मर्कूस 11 - थुलुङ राईयेशू यरूशलेम गोनो हुम्डिम ( मत्ती २१:१-११ ; लूका १९:२८-४० ; यूहन्ना १२:१२-१९ ) 1 येशू नुङ उनी सीसिपाममिम यरूशलेम फार्डाम जैतून पोप्चङकु होनोलाममिम बेथफागे नुङ बेथानिया र्वाक्मा देलडा रोम्फाम्डी। मेकोतिमा गुमीका उनी सीसिपामिमगोडाम नलेलाई आरे र्वाम्डिमा थु़र्मिडी, 2 “गाची होनो ङादोनोम देलनो लक्ची, मा मेसिन्डा गाची हुची मेडे ओम्लोसम्म सु़ वो मेहुथेङा बाट्पा कोले गधाकु चो़ बन्थाट्मा डार्ची, मेरामलाई डिचिमा आसि फिची। 3 कोङनिमका गाची ‘हाम बोचिमिम?’ र्वाम्डी माला येशूका ओराम चाइबेम्डिम बु, मा गुमीका दालाङा ख्लोन्सानिमी र्वामु।” 4 मेकोतिमा मेर्चिप लक्ची, मा मे गधाकु चो़ मेसि लाम्दीडा कोङ नेमकु पाखानो लाम्चोको फार्डा बन्थाट्मा डार्ची। मेरामलाई डित्तोङा बेच्चिलो, 5 मेसिन्डा ङा येम्तासिट्पा कोङ-कोङका हिलाबेम्डी, “गाची हेङा मे गधाकु चो़ डिन्चिमिम?” 6 मेर्चिपका मे येशूका र्वाम्डिम होङङा र्वाक्ची। मेकोतिमा मेर्मिमका मेर्चिपलाई लमु ग्वाम्डिची। 7 मेकोतिमा मेर्चिपका मे गधाकु चो़ येशूकाडा फिट्ची, मा उची त्वाकु हुम-ये मे गधाडला हम्ची, मा येशू मेडला हुम्डी। 8 मेर्मिमगोडाम हापाका ङा उनीमा त्वाकु हुम-ये लाम्दीडा हम्मिडी, मा याङ-याङका ने धक्साकु ग्रेम फल्मिडिमा लाम्दीडा हम्मिडी। 9 मेकोतिमा येशूकु ङादो-ङादो लक्पा नुङ चङ-चङ बिक्पामिम आरे र्वाक्तोङा येम्डी, “होसन्ना, माम्चु़नीकु नङ आलाकाम दु़म्नु़! माम्चु़नीकु नङडा रोक्पा आलाकाम! 10 इकीमा ङाउ दाऊदकु रोक्तोङा बेपा किब्दी आलाकाम दु़म्नु़, पाह्रीलाम माम्चु़नीलाई होसन्ना।” 11 येशू यरूशलेमडा लम्डिमा सो़रनेमगोनो हुम्डी। मेकोतिमा खोत्लेथो़ रेप्मिडी, मा नेम तामु दु़स्तु़म बाइडामका उनी को-न (१२) सीसिपामिमनुङ बेथानियाथो़ लम्डी। येशूका बैससीकु धक्सा वाइतो बेट्मिडिम ( मत्ती २१:१८-१९ ) 12 उ दिकाम नेम गुमी बेथानियालामका बिम्डिलो येशू क्रु़म्सिम्डी। 13 मेकोतिमा होनोवा कोले छो़म ब्लामनुङमा बैससीकु धक्सा ल्वाम्डिमा मेरामकु मा बु डे र्वाक्साका गुमी मेसि रेप्डा लम्डी। लावो मेसिन्डा लम्डिलो गुमीका मे बैससीकु ब्लामडाम वाङमिम हाम वो मेल्वामिवा, हेङालोने मेकोतिलो बैससीकु मा सिन्मु थारी मेबायावा। 14 मेम्मा गुमीका मे बैससीकु धक्सालाई र्वाम्डी, “आनेपडाम आनो इमा मा सु़का वो मेपोमिनु़।” आरे र्वाम्डिम उनी सीसिपामिमका थो़म्डिम बाइडा। येशू सो़रनेम गोनो लम्डिम ( मत्ती २१:१२-१७ ; लूका १९:४५-४८ ; यूहन्ना २:१३-२२ ) 15 मेकोतिमा येशू यरूशलेमडा रोम्फाम्डिमा सो़रनेम बाट्पा गोनो हुम्डी, मा मेगोनो भ्रेपा-भ्रेट्पामिम खोत्लेलाई पाखानो ख्लुम्सोम्डी, मा खउलुङ फाट्पामिमकु टेबलमिम नुङ तुक्तुकुर भ्रेट्पामिमकु गन्खोप वो चार्सोम्डी। 16 मेम्मा गुमीका मे सो़रनेम गोनो सु़लाई हाम वो रेन्मु लमु मेग्वाक्मिवा। 17 मेकोतिमा गुमीका सीत्तोङा र्वाम्डी, “हाम आरेप्माम र्याक्मा मिबु मा, ‘आमा नेम खोत्ले मिनीसामामिमका सो़म्दी बेखोप नेम र्वाक्साका छेमी।’ लावो गानी ने खुचु़वामिम बाखोप बुड्खुम डे बनेन्निम बु।” 18 मेकोतिमा ङाउ डु़म्लाचो़मिम नुङ डु़म्ला सीपा पातु़म्रीमिमका ओराम थो़म्डिमा येशूलाई हेसाका सेन्मु र्वाक्पा खाप रेम्मु चो़म्मिडी। लावो मेर्मिम गुमीनुङ ङिम्डिम बाइडा, हेङालोने सेर्पा मु़चु़मिम खोत्ले ङा उनी सीसिडाम ङाङाया दु़म्मिडिम बाइडा। 19 नेनेम्थाका गुमी मे शहरलामका लुम्डिमा लम्डी। बैससीकु धक्सा साड्डाम ( मत्ती २१:२०-२२ ) 20 उ दिकाम नेम नेप्सुङ धो़मु थारीका मेभाल ङा लक्तो बेम्डिलो येशू नुङ उनी सीसिपामिमका मे बैससीकु धक्सा उ सक्फारयु़म ङा सात्तो गेट्पा ल्वाम्डी। 21 मेम्मा येशूका र्वाम्डिम ल्वा पत्रुसका मिम्डु़मा र्वाक्ता, “रब्बी! रेप्नी, गानी वाइतो बेट्निम बैससीकु धक्सा ने साड्डा डे रेछा।” 22 येशूका मेर्मिमनुङ र्वाम्डी, “माम्चु़नीडा थो़र लु़नी। 23 आच्छाङा गो गानीनुङ र्वाङु, उहेमका उ त्वाकु नगोडा मेमुरु़, मा उ त्वाका र्वामिम रोथी र्वाक्साका थो़र लु़ माला ओराम पोप्चङलाई ‘गाना बुल्सामा दिरिदिनगोयु़ आल्सा’ र्वा माला मेरामकाम लागि मेम ङा दु़म। 24 मेम्मिमका गो गानीनुङ र्वाङु गानी सो़म्दीडा हाम बिनी मेराम गो ल्वाउतोम बु र्वाक्साका थो़र लु़नी, मा मेराम इनीमा दु़म। 25 गानी सो़म्दी बोनिलो गानीगोडा गोफ दु़स्ताम बु माला खोत्ले इनी छु़ल हेम्बेबेनी, मा मेम्साका ङा पाह्रीला बाट्पा इनी पापका वो इनी छु़ल हेम्सानिमी। 26 [लावो गानी छु़ल मेहेम्नी माला ने पाह्रीला बाट्पा इनी पापका वो इनी छु़ल मेहेम्सानिमी।”] येशूकु मुलु़गोनोम खारी मुर्मिडिम ( मत्ती २१:२३-२७ ; लूका २०:१-८ ) 27 येशू नुङ उनी सीसिपामिम आथावो यरूशलेमडा रोम्डी। मेकोतिमा येशू सो़रनेम बाट्पा गोनो उभाल आथो़ लाम्दित्तो बेम्डिलो, ङाउ डु़म्लाचो़मिम, डु़म्ला सीपा पातु़म्रीमिम नुङ थेट्पा-चक्पामिम, उनीमाडा रोम्डी। 28 मेर्मिमका येशूनुङ हिलाबेम्डी, “ओर्मिम खोत्ले सु़का इ मुलु़गोनो जु़ल्लु़म बु मा गाना बोनामिम? गानालाई सु़का आरे बेबेट्नाम बु?” 29 येशूका मेर्मिमनुङ र्वाम्डी, “गो गानीनुङ कोले ल्वा हिला बेउ, मा गानी सो़नी। मेकोतिमा ओर्मिम खारी बोमु सु़का आमा मुलु़गोनो जु़ल्लु़म गो र्वाङु। 30 सो़नी! यूहन्नाका ग्वाक्तु़म कु-रु़दु़म पाह्रीलाममिम डे मु़चु़लाममिम डे?” 31 मेर्मिमका उनी त्वाप-त्वापडाङा आरे र्वाबेम्डी, “पाह्रीलाममिम र्वाकी ने गानी हेङा गुडला थो़र मेलु़निवाम र्वाल्या। 32 मु़चु़लाममिम र्वाकिलो वो हेसाका र्वामु?” लावो मेर्मिम आरे र्वामु वाङमिम मु़चु़मिमडाम ङिम्डी, हेङालोने यूहन्ना माम्चु़नीलाम-जेपा मु़चु़ र्वाक्साका खोत्लेका छेम्थाल्मिडी। 33 मेर्मिमका येशूनुङ र्वाम्डी, “गुकु मेचकु।” येशूका वो मेर्मिमनुङ र्वाम्डी, “मेएँ माला ओर्मिम खारी बोमु सु़का आमा मुलु़गोडा जु़ल्लु़म बु गो वो मेर्वाङु।” |
© Wycliffe Bible Translators, Inc. All rights reserved.
Wycliffe Bible Translators, Inc.