लूका 4 - थुलुङ राईशैतानका येशूकु न-छाम्डु़म ( मत्ती ४:१-११ ; मर्कूस १:१२-१३ ) 1 येशू माम्चु़नी-पेलका लु़न्सिम्डी, मा यर्दन ब्लोकुलामका ख्लोम्सिम्डी। मेकोतिमा माम्चु़नी-पेलका गुमीलाई र्याङगो-र्याङगोथो़ लम्डी, 2 मा मेसिन्डा गुमीलाई शैतानका ब्ल धु़म (४०) नेमसम्म न-छाम्डु़। मेमबिलि गुमीका हाम वो मेपेमिवा-मेडुमिवा। ब्ल धु़म (४०) नेमकु चङडा गुमी छो़म क्रु़म सिम्डी। 3 मेकोतिमा शैतानका गुमीलाई र्वाक्ता, “गानी माम्चु़नीकु तारापाचो़ माला ओराम लुङलाई सो़बेम दु़म्सा बेनी, मा ओराम सो़बेम दु़म।” 4 लावो येशूका गुलाई र्वाम्डी, “माम्चु़नीकु सिजेमडा र्याक्मा बु, ‘सो़बेमका कोङङा मु़चु़कु साम जु़ल्मु मेचाप्सु़’।” 5 शैतानका येशूलाई येप्पाला लडु़मा घरिकोङ खोत्ले सु़म्दिसेरडाम किब्दीमिम रेम्बेड्डु़। 6 मेम्मा गुमीलाई र्वाक्ता, “गो ओर्मिम खोत्ले किब्दी थो़मु नुङ ओर्मिम खोत्लेकु जो़प्सी गानीलाई ग्वानिनी, हेङालोने ओर्मिम खोत्ले आमा ल्वाडा बु, मा गो सु़लाई ग्वा-ग्वा द्वा मेरामलाई ग्वाक्पु। 7 मेम्मिमका गानी गोलाई सेव साट्ङिडिनी माला ओर्मिम खोत्ले गो गानीलाई ग्वानिनी।” 8 येशूका मेरामलाई र्वाम्डी, “माम्चु़नीकु सिजेमडा र्याक्मा बु, ‘गाना इमा मिप्रङमा माम्चु़नीलाई सेव साडा, मा उनीमा कोङङा लाले-पाङके बे’।” 9 मेकोतिमा शैतानका येशूलाई यरूशलेमडाम सो़रनेमकु जु़जु़ला लडु़मिमा र्वाक्ता, “गानी माम्चु़नीकु तारापाचो़ माला ओरामलामका धाली झुक्नी। 10 हेङालोने माम्चु़नीकु सिजेमडा र्याक्मा बु, ‘गुमीका गानीलाई बोमु-थार्मु लागि उनीमा पाह्रीचो़मिमलाई थु़र्मी, 11 मा मेर्मिमका गानीलाई इनीमा खेल लुङडला मेथेम्सिनु़ र्वाक्साका उनीमा ल्वाका येम-येमङा झेनी’।” 12 येशूका मे शैतानलाई र्वाम्डी, “माम्चु़नीकु सिजेमडा आरेसाका र्याक्मा बु, ‘गाना मिप्रङमा इमा माम्चु़नीकु न मेछाम्डा’।” 13 शैतानका येशूकु न-छाम्मु दु़म्स्तु़मा उमा लागि येशूकु न छाम्मु जो़पा खाप मेरोक्थु़मसम्म गुमीलाई डिट्जो़ल्लु़मा लस्ता। येशूका गालीलडा सीट्मिडिम ( मत्ती ४:१२-१७ ; मर्कूस १:१४-१५ ) 14 येशू माम्चु़नी-पेलकु यु़मका लु़न्सिम्डिमा गालीलथो़ ख्लोसिम्डी। मेम्मा उनीमा दुथाममिम ल्वा होनो-आथो़म खोत्ले मु़चु़का थो़म्डी। 15 गुमीका मेर्मिमकु घ्रो़म्दीनेमबाडे मु़चु़मिमलाई सीमु चो़म्मिडी, मा खोत्लेका उनीमा नङ कोम्डी। 16 गुमी नासरत देलडा रोम्डी। मेसिन्डा गुमी बर्मिडिम बाइडा। गुमी ङादो आथाममिम उनी बादीखाम होम्साका ङेम्सिमुनेम घ्रो़म्दीनेमडा लम्डिमा माम्चु़नीकु सिजेम डान्मु लागि गुमी येम्सिम्डी। 17 गुमीलाई माम्चु़नीलाम-जेपा यशैयाका र्याक्तु़म खाजेम डान्मु लागि ग्वाम्डी। मेकोतिमा मेराम खाजेम ह्वाम्डी, मा मेगोडा ओराम र्याक्मा ख्लुम्डी, 18 “‘मिप्रङमाकु पेलका गोलाई लु़ट्ङिडिमिम बु, मेम्साका उनी हाम वो मेबाट्पामिमलाई गो जो़पा-सेला थो़बेट्पुमी, मा शैतानका बथाडु़मिम मु़चु़मिम मेलामका वाङ दु़म्मी। मेम्मा मिक्सीका मेल्वापामिमकाम उनी मिक्सी ह्वासी, मा दु़खाडा बाट्पामिम मेलामका वाङ दु़म्मी, 19 मा मिप्रङमाका उनीमा मु़चु़मिम सेल्पा थारी रोक्ताम बु र्वाक्पा सो़मु लागि गोलाई थु़र्ङिडिमिम बु’।” 20 गुमीका मेकोतिङा डाट्मिडिमा मेराम खाजेम गुमीलाई ग्वाक्पा मे घ्रो़म्दीनेमडाम डु़ल्चो़लाई ख्लोम्साम्डी, मा गुमी गन्मिडी। घ्रो़म्दीनेमगोनो बाट्पा मु़चु़मिमका गुमीलाई रेम्थाम्डी। 21 मेकोतिमा गुमीका मेर्मिमलाई र्वामु चो़म्मिडी, “माम्चु़नीकु र्याक्मा सिजेम आनेप गो डात्तोलो गानी थो़न्नी होङङा मेराम होम्साका रोक्थिड्डाम बु।” 22 खोत्लेका उनीमा नङ कोम्डी, मा गुमीका जेम्डिम न-थो़मनुङमा सिजेम थो़म्डिमा ङाङाया दु़म्मिडी, मा मेर्मिमका र्वाम्डी, “हेसाका गुका आरे र्वामिम? गु ने योसेफकु चो़ मेएँ मा?” 23 येशूका मेर्मिमलाई र्वाम्डी, “आच्छाङा गानी गोलाई ओराम सीसि सो़म्दी र्वानी: ‘ए वैद्य, गाना इ त्वाका इ त्वापलाई ङा सबेडा। कफर्नहुमडा हा-हाम बेन्नाम गुकु थो़त्तोको मेराम होप्माम हेल्लो वो मेल्वाम्मा खारी आसिन्डा इमा शहरडा वो बे’।” 24 मेकोतिमा गुमीका र्वाम्डी, “आच्छाङा गो गानीलाई र्वाङु, माम्चु़नीलाम-जेपा मु़चु़ सु़लाई वो उमा त्वाकु देलडा डोक्पु मेमिम्मी। 25 गो र्वाङुमिम आच्छाङा सो़, एलिया बाइडाम थारीका सु थ रु मुनाम व मेयोकावा, मा खोत्ले नेब्दीडा मा-के हुक्ताम बाइडा। मेकोतिलो इस्राएलडा दु़खा ल्वापा अर्दोमे हापा ङा बाम्डी। 26 वाङमिम सु़काडा वो मेथु़र्मिवा। लावो सिदोनडाम सारपत देलडा बाट्पा अर्दोमेकाडा कोङङा माम्चु़नीका एलियालाई थु़र्मिडी। 27 मेम्साका ङा माम्चु़नीलाम-जेपा एलिशा बाइडाम थारीका इस्राएलडा जोन बेट्पा मु़चु़मिम हापा ङा बाम्डी। वाङमिम सु़ वो समेबेट्मिवा, लावो सिरियाडाम वाङसामा नामान कोङङा सबेट्मिडी।” 28 ओराम ल्वा थो़म्डिमा घ्रो़म्दीनेमगोनो बाट्पा मु़चु़मिमकाम छो़म उनी छोक्चो बक्ता। 29 हुची बम्डिमा मेर्मिमका येशूलाई रो़-रो़न्थु़त्तो शहरलामका पाखा ख्लुम्डी। मेर्मिमकु शहर कोले पोप्चङडला बाइडा, मा मेर्मिमका मेराम पोप्चङकु भ्र्वालामका गुमीलाई धाली डम्सोमु माल्मिडी। 30 लावो गुमी मे सेर्पा मु़चु़मिमकु थेतेलामका लुम्डिमा लम्डी। येशूका मुनाङपेल कोल्मिडिम ( मर्कूस १:२१-२८ ) 31 मेकोतिमा येशू गालीलडाम कोले कफर्नहुम शहरयु़ योम्डी। मेम्मा ङेम्सिमुनेम गुमीका मु़चु़मिमलाई सीमु चो़म्मिडी। 32 येशूकु सीसिडा मेर्मिम ङाङाया दु़म्मिडी, हेङालोने उनीमा सिजेम साखामनुङमा बाइडा। 33 मे घ्रो़म्दीनेमगोडा मुनाङपेलका हुपा कोले मु़चु़ बाइडा। मेराम मु़चु़ डोक्पु लो़लामका येस्तामा येशूलाई र्वाक्ता, 34 “ए नासरतडाम येशू, गुकुलाई गानी हाम बोमु माल्निमिम? हाम गानी गुकुलाई पुयु़ लुबेड्डा रोक्निम? गानी माम्चु़नीकु नङका साट्मा मु़चु़ बुनी र्वाक्पा गो छेनिनी।” 35 मेकोतिमा येशूका मे मुनाङपेललाई साखामनुङ भुर्मिडिमा र्वाम्डी, “लिवा बाया, मेरामलामका लुक्ल्याडा।” मेकोतिलोङा मेराम मु़चु़लाई सेर्पा मु़चु़मिमकु थेतेडा लेप्बोक्जो़ल्लु़, मा मुनाङपेल लुक्तामा लस्ता। लावो मेराम मु़चु़लाई हाम वो मेदु़प्सावा। 36 खोत्ले मु़चु़मिम ङाङाया दु़म्मिडिमा आरे र्वाबोमु चु़म्मिडी, “ओरामका जेमिम ने हेप्माम साखाम नुङ यु़मनुङ रेछा! मुनाङपेलमिमका वो ओरामका र्वामिमिम थो़मिमा स्वामी रेछा।” 37 उनीमा दुथाममिम ल्वा होनो-आथो़म देलबाडे खोत्लेथो़ फोन्सिड्डा। येशूका हापा मु़चु़ सबेट्मिडिम ( मत्ती ८:१४-१७ ; मर्कूस १:२९-३४ ) 38 येशू घ्रो़म्दीनेमलामका लुम्डिमा सिमोनकु नेमडा लम्डी। सिमोनकाम नाइमेकु माम छो़म डार्चु़मो खेड्डु़मका झार्ल्याक्पा बाइडा, मा मेसिन्डा बाट्पा मु़चु़मिमका मेरामलाई सबेसाट्किनी र्वाक्साका येशूनुङ र्वाम्डी। 39 गुमी उमा फार्डा लम्डिमा मे डार्चु़मोलाई डिन्बेट्मिडी, मा मे डार्चु़मोका डिट्ल्याट्डु़। मेकोतिमा गु बक्तामा उनीमा चापे-डुपे बु़साड्डु़मी। 40 नेम गाम्डाम चङडा हापा खाल-खालकाम सोमोरीका नो़पा खोत्लेलाई मु़चु़मिमका येशूकाडा रेट्मिडी। गुमीका मेर्मिमडला उनी ल्वा जु़ल्मिडिमा खोत्लेलाई सबेट्मिडी। 41 हापा मु़चु़मिमलामका मुनाङपेल आरेसाका येत्तो लुम्डी, “गानी माम्चु़नीकु तारापाचो़ सो़।” लावो येशूका मे मुनाङपेलमिमलाई को सि वो जेमु मेग्वाक्मिवा, हेङालोने मेर्मिमका गुमी ख्रीष्ट र्वाक्साका छेट्मिडिम बाइडा। 42 उ दिकाम नेम सोसोका सु़का वो मेल्वापा बायडा येशू लुम्डिमा लम्डी। सेर्पा मु़चु़मिमका गुमीलाई माल्तो लम्डी। गुमीलाई डार्मिडिम चङडा मेर्मिमका आरे र्वाक्साका गुमीलाई मेसिन्डा ङा झेन्मु माल्मिडी, “गुकुलाई डिट्जो़ल्किनिमा मेलक्नी।” 43 लावो गुमीका मेर्मिमनुङ र्वाम्डी, “गो माम्चु़नीकु किब्दीकु दुथाममिम जो़पा-सेला वाङमिम शहरडा वो थो़बेन्मुमि बासी, हेङालोने ओराम ल्वा थो़बेन्मु लागि ङा माम्चु़नीका गोलाई थु़र्ङिडिमिम सो़।” 44 मेकोतिमा गुमीका यहूदियाडाम घ्रो़म्दीनेममिमबाडे वो जो़पा-सेला थो़बेट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.