मर्कूस 13 - थुलुङ राईहुक्पा थारीकु छेखोपमिम ( मत्ती २४:१-२४ ; लूका २१:५-१९ ) 1 मेकोतिमा येशू सो़रनेमलामका लुक्तो बेम्डिलो उनी सीसिपामिमगोडाम कोलेका र्वाक्ता, “रेप्नी ङाचो़, हाङको छो़म डोक्पु-डोक्पुतो लुङमिम नुङ हाङको छो़म जो़पा-जो़पातो नेममिम।” 2 येशूका मेरामनुङ र्वाम्डी, “गाना ओर्मिम डोक्पुतो नेममिम ल्वाना मेएँ डे? आसिन्डा कोले लुङडला कोङमी मेदु़म्पा बेसाका खोत्लेङा फाल्मी।” 3 मेकोतिमा येशू मे सो़रनेमकु होनो होम्बुनोम जैतून पोप्चङडला गन्तासिट्मिडिलो पत्रुस, याकूब, यूहन्ना नुङ अन्द्रियास कोङङा येशूनुङ बाम्डिलो मेर्मिमका हिला बेम्डी, 4 “गुकुनुङ सो़नी ओर्मिम हाम्सी दु़म? मा ओर्मिम खोत्ले दु़म्मु ङादो हा-हाम दु़म?” 5 येशूका मेर्मिमनुङ र्वाम्डी, “चङचङया बानी वो! सु़का वो गानीलाई मेब्लो़म्निमिनु़। 6 ‘गो गुङा’ र्वाक्तो आमा नङडा रोक्पा हापा ङा दु़म्मी, मा मेर्मिमका हापालाई ब्लो़म्मी। 7 हाङकोलो गानी क्वाल्बा नुङ क्वाल्बाकु ल्वा थो़नी मेकोतिलो इनीमा लो़ मेदाम्नु़, हेङालोने आरेप्माम दु़म्मु ङा बासी। मेकोतिमा वो हुमु थारी रोमु ने हापा दु़म। 8 हेङालोने कोङ सामाका कोङमी सामानुङ क्वाल्बा बु़, मा कोङ किब्दीका कोङमी किब्दीनुङ क्वाल्बा बु़। याङ-याङडा सुबु-रुक्सी नुङ पोमुकु दु़खानेम वो दु़म। ओर्मिम खोत्ले ल्वामिम मेसेमकु चो़च्चो़ दु़म्मु थारीका हिम्बा खेन्मु चो़म्डु़मिम होप्माम कोङङा दु़म। 9 “गानी इनी त्वाप ङा चङचङया बानी। मु़चु़मिमका गानीलाई अदालतबाडे लनिमी, मा घ्रो़म्दीनेमबाडे याल्निमी। मेकोतिमा हपमिम नुङ किब्दी साखामचो़मिमकु ङादोबाडे आमा नङकु दुथाम येम्सिबेनिमी। मेराम ङा गो सु़ र्वाक्पा रेम्बोनिमिम दु़म। 10 ओर्मिम दु़म्मु ङादो ङा खोत्ले सामालाई जो़पा-सेला थो़बेन्मुमि बासी। 11 मु़चु़मिमका चु़म्निमिमा लनिमिलो हाम जेमु र्वाक्साका मेङिनी, मेकोतिलो माम्चु़नीका हाम सीनिमी मे ङा जेनी, हेङालोने मेम्लो जेपा गानी मेएँ माम्चु़नी-पेल दु़म्मी। 12 “मेकोतिलो ल्वाकका वालाई, वाका ल्वाकलाई सेन्बेन्मी, मेम्साका ङा पापका चो़मिमलाई सेन्बेडु़मी। चो़च्चो़मिम माम-पापकामथो़ मेदु़म्मी, मा मेर्मिमलाई सेन्बेन्मी। 13 मेकोतिमा आमा दुथाम खोत्लेका गानीलाई नाप्छु़निमी, लावो हुक्पा थारीसम्म ङा इम्सिसाका बाट्पामिम कोङङा सेल्सिमी। 14 “हाङकोलो गानी दु़म्सीङा मेनु़पाडा मे घ्राम्लु़पा दालिद्र ल्वानी (डाट्पा मु़चु़का ङा थेसिथेट्नु़), मेकोतिलो यहूदियाडा बाट्पामिम पोप्चङथो़ स्वामिनु़। 15 नेमडाम पाखानो बाट्पामिम हाम-हुम माल्ला नेमगोनो मेहुमिनु़। 16 ये-दडा बाट्पामिम उनी फसिमु ये माल्ला मेख्लोसिमिनु़। 17 नाम्नाम्चो़! मेमबिलिम गोजु़मे मेसेम नुङ दु़दु़ डुत्तोङा बेपा चो़कु माममिम ने। 18 ओर्मिम खोत्ले जुथारीका मेदु़म्नु़ र्वाक्साका सो़म्दी बेनी। 19 हेङालोने मेराम थारी माम्चु़नीका सुबु प्रङ्मिडिलो आथाम आनो मेप्माम हेल्लो वो मेदु़म्थेङा बु, मा आथाडाम आरे हेल्लो वो मेदु़म्मिम दु़खा थारी मेमबिलि दु़म। 20 माम्चु़नीका मेराम दु़खानेम मेछु़प्मिवाम माला ने सामनुङमा सु़ वो मेदु़म्मिवा। लावो उनी त्वाका छेट्मिडिम मु़चु़मिमकु दुथाम मे थारी छु़प्मिडिम बु। 21 रेप्नी, मेनेम कोङनिमका गानीलाई ‘ख्रीष्ट आसि बुमी, मेसि बुमी’ र्वामिलो थो़र मेलु़नी वो। 22 झाम माला माम्चु़नीलाम छेट्मामिमलाई ब्लो़म्मु ख्रीष्ट लिसिपामिम नुङ माम्चु़नीलाम जेपा लिसिपामिम लुमी मा यु़म-खारी रेम्बोमु माल्मी। 23 रेप्नी, गो गानीलाई ङादो ङा खोत्लेमथोक र्वाङडोम बु, मेम्मिमका चङचङया बानी वो। मिनीचो़ योमु ङादो सुबु धामुडाम छेखोप ( मत्ती २३:२९-३१ ; लूका २१:२५-२८ ) 24 “लावो मे डोक्पु दु़खानेम-थारी दु़म्मिम चङडा नेप्सुङ केकेया दु़म, मा ख्लो़मुकु ओल वो दाम। 25 सोरलुङमिम धामुलामका आल्मी, मा धामुला बाट्पा यु़ममिम रुमी। 26 मेकोतिलो मु़चु़मिमका मिनीचो़ खासेडा यु़म नुङ यु़म-झ्वाक्सीडा योक्तोङा बेपा ल्वामी। 27 मेकोतिमा गुमीका पाह्रीचो़मिमलाई सुबु नुङ धामु खोत्लेथो़ थु़र्मी, मा मेर्मिमका खोत्लेलामका माम्चु़नीका छेट्मिडिम खोत्लेलाई कोदेप बोमिमा रेन्मी। 28 “बैससीकु धक्सालामका कोङनिम ल्वा सीन्सिट्नी। मेरामकु ग्रेमडा लिम लिम्मु चो़म्डु़लो ग्वाल थारी रोफामिम दु़म र्वाक्पा चनी। 29 मेम्साका ङा गानी ओराम गो र्वाङडोम ल्वा दु़म्पा ल्वानिलो मिनीचो़ योमु ङा खाप्डु़म बु र्वाक्पा चनी। 30 आच्छाङा गो गानीनुङ र्वाङु, ओर्मिम खोत्ले मेदु़म्थु़म आथामबिलिम मु़चु़मिम वो मेदाम्मी। 31 सुबु नुङ धामु दाममा ल, लावो आमा सिजेम ने हाम्सी वो मेदाम। 32 मेराम थारीकु दुथाम पाह्रीला बाट्पा माम्चु़नीडाम वाङमी पाह्रीचो़ ना मिनीचो़ सु़का वो मेचमी। 33 गो र्वाङुमिम जो़होमका थो़नी, मा चङचङया बानी वो! हेङालोने मेराम थारी हाम्सिका रोफा र्वाक्पा गानी मेचनी। 34 ओराम ने कोङ नेम-हपका उ नेमगोडाम खोत्ले डु़ल्चो़मिमकु त्वा-त्वाहोम ल्वाडा पार्जो़लु़मा उमा नेम लपा मु़चु़लाई चङचङया बाया वो र्वाजो़लमा उमा नेम डिसाका वाङथो़ लमिम होप्माम ङा बु। 35 “मेम्मिमका गानी वो चङचङया बानी वो, हेङालोने नेमहप नेम्था, सिन्था, नेमसोसोका, मा नेप्सुङ ओम्मु थारीका हाङकोलो रो र्वाक्पा गानी मेचनी। 36 मेएँ ला ने गानी मेचनिम थारीका रोफामा, गानी अम्चेट्पाङा डार्फानी सो़। 37 मेम्मिमका गो गानीनुङ हाम र्वाक्तोङा बेउ मेराम गो खोत्लेलाई ङा र्वाङु, ‘चङचङया बानी वो’।” |
© Wycliffe Bible Translators, Inc. All rights reserved.
Wycliffe Bible Translators, Inc.