लूका 24 - थुलुङ राईयेशू सिमुलाम बम्गेम्डिम ( मत्ती २८:१-१० ; मर्कूस १६:१-११ ; यूहन्ना २०:१-१० ) 1 नेप्सुङनेम नेमसोसोका मे मेसेममिमका ङादोङा रेट्मिडिम भ्रपा मुर्नेम्पा तेल नुङ मसला लम्डिमा येशूकु सु़लु़मडा लम्डी। 2 मेर्मिम मेसिन्डा रोम्थिम्डिलो सु़लु़मकु ख्रेमलुङ रिल्थाट्मा डार्मिडी। 3 लावो सु़लु़मगोनो हुम्डिलो मेर्मिमका ङाचो़ येशूकु मिरो़म मेडार्मिवा। 4 ओराम ल्वाम्डिमा मेर्मिम ङाङाया दु़म्मिडिम बाम्डिलो बुबुया झ्वाक्पा ये फसिक्पा नले मु़चु़ उनी फार्डा रेम्बेसिक्ची। 5 मे मेसेममिम छो़म ङिम्डिमा कुम्सिम्डी, लावो मेर्चिपका र्वाक्ची, “नु़पा मु़चु़लाई हेङा गानी सिपामिमगोडा माल्निमिम? 6 गुमी ने आसिन्डा मेबुमी, सिमुलाम बम्गेम्डिम बु। गालीलडा बाम्डिलो गुमीका गानीनुङ आरे र्वाम्डिम ल्वा मिम्नी: 7 ‘मिनीचो़ छु़लचो़ मु़चु़मिमकु ल्वाडा भ्रेन्मी, मा गुलाई क्रूसडा चेन्मी। मेम्मा सुलेमनेम सिमुलाम बगे।’” 8 मेकोतिमा येशूका याचे जेम्डिम ल्वा मेसेममिमका मिम्मिडी। 9 मेर्मिम सु़लु़मलामका ख्लोसिम्डिमा ओर्मिम खोत्ले ल्वा येशूकु को-कोङ (११) सीसिपामिम नुङ वाङमिम खोत्ले मु़चु़मिमलाई सो़म्डी। 10 मे मेसेममिम मरियम मग्दलिनी, योअन्ना, मा याकूबकु माम मरियम बाम्डी। मेर्मिमनुङ बाट्पा वाङमिम मेसेममिमका वो थु़र्मामिमलाई ओराम ल्वा सो़म्डी। 11 मेसेममिमका सो़म्डिम ल्वा आच्छाङा होङङा मेलु़मिवामका थु़र्मामिमका थो़र मेलु़मिवा। 12 लावो पत्रुस हुबक्तामा सु़लु़मथो़ ओन्तो लस्ता, मा कुम्स्तामा रेप्डु़लो सुती येकु साङखिम कोङङा ल्वास्तु़। ओराम ल्वास्तु़मा ङाङाया दु़म्तो नेम ख्लोस्ता। इम्माउसडाम लाम्दीडा सीसिपाचिपकाडा येशू रेम्बेम्सिम्डिम ( मर्कूस १६:१२-१३ ) 13 मेनेमङा येशूकु उनी सीसिपामिमगोडाम नले सीसिपाचिप यरूशलेमलामका को-कोङ (११) किलोमिटर को-कोडा बेट्पा इम्माउस र्वाक्मा कोले देलथो़ लक्तोङा बेच्ची। 14 हा-हाम दु़स्ताम मेराम ल्वाकु दुथाम मेर्चिपका ल्वा बेत्तोङा लेट्ची। 15 ओर्मिम ल्वाकु दुथाम मेर्चिपका ल्वा बेत्तो नुङ हिलाहिसी बेबेत्तोङा बेच्चिलो कोचोत्ति येशू रोम्डिमा मेर्चिपनुङ लाम्दिम्डी, 16 लावो मेर्चिपका येशू मेछेचिनु़ र्वाक्साका उची मिक्सी ड्यामा बाइडा। 17 येशूका मेर्चिपनुङ हिलाबेम्डी, “गाची हामकु दुथाम हिलाहिसी बेबेत्तो लाम्दित्तो लेन्ची?” उची ङाली डक्चिमा मेर्चिप येम्सिक्ची, 18 मेर्चिपगोडाम क्लेओपास र्वाक्माका गुमीनुङ र्वाक्ता, “यरूशलेमलामका खिर्सिट्निमा रोक्नीमा वो आनेप-दिका मेसिन्डा हाम दु़स्ताम बु र्वाक्पा गानी मेचनिमिम?” 19 गुमीका मेर्चिपनुङ हिलाबेम्डी, “हेप्माम ल्वा?” मेर्चिपका र्वाक्ची, “नासरतडाम येशूकु दुथाममिम ल्वा। गुमी यु़मनुङमा खारीमिम बेपा माम्चु़नीलाम-जेपा मु़चु़ मा माम्चु़नीकु ङादोडा नुङ खोत्ले मु़चु़मिमकु ङादोडा यु़मनुङमा सीपा मु़चु़ बाम्डी। 20 लावो आकी ङाउ डु़म्लाचो़मिम नुङ ङाउमिमका गुमीलाई सेट्नी र्वाम्डिमा क्रूसडा चेन्बेट्मिडी। 21 इस्राएलीमिमलाई बोपा-थार्पा ख्रीष्ट गुमीङा बाम्डी र्वाक्पा गुकु लु़त्तोकोम बाइडा। ओर्मिम खोत्ले ल्वा दु़स्ताम सुलेम दु़म्मु दु़म्स्तु़। 22 मेम्मा आथावो गुकु उनी सीसिपामिमगोडाम कोले-नले मेसेममिमका गुकुलाई छो़म ङाङाया बेत्तिकिम बु। मेर्मिम आनेप नेमसोसोकाङा येशूकु सु़लु़मथो़ लम्डी, 23 लावो येशूकु मिरो़म ने मेडार्मिवा। मेर्मिम मेसेम ख्लोसिक्साका रोम्डिमा गुकुनुङ सो़म्डी, ‘गुकुनुङ पाह्रीचो़चिप रेम्बेसिक्ची, मा मेर्चिपका येशू नु़म्डिम बु र्वाक्ची।’ 24 ओराम ल्वा थो़म्डिमा गुकुनुङ लाम्दिपा कोङनिम मु़चु़ वो सु़लु़मथो़ लम्डी, मा मे मेसेममिमका सो़म्डिम होप्मामङा मेर्मिमका डार्मिडी, लावो येशूलाई ने मेल्वामिवा।” 25 येशूका मेर्चिपलाई र्वाम्डी, “ए नेप्ची मान्थिम मु़चु़चिप, माम्चु़नीलाम-जेपामिम खोत्लेका र्वाम्डिम ल्वाडा थो़र बोमु गाचीलाई छो़म छो़स्ताम बु। 26 यु़म-झ्वाक्सी डार्मु ङादो हाम ख्रीष्टका खोत्ले उ दु़खा इम्मु बासिक्पा मेबायावा मा?” 27 मेकोतिमा येशूका मोशा नुङ माम्चु़नीलाम-जेपामिमका खोत्ले माम्चु़नीकु सिजेमडा येशूकु दुथाम र्याम्डिम खोत्ले ल्वा मेर्चिपलाई थेसिथेन्बेट्मिडी। 28 मेर्चिप रोम्थिमु बासिक्पा इम्माउस देल फार्डा रोक्थिक्ची। मेकोतिलो येशू ने आथावो किचो़ भाल लक्पा होङङा बाम्सिम्डी। 29 लावो मेर्चिपका गुमीलाई “गुचुकुनुङङा बुइ हेङालोने दुङमा र्यामु खाप्डु़म बु” र्वाक्चिम-र्वाक्चिमङा बेच्ची। मेकोतिमा गुमी मेर्चिपनुङङा बुमु लागि नेमगोनो हुम्डी। 30 येशू मेर्चिपनुङ पेप्डा गन्मिडी। गुमीका सो़बेम झेट्मिडिमा आलासो़ ग्वाम्डी, मा चम्डिमा मेर्चिपलाई ग्वाम्डी। 31 मेकोतिलोङा मेर्चिपकु मिक्सी ह्वास्ता, मा मेर्चिपका येशूलाई छेट्ची। मेकोतिमा गुमी मेर्चिपकु मिक्सीलामडा दाम्मिडी। 32 मेर्चिपका उची त्वाप-त्वापडा आरे र्वा बेच्ची, “गुमी गुचीनुङ लाम्दीडा जेम्डिलो नुङ माम्चु़नीकु सिजेमडा र्याक्मा ल्वाकु दुथाम थेसिथेन्बेसाड्डामिलो छो़म इची न-गो भ्रसिड्डाम बाइडा हि।” 33 मेर्चिप मेकोतिलोङा बक्चिमा यरूशलेम शहरथो़ ख्लोसिक्ची, मा को-कोङ (११) सीसिपामिम, मा मेर्मिमनुङ खोम्सिक्पा वाङमिम मु़चु़लाई डार्ची, 34 मा मेर्चिपका मेर्मिमनुङ सो़च्ची, “ङाचो़ येशू आच्छाङा सिमुलाम बक्साका सिमोनकाडा रेम्बेसिम्डिम रेछा।” 35 मेर्चिप इम्माउसथो़ लक्तोङा बेच्चिलो लाम्दीडा येशूलाई डार्चिम ल्वा नुङ सो़बेम चम्डिलो मेर्चिपका हेसाका छेट्ची मेराम ल्वा मेर्मिमनुङ सो़च्ची। येशू उनी सीसिपामिमनुङ रेम्बेम्सिम्डिम ( मत्ती २८:१६-२० ; मर्कूस १६:१४-१८ ; यूहन्ना २०:१९-२३ ; थु़र्मा १:४-८ ) 36 मेर्चिपका ओर्मिम ल्वा सो़त्तोङा बेच्चिलो येशू मेर्मिमकु थेतेडा कोचोत्ति येम्सिम्डी, मा र्वाम्डी, “इनी न-गो भ्रसिनु़।” 37 मेर्मिम छो़म ङिम्डी, मा उनी लो़ दाम्स्ता। मेम्मा मुनाङ डे ल्वाकुमिम बुकु र्वाक्पा मिम्सिम्डी। 38 लावो गुमीका मेर्मिमलाई र्वाम्डी, “हेङा गानी आरेसाका ङिनिमिम, मा इनी नगोडा मुर्सिनिमिम? 39 आमा ल्वा नुङ खेलडा रेप्नी, मा गो ङा सो़, मेङिनी। लु़प्ङिनी, मा रेप्नी। हेङालोने मुनाङकाम ने सो़ नुङ सेर मेदु़म, लावो आमा ने बुमिम गानी ल्वात्तोङा लेनी।” 40 आरे र्वाम्डिमा येशूका उनी ल्वा नुङ खेल उनी सीसिपामिमलाई रेम्बेट्मिडी। 41 मेर्मिम छो़म गेर्सिद्वाम्डिमका नुङ ङाङाया दु़म्मिडिमा थो़र मेलु़मिवामका आथावो येम्तासिम्डी। मेम्मा येशूका मेर्मिमलाई हिलाबेम्डी, “हाम गानीनुङ हाम-हुम पोमु-डुमु बु?” 42 मेर्मिमका गुमीलाई चाम्मा ङोकु को फ्वाक्चो़ल ग्वाम्डी। 43 मेकोतिमा गुमीका मेराम रम्डिमा मेर्मिमकु ङादोडाङा पेम्डी। 44 गुमीका मेर्मिमलाई र्वाम्डी, “गो ङादो गानीनुङ बाङडोलो मोशाकु डु़म्लाडा, माम्चु़नीलाम-जेपामिमकु खाजेमडा नुङ कोमु काम्सोकु खाजेमडा आमा दुथाम र्वाक्मा खोत्ले ल्वा रोम्थिमुङा बासी” र्वाङ्डोमा सो़उतोम बाइडा। 45 मेकोतिमा गुमीका माम्चु़नीकु सिजेमडाम ल्वा थेसिथेट्पा नेप्ची मेर्मिमलाई ग्वाम्डी। 46 गुमीका मेर्मिमलाई र्वाम्डी, “माम्चु़नीकु सिजेमडा ओराम र्याक्मा बु: ‘ख्रीष्टका छो़म दु़खा ल्वामुमा सिमु बासी, मा सुलेमनेम सिमुलाम बम्गेमु बासी, 47 मा छु़ल उनी न-गोलामका मिम्सिसाका माम्चु़नीडा ख्लोसिमुमा पाचो ल्वामु लागि यरूशलेमलामका चो़म्सिक्साका खोत्ले सामाडाम मु़चु़मिमलाई ख्रीष्टकु दुथाम थो़बेन्मुमि बासी।’ 48 गानी ओर्मिम ल्वाकु दुथाम सो़पा मु़चु़ सो़। 49 रेप्नी, आमा माम्चु़नीका ङादो इनीमाडा उनी पेल थु़रु र्वाम्डिम बाइडा, मेराम गो थु़रु। लावो माम्चु़नी-पेल योमी मा पाह्रीलाम यु़मका गानीलाई मेलु़थु़मसम्म गानी ओराम शहरडाङा बानिम बानी।” येशू पाह्रीथो़ कोम्सिम्डिम ( मर्कूस १६:१९-२० ; थु़र्मा १:९-११ ) 50 मेकोतिमा येशूका उनी सीसिपामिमलाई बेथानिया देलथो़ लम्डी, मा पाह्रीथो़ उनी ल्वा कोम्डिमा गुमीका मेर्मिमलाई जि ग्वाम्डी। 51 गुमीका मेर्मिमलाई जि ग्वाक्तोङा बेम्डिलो मेर्मिमलाई पार्जो़ल्मिडिमा पाह्रीथो़ कोम्सिम्डी। 52 मेर्मिमका येशूकु सो़रलोले बेम्डी, मा छो़म उनी न-गो भ्रसिक्तो यरूशलेम ख्लोसिम्डी। 53 मेकोतिमा मेर्मिमका हाङकोलो लोवो सो़रनेमगोडा माम्चु़नीकु नङ कोम्डिम बाम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.