मत्ती 7 - थुलुङ राईवाङमिमकु निया मेबेनी ( लूका ६:३७-३८ , ४१-४२ ) 1 “वाङमिमकु निया मेबेनी, मा माम्चु़नीका इनीमा वो निया मेबोमी। 2 हेङालोने वाङमिमलाई गानी हे बोनी, गानी वो मेमङा बेला सो़न्सिनी। वाङमिमकु निया बोनिलो बाम थो़मसङ मोनी, मेराम थो़मसङकाङा इनीमा वो निया दु़म। 3 “गानी इनी वा-ल्वाककु मिक्सीडा गन्पा कति कल्पा फुर्कु ल्वानी, लावो इनी त्वाकु मिक्सीडा कार्तासिट्पा डोक्पु सङ ने हेङा मेल्वानी? 4 गानी इनी मिक्सीडा कार्तासिट्पा डोक्पु सङ ने मेल्वानी माला हेसाका इनी त्वाकु वा-ल्वाकलाई, ‘छारी, इमा मिक्सीडा गन्पा फुर्कु गो पार्सानी’ र्वानी मा? 5 मु़चु़मिमकु ङादोडा जो़पा लिसिक्पा मु़चु़नी, ङादो इनी त्वाकु मिक्सीडा कार्तासिट्पा डोक्पु सङ थाट्निमा पार्नी। मेम्मा इनी वा-ल्वाककु मिक्सीडा गन्पा फुर्कु जो़होमका ल्वानी, मा पार्सामु चाम्नी। 6 “सेपा थोकमिम ख्लेबामिमलाई मेग्वाक्नी, मेएँ माला ने मेर्मिमका गानीलाई घ्रमु माल्निमी। हापा थिकाम दिरिल्यमिम ब्वामिमकु ङादोडा मेफोट्नी, मेर्मिमका मेरामलाई देम्मिमा हाम ना हामकाम बनेबोमी।” माम्चु़नीनुङ बिनी ( लूका ११:९-१३ ) 7 “बिनी मा गानी ल्वानी, माल्नी मा गानी डार्नी, नेमगोनो हुमु लागि हेलाबेनी, मा इनीमा लागि लाम्चोको होल्सी। 8 हेङालोने उहेमका बियु़, मेरामका ल्वासु़। उहेमका मालु़, मेरामका डारु़। उहेमका नेमगोनो हुमु लागि हेला बु़, मेरामकाम लागि लाम्चोको होल्सी। 9 “गानीगोडा सु़ बु, उ तारापाचो़का सो़बेम बियु़लो लुङ ग्वाक्पा? 10 ङो बियु़लो ब्लो ग्वाक्पा सु़ बु? 11 गानी छु़लचो़ बुनिमा वो इनी चो़मिमलाई जो़पा-जो़पा ल्वामिम ग्वामु थेनी। मेरामडाम वो पाह्रीलाम माम्चु़नी इनी पापका गुमीनुङ बिपा मु़चु़मिमलाई हाङको हापा जो़पा ल्वामिम ग्वामी। 12 वाङमिमका गानीलाई हेप्माम बोमिमिम द्वानी, गानी वो मेर्मिमनुङ मेमङा बेनी। मोशाकु डु़म्ला नुङ माम्चु़नीलाम-जेपामिमकु खोत्ले सीसि ओरामङा सो़। कतिभापा नुङ भापा लाम्चोको ( लूका ६:३१ ; १३:२४ ) 13 “कोतिभापा लाम्चोकोलाम माम्चु़नीकु किब्दीगोनो हुनी। पुयु़ लुक्पा खोमडा रेथिक्पा लाम्दी भापा दु़म, मा लाम्चोको डोक्पु बु, मा मेरामलामका हुपा मु़चु़मिम हापा बुमी। 14 लावो त्वारो़म ल्वामु लाम्दिपा लाम्दी लाम्दिमु मेझापा बु, मा मेगोनो हुखोप लाम्चोको कतिभापा बु। ओराम लाम्दी डार्पा मु़चु़मिम ने किकि कोङङा बुमी। धक्सा नुङ मेरामकु मा ( लूका ६:४३-४६ ; १३:२५-२७ ) 15 “उडलाम भेन्दा होङङा बेपा लावो ङिमलु़पा बडिमिम होप्माम माम्चु़नीलाम-जेपा लिसिक्पामिमडाम चङचङया बानी वो! 16 मेर्मिमलाई गानी उनी खारीलामकाङा छेनी। चु़कु धक्साडा अङ्गूर मेसिडु़, मा दोचु़कु धक्साडा बैससी मेसिडु़। 17 मेम्साका जो़पा धक्साडा जो़पा मा सिडु़, मेजो़पा धक्साडा मेजो़पा मा सिडु़। 18 जो़पा धक्साडा मेजो़पा मा मेसिडु़, मेजो़पा धक्साडा जो़पा मा मेसिडु़। 19 मेम्मिमका जो़पा मा मेसिट्पा खोत्ले धक्सा रु़प्मी, मा मुगोडा घ्रोमी। 20 आरेसाका मेर्मिमका बोमिमिम खारीलामका माम्चु़नीलाम-जेपा लिसिक्पामिमलाई गानी छेनी। 21 “गोलाई ‘ङाचो़, ङाचो़’ र्वाक्पा खोत्ले पाह्री-किब्दीगोडा मेहुमी। पाह्रीला बाट्पा आमा पापकु न होम्साका खारी बेपामिम कोङङा मेगोडा हुमु ल्वामी। 22 मेनेम हापा मु़चु़का गोलाई र्वामी, ‘ङाचो़, ए ङाचो़, गुकु इनीमा नङडा माम्चु़नीलाम-जेत्तोको, मुनाङमिम कोल्तोको, मा यु़मनुङमा खारीमिम बेत्तोको।’ 23 गो मेर्मिमलाई र्वाङु, ‘गो गानीलाई हेल्लो वो छेट्निनिमङा मिबु। माम्चु़नीकु न होम्साका खारी मेबेपा मु़चु़नी, आमा फार्डा मेबानी।’ नेप्चीनुङमा नुङ नेप्ची मान्थिम नेम बनेबेपा मु़चु़ ( लूका ६:४७-४९ ) 24 “मेम्मिमका उहेम मु़चु़का आमा सिजेम थो़सु़, मा मेराम होम्साका खारी बु़, मेराम मु़चु़ मेदोपा लुङडला नेम बनेबेपा नेप्चीनुङमा मु़चु़ होप्मामङा सो़। 25 व योक्ता, मा होङकोर्मा योक्ता, ब्लोजु़ फुड्डु़मा मेराम नेम याक्तु़। मेम्मा वो मेराम नेम मेझार्सावा, हेङालोने मेराम नेम मेदोपा लुङडला बनेबेम्मा बाइडा। 26 लावो उहेम मु़चु़का आमा सिजेम थो़सु़, मा मेराम होम्साका मेबु़, मेराम मु़चु़ सेक्रेडला नेम बनेबेपा नेप्ची मान्थिम मु़चु़ होप्मामङा सो़। 27 व योक्ता, मा होङकोर्मा योक्ता, ब्लोजु़ फुड्डु़। मेम्मा मेराम नेम याक्तु़लो मेराम नेम झार्स्ता, मा स्याकारिस्ता। 28 येशूका ओर्मिम ल्वा सीमु दु़म्मिडिमा येशूकु सीसिडा सेर्पा मु़चु़ ङाङाया दु़म्मिडी, 29 हेङालोने मेर्मिमकु डु़म्ला सीपा पातु़म्रीमिमका होम्साका मेएँ, साखामनुङमा मु़चु़का होम्साका येशूका सीट्मिडिम बाइडा।” |
© Wycliffe Bible Translators, Inc. All rights reserved.
Wycliffe Bible Translators, Inc.