मर्कूस 1 - थुलुङ राईकु-रु़दु़म ग्वाक्पा यूहन्नाका सीड्डु़मिम ( मत्ती ३:१-१२ ; लूका ३:१-१८ ; यूहन्ना १:१९-२८ ) 1 माम्चु़नीकु चो़ येशू ख्रीष्टकु दुथाम जो़पा-ल्वाकु चो़म द। 2 माम्चु़नीलाम जेपा यशैयाका आरेसाका र्याक्तु़म बु, “रेप्डा! गो इमा लाम्दी ख्लुक्पा आमा सेलाचो़ इमा ङादो-ङादो थु़रु।” 3 कोङ लो़लाम राङ-राङयालामका ये, “माम्चु़नीकु लाम्दी ख्लुनी, मा उनी लाम धानी।” 4 मेम्साका यूहन्ना कु-रु़दु़म ग्वाक्तोङा र्याङगो-र्याङगोडा ल्वाला सो़सिड्डा। “खोत्ले इनी छु़ललामका ख्लोसिट्नी, मा माम्चु़नीका इनी छु़ल हेम्मी” र्वाक्तोङा मु़चु़मिमलाई सीड्डु़मी। 5 खोत्ले यहूदिया नेब्दी नुङ यरूशलेमडाम मु़चु़मिम यूहन्नाकाडा लम्डी। मेकोतिमा उनी छु़लमिम उनी गोलामका मिम्सित्तोङा यूहन्नालामका यर्दन ब्लोकुडा कु-रु़दु़म रम्डी। 6 यूहन्नाका ऊँटकु सो़मकाम ये फसिथाल्ला, मा कोक्तेकु खिम्खिरी खिम्स्थाल्ला। गुका रु़ नुङ ब्रेउ खुदो पु़थाल्लु़। 7 मेरामका आरे र्वाक्तोङा सीड्डु़मी, “गोडाम चङडा कोले यु़मनुङमा रोमी, मा गो ने कुम्सिमुमा उनी सो़लो़पकु साले फ्रोमु वो मेघ्रेन्ङी। 8 गो कु-रु़दु़म ग्वानिनिम बु, गुमीका ने माम्चु़नी-पेल-रु़दु़म ग्वानिमी।” येशूकु कु-रु़दु़म नुङ न छाम्सी ( मत्ती ३:१३-१७ ; ४:१-११ ; लूका ३:२१-२२ ; ४:१-१३ ) 9 मेकोतिलो येशू गालीलडाम नासरतलामका बिम्डी, मा यूहन्नालामका यर्दन ब्लोकुडा कु-रु़दु़म रम्डी। 10 ब्लोकुलामका पाखाथो़ लुम्डी वो मेडे गुमीका पाह्री ह्वासिट्पा ल्वाम्डी, मा माम्चु़नी-पेल उनी त्वापडला तुक्तुकुर होप्माम योक्तोङा बेपा ल्वाम्डी। 11 मेकोतिमा पाह्रीलामका कोले लो़लामका आरे र्वाक्ता, “गाना गो छो़म द्वानिमिम आमा चो़, मा गानानुङ गो छो़म गेर्सिट्पा बुङु।” 12 माम्चु़नी-पेलका गुमीलाई र्याङगो-र्याङगोडा लम्ल्याम्डी। 13 मेसिन्डा गुमी शैतानलाम न छाम्सित्तो ब्ल धु़म नेम बाम्डी। मेम्लो गुमी सो़ब्दीपोमिम नुङ बाम्डी, मा पाह्रीचो़मिमका उनी चापे-डुपे बेम्डी। येशूका सीसिपामिम येट्मिडिम ( मत्ती ४:१८-२२ ; लूका ५:१-११ ; यूहन्ना १:३५-४२ ) 14 यूहन्ना चु़म्मिडिम चङडा, माम्चु़नीकु जो़पा-सेला थो़बेत्तोङा येशू गालीलडा रोम्फाम्डी। 15 गुमीका र्वाम्डी, “थारी रोम्फामु दु़म्स्तु़म बु, मा माम्चु़नीकु किब्दी वो फार्डा ङा रोक्फाड्डाम बु। मेम्मिमका इनी न ख्लोनी, मा जो़पा-सेलाडा थो़र लु़नी।” 16 येशू गालील दिरिदिन फारभाल लक्तोङा बेम्डिलो सिमोन नुङ उ ल्वाक अन्द्रियासका पालुङ ओप्तोङा बेच्चिम ल्वाम्डी, हेङालोने मेर्चिप पालुङचो़ बाच्ची। 17 येशूका र्वाम्डी, “गोनुङ लाम्दिची, गो गाचीलाई मु़चु़ रेट्पा पालुङचो़ दु़म्बेनिची।” 18 मेर्चिपका उची पालुङ पार्जो़ल्चिमा येशूनुङ लाम्दिट्ल्याच्ची। 19 किचो़ होनोक्थो़ रोम्थिम्डिलो येशूका जब्दियाकु चो़चिप याकूबनुङ यूहन्नाका कुबी-बोक्साडला उची पालुङ फिर्तोङा बेपा ल्वाम्डी। 20 मेम्लो गुमीका मेर्चिपलाई येन्थाम्डिची, मा मेर्चिपका उची पाप जब्दिया उनी खारी बेपामिमनुङ कुबी-बोक्साडला पार्जो़ल्चिमा येशूनुङ लक्ची। येशूका मुनाङपेल ख्लुम्डिम ( लूका ४:३१-३७ ) 21 येशू नुङ उनी सीसिपामिम कफर्नहुम शहरडा लम्डी, मा ङेम्सिमुनेम येशू घ्रो़म्दीनेमडा लम्डिमा सीमु चो़म्मिडी। 22 उनी सीसिडा मेसिन्डा बाट्पा खोत्लेङा ङाङाया दु़म्मिडी, हेङालोने उनी सीसि मे यहूदीमिमकु डु़म्लासीपा पातु़म्रीमिमकाम होप्माम मेबायावा। लावो गुमीका उनी त्वाकु मुलु़गोनोम होम्साका सीट्मिडी। 23 मेकोतिलोङा मेराम घ्रो़म्दीनेमगोडा मुनाङपेलका हुपा कोले मु़चु़ बाइडा। 24 मेरामका येत्तोङा येशूनुङ र्वाक्ता, “ए नासरतडाम येशू, गुकुनुङ गानी हाम माल्निमिम? हाम गानी गुकु पुयु़लुबेड्डा रोक्निम? गानी माम्चु़नीकु सेपाचो़ र्वाक्साका गो जो़होमका छेनिनी।” 25 येशूका मेरामलाई भुर्मिडी मा र्वाम्डी, “वाय बाया, मा मेरामलामका लुक्ल्याडा।” 26 मेकोतिलोङा मे मुनाङपेलका मेराम मु़चु़ लेप्ले बोक्तो नुङ येत्तोङा मेरामलामका लुक्ल्याड्डा। 27 मेसिन्डाम खोत्ले मु़चु़मिमका मेराम ल्वाम्डिमा ङाङाया दु़म्मिडी, मा उनी त्वाप-त्वापडाङा, “हाम डे आरेप्माम? ओराम ने आच्छाङाकाम लाले सीसि डे रेछा! मा ओरामका ने उ मुलु़गोनोम होम्साकाङा मुनाङपेलमिमलाई वो भुरु़मी रेछा! मा मेर्मिमका वो ओरामका र्वामिम थो़मी रेछा!” र्वाबेम्डी। 28 येशूकु दुथाम मेर्मिम ल्वा गालील होनो-आथो़ खोत्लेथो़ फोन्ल्यासिड्डा। येशूका पत्रुसकु नाइमेकु माम सबेट्मिडिम ( मत्ती ८:१४-१७ ; लूका ४:३८-४१ ) 29 येशू नुङ उनी सीसिपामिम मे घ्रो़म्दीनेमलामका लुम्डी मेडे सिमोन नुङ अन्द्रियासकु नेमडा लम्डी। मेकोतिलो याकूब नुङ यूहन्नाचिप वो गुमीनुङ ङा बाच्ची। 30 मेम्लो सिमोनकु नाइमेकु माम डार्चु़मोका नो़पामा अम्ल्याट्पा बाइडा। मेकोतिमा मु़चु़मिमका मेराम ल्वा येशूनुङ सो़म्ल्याम्डी। 31 मेम्मिमका येशू उमाडा लम्डिमा उ ल्वाडा जेट्मिडिमा फम्डी, मा मेम्लोङा डार्चु़मोका वो डिट्ल्याट्डु़। मेकोतिमा मेरामका उनी चापे-डुपे बोमु चो़म्डु़। येशूका सेर्पा मु़चु़मिम सबेट्मिडिम ( मत्ती ८:१६-१७ ) 32 मेनेम नेम्था नेप्सुङ गाम्डालो मेसिन्डा खोत्ले नो़पामिम नुङ मुनाङपेलका हुपामिमलाई मु़चु़मिमका येशूकाडा रेट्मिडी। 33 मेराम देलडाम खोत्ले ङा मु़चु़मिम मेराम नेमडा खोम्सिम्डिम बाइडा। 34 वाङ-वाङमी सोमोरीनुङमा छो़म सेर्पा मु़चु़मिमलाई येशूका सबेट्मिडी। मेकोतिमा छो़म सेर्पा मुनाङपेलमिम वो ख्लुम्डिमी। लावो येशूका मे मुनाङपेलमिमलाई जेमुङा मेग्वाक्मिवा, हेङालोने मेर्मिमका येशू सु़ र्वाक्साका छेट्मिडिम बाइडा। येशूका मेल्वाखोपडा सो़म्दी बेम्डिम ( लूका ४:४२-४४ ) 35 येशू नेमसोसोका, सिन्थाङा बम्डिमा मेल्वाखोपडा लम्डिमा मेसिङा सो़म्दी बोमु चो़म्मिडी। 36 मेकोतिमा सिमोन नुङ गुनुङ बाट्पा उ ङोप्सो़मिमका गुमीलाई माल्तोङा लम्डी। 37 मेर्मिमका येशूलाई डार्मिडी मा, “खोत्लेका गानीलाई माल्तोङा बोमी” र्वाम्डी। 38 मेकोतिमा गुमीका मेर्मिमनुङ र्वाम्डी, “दो, गुइ होनो-आथो़म वाङमी देलबाडे लक्सी, मा गो मेसिन्डा वो जो़पा-सेला थो़बेट्पुमी, हेङालोने गो जो़पा-सेला थो़बेड्डा ङा योङ्डोम।” 39 मेकोतिमा येशू घ्रो़म्दीनेमबाडे जो़पा-सेला थो़बेत्तो नुङ मुनाङपेलमिम ख्लुक्तो खोत्ले गालीलङा खिर्सिम्डी। येशूका जोन बेट्पालाई सबेट्मिडिम ( मत्ती ८:१-४ ; लूका ५:१२-१६ ) 40 कोले जोन बेट्पा मु़चु़का क्रचु़खुम बेत्तो येशूनुङ, “गानी न बोनी माला गोलाई नु़बेन्मु चाम्ङिनी” र्वाक्ताम-र्वाक्तामङा बु़डु़। 41 येशूकु थो़म ङा भ्रो़स्तामका गुमीका मेरामलाई लु़म्मु उनी ल्वा लक्तोङा र्वाम्डी, “गो न बेउ, गाना नु़या।” 42 मेकोतिलोङा जोनका डिट्ल्याट्डु़, मा मेराम सस्ता। 43 येशूका मेरामलाई “मामासो़! ओराम ल्वा सु़नुङ वो मेसो़या वो, लावो गाना ने लक्सामा डु़म्लाचो़मिमकाडा इ त्वापङा रेम्बेसा, मा गुका रेम्नानु़। 44 मेसिन्डाम मु़चु़मिमलाई गाना नु़न्नाम बु र्वाक्पा रेम्बोमु मोशाका माम्चु़नीलाई हाम ग्वामु र्वाक्ताम बु मेम ङा बे।” र्वाक्तोङा मेरामलाई थु़र्सोम्डी। 45 लावो मेरामका गुमीका र्वाम्डिम होङङा मेबेसाका लस्तामा खोत्लेनुङ सो़मु चो़म्डु़, मा मेराम ल्वा खोत्लेथो़ फोन्स्ता। मेम्मिमका येशू देलबाडे ङादोम होम्साका मेबासाका मु़चु़का मेल्वाखोपबाडे कोङङा बुमु चो़म्मिडी। लावो मु़चु़मिम आथावो उनीमाडा खोत्लेलामका रोम्डिहोमङा बाम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.