका ङा ओम्लो वो चु़म्मामा चक्मामिमगोडाम कोलेलाई डिसाट्की बेम्डी। 9 पिलातसका आरे र्वाक्तामा मेर्मिमनुङ हिलाबु़डु़, “हाम गो गानीलाई यहूदीकु हप डिट्पुमिम द्वानी?” 10 हेङालोने ङाउ डु़म्लाचो़मिमका उनी नो़ मेनु़यामका ङा येशूलाई उ ल्वाडा ग्वाम्डिम र्वाक्पा ल्वा पिलातसका चडु़म बाइडा। 11 लावो ङाउ डु़म्लाचो़मिमका सेर्पा मु़चु़मिमलाई कोम्डिमा मेर्मिमलाई गुका बारब्बा ङा डिट्नु़ र्वाबेट्मिडिम बाइडा। 12 मेकोतिमा पिलातसका मेर्मिमनुङ हिलाबु़डु़, “मेम माला गानी मे ‘यहूदीकु हप’ र्वानिमिमलाई गो हाम बेउनु़ र्वानी?” 13 मेर्मिमका आथावो येम्डिमा र्वाम्डी, “मेरामलाई क्रूसडा चेट्नी!” 14 पिलातसका मेर्मिमनुङ र्वाक्ता, “हेङा, मेरामका मेजो़पा खारी हाम बु़डु़म बु मा?” लावो मेर्मिम आथावो छो़म येत्तोङा र्वाम्डी, “मेरामलाई क्रूसडा चेट्नी!” 15 मेकोतिमा पिलातसका मु़चु़मिमलाई गेर्सिबेन्मु नका बारब्बा डिड्डु़, मा येशूलाई कोक्तेकाम याल्खोपका याल्बेत्तो क्रूसडा चेन्मुलाई सिपाहीमिमकु ल्वाडा ग्वाक्तु़। येशूलाई नाले डाट्मिडिम ( मत्ती २७:२७-३१ ; यूहन्ना १९:२-३ ) 16 मेकोतिमा सिपाहीमिमका येशूलाई प्रेटोरियन र्वाक्मा ओगानेमगोनो लम्डी, मा मेसिन्डा खोत्ले पल्टन ङा खोम्सिम्डी। 17 मेम्मा मेर्मिमका बैजनी रङकाम ब्लङमा फबेट्मिडी, मा चु़कु मुकुट किम्डिमा उनी बुइडला खुबेट्मिडी। 18 मेम्मा, “यहूदीमिमकु हपकु नङ आलाकाम दु़म्नु़!” र्वाक्तो मेर्मिमका गुमीलाई सेव सान्मु चो़म्मिडी। 19 मेर्मिमका येशूकु बुइडला नारकु डु़लु़म्चो़का याल्मिडी, मा थक्सी बेट्मिडी। मेकोतिमा क्रचु़खुम बेत्तो सेव साट्मिडी। 20 मेर्मिमका येशूलाई नाले डान्मु डु़म्मिडिमा मे बैजनी रङकाम ब्लङमा प्लु़म्साट्मिडी, मा उनीमा ये ङा फबेट्मिडी, मेकोतिमा गुमीलाई क्रूसडा चेन्मुलाई पाखाथो़ ख्लुम्डी। येशू क्रूसडा चेट्मिडिम ( मत्ती २७:३२-४४ ; लूका २३:२६-४३ ; यूहन्ना १९:१७-२७ ) 21 कुरेनीडाम सिमोन, गु अलेक्जेन्डर नुङ रूफसकु पाप बाइडा। गु देललामका बिक्तोङा बेपा मेर्मिमका डार्मिडी, मा मेरामलाई येशूकु क्रूस कुर्मु क्र्वाम्डी। 22 मेम्मा मेर्मिमका येशूलाई गलगथा पोप्चङथो़ लम्डी (गलगथा र्वाक्मा बुइ-सेर बाट्पा ये)। 23 मेकोतिमा मेर्मिमका गुमीलाई मूर्र फिक्मा अङ्गूरकु बिलाम ग्वाम्डी। लावो गुमीका मेराम मेडुमिवा। 24 मेर्मिमका येशूलाई क्रूसडा चेट्मिडी। मेकोतिमा सु़का उहेम लक्पा र्वाक्साका चिठ्ठा ओप्मिडी मा मेर्मिमका येशूकु ये दो़म्डी। 25 मेर्मिमका येशूलाई क्रूसडा चेट्मिडिलो नेम छेमु थारीकाम गुले (९) जेस्ताम बाइडा। 26 येशूकु बुइकु डला “यहूदीमिमकु हप” र्वाक्साका गुमीलाई मुमा बेट्मा ल्वा र्याक्साका चेट्मा बाइडा। 27 मेर्मिमका नले खुचु़वाचिप वो कोले उनीमा जो़पलाम नुङ कोङमी उनीमा पेलाम बेसाका क्रूसडा चेट्मिडिम बाइडा। 28 [माम्चु़नीकु-सिजेम आरेसाका रोक्थिड्डा: “गुमी छु़लचो़मिमनुङ ङार्सिम्डी।”] 29 मेमभाल लाम्दिपा मु़चु़मिमका उनी बुइ रक्तो गुमीलाई र्वाम्डी, “पेन्ना रे! गाना सो़रनेम फाल्साका सुलेमनेमका बनेपा मेएँ? 30 क्रूसलामका लुकामा योका, मा इ त्वापङा सेल्सा।” 31 मेम्साका ङा ङाउ डु़म्लाचो़मिम नुङ यहूदीमिमकु डु़म्ला सीपा पातु़म्रीमिमका उनी त्वाप-त्वापडा ङा आरे र्वाबेत्तो नाले डाट्मिडी, “ओरामका वाङमिलाई ने सेल्लु़मी, लावो उ त्वापलाई ने सेल्मु मेचाप्सु़। 32 ओराम आच्छाङा इस्राएलकु हप ख्रीष्ट ङा माला क्रूसलामका लुयोनु़। मेकोतिमा मेराम ल्वासाका गुइ थो़र लु़इ।” गुमीनुङ ङा क्रूसडा चेट्माचिपका वो मेम ङा र्वाक्चिमा गुमीलाई नानावोली बेच्चिमी। येशू क्रूसडा सिम्डिम ( मत्ती २७:४५-५६ ; लूका २३:४४-४९ ; यूहन्ना १९:२८-३० ) 33 को-न (१२) जेस्तालोम आथाम नेम्फु सु जेस्ताम सम्म खोत्ले किब्दी तुकुम्चिम दु़स्ता। 34 नेम्फुम सु जेस्तालो येशूका आरे र्वाम्डिमा डोक्पु लो़लामका येम्डी, “इलोई, इलोई, लामा सबखथनी?” ओराम र्वाक्मा, “ए आमा माम्चु़नी, ए आमा माम्चु़नी, हेङा गानी गोलाई ङेट्ङिडिनिम?” 35 मेसिन्डा येम्तासिट्पामिमगोडाम कोङ-कोङका मेराम थो़म्डिमा र्वाम्डी, “थो़नी, ओरामका ने एलिया डे येडु़मिम बु।” 36 मेकोतिमा कोले ओन्तो लस्तामा कोङ स्पन्ज जु़र्पा अङ्गूरकु बिलामगोयु़ प्लु़म्डु़मा मेरामलाई नारकु जु़जु़डा सक्तु़मा येशूलाई ग्वाक्तोङा र्वाक्ता, “घरिकोङ रेप्डी! ओरामलाई क्रूसलाम ख्लुप्डा एलिया रो डे।” 37 मेकोतिलोङा येशू डोक्पु लो़लामका येम्डिमा उनी साम लस्ता। 38 मेकोतिलो सो़रनेम गोनोम रिपा-ये हालाम हायु़ ङा नक फ्वाक्चो़ल दु़स्तामा आ़स्ता। 39 येशू आरेसाका सिम्डिम ल्वास्तु़मा मेसिन्डा ङा येम्तासिट्पा कप्तानका र्वाक्ता, “आच्छाङा ओराम ने माम्चु़नीकु तारापाचो़ ङा डे रेछा!” 40 मेसिन्डा कोङ-कोङ मेसेममिमका होनोवा बासाका ङा रेम्थाम्डिम बाइडा। मेर्मिम मेसेममिम मरियम मग्दलिनी, याक्के याकूब नुङ योसेसचिपकु माम मरियम नुङ सलोमी बाम्डी। 41 येशू गालीलडा बाम्डिलो मेर्मिम गुमीनुङ लाम्दिम्डिम बाइडा, मा उनी चापे-डुपे वो बेम्थाल्मिडिम बाइडा। येशूनुङ लाम्दिपा यरूशलेमलाम बिक्पा वाङमी हापा मेसेममिम वो मेसि ङा बाम्डी। येशूलाई क्लु़म्मिडिम ( मत्ती २७:५७-६१ ; लूका २३:५०-५६ ; यूहन्ना १९:३८-४२ ) 42 झो़म्सिमु-नेम मेराम र्वाक्मा ङेम्सिमु-नेमकु ङादोम नेनेम्थाका, 43 अरिमाथियाडाम योसेफ मेङिसाका येशूकु सिपा रो़म बिप्डा पिलातसकाडा लस्ता। गु माम्चु़नीकु किब्दी लत्तोङा बेपा यहूदीमिमकु डोक्पु-घ्रो़म्दीडाम कोले ङाउ मु़चु़ बाइडा। 44 येशू बासी ङा सिम्ल्याम्डिम र्वाक्पा थो़स्तु़मा पिलातस ङाङाया दु़स्ता। मेकोतिमा गुका कप्तानलाई येड्डु़मा गुमी आच्छाङा सिम्डिम रे मेएँ र्वाक्तामा हिलाबु़डु़। 45 गुमी बासीङा सिम्डिम र्वाक्पा ल्वा कप्तानलामका पिलातसका थो़स्तु़मा येशूकु सिप्ल्याट्पा रो़म योसेफलाई लमु ग्वाक्तु़। 46 मेकोतिमा योसेफका साङखिम भ्रेयु़डु़मा येशूकु सिप्ल्याट्पा रो़म क्रूसलामका थास्तु़, मा मे साङखिमका रिम्डु़। मेकोतिमा लुङ क्रिप्साका बनेम्मा सु़लु़मगोनो जु़ल्लु़, मेराम सु़लु़मकु हुखोपडा डोक्पु लुङकु ख्रेमलुङका ख्रेप्जो़ल्लु़। 47 मरियम मग्दलिनी नुङ योसेफकु माम मरियमचिपका येशू जु़ल्मिडिम सु़लु़म रेप्थाक्चिम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.