मत्ती 27 - थुलुङ राईयेशू किब्दी साखामचो़ पिलातसलाई ग्वाम्डिम ( मर्कूस १५:१ ; लूका २३:१-२ ; यूहन्ना १८:२८-३२ ) 1 नेमसोसोका मे ङाउ डु़म्लाचो़मिम नुङ ङाउमिम खोत्लेका येशूलाई सेट्पा मुलु़ बेम्डी। 2 मेम्मा मेर्मिमका गुमीलाई बसाका लम्डिमा रोमी किब्दी साखामचो़ पिलातसलाई ग्वाम्डी। यहूदा चेस्ताम ( थु़र्मा १:१८-१९ ) 3 येशूलाई सेन्मु देन्दे ग्वाम्डी र्वाक्पा गुमीलाई भ्रेट्पा यहूदाका थो़स्तु़, मा खोर्सेड्डु़। मेम्मा मे सु धु़म (३०) मत्तोकु सिक्का ङाउ डु़म्लाचो़मिम नुङ ङाउमिमलाई ख्लोक्साड्डु़मी। 4 मेम्मा र्वाक्ता, “हाम वो मेख्लो़ट्पा मु़चु़लाई भ्रेसाका गो छु़ल बेउतो।” मेर्मिमका र्वाम्डी, “मेराम आकीमा लागि हाम मा? गानाङा चना।” 5 मेकोतिमा यहूदाका मेराम खउलुङ सो़रनेमगोनो घ्रोक्तु़मा लस्ता, मा मेराम चेस्तामा सिडा। 6 ङाउ डु़म्लाचो़मिमका मेराम खउलुङ डो़म्डिमा र्वाम्डी, “ओराम ने मु़चु़ सेन्मु लागि सोक्मा खउलुङ। मेम्मिमका सो़रनेमडाम खउलुङ जु़ल्खोपडा ओराम जु़ल्मु इकीमा डु़म्लाका मेग्वाक्सा।” 7 मेर्मिमका मुलु़ बेम्डिमा मेराम खउलुङका वाङथो़लाम रोक्पामिमकु सु़लु़मकाम लागि कुमालेकु ये भ्रेम्डी। 8 मेम्मिमका आथामबिलि वो मेराम येलाई ‘सिसिकु ये’ र्वामी। 9 माम्चु़नीलाम-जेपा यर्मियाका आरे र्वाक्ताम रोक्थिड्डा: “इस्राएलडाम मु़चु़मिमका उमा थि बेम्डिम सु धु़म (३०) मत्तोकु खउलुङ रम्डी, 10 मा मिप्रङमाका गोलाई बेबेट्ङिडिमिम होम्साका मेर्मिमका कुमालेकु ये मेराम खउलुङका भ्रेम्डी।” पिलातसका येशूलाई हिलाहिसी बु़डु़म ( मर्कूस १५:२-१५ ; लूका २३:३-५ , १३-२५ ; यूहन्ना १८:२९–१९:१६ ) 11 मेकोतिमा येशूलाई रोमी किब्दी साखामचो़ पिलातसकु ङादोडा येम्सिबेट्मिडी। किब्दी साखामचो़का गुमीलाई हिलाबु़डु़, “हाम गाना यहूदीमिमकु हप?” येशूका र्वाम्डी, “गानी र्वानिमिम होङङा सो़।” 12 ङाउ डु़म्लाचो़मिम नुङ यहूदी ङाउमिमका येशूलाई मुमा बेन्मु चो़म्मिडी, लावो गुमी वायवाय बाम्डी। 13 मेकोतिमा पिलातसका गुमीलाई र्वाक्ता, “मेर्मिमका इमा कोर्थो़लाम हापा ल्वामिम सो़त्तोङा लेन्मिमिम हाम गाना मेथो़ना?” 14 लावो येशूका पिलातसलाई कोसि वो मेतुक्मिवा, मा किब्दी साखामचो़ पिलातस छो़म ङाङाया दु़स्ता। 15 थ-थकाम सेल्सिमुनेमकु चाडकाम थारीका मु़चु़मिमका न बोमिमिम होङङा चक्मा कोले मु़चु़लाई किब्दी साखामचो़का डिथाल्लु़। 16 मेराम थारीका बारब्बा नङकाम ङिमलु़पा कोले मु़चु़ चसिड्डाम बाइडा। 17 सेर्पा मु़चु़ खोम्सिम्डी, मा पिलातसका मेर्मिमलाई हिलाबु़डु़मी, “इनीमा लागि गो सु़लाई डिन्सानिनिमिम न बोनी, बारब्बालाई डे ख्रीष्ट र्वाक्मा येशूलाई डे?” 18 हेङालोने ङाउमिम उनी नो़ मेनु़यावामका येशूलाई उमा ल्वाड्डा ग्वाम्डिम र्वाक्पा पिलातसका चडु़म बाइडा। 19 निया बेपा गन्खोपडा पिलातस गन्तासिट्डालो उमा नाइमेका आरे र्वाक्पा सेला थु़र्स्तु़, “हाम वो मेख्लो़ट्पा मेराम मु़चु़लाई हे वो मेबेनी, हेङालोने बासिन्था गो उमा दुथाम ङिमा म्वात्तोमा छो़म दु़खा ल्वाउतोम बु।” 20 लावो ङाउ डु़म्लाचो़मिम नुङ ङाउमिमका बारब्बालाई डिन्सोमु, मा येशूलाई सेन्मु बासी र्वाक्नी बेसाका सेर्पा मु़चु़लाई लेम्मिडी। 21 किब्दी साखामचो़ पिलातसका आथावो मेर्मिमलाई हिलाबु़डु़मी, “ओर्चिप नलेडा गो उहेमलाई डिन्सानिनिमिम गानी न बोनी?” मेर्मिमका र्वाम्डी, “बारब्बालाई।” 22 पिलातसका मेर्मिमलाई हिलाबु़डु़मी, “मेम माला ख्रीष्ट र्वाक्मा येशूलाई गो हाम बेउमिम?” मेर्मिम खोत्लेका येत्तो र्वाम्डी, “मेरामलाई क्रूसडा चेट्नी।” 23 पिलातसका मेर्मिमलाई हिलाबु़डु़मी, “हेङा, ओरामका हाम ख्लाम्या बु़डु़म बु मा?” लावो मेर्मिम आथावो येत्तो र्वाम्डी, “मेरामलाई क्रूसडा चेट्नी।” 24 हाम वो बोमु मेझापा, मेरामडाम ने मु़चु़मिम येमु-दुमुमा ङाल्मु खाप्मिमिम पिलातसका ल्वास्तु़। मेम्मा गुका कु रङडु़मा सेर्पा मु़चु़कु ङादोडा उ ल्वा सो़ल्साका र्वाक्ता, “ओराम मु़चु़ सेन्मुडा गो हाम वो ख्लो़त्तोम मिबु, इनी त्वापङा चन्सिट्नी।” 25 खोत्ले मु़चु़का र्वाम्डी, “गुलाई सेट्माकु मुमा-तामा गुकु नुङ आकी चो़-चु़सु़डला बुसिनु़।” 26 मेकोतिमा पिलातसका बारब्बालाई डिसाड्डु़मी। लावो येशूलाई कोक्तेकु रिबाका याल्बेड्डु़मा क्रूसडा चेन्मु लागि सिपाहीमिमकु ल्वाड्डा ग्वाक्तु़मी। सिपाहीमिमका येशूलाई नालेडाट्मिडिम ( मर्कूस १५:१६-२० ; यूहन्ना १९:२-३ ) 27 मेकोतिमा किब्दी साखामचो़ पिलातसकु सिपाहीमिमका येशूलाई ओगानेमगोनो लम्डी, मा पल्टनडाम खोत्ले सिपाहीमिमलाई येशूकु ङादोडा खोप्मिडी। 28 मेर्मिमका येशूकु ये-सेम प्लु़म्साम्डिमा गुमीलाई लालाम हुम-ये फबेट्मिडी। 29 मेर्मिमका चु़काम मुकुट थो़म्डिमा येशूकु बुइडला खुबेट्मिडी। मेम्मा उनी जो़प ल्वाडा हपकु डु़लु़म्चो़ होङङा नारकु डु़लु़म्चो़ जु़ल्साम्डी, मा उनी ङादोडा क्रचु़खुम बेसाका आरे र्वाक्तो गुमीलाई नालेडाट्मिडी, “यहूदीमिमकु हपकाम सो़र दु़म्नु़, रो़र दु़म्नु़!” 30 मेम्मा मेर्मिमका गुमीलाई थक्सी बेट्मिडिमा मे नारकु डु़लु़म्चो़ रोट्मिडी, मा मेरामका उनी बुइडला याल्मिडी। 31 गुमीलाई नालेडान्मु डु़म्मिडिमा मे हुम-ये प्लु़म्साम्डी, मा उनी ये फबेट्मिडी। मेम्मा गुमीलाई क्रूसडा चेड्डा लम्डी। येशूलाई क्रूसडा चेट्मिडिम ( मर्कूस १५:२१-३२ ; लूका २३:२६-४३ ; यूहन्ना १९:१७-२७ ) 32 लाम्दीडा लक्तोङा बेम्डिलो मेर्मिमका कुरेनी शहरलाम बिक्पा सिमोन नङकाम कोले मु़चु़ डार्मिडी। मेम्मा सिपाहीमिमका मेरामलाई येशूकु क्रूस कुर्मु क्र्वाम्डी। 33 मेम्मा मेर्मिम गलगथा र्वाक्मा बायडा रोम्फाम्डी। गलगथा र्वाक्मा बुइसेर बाट्पा बाय। 34 सिपाहीमिमका गुमीलाई खिङ ङोल्मा अङ्गूरकु बिलाम थो़ट्मिडी, लावो गुमीका मेराम दो़प्मिडी, मा डुमु मेबिम्सिप्मिवा। 35 मेर्मिमका गुमीलाई क्रूसडा चेट्मिडिमा चिठ्ठा ओप्साका येशूकु ये-सेम दो़म्डी। 36 मेम्मा मेसिन्डा बासाका मेर्मिमका येशूलाई लन्थाम्डी। 37 “ओराम यहूदीमिमकु हप येशू” र्वाक्साका येशूकु कोर्थो़लाम र्याक्मा ल्वा येशूकु बुइकु डला मेर्मिमका चेट्मिडी। 38 गुमीनुङङा नले खुचु़वाचिप वो क्रूसडा चेट्मिडिम बाइडा। कोले उनी जो़पलाम, मा कोङमी उनी पेलामका बाच्ची। 39 मेराम लाम्दीभाल लाम्दिपा खोत्ले मु़चु़मिमका उनी बुइ रक्तो येशूलाई डक्साका जेम्डी, 40 मा र्वाम्डी, “सो़रनेम फाल्पामा सुलेमका बनेबेपा गाना, इ त्वापलाई सेला, मा गाना माम्चु़नीकु चो़ माला ने क्रूसलामका लुकामा योका।” 41 ङाउ डु़म्लाचो़मिम, डु़म्ला सीपा पातु़म्रीमिम नुङ ङाउमिमका वो मेम्साकाङा गुमीलाई नाले डाट्मिडी। 42 मेर्मिमका र्वाम्डी, “ओरामका वाङमिमलाई सेल्लु़मी, लावो उ त्वापलाई ने सेल्मु मेचाप्सु़। गु इस्राएलडाम हप। ओम्लोङा क्रूसलामका लुक्साका योनु़, मा गुइ ओरामडला थो़रबिइ। 43 ओरामका माम्चु़नीडा थो़र बु़। माम्चु़नीका न बोमी माला ओरामलाई ओम्लोङा फ्वामिनु़। हेङालोने ओरामका ‘गो माम्चु़नीकु चो़’ र्वाक्ताम बाइडा।” 44 गुमीनुङ क्रूसडा चेट्मा नले खुचु़वाचिपका वो मेम्साकाङा गुमीलाई डक्साका जेच्ची। येशू सिम्डिम ( मर्कूस १५:३३-४१ ; लूका २३:४४-४९ ; यूहन्ना १९:२८-३० ) 45 नेम्फुम को-न (१२) जेस्तालो आथाम सु जेस्तामसम्म खोत्लेथो़ तुकुम्चिमका हुप्डु़। 46 सु जेस्ताम बिलि येशू आरे र्वाक्तो डोक्पु लो़लामका येम्डी, “इलोई, इलोई, लामा सबखथनी?” ओराम र्वाक्मा, “ए आमा माम्चु़नी, ए आमा माम्चु़नी, हेङा गानी गोलाई ङेट्ङिडिनिम?” 47 मेसिन्डा येम्सिक्पा याङ-याङका कोर्थो़ थो़म्डिमा माम्चु़नीलाम-जेपा एलियालाई गुका येडु़मिम र्वाक्पा मिम्मिडी। 48 मेर्मिमगोडाम कोले ओन्तो लस्तामा जु़र्पा अङ्गूरकु बिलामडा खाबा प्लु़म्डु़। मेम्मा नारकु डु़लु़म्चो़कु जु़जु़डा सक्साका कोस्तु़मा गुमीलाई डुबेड्डु़। 49 लावो वाङमिमका र्वाम्डी, “लडी, ओरामलाई सेल्ला एलिया रो डे, रेप्डी।” 50 मेकोतिमा येशू आथावो डोक्पु लो़लामका येम्डी, मा उनी साम लस्ता। 51 मेकोतिलोङा सो़रनेमगोडाम रिपा-ये हालाम हायु़ नक फ्वाक्चो़ल दु़म्साका आ़स्ता। मेम्मा सुबु रुड्डु़, मा भ्र्वा रिड्डा। 52 सु़लु़ममिम ह्वाम्सिम्डी, मा माम्चु़नीकु हापा मु़चु़मिम सिम्डिम, सिमुलाम बम्गेम्डी। 53 सु़लु़मलामका मेर्मिम लुम्डी। येशू सिमुलाम बम्गेम्डिम चङडा मेर्मिम माम्चु़नीकु नङका साट्मा यरूशलेम शहरडा लम्डी, मा हापा मु़चु़मिमकाडा रेम्बेम्सिम्डी। 54 येशूलाई लपाम बाट्पा कप्तान नुङ सिपाहीमिमका सुबुरुक्सी लस्ताम नुङ मेसिन्डा दु़स्ताम खोत्ले ल्वाम्डिमा छो़म ङिम्डी। मेम्मा मेर्मिमका र्वाम्डी, “आच्छाङा ओराम ने माम्चु़नीकु चो़ङा बाइडाम रेछा।” 55 मेसिन्डा हापा मेसेममिम वो बाम्डी, मेर्मिमका होनोवा बासाका रेम्थाम्डी। मेर्मिमका येशूकु चापे-डुपे बोमु गालीललामका उनी चङचङ लाम्दिम्डिम बाइडा। 56 मेर्मिमगोडाम मरियम मग्दलिनी, याकूब नुङ यासेफकु माम मरियम नुङ जब्दियाकु चो़चिपकु माम बाम्डी। येशू क्लु़म्मिडिम ( मर्कूस १५:४२-४७ ; लूका २३:५०-५६ ; यूहन्ना १९:३८-४२ ) 57 ने-नेम्थाका अरिमाथिया शहरडाम योसेफ नङकाम कोले खाप्चीचो़ रोक्ता। गु वो येशूकु सीसिपा बाइडा। 58 गु पिलातसकाडा लस्तामा येशूकु सिपा रो़म बियु़डु़, मा पिलातसका मे सिपा रो़म योसेफलाई ग्वाबेड्डु़मी। 59 योसेफका मे सिप्खा रेड्डु़, मा बुबुयाम सुतीकु येका दिल्लु़। 60 मेम्मा गुका भ्र्वागोनो धासाका उ त्वाकाम लागि बनेबु़डु़म लाले सु़लु़मगोनो मे सिप्खा जु़ल्लु़। सु़लु़मगोनो हुखोपडा गुका डोक्पु ख्रेमलुङ रिल्साका ख्रेप्जो़ल्लु़, मा लस्ता। 61 मरियम मग्दलिनी नुङ कोङमी मरियम वो सु़लु़मकु ङादोडा गन्तासिट्चिम बाइडा। येशूकु सु़लु़म लट्मिडिम 62 उ दिकाम, सिलापालेम नेम ङाउ डु़म्लाचो़मिम नुङ फरिसीमिम पिलातसकाडा घ्रो़म्डा लम्डी, 63 मा र्वाम्डी, “ङाचो़, मेराम लुचो़ नु़पा बाइडालो ‘सुलेमका सिमुलाम बम्गेङु’ र्वाक्ताम आकी नडा बु। 64 मेम्मिमका सुलेमसम्म मे सु़लु़म जो़होमका लन्बेट्नी। मेएँ माला ने उमा सीसिपामिम रोमिमा उमा रो़म खुमिमा सिमुलामका गु बग्गेड्डा र्वाक्साका मु़चु़मिमनुङ र्वामी। मेम्मा ङादोमडाम वो छो़म मेजो़पा लु-फेले दु़म।” 65 पिलातसका मेर्मिमलाई र्वाक्ता, “सिपाहीमिमलाई लक्साका लक्निमा इनी चाप्सी जो़होमका लन्बेट्नी।” 66 मेकोतिमा मेर्मिम लम्डिमा सु़लु़मकु ख्रेमलुङडा छाप ओप्मिडी, मा सिपाहीमिमलाई लन्बेट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.