लूका 8 - थुलुङ राईयेशूनुङ लाम्दिपा मेसेममिम 1 कोलेम नलेम चङडा येशूका माम्चु़नीकु किब्दीकु दुथाम जो़पा-सेला थो़बेत्तो नुङ सिजेम दो़त्तो देल-देलडा नुङ शहर शहरडा लम्डी। गुमीनुङ को-न (१२) सीसिपामिम बाम्डी, 2 मुनाङ नुङ सोमोरीलाम सपा कोङनिम मेसेममिम वो गुमीनुङ बाम्डी। मेर्मिम मेसेममिमगोडा मरियम र्वाक्मा मग्दलिनी मेसेम वो बाइडा। मेराम मेसेमकु मिरो़मलामका येशूका येतले (७) मुनाङ कोल्मिडिम बाइडा, 3 हेरोद हपकु खउलुङ रेप्साक्पा खुजासकु नाइमे योअन्ना मा सुसन्ना नुङ वाङमी हापा मेसेममिम वो बाम्डी। मेर्मिमका उनी खाप्ची ग्वाक्साका येशूनुङ उनी सीसिपामिमलाई ख्लो़म्थाल्मिडी। भ्रल फोट्पाकु सीसि-सो़म्दी ( मत्ती १३:१-२३ ; मर्कूस ४:१-२० ) 4 शहर-शहरलामका मु़चु़मिम येशूकाडा रोम्डी, मा छो़म सेर्पा मु़चु़मिम खोम्सिम्डी। मेकोतिमा येशूका मेर्मिमनुङ कोले सीसि-सो़म्दी र्वाम्डी। 5 “कोले खारीचो़ भ्रल फोड्डा लस्ता। भ्रल फोड्डु़लो याङ भ्रल लाम्दीबाडे झुस्ता, मा मु़चु़मिमका देम्मिडी। मेकोतिमा चक्पुका डो़म्पेम्डी। 6 याङ भ्रल लुङदुडा झुस्ता, मा मे भ्रल ल्यास्ता मेडे साट्ल्याड्डा, हेङालोने मेराम ये साट्पा बाइडा। 7 याङ भ्रल चु़दुगोनो झुस्ता, मा मे भ्रलनुङङा चु़ वो बर्तो गेड्डा, मा भ्रल बर्मु मेग्वाकु़वा। 8 लावो याङ भ्रल ने जो़पा क्वाडला झुस्ता, मा ल्यास्तामा को सङ (१००) डाम वो हापा मा सिड्डु़।” आकोति र्वाम्डिमा गुमीका डोक्पु लो़लामका र्वाम्डी, “सु़काम थो़पा नोफ्ला बु मेरामका थो़स्नु़मा थेसिथेट्नु़।” 9 येशूकु उनी सीसिपामिमका ओराम सीसि-सो़म्दीका हाम र्वामु मालु़मिम र्वाक्साका हिलाबेम्डी। 10 येशूका मेर्मिमनुङ र्वाम्डी, “माम्चु़नीकु किब्दी हाम र्वाक्साका आच्छाङा छेपा सामा गानीलाई कोङङा ग्वाक्मा बु। मेम्मिमका मु़चु़मिमका ने थेसिमेथेन्मिनु़ र्वाक्साका सीसि-सो़म्दीडा कोङङा जेङु। यशैयाका र्याक्तु़म खाजेमडा वो आरे र्वाक्पा बु, ‘मेर्मिमका रेम्मी ङा लावो मेल्वामिनु़, मा थो़मी ङा लावो थेसिमेथेन्मिनु़।’ 11 “ओराम सीसि-सो़म्दीका र्वाक्ताम भ्रल ने माम्चु़नीकु सिजेम सो़। 12 लाम्दीडा झुक्पा भ्रल मेर्मिमङा सो़, उहेमका सिजेम थो़मी, लावो नगोडा थो़मिमिम सिजेमलामका थो़र मेलु़मिनु़मा मेसेल्सिमिनु़ र्वाक्साका शैतान रोमा मेर्मिमकु नगोडाम सिजेम रोडु़मा लल्याडु़। 13 लुङदुडा झुक्पा भ्रल ओर्मिम ङा सो़, उहेमका माम्चु़नीकु सिजेम थो़मिमा गेर्सिद्वाक्तो रमी। लावो धु़प्पा सक्फार मान्थिम भ्रल होङङा हापा थो़र मेलु़पा दु़म्मी। लावो मेजो़पा ल्वालामका उनी न छाम्सिमिम थारीका माम्चु़नीडा थो़र लु़मु डिन्मी, मा गुमीडाम वाङ दु़म्मी। 14 मे चु़दुडा झुक्पा भ्रल ने मेर्मिमङा सो़, उहेमका माम्चु़नीकु सिजेम थो़मु ने थो़मी लावो मिरो़मकु दुथाम मिम्ताम-सो़र्ताम बेपा, मा खाप्चीचो़ दु़म्मु न बेपा नुङ नसीहोम बोमु माल्पा नकाम दु़म्मी। मेम्मिमका मेर्मिमकु थो़र बर्मुमा मा सिन्बेन्मु मेचाम्मी। 15 लावो जो़पा क्वाडला झुक्पा भ्रल ने मेर्मिम ङा सो़, उहेमका सिजेम थो़मिमा नड्डा जु़ल्थामी, मा मेराम होम्साका दोमी। मेम्मा इम्साका लन्थामिमा हापा मा सिन्बेन्मी। धिप्रीकु सीसि-सो़म्दी ( मर्कूस ४:२१-२५ ) 16 “सु़का वो धिप्री चायु़मा खचाका मेचु़प्डु़, मा खाटकु गोयु़ वो मेजु़लु़। लावो नेमडा रोक्पामिम खोत्लेका ल्वामिनु़ र्वाक्साका बोर्सोडला जु़लु़। 17 थक्साका जु़ल्मा खोत्ले ल्वासिमा ख्रेप्साका जु़ल्मामिम खोत्ले लुमिमा ओलडा दो़। 18 सु़का थेसिथेडु़, मेरामका आथावो थेसिथेन्मु चाप्सु़। लावो सु़का थेसिमेथेडु़, मेरामका थेसिथेट्पु र्वाक्पा मिम्सिमिम वो रोन्ला सो़सी। मेम्मिमका गानी थो़निमिम ल्वाडा चङचङया बानी वो!” येशूकु त्वाकु माम नुङ ल्वाकमिम ( मत्ती १२:४६-५० ; मर्कूस ३:३१-३५ ) 19 मेकोतिमा येशूकु माम नुङ ल्वाकमिम गुमीलाई क्रो़म्डा रोम्डिम बाइडा, लावो सेर्पा मु़चु़मिम बाम्डिमका येशूकु फार्डा रोम्थिमु मेचाप्मिवा। 20 कोङनिम मु़चु़का गुमीलाई र्वाम्डी, “इनीमा माम नुङ ल्वाकमिम गानीलाई क्रो़म्मु र्वाक्साका पाखानो येम्तासिक्पा बुमी।” 21 येशूका मेर्मिमनुङ र्वाम्डी, “उहेमका माम्चु़नीकु सिजेम जो़होमका थो़मिमा मेरामका र्वामिम होम्साका खारी बोमी मेर्मिम ङा सो़ आमा माम नुङ ल्वाकमिम।” येशूका ब्लोजु़ हेप्मिडिम ( मत्ती ८:२३-२७ ; मर्कूस ४:३५-४१ ) 22 कोलेम येशू उनी सीसिपामिमनुङ कुबी-बोक्साडला हुम्डी, मा उनी सीसिपामिमलाई र्वाम्डी, “दो, गुइ दिरिदिनकु होनोहोम्बुनो लक्सी।” मेकोतिमा मेर्मिम लाम्दिमु चो़म्मिडी। 23 मेर्मिम कुबी-बोक्साडला हुम्डिमा लक्तोङा बेम्डिलो येशू अम्चेट्मिडी। मेकोतिलोङा मे दिरिदिनडा छो़म डोक्पु ब्लोजु़ फुड्डु़। मेम्मिमका कुबी-बोक्सा र्वाप्डा कुगोयु़ प्लु़म्सिमु खाप्डु़म बाइडा, मा मेर्मिम सिमुङा खाप्मिडिम बाइडा। 24 मेकोतिमा मेर्मिम येशूकु फार्डा लम्डिमा आरे र्वाक्तो गुमीलाई फक्मिडी, “ङाचो़, ङाचो़, गुकु ने कुगोयु़ प्लु़म्सिमु खाम्कु।” येशू बम्डिमा मे ब्लोजु़ नुङ मेर्मिमलाई र्वाप्डा हुपा कुकु बाबारिमलाई हेप्मिडी। ब्लोजु़ फोन्मु डिड्डु़मा पपया दु़स्ता। 25 येशूका मेर्मिमलाई र्वाम्डी, “गानीनुङ थो़र मिबु?” मेर्मिम ङिम्डिमा ङाङाया दु़म्तो उनी त्वाप-त्वापडा आरे र्वा बेम्डी, “गुमी हेप्माम मु़चु़ डे? ब्लोजु़ नुङ कुकु बाबारिमलाई ल्वाडा जु़ल्मी, मा मेर्मिमका वो गुमीका र्वामिम थो़मी रेछा!” मुनाङका हुपा मु़चु़लाई येशूका सबेट्मिडिम ( मत्ती ८:२८-३४ ; मर्कूस ५:१-२० ) 26 येशू उनी सीसिपामिमनुङ गालील दिरिदिनकु होनोहोम्बु गेरासेनस इलाकाडा कुबी-बोक्सालामका रोम्फाम्डी। 27 येशू दिरिदिनकु सो़प फार्डा लुम्डिलो मेराम शहरडाम कोले मु़चु़ डार्मिडी, मेरामलाई मुनाङका हुप्डु़म बाइडा। मेराम मु़चु़का हापा ङादो आथामङा ये मेफस्थालावा, मा नेमडा मेबासाका सु़लु़मदुबाडे बाइथाल्ला। 28 मेराम मु़चु़का येशूलाई ल्वास्तु़मा उनी खेलफारयु़ खुम्बु बु़डु़, मा डोक्पु लो़लामका र्वाक्ता, “खोत्लेडाम घ्ल्वापा माम्चु़नीकु चो़ येशू, गानी गोनुङ हाम बोमु माल्निमिम? गो गानीनुङ र्वाङु, गोलाई दु़खा मेग्वाङनी।” 29 हेङालोने येशूका मुनाङपेललाई मेराम मु़चु़लामका लुकामा लस्ल्याडा बेम्डिम बाइडा। मेराम मु़चु़लाई हापाखेपङा मुनाङपेलका उ ल्वाड्डा बु़डु़म बाइडा। मेराम मु़चु़लाई ल्वा नुङ खेलडा सेल रिवाका बसाका मु़चु़मिमका लम्थाल्मिडी। लावो सेल रिवा ङा फ्यास्थाल्लु़। मेकोतिमा मुनाङपेलका मेरामलाई र्याङगो-र्याङगोथो़ लथाल्लु़। 30 येशूका मेरामलाई “इमा नङ हाम?” र्वाम्डिमा हिलाबेम्डी। मेरामका र्वाक्ता, “फौज।” हेङालोने गुलाई सेर्पा मुनाङपेलमिमका हुप्मिडिम बाइडा। 31 मे मुनाङपेलमिमका येशूनुङ आरे र्वाम्डिम र्वाम्डिम ङा बेम्डी, “गुकुलाई देन्दे ग्वामु लागि खादीगोयु़ मेथु़र्किनी।” 32 मे पोप्चङ फारबाडे सेर्पा ब्वामिम जात्तोङा लेट्मिडी। मेकोतिमा मुनाङपेलमिमका मे ब्वामिमगोनो हुमु ग्वाक्किनी र्वाक्साका येशूनुङ र्वाम्डिम-र्वाम्डिम ङा बेम्डी, मा गुमीका मेर्मिमलाई हुमु ग्वाम्डी। 33 मुनाङपेलमिम मेराम मु़चु़लामका लुम्डिमा ब्वामिमगोनो हुम्डी। मेकोतिमा मे सेर्पा ब्वामिम भ्र्वालाम सिसिरका झार्मिडिमा दिरिदिनगोयु़ झुम्डी, मा सिम्डी। 34 मे ब्वामिम भ्र्वालामका झार्मिडिम ल्वाम्डिमा ब्वा रेपा मु़चु़मिम स्वाम्डी, मा मेराम शहर नुङ देलबाडे ओराम ल्वा सो़म्डी। 35 मेम्मा मेसिन्डा हाम दु़स्ताम बाइडा मेराम रेप्डा मु़चु़मिम येशूकाडा रोम्डी। मेकोतिलो मेसिन्डा मुनाङपेलका हुप्डु़म मु़चु़ जो़होमका सस्ताम बाइडा। गु उ ननुङमा दु़म्साका मेरामका ये फस्तामा येशूकु खेल फार्डा गन्तासिट्डाम ल्वाम्डी, मा मेर्मिम ङिम्डी। 36 मेराम ल्वापा मु़चु़मिमका मे मुनाङपेलका हुप्डु़म मु़चु़लाई येशूका हेसाका सबेट्मिडी र्वाक्साका खोत्ले मु़चु़मिमनुङ सो़म्डी। 37 गेरासेनस इलाकाडाम खोत्ले मु़चु़मिमका येशूलाई मेर्मिमकु इलाका डिट्निमा लक्ल्याट्नी र्वाम्डिम-र्वाम्डिम ङा बेम्डी, हेङालोने मेर्मिम छो़म ङिम्डिम बाइडा। मेम्मिमका येशू कुबी-बोक्साडला हुम्डिमा ख्लोम्सिम्डी। 38 मेकोतिलो गुमीका सबेट्मिडिम मु़चु़का “गोलाई वो लङ्निका र्वाक्साका” येशूनुङ र्वाक्ताम-र्वाक्ताम ङा बु़डु़। लावो येशूका मेराम मु़चु़लाई आरे बेम्डिमा थु़र्सोम्डी, 39 “गाना इ त्वाकु नेम ख्लोसा, मा माम्चु़नीका इमा लागि हाङको छो़म डोक्पु खारी बेम्डी, मेराम ल्वा खोत्ले मु़चु़मिमनुङ सो़या।” मेम्मिमका मेराम मु़चु़ ख्लोसिड्डामा लस्ता, मा येशूका उमा लागि बेम्डिम खारीकु दुथाम खोत्ले शहरबाडे थो़बेत्तो लाम्दिडा। याइरसकु जाउमोचो़ नुङ सिसि लक्पा सोमोरीनुङमा मेसेम ( मत्ती ९:१८-२६ ; मर्कूस ५:२१-४३ ) 40 येशू ख्लोसिम्डिमा रोम्डिलो सेर्पा मु़चु़मिमका गुमीलाई हुनाखाना बेम्डी, हेङालोने मेर्मिम खोत्लेका गुमीलाई लथाट्मिडिम बाइडा। 41 घ्रो़म्दीनेमगोडाम याइरस र्वाक्मा कोले ङाउ रोक्तामा येशूकु खेल चु़म्तो, “आमा नेमडा रोक्नी” र्वाक्ताम-र्वाक्ताम ङा बु़डु़, 42 हेङालोने मेरामकाम कोले ङा बाट्पा उ जाउमोचो़ को-न (१२) थकाम बाइडा, गु सिमुङा खाप्डु़म बाइडा। येशू गुनुङ लक्तोङा बेम्डिलो सेर्पा मु़चु़मिम वो उनी होनोलाम-आथो़लाम बाम्डी। 43 मेर्मिमगोडाम को-न थ आथाम सिसि लक्पा सोमोरीका लु़प्डु़म कोले मेसेम बाइडा। मेराम मेसेमलाई सु़का वो सबेन्मु चाप्मिडिम मेबायावा। 44 मे मेसेम येशूकु चङलाम रोक्तामा उनी हुम-येकु जु़जु़डा लु़प्डु़, मा मेकोतिलोङा मेरामकु रो़पलामका सिसि लमु डिथाड्डु़। 45 येशूका हिलाबेम्डी, “गोलाई सु़का लु़प्ङिडी?” खोत्ले मु़चु़मिमका गुकु ने मेएँ र्वाम्डी, मा पत्रुसका र्वाक्ता, “ङाचो़, गानीलाई ने सेर्पा मु़चु़मिमका उत्तोङा लेनी।” 46 लावो येशूका र्वाम्डी, “कोङनिमका गोलाई लु़प्ङिडिमङा बु, हेङालोने सबेट्पा आमा यु़म लुक्तामा लस्ताम गो लु़लेत्तोम बु।” 47 गु थसिक्साका बुमु मेझाम र्वाक्पा ल्वा चडु़मा मे मेसेम रुत्तो रोक्तामा येशूकु ङादोडा खुम्बु बु़डु़मा हेङा गुका गुमीलाई लु़प्डु़, मा हेसाका गु सोमोरीलामका सस्ल्याड्डा मेराम ल्वा खोत्ले मु़चु़मिमकु ङादोडा सो़यु़डु़। 48 मेकोतिमा येशूका मेराम मेसेमलाई र्वाम्डी, “ए तोङमा, गाना थो़र लु़न्नामका सन्नाम बु, इ न-गो भ्रसिक्तो लक्सा।” 49 येशू मेराम मेसेमनुङ जेत्तोङा बेम्डिलो मे घ्रो़म्दीनेमगोडाम ङाउ याइरसकु नेमलामका कोले सेलाचो़ रोक्फाड्डा, मा याइरसनुङ र्वाक्ता, “इनी जाउमोचो़ ने सिमु दु़म्स्तु़। हेङा ङाचो़लाई दु़खा ग्वानी मा?” 50 लावो येशूका ओराम ल्वा थो़म्डिमा याइरसलाई र्वाम्डी, “मेङिसा, थो़रलु़या कोङङा इमा चो़ नु़।” 51 गुमी याइरसकु नेमडा रोम्थिम्डी। मेकोतिमा गुमीका पत्रुस, याकूब, यूहन्ना, मा मे चो़च्चो़कु माम-पापडाम वाङमिम सु़लाई वो गुमीनुङ नेमगोनो हुमु मेग्वाम्वा। 52 मेसिन्डा खोम्सिक्पा खोत्ले मु़चु़मिम मे चो़च्चो़ सिडामका येम्डी-दुम्डी, मा ख्राप्मिडिम बाम्डी। लावो येशूका मेर्मिमलाई र्वाम्डी, “मेख्राप्नी, मे चो़च्चो़ ने सिडाम मिबु, अम्स्ताम कोङङा बु।” 53 मे चो़च्चो़ सिमु दु़म्स्तु़म बु र्वाक्पा चम्डिमा मेर्मिमका गुमीलाई रिम्साम्डी। 54 लावो गुमीका मे चो़च्चो़कु ल्वा झेट्मिडिमा आरे र्वाम्डी, “यु़म्पी, बका।” 55 मेकोतिमा मे सिडाम चो़च्चो़का उ साम खेड्डु़, मा हुबक्ता। मेम्मा येशूका मेराम चो़च्चो़लाई हाम-हुम पोमु ग्वाक्नी र्वाम्डी। 56 मे चो़च्चो़कु माम-पाप ङाङाया दु़म्ची, लावो ओराम ल्वा सु़नुङ वो मेसो़मु सो़ र्वाक्साका येशूका मेर्चिपलाई र्वाम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.