मर्कूस 10 - थुलुङ राईवोचु़-मोचु़ ङेन्बोमुकु दुथाम येशूका सीट्मिडिम ( मत्ती १९:१-१२ ; लूका १६:१८ ) 1 मेकोतिमा येशू यर्दन ब्लोकु होनोहोम्बु यहूदियाथो़ लम्डी। लावो सेर्पा मु़चु़मिम आथावो उनीमाडा खोम्सिम्डी मा गुमीका मेर्मिमलाई ङादोम होम्साकाङा सीट्मिडी। 2 मेकोतिमा फरिसीमिम उनीमाडा रोम्डी, मा उनी न छाम्मुलाई आरेसाका हिलाहिसी बेम्डी, “मु़चु़का हाम त्वाकु नाइमेनुङ डिन्बोमु डु़म्लाका ग्वाक्सा?” 3 गुमीका मेर्मिमनुङ र्वाम्डी, “मोशाका हाम डु़म्ला ग्वाक्निमिम बु मा?” 4 मेर्मिमका र्वाम्डी, “डिन्बेबोमु र्वाक्पा र्याक्साका मु़चु़का उ त्वाकु नाइमे डिडु़ लोवो नु़ र्वाक्साका मोशाका र्वाक्ताम बु।” 5 लावो येशूका मेर्मिमनुङ र्वाम्डी, “इनीमा न लुङ होप्माम बाइडामका गुका गानीलाई ओराम डु़म्ला र्याक्तु़म। 6 लावो खोत्ले प्रङसिमुकु चो़म-दलोमङा मेर्चिपलाई माम्चु़नीका वोस्चो़ नुङ मेसेम बेसाका प्रङ्मिडी। 7 मेम्मिमका मु़चु़का उमा माम-पाम डिडु़मा उ नाइमेनुङ कोदेप बु, 8 मा मेर्चिप निफिङा कोङ सो़ दु़म्ची, मेर्चिप आथा ने नले मेएँ निफि कोङ सो़ दु़म्ची। 9 मेम्मिमका उहेमलाई माम्चु़नीका कोङ सो़ बेम्डिम बु, मु़चु़का मेराम मेफ्वाकु़नु वो।” 10 मेकोतिमा नेमगोनो बाम्डिलो उनी सीसिपामिमका गुमीनुङ आथावो ओरामकु दुथाम हिला बेम्डी। 11 गुमीका मेर्मिमनुङ र्वाम्डी, “उहेमका उ त्वाकु नाइमे डिडु़मा कोङमी रेडु़, मेरामका नाम्सु़रु़ बु़। 12 मेम्साका ङा मेसेमका वो उमा वोचु़ डिडु़मा वाङमिमनुङ ल माला मेरामका वो नाम्सु़रु़ बु़।” येशू नुङ चो़च्चो़मिम ( मत्ती १९:१३-१५ ; लूका १८:१५-१७ ) 13 येशूका लु़म्मिनु़ र्वाक्साका मु़चु़मिमका याक्के चो़च्चो़मिमलाई उनीमाडा रेट्मिडी। लावो उनी सीसिपामिमका मेर्मिमलाई भुर्मिडी। 14 लावो येशूका ओराम ल्वाम्डिमा उनी छोक्चो बक्ता, मा उनीमा सीसिपामिमनुङ र्वाम्डी, “याक्के चो़च्चो़मिमलाई आमाडा रोमु ग्वाक्निमी। मेर्मिमलाई मेभोप्नी, हेङालोने माम्चु़नीकु किब्दी आरेप्माममिमकाम ङा सो़। 15 आच्छाङा गो गानीनुङ र्वाङु, उहेमका माम्चु़नीकु किब्दी चो़च्चो़ होङका मेरङु़, मेरामका मेगोडा हुमु वो मेल्वासु़।” 16 मेकोतिमा गुमीका चो़च्चो़मिमलाई उनी गोजु़डा रम्डी, मा मेर्मिमडला उनीमा ल्वा जु़ल्मिडिमा जि ग्वाम्डिमी। खाप्चीचो़ नुङ माम्चु़नीकु किब्दी ( मत्ती १९:१६-३० ; लूका १८:१८-३० ) 17 येशू मेलामका लक्तो बेम्डिलो, कोले मु़चु़ ओन्तोङा रोक्तामा उनी ङादोडा क्रचु़खुम बु़डु़मा र्वाक्ता, “जो़पा सीपा! हेल्लो वो मेसिपा त्वारो़म ल्वामु गो हाम बोमु बासी?” 18 मेकोतिमा येशूका मेरामनुङ र्वाम्डी, “गाना गोलाई हेङा जो़पा र्वानामिम? वाङमी सु़ वो जो़पा मेबुमी, कोले माम्चु़नी कोङङा जो़पा बुमी। 19 मेसेन्मु, नाम्सु़रु़ मेबोमु, मेखुमु, लिमा ल्वा मेसो़मु, रारी मेबोमु, त्वाकु माम-पाप जो़होम बोमु र्वाक्पा डु़म्ला चना डे मेएँ?” 20 मेकोतिमा मेरामका गुमीनुङ र्वाक्ता, “ङाचो़, ओर्मिम ने गो याक्के बाङडोम आरेम ङा खोत्ले बेत्तोगेङडोम बु।” 21 येशूका मेरामलाई रेप्मिडिमा नाम-नामचो़ लु़त्तोङा र्वाम्डी, “गाना आथावो कोले खारी बोमु बासी। लक्सामा गानानुङ हा-हाम बु, मेर्मिम खोत्ले भ्रेडा, मा उनी हाम वो मेबाट्पामिमलाई ग्वाकामी। मेकोतिमा गाना पाह्रीला खाप्ची ल्वाना, मा बिकामा गोनुङ लाम्दिया।” 22 ओराम ल्वा थो़स्तु़मा मेरामका उ ङाली ङा डस्तु़, मा उ गो जक्ल्याट्पा लस्ता, हेङालोने मेराम छो़म खाप्चीनुङमा बाइडा। 23 मेकोतिमा होनो-आथो़ रेप्तोङा येशूका उनीमा सीसिपामिमनुङ र्वाम्डी, “खाप्चीनुङमामिम माम्चु़नीकु किब्दीगोडा हुमु हापा ङा छो़।” 24 गुमीका र्वाम्डिम ओराम ल्वा थो़म्डिमा उनी सीसिपामिम ङाङाया दु़म्मिडी। लावो येशूका आथावो ङा र्वाम्डी, “चो़च्चो़ नी! खाप्चीडा थो़रलु़पामिम माम्चु़नीकु किब्दीगोनो हुमु हापा ङा छो़। 25 माम्चु़नीकु किब्दीगोनो खाप्चीनुङमामिम हुमुडाम ने चु़ल्बीकु ग्वाङलामका ऊँट लुमु ङा मेछु़।” 26 मेर्मिम ङाङाया दु़म्मिडिमा उनी त्वाप-त्वापडा ङा र्वाबेम्डी, “मेएँ माला ने सु़ सेल्सिमु चाप्सु़ मा?” 27 येशूका मेर्मिमलाई रेप्मिडिमा र्वाम्डी, “मु़चु़का ने हाम वो बोमु मेचाम्मी, लावो माम्चु़नीडा ने मेप्माम हाम वो मिबु, हेङालोने माम्चु़नीका बोमु मेचाप्मिमिम हाम वो मिबु।” 28 पत्रुसका गुमीनुङ र्वाक्ता, “रेप्नी! गुकु खोत्लेम थोक ङेत्तोकोमा गानीनुङ लाम्दित्तोकोम बु।” 29 येशूका मेर्मिमनुङ र्वाम्डी, “आच्छाङा गो गानीनुङ र्वाङु, उहेमका आमा नङ नुङ जो़पा-ल्वाकु दुथाम उमा नेम-किम वा-ल्वाक, रिचो़मिम, माम-पाप, चो़च्चो़मिम, ये-द डिडु़। 30 मेरामका दु़खानुङङा को सङ कोति हापा छो़म नेम-किम, वा-ल्वाक, रिचो़मिम, ये-द, माम-पाप, चो़च्चो़मिम ओम्लोम थारीकाङा ल्वासु़। मेकोतिमा दिफु रोक्पा थारीका हेल्लो वो मेसिपा त्वारो़म वो ल्वासु़। 31 लावो ङादो दु़म्पामिम चङडा दु़म्मी, मा ओम्लो चङडा दु़म्पामिम ङादो दु़म्मी।” येशूका उनी सिमुकु दुथाम सो़म्डिम ( मत्ती २०:१७-१९ ; लूका १८:३१-३४ ) 32 येशू नुङ उनी सीसिपामिम यरूशलेमथो़ लक्तो बेम्डिलो येशू उनी ङादो-ङादो लाम्दित्तो बेम्डी। मेम्लो उनीमा सीसिपामिम ङाङाया दु़म्मिडी, मा मेर्मिमनुङ लाम्दिपामिम वो ङिम्डिम बाइडा। मेकोतिमा येशूका आथावो को-न उनीमा सीसिपामिमलाई कोर्थो़ लम्डिमा गुमीलाई हाम दु़म्मु खाप्डु़ बु र्वाक्पा ल्वा खोत्लेङा मेर्मिमनुङ सो़म्डी। 33 गुमीका र्वाम्डी, “थो़नी, गुइ यरूशलेमथो़ लक्तोङा बिइ। मेसिन्डा मिनीचो़लाई कोङ-कोङका डु़म्लाचो़मिम नुङ डु़म्ला सीपा पातु़म्रीमिमकु ल्वाडा ग्वामी, मा मेर्मिमका सेन्मु मुलु़ बोमी। मेकोतिमा सेन्मुलाई मेर्मिमका वाङसामामिमकु ल्वाडा ग्वामी। 34 मेकोतिमा मेर्मिमका गुलाई नाले डान्मी, थक्सी बेन्मी, याल्मी मा सेन्मी। लावो सुलेम नेम गु सिमुलामका बगे।” याकूब नुङ यूहन्नाका येशूकु जो़प-पेलाम दु़म्मु ल्वाचुकुनु़ र्वाक्चिम ( मत्ती २०:२०-२८ ) 35 जब्दियाकु चो़चिप याकूब नुङ यूहन्ना येशूकाडा रोक्चिमा र्वाक्ची, “ङाचो़, गुचुकु गानीनुङ हाम बिचुकु, मेराम गानी गुचुकुलाई बेसाक्चिकिनी र्वाक्पा आचीमा न बु।” 36 गुमीका मेर्चिपनुङ हिलाबेम्डी, “गो गाचीलाई हाम बेउनु़ र्वाक्पा इचीमा न बु?” 37 मेर्चिपका गुमीनुङ र्वाक्ची, “इनीमा यु़म-झ्वाक्सीडाम किब्दीगोडाम गुचुकु कोले इनीमा जो़पलाम कोले इनीमा पेलाम गन्मु ल्वाचुकुनु़।” 38 लावो येशूका मेर्चिपलाई र्वाम्डी, “गाची हाम बेत्तोङा बोची, मेराम मेचची। उहेम कान्चु़रेलामका गो डु हाम गाची वो डुमु चाम्ची, मा उहेम कु-रु़दु़म गो रउतोम बु मेराम गाची रमु चाम्ची मा?” 39 मेर्चिपका र्वाक्ची, “चाम्चुकु।” येशूका मेर्चिपलाई र्वाम्डी, “उहेम कान्चु़रेलाम गो डु मेरामलामका गाची डुमु चाम्ची, मा उहेम कु-रु़दु़म गो रउतोम बु, मेराम कु-रु़दु़म गाची रची? 40 लावो आमा जो़पलाम नुङ पेलाम गन्मु ग्वाक्पा गो मेएँ। ओराम ने उहेम-उहेमकु नङडा जु़ल्मा बु मेर्मिमकाम ङा दु़म।” 41 ओराम थो़म्डिमा मे को धु़म सीसिपामिम याकूब नुङ यूहन्नाडाम उनी छोक्छो बक्ता। 42 मेकोतिमा येशूका मेर्मिमलाई उनीमाथो़ येट्मिडिमा र्वाम्डी, “वाङसामामिमलाई उनीमा मुलु़गोनो बेपामिमका मेर्मिमलाई उनी ल्वाडा जु़ल्मी। मेकोतिमा उनीमा डोक्पुमिमका मेर्मिमलाई उनीमा मुलु़गोनो बोमी र्वाक्पा गानी चनिमिम ङा बु। 43 लावो गानीगोडा ने मेम दु़म्सिमेनु़। गानीगोडा उहेमका खोत्लेडाम डोक्पु दु़म्मु न बु़, मेराम खोत्लेकु चापे-डुपे बेपा दु़म्मु बासी। 44 मेकोतिमा गानीगोडाम उहेमका खोत्लेडाम ङादो दु़म्मु न बु़, मेराम खोत्लेकु डु़ल्चो़ दु़म्मु बासी। 45 हेङालोने मिनीचो़ चापेडुपे बेला सो़सिड्डा मेएँ, चापेडुपे बेप्डा नुङ उमा साम फ्याक्साका हापा मु़चु़मिमकु थि सोक्साका सेल्मु लागि योक्ताम सो़।” येशू नुङ मिक्सीका मेल्वापा बारतिमै ( मत्ती २०:२९-३४ ; लूका १८:३५-४३ ) 46 मेकोतिमा येशू नुङ उनीमा सीसिपामिम यरीहो शहरडा रोम्डी। गुमी उनीमा त्वाकु सीसिपामिम नुङ मे सेर्पा मु़चु़मिमनुङ मेराम शहरलाम लुक्तो बेम्डिलो, मे उ मिक्सीका मेल्वापामा बिप्बाल्पा बारतिमै र्वाक्मा तिमैकु चो़ वो मेसिङा लाम्दीडा गन्तासिट्पा बाइडा। 47 मेकोतिमा नासरतडाम येशू लक्तोङा बोमी र्वाक्पा थो़स्तु़मा मेरामका येत्तोङा र्वाक्ता, “ए दाऊदकु चो़-चु़सु़, येशू, गोडला इनी नथो़म रेम्बेनी।” 48 हापा मु़चु़मिमका मेयेसा र्वाक्तोङा मेरामलाई भुर्मिडी। लावो मेराम आथावो छो़म डोक्पु लो़लामका आरे र्वाक्तोङा येस्ता, “ए दाऊदकु चो़-चु़सु़! गोडला इनी न-थो़म रेम्बेनी।” 49 मेकोतिमा येशू मेसि ङा येम्सिम्डिमा र्वाम्डी, “मेरामलाई येट्नी।” मेकोतिमा मेर्मिमका मे मिक्सीका मेल्वापा बारतिमैलाई आरे र्वाम्डिमा येट्मिडी, “गेर्सा, मा बका! गुमीका गानालाई येत्तोङा बोनामी।” 50 मेकोतिमा मेरामका मे उ हुम-ये छा घ्रोक्तु़मा हु बक्ता, मा येशूकाडा बिक्ता। 51 येशूका मेरामलाई हिला बेम्डी, “गो गानालाई हाम बेउनु़ र्वाक्पा इमा न बु?” मेरामका र्वाक्ता, “ङाचो़, गो आमा मिक्सीका ल्वाउनु़।” 52 मेकोतिमा येशूका मेरामलाई र्वाम्डी, “लक्सा। इमा थो़रका ङा गानालाई सबेट्नाम बु।” मेकोतिलोङा मेरामका उमा मिक्सीका ल्वास्तु़मा येशूनुङ लाम्दिडा। |
© Wycliffe Bible Translators, Inc. All rights reserved.
Wycliffe Bible Translators, Inc.