मर्कूस 14 - थुलुङ राईडु़म्लाचो़मिमकाम येशू सेट्पा न ( मत्ती २६:१-५ ; लूका २२:१-२ ; यूहन्ना ११:४५-५३ ) 1 मेरामकु नलेम चङडा सेल्सिमु-नेम नुङ लङखाम मान्थिम सो़बेम पेपा नेम बाइडा। मेम्लोका ङाउ डु़म्लाचो़मिम नुङ यहूदीमिमकु डु़म्ला सीपा पातु़म्रीमिमका येशूलाई हेसाका चु़म्मुमा सेन्मु र्वाक्पा खाप रेम्बाल्मिडी। 2 लावो मेर्मिमका आरे र्वाम्डिम बाइडा, “चाडकाम थारीका ने मेएँ, मेएँ माला ने मु़चु़मिमका रिबुसी किन्मी।” 3 बेथानिया देलडा जोन बेट्पा सिमोनकु नेमडा येशू ग्रुला पेप्डा गन्मिडिलो कोले मेसेमका हापा थिकाम भ्रपा नेम्पा मोरोचेकु तेल सिङ्गमरमरकु सोजामडा रेड्डु़मा रोक्ता, मा मेराम सोजाम पियु़डु़मा मे भ्रपा नेम्पा मोरोचीकु तेल येशूकु बुइडला अयु़डु़। 4 लावो कोङ-कोङका ओराम ल्वाम्डिमा उनी छोक्चोका उनी त्वाप-त्वापगोडा ङा आरे र्वा बोमु चो़म्मिडी, “आकोम थिकाम तेल हेङा ओरामका आरेसाका ब्लाम-ब्लाम बु़मिम? 5 हेङालोने ओ भ्रपा नेम्पा तेल सु सङ (३००) दिनारडाम वो हापा थिडा भ्रेन्मु झाप्सावा मा उ हाम वो मेबाट्पामिमलाई मेराम खउलुङ ग्वामु जो़पा दु़प्सावाम” र्वाक्तो मेर्मिमका मेराम मेसेमलाई मेजो़होमका भुर्मिडी। 6 लावो येशूका मेर्मिमनुङ र्वाम्डी, “बुनु़, गानी मेरामलाई दु़खा मेग्वाक्नी। मेरामका गोलाई छो़म जो़पा खारी बु़डु़म बु। 7 हेङालोने उ हाम वो मेबाट्पामिम ने गानीनुङ हेल्लो लोवो दु़म्मिम बुमी, मा हाङकोलो न बोनी मेकोतिलो ङा गानी मेर्मिमलाई ख्लो़मु चाम्निमी। लावो गो ने गानीनुङ मेम्साका मेदु़म्ङु। 8 ओराम मेसेमका हाम चाप्स्तु़म बु मेरामङा बेत्तोलेडु़। ओरामका आमा रो़म क्लु़म्मु ङादोङा झो़म्सिबेन्मु लागि भ्रपा नेम्पा तेलका क्लमु दु़म्स्तु़म बु। 9 आच्छाङा गो गानीनुङ र्वाङु, सुबुडा बा-बान्थो़ ओराम जो़पा-सेला थो़बेन्मी मेसि-मेसि ङा ओराम मेसेमलाई मिम्मु लागि उमा खारीकु दुथाम वो सो़मी।” 10 मेकोतिमा को-न (१२) येशूकु सीसिपामिमगोडाम कोले यहूदा इस्करियोत ने येशू उनी ल्वाडा चु़म्बेड्डा ङाउ डु़म्लाचो़मिमकाडा लस्ता। 11 मेर्मिमका ओराम ल्वा थो़म्डिमा गेर्सिम्डी, मा यहूदालाई खउलुङ ग्वाक्पा मुलु़ बेम्डी। मेकोतिमा यहूदाका गुमीलाई हेसाका चु़म्बेन्मुमी र्वाक्साका जो़पा खाप रेम्मु चो़म्डु़। येशूकु ग्रुला ( मत्ती २६:१७-३० ; लूका २२:७-२३ ; यूहन्ना १३:२१-३० ; १ कोरिन्थी ११:२३-२५ ) 12 लङखाम मान्थिम सो़बेम पोमु ङादोम नेम मेर्मिमका सेल्सिमु-नेमकु भेन्दा चो़ फल्थाल्मिडी। मेम्लो उनीमा सीसिपामिमका येशूनुङ हिला बेम्डी, “गुकु इनीमा लागि सेल्सिमु-नेमकु ग्रुला बान्थो़ लमुमा बनेबोमु र्वानी?” 13 मेकोतिमा गुमीका उनी सीसिपामिमगोडाम नलेलाई आरे बेम्डिमा थु़र्सोम्डी, “शहरडा लक्ची मा कु कुर्थाक्पा कोले वोस्चो़ डार्थिन्ची, मा गाची वो मेरामकु चङ-चङ लक्ची। 14 मेराम मु़चु़ बाम नेमडा हु मेराम नेमहपलाई र्वाक्ची, ‘ङाचो़का र्वाम्डिम बु, आमा सीसिपामिमनुङ सेल्सिमु-नेमकु सो़बेम पेखोप बोच्चो़ बाखोप बान्थो़ बु?’ 15 मेकोतिमा मेरामका गाचीलाई क्लक्सा बेसा झो़म्ल्यासिट्पा उडलाम डोक्पु बाखोप रेम्बेन्ची। मेसिन्डाङा इकीमा लागि ग्रुला बनेबेची।” 16 मेकोतिमा येशूकु सीसिपाचिप मेलामका लक्ची, मा शहरगोडा हुच्ची। मेकोतिलो गुमीका र्वाम्डिम होप्मामङा डार्ची, मा सेल्सिमु-नेमकु ग्रुला बनेबेच्ची। 17 नेनेम्थाका को-न (१२) उनी सीसिपामिमनुङ येशू मेसिन्डा रोम्डी। 18 येशू नुङ उनीमा सीसिपामिमका पेम्डिम बाम्डिलो गुमीका र्वाम्डी, “आच्छाङा गो गानीनुङ र्वाङु, गानीगोडाम गोनुङ कोयो पेत्तोङा बेपा कोलेका गो भ्रेन्ङी।” 19 मेकोतिमा मेर्मिमकु गो नो़डा, मा “हाम मेराम गो ङा ने मेएँ?” र्वाक्तो कोले-कोलेका हिलाबोमु चो़म्मिडी। 20 गुमीका मेर्मिमनुङ र्वाम्डी, “गानी को-नगोडाम कोले उहेमका कान्चु़रेडा गोनुङ ङा सो़बेम लु़प्डु़होम बु। 21 हेङालोने मिनीचो़ ने उ दुथाम र्याक्मा होम्साका ङा ल, लावो हाउरे मा! मे मिनीचो़लाई भ्रेट्पा ने। मेराम मु़चु़ ने मेगक्सावाम ङा नु़यावा।” 22 मेकोतिमा पेत्तोङा बेम्डिलो येशूका सो़बेम रम्डिमा जि ग्वाम्डी, मा चम्डी। मेकोतिमा मेर्मिमलाई ग्वाक्तोङा र्वाम्डी, “ने रनी, ओराम आमा मिरो़म सो़।” 23 मेकोतिमा कान्चु़रे रम्डिमा आलासो़ ग्वाम्डिमा गुमीका मेर्मिमलाई ग्वाम्डिमी, मा मेर्मिम खोत्लेका मेलामका डुम्डी। 24 मेकोतिमा गुमीका मेर्मिमलाई र्वाम्डी, “ओराम हापा मु़चु़मिमकाम लागि हाट्मा सो़रख्रेपा आमा सिसि सो़। 25 गो आच्छाङा गानीनुङ र्वाङु, माम्चु़नीकु किब्दीडा लाले बेसाका मेडुथु़म मे अङ्गूरकु बिलाम गो मेडुउ।” 26 मेकोतिमा कोले कोमु-काम्सो बेम्डिमा येशू उनी सीसिपामिमनुङ जैतून पोप्चङथो़ लम्डी। पत्रुसका मेछेपु र्वा र्वाक्साका येशूका सो़म्डिम ( मत्ती २६:३१-३५ ; लूका २२:३१-३४ ; यूहन्ना १३:३६-३८ ) 27 येशूका मेर्मिमनुङ र्वाम्डी, “गानी खोत्लेका गोलाई डिन्ङिनी, हेङालोने आरेप्माम र्याक्मा बु भेन्दा रेपा-क्रिपालाई गो याक्पु, मा भेन्दामिम खोत्लेथो़ फोन्सिट्मी। 28 लावो गो सिमुलाम बङ्गेङुमा गानीडाम ङादो गालीलथो़ लङु।” 29 पत्रुसका गुमीनुङ र्वाक्ता, “खोत्लेका डिनिङा लोवो गो ने मेडिनिनी।” 30 मेकोतिमा येशूका पत्रुसलाई र्वाम्डी, “आच्छाङा गो गानानुङ र्वाङु, आनेप सिन्था नकखेप स्वारेपो ओमु ङादोङा गाना गोलाई सुकखेप मेछेपु र्वाना।” 31 लावो पत्रुस जिजिर वाक्तो र्वाक्ता, “गानीनुङ ङा सिमु बासी लोवो गो गानीलाई मेछेपुमी मेर्वाङु।” मेकोतिमा मेर्मिम खोत्लेका ङा कोङ सि दु़म्मिडी। गेतसमनीडा येशूका सो़म्दी बेम्डिम ( मत्ती २६:३६-४६ ; लूका २२:३९-४६ ) 32 मेकोतिमा येशू नुङ उनीमा सीसिपामिम गेतसमनी र्वाक्माडा लम्डी, मा गुमीका उनीमा सीसिपामिमनुङ र्वाम्डी, “गो सो़म्दी बेउ, गानी आसिन्डा ङा बानी।” 33 मेकोतिमा गुमीका पत्रुस, याकूब नुङ यूहन्नामिमलाई गुमीनुङ लम्डी। मेकोतिलो येशू उनी गो मेभ्रसिट्पा नुङ न ख्याक्ल्याक्पा बाम्डी। 34 गुमीका मेर्मिमनुङ र्वाम्डी, “गो आमा नगोनो सिपा कोतिम ङा दु़म्ङोडोम बु। गानी आसिङा चङचङया बानी।” 35 मेकोतिमा गुमी किचो़ होनोक्थो़ लम्डिमा क्वायु़ खुम्बु बेम्थाम्डिमा नु़ माला ओराम थारी गोडला मेरोनु़ र्वाक्तो सो़म्दी बेम्डी। 36 मेकोतिमा गुमीका र्वाम्डी, “अब्बा, पाआ, गानी बोमु मेचाम्निमिम हाम वो मिबु। ओराम कान्चु़रे गोलामका हेम्साङ्नी, लावो गो न बेउमिम होम्साका मेएँ इनी न होम्साका ङा दु़म्नु़।” 37 मेकोतिमा गुमी ख्लोम्सीम्डिमा रोम्डिलो मेर्मिमलाई अम्चेट्पा डार्मिडी। गुमीका पत्रुसनुङ र्वाम्डी, “सिमोन, हाम गानी अम्ल्याट्पा ङा बुनी? हाम गानी को घण्टा वो मेअम्साका बुमु मेचाप्निवा? 38 मेअम्साका बानी मा सो़म्दी बेनी, गानी न छाम्ला मेसो़सिट्नी। नका ने बोमु मालु़, लावो मिरो़म ङा मेचापा बु।” 39 मेकोतिमा आथावो लम्डिमा गुमीका बासिम होङङा ङा र्वाक्तो सो़म्दी बेम्डी। 40 आथावो गुमी ख्लोम्सीम्डिमा रोम्डिलो मेर्मिम अम्चेट्पा ङा डार्मिडी, हेङालोने मेर्मिम अमका उनी मिक्सी वो ह्वामु मेचापा दु़म्मिडिम बाइडा, मा गुमीनुङ हाम र्वामु बासिपा हाम वो मेचक्मिवा। 41 गुमी सुकखेपडा रोम्डिमा मेर्मिमनुङ र्वाम्डी, “हाम गानी आथावो अम्चेट्पा ङा बुनी, मा ङेन्सिनिम बुनी? आकोतिङा दु़म्नु़, हेङालोने मिनीचो़लाई छु़लचो़मिमकु ल्वाडा भ्रेट्पा थारी रोम्फामु दु़म्स्तु़म बु। 42 बक्नी, दो लक्सी, हेङालोने गोलाई भ्रेट्पा मु़चु़ आसिङा रोम्फामु दु़म्स्तु़म बु।” येशू चु़म्मिडिम ( मत्ती २६:४७-५६ ; लूका २२:४७-५३ ; यूहन्ना १८:३-१२ ) 43 येशू जेत्तोङा बेम्डिलो को-न उनी सीसिपामिमगोडाम यहूदा मेसिन्डा रोक्ल्याड्डा। ङाउ डु़म्लाचो़मिम, यहूदीमिमकु डु़म्ला सीपा पातु़म्रीमिम नुङ ङाउमिमका थु़र्मीडिम सेर्पा मु़चु़मिमका कातु़रु़ नुङ डु़लु़म्चो़ जेन्थाम्डिमा मेसिन्डा गुनुङ रोम्डी। 44 गुमीलाई भ्रेट्पा यहूदाका मे चु़म्डा रोक्पामिमलाई आरे र्वाक्तो कोङ छेखोप ग्वाक्तु़मिम बाइडा, “गो उहेमलाई चुप बेउ मेराम ङा सो़, गानी माल्निमिम मु़चु़। मेरामलाई चु़म्नीमा जो़होमका लक्नी।” 45 मेकोतिमा यहूदा लस्तामा, “रब्बी” र्वाक्तोङा येशूलाई चुप्पा बु़डु़। 46 मेकोतिमा मेर्मिमका येशूलाई चु़म्मिडिमा उनी ल्वाडा बेम्डी। 47 मेसिन्डा ङा येम्तासिट्पामिमगोडाम कोलेका उ कातु़रु़ थास्तु़मा ङाउ डु़म्लाचो़कु डु़ल्चो़कु नोफ्ला क्रिप्साड्डु़। 48 येशूका मेर्मिमलाई र्वाम्डी, “हाम गानी कोङ खुचु़वालाई होङङा कातु़रु़ नुङ डु़लु़म्चो़ रेसाका गोलाई चु़म्डा रोक्निम? 49 हेल्लो लोवो सो़रनेमगोडा सीत्तो गो गानीनुङ ङा बाङथाल्ङोडो मा मेकोतिलो गानी गोलाई मेचु़म्ङिनिवा, लावो माम्चु़नीकु-सिजेम होम्साकाङा रोक्थिड्डा।” 50 मेकोतिमा उनीमा सीसिपामिम खोत्लेका ङा डिन्जो़ल्मिडिमा स्वाम्डी। 51 कोले येका कोङङा रिम्सिट्पा कोले स्वाला गुमीनुङ लस्ता, मा मेर्मिमका मेरामलाई चु़म्मिडी। 52 लावो मेरामका मे उमा ये वो पार्जो़ल्लु़मा खालिन्ते ङा स्वाङ्डा। डोक्पु घ्रो़म्दीकु ङादोडा येशू ( मत्ती २६:५७-६८ ; लूका २२:५४-५५ , ६३-७१ ; यूहन्ना १८:१३-१४ , १९-२४ ) 53 मेकोतिमा मेर्मिमका येशूलाई डोक्पु ङाउ डु़म्लाचो़काडा लम्डी, मा मेसिन्डा ङाउ डु़म्लाचो़मिम, ङाउमिम नुङ डु़म्ला सीपा पातु़म्रीमिम खोम्सिम्डिम बाइडा। 54 पत्रुस ने होनोवा बासाका ङाउ डु़म्लाचो़कु देल्फुडा येशूकु चङचङ लस्ता। मेकोतिमा मेसिन्डा सिपाहीमिमनुङ मु झु़ड्डा मु फार्डा गन्डा। 55 ङाउ डु़म्लाचो़ नुङ डोक्पु-घ्रो़म्दीडाम खोत्ले मु़चु़मिमका येशूलाई सेन्मु र्वाक्साका येशूका बेम्डिम मेजो़पा खारीमिम माल्मिडी, लावो मेप्माम हाम वो मेल्वामिवा। 56 गुमीलाई मेजो़पा बोमु हापा ङा उनीमा दुथाम लिमा ल्वा जेम्डी, लावो मेर्मिमकु ल्वा मेघ्रो़म्सावा। 57 कोङ-कोङका गुमीलाई मेजो़पा बोमु नका बम्डिमा आरे र्वाम्डी, 58 “ओरामका आरे र्वाक्ताम गुकु थो़त्तोको, ‘मु़चु़कु ल्वाका बनेबेम्मा ओराम सो़रनेम फालुमा कोङमी सो़रनेम सुलेमनेम गो बनेबेउसोक्पु, मेराम ने मु़चु़मिमका बनेबोमिमिम ने मेएँ’।” 59 लावो ओराम ल्वाडा वो मेर्मिमकु सि मेघ्रो़म्सावा। 60 मेकोतिमा डोक्पु डु़म्लाचो़ थेत्तेडा येम्स्ता, मा येशूनुङ हिला बु़डु़, “हेङा गाना हाम वो मेर्वानामिम? ओर्मिमका इमा दुथाम हाम र्वाक्तोङा बोमी हाम गाना मेथो़ना?” 61 लावो येशू को सि वो मेजेसाका वाय-वाय ङा बाम्डी। आथावो ङाउ डु़म्लाचो़का गुमीनुङ हिलाबु़डु़, “हाम गाना मिप्रङमा माम्चु़नीकु चो़ ख्रीष्ट ङा?” 62 येशूका र्वाम्डी, “गो ङा, गानी मिनीचो़लाई माम्चु़नीकु जो़पलामका गन्तासिट्पा मा धामुला खासेडा योक्तोङा बेपा ल्वानी।” 63 ओराम थो़स्तु़मा ङाउ डु़म्लाचो़का उ रो़मडाम ये आ़क्तोङा र्वाक्ता, “आथावो ओरामडाम वाङमी ल्वा हाउ मा? 64 ओरामका माम्चु़नीलाई डक्साका जेस्ताम ने गानी थो़न्ल्याट्नी, गानी हाम र्वानी?” मेकोतिमा मेर्मिम खोत्लेका येशूलाई सेन्मु घ्रेट्पा बुमी र्वाक्साका मुमा बेट्मिडी। 65 मेकोतिमा कोङ-कोङका येशूलाई थक्सी बेट्मिडी, मा उनी मिक्सी ड्याम्डिमा मुठिमका याक्तोङा र्वाम्डी, “लु सु़का याल्ना माम्चु़नीलाम जेसा!” मेकोतिमा सिपाहीमिमका लम्डिमा याल्मिडी। पत्रुसका येशूलाई मेछेपु र्वाक्ताम ( मत्ती २६:६९-७५ ; लूका २२:५६-६२ ; यूहन्ना १८:१५-१८ , २५-२७ ) 66 पत्रुस धालु़ देल्फुडा बाइडालो ङाउ डु़म्लाचो़कु मेसेम डु़ल्चो़मिमगोडाम कोले मेसिन्डा रोक्ता। 67 मेकोतिमा पत्रुसका मु झु़त्तोङा बु़डु़म ल्वास्तु़मा मे मेसेमका जो़होमका उ ङालीडा रेप्तोङा र्वाक्ता, “गाना वो नासरतडाम येशूनुङ बान्नाम मेएँ डे?” 68 लावो पत्रुसका लिमा थेत्तोङा र्वाक्ता, “हाम सो़नामिम, गो ने हाम वो थेसिमेथेट्पुवा, मा मेचक्पु सो़।” मेकोतिमा गु पाखा लक्पा डोक्पु लाम्चोकोथो़ लस्ता, मा स्वारेपो वो ओक्ता। 69 मेराम मेसेमका मेसिन्डा वो पत्रुस ल्वास्तु़मा मेगोबाडे येम्तासिट्पामिमनुङ आथावो र्वाक्ता, “ओराम वो मेर्मिमगोडाम ङा कोले।” 70 लावो पत्रुसका आथावो मेएँ ङा र्वाक्ता। मेकोतिमा मेसिन्डा ङा येम्तासिट्पामिमका आथावो ङा पत्रुसलाई र्वाम्डी, “आच्छाङा गाना वो मेर्मिमगोडाम ङा कोले दु़म्मु बासी, हेङालोने गाना वो गालीलडाम मु़चु़ ङा रेछा।” 71 लावो पत्रुसका उ त्वाप ङा वाइतो बेन्सित्तो कसम पु़डु़मा र्वाक्ता, “आच्छाङा गानी हाम र्वानिमिम मे मु़चु़ गो मेछेपु।” 72 मेकोतिलोङा नकखेप स्वारेपो ओक्ल्याड्डा मा येशूका ङादो आरे र्वाम्डिम ल्वा पत्रुसका मिम्डु़, “नकखेप स्वारेपो ओमु ङादोङा गाना गोलाई सुकखेप मेछेपुमी र्वाना।” मेकोतिमा पत्रुसका मेराम ल्वा मिम्तो प्ल-नाख्ली दु़म्होम ख्राप्डा। |
© Wycliffe Bible Translators, Inc. All rights reserved.
Wycliffe Bible Translators, Inc.