मत्ती 16 - थुलुङ राईछेखोप रेम्मु माल्मिडिम ( मर्कूस ८:११-१३ ; लूका १२:५४-५६ ) 1 कोलेम फरिसीमिम नुङ सदुकीमिम येशूकाडा रोम्डिमा उनी न छाम्मु लागि माम्चु़नीलाममिम हेल्लो वो मेल्वाम्मा छेखोप रेम्बेला सो़म्सिम्डी। 2 येशूका मेर्मिमलाई र्वाम्डी, “ने-नेम्थाका धामु ख्याक्पा ल्वानिमा गानी र्वानी, ‘दिका नेम नु़ रेछा’ 3 नेमसोसोका धामु ख्याक्पा नुङ खासेका ड्याक्पा ल्वानिमा र्वानी, ‘आनेप व यो रेछा।’ धामु रेप्साका हाम दु़म रेछा र्वाक्पा चनी। लावो थारीकु दुथाम गानी मेचनी? 4 छु़लचो़ नुङ नाम्सु़रु़ बेपा ओराम थारीकु मु़चु़मिमका छेखोप रेम्मु माल्मी, लावो मेर्मिमका योनाकु छेखोप कोङङा रेम्मु ल्वामी।” मेकोतिमा येशूका मेर्मिमलाई पार्जो़ल्मिडिमा लम्डी। फरिसीमिम नुङ सदुकीमिमकु लङखामडाम वाङ बुमु ( मर्कूस ८:१४-२१ ) 5 येशू नुङ उनी सीसिपामिम दिरिदिनकु होम्बुनो रोम्थिम्डी, लावो उनी सीसिपामिमका सो़बेम कुर्मु प्ल्वाम्चेम्डिम बाइडा। 6 येशूका मेर्मिमलाई र्वाम्डी, “मामासो़! फरिसी नुङ सदुकीमिमकु लङखामडाम चङचङया बानी वो।” 7 मेर्मिमका उनी त्वाप-त्वापडा आरे र्वाबोमु चो़म्मिडी, “गुइ सो़बेम मेकुरिवामका गुमीका आरे र्वामिमिम रो ओ।” 8 मेर्मिमका हिलाहिसी बेबेम्डिमकु दुथाम येशूका चम्डिमा र्वाम्डी, “याक्के थो़रनुङमा ए मु़चु़नी, गानीनुङ सो़बेम मिबु र्वानिमा हेङा इनी त्वाप-त्वापडा हिलाहिसी बेबोनिमिम? 9 ङोले सो़बेम ङो धु़मसङ (५,०००) मु़चु़मिमलाई पोमु ग्वाक्तोमिलो हाङको खचा घ्लेस्ताम गानी डो़न्नी, हाम मेमिम्नी? 10 येतले सो़बेम ब्ल धु़मसङ (४,०००) मु़चु़मिमलाई पोमु ग्वाक्तोमिलो क्लेट्मिडिम सो़बेम हाङको खचा डो़न्नी? 11 गानीलाई गो सो़बेमकु दुथाम र्वाङडोम मेएँ र्वाक्साका गानी हेङा थेसिमेथेनिमिम? मेम्मिमका गो आथावो र्वाङु, फरिसीमिम नुङ सदुकीमिमकु लङखामडाम वाङ बानी।” 12 मेकोतिमा सो़बेमडा फिकिमिम लङखामडाम मेएँ, फरिसीमिम नुङ सदुकीमिमकु सीसिडाम येशूका चङचङया बानी र्वाम्डिम रेछा र्वाक्पा मेर्मिमका थेसिथेट्मिडी। येशूङा ख्रीष्ट र्वाक्साका पत्रुसका सो़यु़डु़म ( मर्कूस ८:२७-३० ; लूका ९:१८-२१ ) 13 येशू कैसरिया फिलिप्पीकु इलाकाडा रोम्डी, मा उनी सीसिपामिमलाई हिलाबेम्डी, “मु़चु़मिमका मिनीचो़लाई सु़ र्वामी?” 14 मेर्मिमका र्वाम्डी, “याङका कु-रु़दु़म ग्वाक्पा यूहन्ना र्वामी, याङका एलिया र्वामी, मा याङका यर्मिया डे, माम्चु़नीलाम-जेपामिमगोडाम कोले डे र्वामी।” 15 गुमीका मेर्मिमलाई हिलाबेम्डी, “मा गानी गोलाई सु़ र्वानी?” 16 सिमोन पत्रुसका र्वाक्ता, “गानी ख्रीष्ट, हेल्लो लोवो बाट्पाम बाट्पा माम्चु़नीकु तारापाचो़।” 17 येशूका मेरामलाई र्वाम्डी, “योनाकु तारापाचो़ सिमोन, गाना जिनुङमा सो़। हेङालोने ओराम ल्वा मु़चु़लामका गाना सीसिट्नाम मेएँ, पाह्रीलाम आमा पापका रेम्बेम्डिम सो़। 18 गो गानालाई र्वाङु, गाना पत्रुस सो़। ओराम लुङडला आमा मण्डली गो बनेबेउ, मा शैतानकाङा वो ओरामलाई घ्ल्वामु मेचाप्सु़। 19 गो गानालाई पाह्रीलाम साँचोमिम ग्वानी। गाना सुबुडा चक्नामिम ल्वा पाह्रीला वो चसी, मेम्साकाङा सुबुडा डिट्नामिम ल्वा पाह्रीला वो डिन्सी।” 20 गुमीका उनी सीसिपामिमलाई गुमी ख्रीष्ट र्वाक्पा ल्वा सु़नुङ वो मेसो़मु र्वाक्साका ङिम्साट्मिडी। येशूका त्वाकु सिमु नुङ बम्गेमुकु दुथाम सो़म्डिम ( मर्कूस ८:३१-३३ ; लूका ९:२२ ) 21 गुमी यरूशलेम लमुङा बासिक्पा, मा ङाउमिमका, ङाउ डु़म्लाचो़मिमका नुङ डु़म्ला सीपा पातु़म्रीमिमका हापा ल्वालाम गुमीलाई दु़खा ग्वामी, गुमीलाई सेन्मी, लावो सुलेमनेम गुमी बम्गेट्मी र्वाक्साका मेम्लो आथाम येशूका उनी सीसिपामिममनुङ सो़मु चो़म्मिडी। 22 पत्रुसका गुमीलाई कोर्थो़ लडु़मा भुर्तो र्वाक्ता, “माम्चु़नीका आरे मेबोमिनु़। ङाचो़, गानीडला आरेप्माम हेल्लो वो मेदु़म।” 23 पत्रुसथो़ ख्लोम्सिम्डी, मा येशूका र्वाम्डी, “शैतानका बु़मिम होङङा बोमु डिडा। माम्चु़नीकु न होङङा बोमु गाना गोलाई भोम्मु माल्ङिमिम बु। हेङालोने माम्चु़नीका मिम्मिमिम होङङा गाना मेमिम्ना, मु़चु़का मिम्मिमिम होङङा मिम्ना।” 24 मेकोतिमा येशूका उनी सीसिपामिमलाई र्वाम्डी, “कोङनिमका आमा चङचङ लाम्दिमु न बु़ माला मेरामका उमा नसिहोम बोमु डिसाका त्वाकु क्रूस कुर्नु़मा आमा चङचङ लाम्दिनु़। 25 हेङालोने उहेम मु़चु़का उ त्वाकु साम जु़ल्मु मालु़, मेरामका त्वारो़म मेल्वासु़। लावो उहेम मु़चु़का आमा लागि उ साम फ्याक्सु़, मेरामका त्वारो़म ल्वासु़। 26 खोत्ले सु़म्दिसेरङा उ ल्वाड्डा बेसाका वो त्वारो़म मेल्वासु़ माला मेराम मु़चु़का हाम ल्वासु़ मा? मु़चु़कु त्वारो़मडाम वो हापा थिकाम हाम बु मा? 27 हेङालोने मिनीचो़ उ त्वाकु पापका ग्वामिमिम यु़म-झ्वाक्सीडा उ पाह्रीचो़मिमनुङ यो। मेराम थारीका गुका खोत्ले मु़चु़मिमलाई मेर्मिमका बेम्डिम खारी होम्साका पुरस्कार लोवो देन्दे लोवो ग्वाकु़मी। 28 आच्छाङा गो गानीलाई र्वाङु, आसिन्डा येम्तासिक्पामिमगोडाम कोङ-कोङका मिनीचो़लाई हपकु साखाम थो़ड्डा योक्तोङा बेपा मेल्वाथु़मसम्म उनी साम मेल।” |
© Wycliffe Bible Translators, Inc. All rights reserved.
Wycliffe Bible Translators, Inc.