मर्कूस 12 - थुलुङ राईअङ्गूर ये बोम्था बेपा मु़चु़कु दुथाममिम सीसि-सो़म्दी ( मत्ती २१:३३-४६ ; लूका २०:९-१९ ) 1 मेकोतिमा येशू मेर्मिमनुङ कोङ सीसि-सो़म्दीडा जेमु चो़म्मिडी, “कोले मु़चु़का उमा येडा अङ्गूर ख्लियु़डु़मा होनोलाम आनोलाम भोम्बेल बु़डु़, मा कोल जु़ल्खोप कोले पोलु़म धायु़डु़। मेकोतिमा कोङ अङ्गूर लट्पा खोम बनेबु़डु़मा मे अङ्गूर ये बोम्थाम बोमु ग्वाक्जो़ल्लु़मा गु उ त्वाप ने वाङथो़ ङा लस्ताम बाइडा। 2 मे अङ्गूर प्रो़न्मु थारीका कोले उमा डु़ल्चो़ बोम्थाम बेपामिमकाडा गुका ल्वामुबासिक्पा अङ्गूरकु दो़दो़वा माल्ला थु़र्स्तु़। 3 लावो मेर्मिमका मेरामलाई चु़म्मिडिमा याल्मिडी, मा मेडेङा थु़र्मिडी। 4 आथावो मेरामका कोङमी उमा डु़ल्चो़ मेर्मिमकाडा थु़र्स्तु़, लावो मेर्मिमका मेरामलाई बुइडला याल्मिडिमा नो़-कल पार्साम्डिमा थु़र्मिडी। 5 मेकोतिमा मेरामका आथावो ङा कोङमीलाई वो थु़र्स्तु़, लावो मेरामलाई मेर्मिमका सेट्मिडी। वाङमी वो हापा ङा मेरामका थु़र्स्तु़, लावो मेर्मिमका याङलाई याल्मिडी, याङलाई सेट्मिडी। 6 “मेरामनुङ गुका छो़म द्वाक्तु़म कोले ङा उमा चो़ बाइडा। मेर्मिमका उमा चो़लाई ने जो़होमका ङा बोमी डे र्वाक्साका खोत्लेकु चङडा मेर्मिमकाडा थु़र्स्तु़। 7 “लावो मे बोम्थाम बेपामिमका र्वाम्डी, ‘ओराम ङा मेरामकु खाप्ची डार्पा चो़। लु, गुइ ओरामलाई वो सेडी मा गुका ल्वासु़मिम खोत्ले इकीमा ङा दु़म।’ 8 मेकोतिमा मेर्मिमका मेरामलाई चु़म्मिडिमा सेट्मिडी, मा अङ्गूर येकु होनोलाम घ्रोम्सोम्डी। 9 “मेकोतिमा मे येकु मु़चु़ रोमा मेर्मिमलाई हे बु़? गु रोमा मे बोम्थाम बेपामिम खोत्ले ङा सेडु़मी, मा मे अङ्गूर ये वाङमिलाई ङा ग्वाकु़मी। 10 हाम गानी माम्चु़नीकु सिजेमडा हेल्लो वो डाट्निम मिबु? ‘उहेम लुङ नेम बनेबेपामिमका पार्मिडी मेराम ङा सुरलुङ दु़स्ता, 11 ओराम ने यहोवेलामका ङा दु़स्ताम, मा ओराम इकी मिक्सीलामडा हेल्लो वो मेल्वाम्मा ङा ल्वास्तिम बु।’ ” 12 मेकोतिमा मेर्मिमका येशूलाई चु़म्मु माल्मिडी, हेङालोने ओराम सीसि-सो़म्दी उनीमा दुथाम ङा सो़म्डिम र्वाक्पा मेर्मिमका थेसिथेट्मिडी। लावो मे सेर्पा मु़चु़मिमडाम ङिम्डिमका गुमीलाई डिन्जो़ल्मिडिमा लम्ल्याम्डी। कैसरकु दुथाम येशूकु न छाम्डिम ( मत्ती २२:१५-२२ ; लूका २०:२०-२६ ) 13 मेकोतिमा गुमीलाई ल्वा ख्लो़न्बेन्मु नका फरिसीमिम नुङ हेरोदीमिमगोडाम कोङ-कोङ मु़चु़मिम उनीमाडा थु़र्मिडी। 14 मेर्मिम उनीमाडा रोम्डिमा गुमीनुङ र्वाम्डी, “ङाचो़, गानी आच्छाङाकाम बुनी, मा सु़कामथो़ वो न मेसोनी र्वाक्पा गुकु चकु, हेङालोने गानी ङाली रेप्साका खारी मेबोनी, लावो माम्चु़नीकु लाम्दी आच्छाङा जो़होमका सो़नी। सो़नीका, कैसरलाई कर सोक्सी नु़ डे मेनु़? 15 गुकु कर सोमु बासी डे मेएँ?” येशूका मेर्मिमकु नगो चम्ल्याम्डिमका र्वाम्डी, “गानी हेङा आमा न छाम्निमिम? कोले दिनार आसि रेट्नी, मा गो रेपु।” 16 मेर्मिमका कोले दिनार रेट्मिडी। मेकोतिमा गुमीका मेर्मिमनुङ र्वाम्डी, “ओराम सु़, मा आसिन्डा सु़कु ङाली बु?” मेर्मिमका गुमीनुङ र्वाम्डी, “कैसरकाम।” 17 मेकोतिमा येशूका मेर्मिमनुङ र्वाम्डी, “कैसरकाम खोत्ले कैसरलाई ङा ग्वाक्नी, मा माम्चु़नीकाम खोत्ले माम्चु़नीलाई ङा ग्वाक्नी।” ओराम ल्वा थो़म्डिमा मेर्मिम ङाङाया दु़म्मिडी। सिमुलाम बक्गेट्पाकु दुथाम हिलाहिसी ( मत्ती २२:२३-३३ ; लूका २०:२७-४० ) 18 सिमुलाम बम्गेमुडा थो़र मेलु़पा सदुकीमिम येशूकाडा रोम्डी, मा गुमीनुङ हिलाहिसी बोमु चो़म्मिडी। 19 “ङाचो़, मोशाका आरेसाका र्याक्तु़म बु, ‘कोङनिमकु वा उमा चो़ मेदु़म्साका ङा सिडा, मा उमा नाइमे बु माला, उ ल्वाकका मेराम लमु बासी, मा उमा ल्वाकका उमा वाकु नङडा चो़च्चो़ दु़म्बेन्मु बासी।’ 20 कोङ नेमडा येतले वा-ल्वाकमिम बाम्डी। उनी वाका कोले मेसेम रेड्डु़, मेकोतिमा मेरामकाम उमा चो़ मेदु़म्साका ङा सिडा। 21 मेकोतिमा लु़न्देका उ वादेल्मी लडु़, मा मेराम वो उमा चो़ मेदु़म्साका ङा सिडा। मेकोतिमा चु़न्देका वो मेमङा बु़डु़। 22 मेम्साका ङा येतले वा-ल्वाकमिम उहेमकाम वो चो़ मेदु़म्सावा, मा चङडा मेराम मेसेम वो सिडा। 23 लु सो़नी, सिमुलाम बम्गेमुनेम मेराम सु़कु नाइमे दु़म? हेङालोने मेराम मेसेम खोत्लेका ङा जु़ल्मिडिम बाइडा।” 24 येशूका मेर्मिमनुङ र्वाम्डी, “गानी माम्चु़नीकु सिजेम नुङ माम्चु़नीकु यु़म मेचनिमका ङा आरेसाका ब्लो़म्सिनिमिम। 25 हेङालोने हाङकोलो मेर्मिम सिमुलाम बम्गेमी मेकोतिलो मेर्मिमका ना लालीकुन्दा बोमी ना मेर्मिमकु लालीकुन्दा ङा दु़म। मेर्मिम ने पाह्रीला बाट्पा पाह्रीचो़ होप्माम ङा दु़म्मी। 26 सिपामिम बम्गेमी र्वाक्पा हाम गानी मोशाकु खाजेमडा डाट्निम मिबु? बुथ्राकु दुथाम माम्चु़नीकु सिजेमडा माम्चु़नीका मोशानुङ र्वाम्डी, ‘गो अब्राहाम, इसहाक नुङ याकूबकु माम्चु़नी।’ 27 गुमी ने सिपामिमकु माम्चु़नी मेएँ, सामनुङमामिमकु माम्चु़नी बुमी। गानी छो़म ब्लो़म्सिट्निम बु।” येशूका खोत्लेडाम डोक्पु डु़म्ला सो़म्डिम ( मत्ती २२:३४-४० ; लूका १०:२५-२८ ) 28 यहूदीमिमकु डु़म्ला सीपा पातु़म्रीमिमगोडाम कोले मेसिन्डा बाइडा, मा मेर्मिमका येशूनुङ हिलाहिसी बेबेम्डिम थो़स्तु़। येशूका मेर्मिमलाई जो़होमका र्वाम्डिम ल्वास्तु़मका मेरामका येशूनुङ हिलाबु़डु़, “खोत्ले डु़म्लामिमडाम डोक्पु डु़म्ला उहेम डे?” 29 येशूका र्वाम्डी, “खोत्लेडाम डोक्पु ओराम ङा सो़: ए इस्राएल थो़सा, मिप्रङमा इकीमा माम्चु़नी, मिप्रङमा कोले ङा बुमी। 30 मिप्रङमा इमा माम्चु़नीलाई खोत्ले इमा न-गोका, खोत्ले इमा सामका, खोत्ले इमा नका नुङ खोत्ले इमा यु़मका रिखाम बे। 31 मेरामकु ध्वायु़म ओराम ङा सो़, ‘गाना इमा साउखोरेलाई इमा त्वापलाई होङङा रिखाम बे।’ ओर्चिपडाम डोक्पु डु़म्ला वाङमी उहेम वो मिबु।” 32 मेरामका गुमीनुङ र्वाक्ता, “ङाचो़ गानी र्वाक्निम ने आच्छाङा। माम्चु़नी ने कोले ङा बुमी, गुमीडाम वाङमी उहेम वो मिबु। 33 गुमीलाई खोत्ले न-गोका, खोत्ले नका, खोत्ले यु़मका द्वामु, मा त्वाकु साउखोरेलाई त्वापलाई होङङा रिखाम बोमु खोत्ले सासेसी नुङ मुगोडा चासाका ग्वाक्मा ग्वा-ग्वाडाम वो डोक्पु दु़म।” 34 मेरामका छो़म मिम्साका र्वाक्ताम ल्वाम्डिमका येशूका मेरामलाई र्वाम्डी, “गाना माम्चु़नीकु किब्दी फार्डा ङा बुना।” मेनेम आथाम गुमीनुङ हिलाहिसी बोमु खोत्ले ङा ङिम्डी। येशू ख्रीष्ट सु़कु चो़? ( मत्ती २२:४१-४६ ; २३:१-३६ ; लूका २०:४१-४७ ) 35 येशूका सो़रनेम गोनो सीट्मिडिलो र्वाम्डी, “डु़म्ला सीपा पातु़म्रीमिमका ख्रीष्ट ने दाऊदकु चो़-चु़सु़ र्वाक्साका हेसाका र्वामिमिम? 36 हेङालोने माम्चु़नी-पेलका थो़ड्डु़लो दाऊदका र्वाक्ता, ‘मिप्रङमा माम्चु़नीका आ माम्चु़नीलाई र्वाम्डी, “गो इ स्वाक्चिमोमिमलाई इ फेमखेलगोयु़ मेबेथु़म गाना आ जो़पलामका बाया”।’ 37 दाऊद उ त्वाका ङा मेरामलाई ‘माम्चु़नी’ र्वा, मा हेसाका गु मेरामकु चो़ दु़स्ता?” मेकोतिमा मेसिन्डाम सेर्पा मु़चु़मिमका उनी सिजेम गेर्सिक्तो थो़म्डी। 38 मेकोतिमा मेर्मिमलाई सीत्तोङा र्वाम्डी, “यहूदीमिमकु डु़म्ला सीपा पातु़म्रीमिमडाम वाङ बानी। मेर्मिमका धु़प्पा ये फसिट्मिमा होनो-आथो़ लाम्दिम्बाल्मु नुङ बजारबाडे सेव सान्ला सो़सिमु, 39 मा घ्रो़म्दीनेमबाडे ङादोडा गन्मु नुङ ग्रुलामिमबाडे ङाउकु गन्खोपडा गन्मु माल्मी। 40 मेर्मिमका उमा वोचु़ अर्दोमेकु नेम पोम्सामी, मा वो धु़पा-धु़पा सो़म्दी बेपा लिम्सिमी। आरेप्माम मु़चु़मिमका ङा छो़म मेजो़पा देन्दे ल्वामी।” खोत्लेडाम घ्ल्वापा ग्वा-ग्वा ( लूका २१:१-४ ) 41 मेकोतिमा येशू सो़रनेमडाम ग्वा-ग्वा जु़ल्खोपकु ङादोडा गन्मिडी, मा सेर्पा मु़चु़मिमका ग्वा-ग्वा जु़ल्खोपडा ग्वा-ग्वा ग्वाम्डिम रेप्मिडी। हापा खाप्चीचो़मिमका हापा-हापा खउलुङ ग्वाम्डी। 42 मेकोतिमा कोले उ हाम वो मेबाट्पा अर्दोमे रोक्तामा वाताकु नले खउलुङ ग्वाक्तु़। मेराम को पैसा दु़म। 43 उनी सीसिपामिम उनीमाथो़ येट्मिडिमा मेर्मिमनुङ र्वाम्डी, “आच्छाङा गो गानीनुङ र्वाङु, ग्वा-ग्वा ग्वाक्पामिमगोडाम ओराम उ हाम वो मेबाट्पा अर्दोमेका खोत्लेडाम हापा ग्वाक्तु़म बु। 44 हेङालोने खोत्लेका हापा खाप्ची बासाका ग्वाम्डी, लावो ओराम मेसेमका ने हाम वो मेजु़ल्साका गुनुङ बाट्पा खोत्ले ङा ग्वाक्तु़।” |
© Wycliffe Bible Translators, Inc. All rights reserved.
Wycliffe Bible Translators, Inc.