लूका 22 - थुलुङ राईयहूदाका येशूलाई भ्रेड्डु़म ( मत्ती २६:१-५ , १४-१६ ; मर्कूस १४:१-२ , १०-११ ; यूहन्ना ११:४५-५३ ) 1 लङखाम मान्थिम सो़बेम पेपा चाडकु थारी रोक्फाड्डाम बाइडा। ओरामलाई सेल्सिमुनेमकु चाड वो र्वाकी। 2 ङाउ डु़म्लाचो़मिम नुङ यहूदीकु डु़म्ला सीपा पातु़म्रीमिमका येशूलाई हेसाका सेन्मु र्वाक्साका खाप रेप्थाल्मिडी, लावो मु़चु़मिमडाम मेर्मिम ङिम्थाल्मिडी। 3 मेकोतिमा को-न (१२) सीसिपामिमगोडाम कोले यहूदा इस्करियोत र्वाक्मा मु़चु़गोडा शैतान हुङडा। 4 मेम्मा हेसाका येशूलाई मेर्मिमकु ल्वाडा चु़म्बेन्मु र्वाक्साका ङाउ डु़म्लाचो़मिम नुङ सो़रनेम लपा कप्तानमिमकाडा लस्तामा मुलु़ बु़डु़। 5 मेर्मिमका ओराम ल्वा थो़म्डिमा गेर्सिद्वाम्डी, मा गुलाई खउलुङ ग्वाक्पा दु़म्मिडी। 6 यहूदा वो बिसिड्डा मा सेर्पा मु़चु़मिम मेदु़म्मिमिम थारीका येशूलाई चु़म्बेट्पा खाप रेम्मु चो़म्डु़। येशूकु ग्रुला ( मत्ती २६:१७-३० ; मर्कूस १४:१२-२६ ; यूहन्ना १३:२१-३० ; १ कोरिन्थी ११:२३-२५ ) 7 लङखाम मान्थिम सो़बेम पेपा थारीकु चाड रोक्ता, मेराम नेम सेल्सिमुनेमकु चाडकाम लागि भेन्दाकु चो़ सासेन्थाल्मिडी। 8 येशूका पत्रुस नुङ यूहन्नालाई आरे र्वाम्डिमा थु़र्मिडी, “लक्चिमा इकीमा लागि सेल्सिमुनेमकु चाडकाम ग्रुला खोक्जो़ल्ची।” 9 मेर्चिपका गुमीनुङ हिलाबेच्ची, “गुचुकु ग्रुला बान्ते खोजो़ल्चुकुमिम?” 10 गुमीका मेर्चिपलाई र्वाम्डी, “गाची यरूशलेम शहरगोनो हुत्तोङा बोचिलो लिपडा कु कुर्थाट्पा कोले मु़चु़का गाची डार्ची। गु हुमिम नेमडा उ चङचङ लक्ची, 11 मा गाची मेराम नेमहपलाई र्वाक्ची, ‘ङाचो़का गानीनुङ हिलाबेम्डिम बु, उनी सीसिपामिमनुङ सेल्सिमुनेमकु चाडकाम ग्रुला पोमु लागि बोच्चो़ बाखोप बान्ते बु?’ 12 मेकोतिमा मे नेमहपका गाचीलाई गन्खोप, पेखोप नेमडलाम डोक्पु बाखोप रेम्बेन्ची, मा गाची मेसिन्डाङा ग्रुला खोक्ची।” 13 मेर्चिप लक्ची, मा येशूका र्वाम्डिम होङङा डार्ची। मेम्मा मेर्चिपका सेल्सिमुनेमकु चाडकाम ग्रुला खोक्ची। 14 ग्रुला पोमुथारी दु़स्तामा येशूका उनी थु़र्मामिमनुङ ग्रुला पेप्डा गन्मिडी। 15 गुमीका मेर्मिमनुङ र्वाम्डी, “गो दु़खा ल्वामु ङादोङा सेल्सिमुनेमकु चाडकाम ग्रुला गानीनुङ पोमु छो़म आमा न बाइडा। 16 हेङालोने गो गानीलाई र्वाङु, माम्चु़नीका किब्दी थो़मिलो ओराम ग्रुलाका रेम्बोमु मालु़मिम ल्वा होङङा मेरोक्थु़मसम्म आथाडा आनो गो ओराम ग्रुला मेपेउ।” 17 मेकोतिमा येशूका अङ्गूरकु बिलामनुङमा कान्चु़रे कोम्डिमा माम्चु़नीलाई आलासो़ ग्वाम्डी, मा उनी थु़र्मामिमलाई र्वाम्डी, “ओराम रनी, मा ओलामकाङा खोत्लेका डुनी। 18 हेङालोने गो गानीलाई र्वाङु, माम्चु़नीका साखाम मेथो़थु़मसम्म आथाडा आनो गो अङ्गूरकु बिलाम मेडु।” 19 मेकोतिमा गुमीका सो़बेम झेट्मिडिमा माम्चु़नीलाई आलासो़ ग्वाम्डी, मा मे सो़बेम चम्डी। मेम्मा उनी थु़र्मामिमलाई आरे र्वाक्तो ग्वाम्डी, “गो इनीमा लागि ग्वाक्पुमिम ओराम आमा मिरो़म सो़। गोलाई मिम्ङिनिमा ओराम पेनी।” 20 ग्रुला पेम्डिमा येशूका अङ्गूरकु बिलामनुङमा कोङमी कान्चु़रे कोम्डिमा उनी सीसिपामिमनुङ र्वाम्डी, “ओराम कान्चु़रे आमा सिसिका माम्चु़नीनुङ उनी मु़चु़मिमकाम लाले सो़रख्रेप्मा सो़, मेराम इनीमा लागि सासेसाका हासी सो़। 21 लावो रेप्नी, गोलाई चु़म्बेट्पा मु़चु़ गोनुङङा पेप्डा गन्डाम बु। 22 हेङालोने माम्चु़नीका मुलु़ बेम्डिम होम्साका मिनीचो़ ने सिमुङा बासी, लावो गुलाई भ्रेट्पा मेराम मु़चु़लाई ने माम्चु़नीका इम्मु मेझापा देन्दे ग्वामी।” 23 ओराम थो़म्डिमा थु़र्मामिमका आरेप्माम खारी बेपा मेर्मिमगोडाम मु़चु़ सु़? र्वाक्साका उनी त्वाप-त्वापगोडा हिलाबेबोमु चो़म्मिडी। डोक्पु मु़चु़ सु़? ( मत्ती २०:२५-२८ ; १९:२८ ; मर्कूस १०:४२-४५ ) 24 मेर्मिमगोडाम खोत्लेडाम डोक्पु सु़ बु र्वाक्साका सीसिपामिमका उनी त्वाप-त्वापगोडा रिबुसी किन्मु चो़म्मिडी। 25 येशूका मेर्मिमलाई र्वाम्डी, “सु़म्दिसेरडाम मु़चु़मिमकु हपमिमका मेर्मिम मु़चु़लाई उनी ल्वाडा जु़ल्मी, मा मे उनी ल्वाडा जु़ल्पा साखामचो़मिमका ‘मु़चु़मिमलाम जो़पा’ र्वाला सो़म्सिमी। 26 लावो गानी ने आरेप्माम मेदु़म्नी। गानीगोडाम उहेम मु़चु़ डोक्पु बु मेराम याक्के दु़म्नु़, मा ङाउ दु़म्पा मु़चु़ ने डु़ल्चो़ दु़म्मु बासी। 27 पेप्डा गन्पा नुङ चापे-डुपे बेपा मु़चु़चिपगोडा उहेम डोक्पु मु़चु़ दु़म? ग्रुला पेप्डा गन्पा ङा डोक्पु मेएँ मा? लावो इनी थेतेडा गो चापे-डुपे बेपा मु़चु़ होप्माम ङा बुङु। 28 “गानी आमा दु़खाडा थो़रलु़इमिम दु़म्निम बु। 29 हेसाका आमा माम्चु़नीका गोलाई हप दु़म्बेट्ङिडिमिम बु, गानीलाई गो वो मेम्साकाङा हप दु़म्बेनिनी। 30 मेकोतिमा गो किब्दी थो़पुमिम थारीका गानी गोनुङङा पोनी-डुनी, मा हपकु गन्खोपडा गन्साका माम्चु़नीकु मु़चु़मिमडला गोनुङ साखाम थो़पा दु़म्नी।” पत्रुसकु नाप्छु़सीकु दुथाम येशूका सो़म्डिम ( मत्ती २६:३१-३५ ; मर्कूस १४:२७-३१ ; यूहन्ना १३:३६-३८ ) 31 मेकोतिमा येशूका र्वाम्डी, “सिमोन, ए सिमोन थो़सा, खारीचो़मिमका उनी जेप्सेर स्यामिमिम होम्साकाङा शैतानका गानीलाई स्यामु लागि माम्चु़नीनुङ र्वाक्ताम बु। 32 लावो गाना गोडला थो़रलु़मुम बुमु मेडिडा र्वाक्साका गो इमा लागि सो़म्दी बेउतोम बु। गाना आमाडा रोकामा गानानुङ लाम्दिपा सीसिपामिमका गोडला थो़रलु़मु लागि उनी सो हन्बेसाडामी।” 33 मेकोतिमा पत्रुसका र्वाक्ता, “ङाचो़, गो गानीनुङङा झ्यालखान लमु मा गानीनुङङा सिमु लोवो चापु।” 34 लावो येशूका र्वाम्डी, “पत्रुस आच्छाङा गो गानालाई र्वाङु, गाना गोलाई सुक खेपसम्म मेछेपु मेर्वानामिमसम्म थामा नेमसोसोका स्वारेपो मेओ।” येशूका सीसिपामिमलाई रोक्पा थारीकाम लागि झो़म्सी बेट्मिडिम 35 मेम्मा येशूका मेर्मिमनुङ हिलाबेम्डी, “गो गानीलाई जो़पा-सेला थो़बेड्डा खउलुङ, फाजी, नुङ सो़लो़प मान्थिङा थु़र्निनिलो गानीलाई हाम-हुमकाम खेरेला दु़स्ताम बाइडा?” सीसिपामिमका र्वाम्डी, “मेदु़प्सावा।” 36 गुमीका र्वाम्डी, आथाडा आनो उहेमनुङ फाजी बु मेरामका फाजी कुर्नु़ मा खउलुङ बाट्पाका खउलुङ कुर्नु़। मेम्मा उहेमनुङ कातु़रु़ मिबु मेरामका उ हुम-ये भ्रेसाका लोवो कातु़रु़ भ्रेयेनु़। 37 हेङालोने “गुमी ख्ल्याम्याचो़मिमनुङ ङार्सिम्डी र्वाक्साका माम्चु़नीकु सिजेमडा आमा दुथाम र्याक्मा ल्वा रोक्थिट्पा थारी रोक्ताम बु। आच्छाङा आमा दुथाम र्वाक्मा खोत्ले ल्वामिम रोक्थित्तोङा लेडु़।” 38 मेकोतिमा सीसिपामिमका र्वाम्डी, “रेप्नी, ङाचो़ आसिन्डा नले कातु़रु़ बु।” येशूका र्वाम्डी, “मेकोतिङा बुनु़।” जैतून पोप्चङडला येशूका सो़म्दी बेम्डिम ( मत्ती २६:३६-४६ ; मर्कूस १४:३२-४२ ) 39 उनी बादु़खाम होम्साकाङा येशू शहरलामका लुम्डिमा जैतून पोप्चङडला लम्डी, मा उनी सीसिपामिम वो गुमीनुङङा लम्डी। 40 मेसिन्डा रोम्थिम्डिमा गुमीका उनी सीसिपामिमलाई र्वाम्डी, “मेजो़पा ल्वालाम इनी न-मेछाम्सिनु़ र्वाक्साका सो़म्दी बेनी।” 41 मेकोतिमा येशू सीसिपामिमडाम सुक धु़म (३०) मिटर को-को भाल लम्डिमा क्रचु़खुम बेसाका सो़म्दी बोमु चो़म्मिडी, 42 मा गुमीका र्वाम्डी, “ए माम्चु़नी पाआ, गानी न बोनी माला ओराम दु़खाकु कान्चु़रे गोलामका हेम्साङ्नी। लावो आमा न होम्साका मेएँ, इनी न होम्साका बेनी।” 43 मेकोतिमा पाह्रीलामका कोले पाह्रीचो़ योक्तामा येशूलाई सो ग्वाक्तु़। 44 येशू छो़म मेभ्रम्सिप्मिवा, मा छो़म सो़म्दी बोमु चो़म्मिडी, मा सिसिकु थप्का चाप्सु़मिम होङङा बेपा उनी ग्वाल क्वायु़ चाप्तोङा लेड्डु़। 45 येशूका सो़म्दी बेम्डिमा उनी सीसिपामिमकाडा रोम्डिलो मेर्मिम उनी न-गो मेभ्रसावामका अम्ल्याक्पा डार्मिडी। 46 गुमीका मेर्मिमलाई हिलाबेम्डी, “गानी हेङा अम्ल्यानिमिम? बक्नी, मा गानीडला मेजो़पा ल्वाका इनी न मेछाम्सिनु़ र्वाक्साका सो़म्दी बेनी।” येशू चु़म्मिडिम ( मत्ती २६:४७-५६ ; मर्कूस १४:४३-५० ; यूहन्ना १८:३-११ ) 47 येशू उनी सीसिपामिमनुङ जेत्तोङा बेम्डिलो मेसिन्डा सेर्पा मु़चु़मिम रोम्डी। को-न (१२) उनी सीसिपामिमगोडाम यहूदा र्वाक्मा ने मेर्मिमकु ङादो-ङादो रोक्ता। येशूलाई चुप्पा बोमु लागि मे यहूदा उनी फार्डा रोक्ता, 48 लावो येशूका मेरामलाई र्वाम्डी, “यहूदा, हाम गाना मिनीचो़लाई चुप्पा बेसाका भ्रेनामिम?” 49 मेसिन्डा हाम दु़म्मु खाप्डु़म बाइडा मेराम ल्वाम्डिमा येशूकु फार्डा बाट्पा सीसिपामिमका र्वाम्डी, “ङाचो़, हाम गुकु कातु़रु़का फल्कुमी?” 50 मे सीसिपामिमगोडाम कोलेका डोक्पु ङाउ डु़म्लाचो़कु डु़ल्चो़काम जो़पलाममिम उ नोफ्ला फल्साड्डु़। 51 लावो येशूका मेर्मिमलाई र्वाम्डी, “आरे मेबेनी!” मेकोतिमा गुमीका मेराम डु़ल्चो़कु नोफ्ला लु़प्मिडिमा सबेट्मिडी। 52 येशूलाई चु़म्डा रोक्पा ङाउ डु़म्लाचो़मिम, सो़रनेम लपा कप्तानमिम, मा ङाउमिमलाई गुमीका र्वाम्डी, “हाम गो कोर्थो़लाम बक्पामिमकु ङाउ मा? गानी गोलाई चु़म्डा कातु़रु़मिम नुङ डु़लु़म्चो़मिम रेट्निमा रोक्निम? 53 हेल्लो लोवो गो गानीनुङङा सो़रनेमगोडा बाङडोलो गोलाई मेचु़म्ङिनिवा। लावो शैतानकु न होङङा खारी बेपा ओराम इनीमा थारी सो़।” पत्रुसका येशूलाई मेछेपु र्वाक्ताम ( मत्ती २६:५७-५८ , ६९-७५ ; मर्कूस १४:५३-५४ , ६६-७२ ; यूहन्ना १८:१२-१८ , २५-२७ ) 54 मेर्मिमका येशूलाई चु़म्मिडिमा डोक्पु ङाउ डु़म्लाचो़कु नेमडा लम्डी। पत्रुस ने होनोवा बासाका येशूकु चङचङ लस्ता। 55 मेसिन्डा मु़चु़मिमका देल्फुकु थेतेडा मु होट्मिडिमा जु़त्तोङा लेट्मिडी। पत्रुस वो लस्तामा मेर्मिमनुङङा गन्डा। 56 कोले डु़ल्चो़मेका पत्रुस मुकु ओलका गन्तासिट्पा ल्वास्तु़मा जो़होमका रेप्तो र्वाक्ता, “ओराम मु़चु़ वो येशूनुङङा बाइडा।” 57 लावो पत्रुसका आरे र्वाक्तामा गो ने मेएँ र्वाक्ता, “ए तोङमा, गुमीलाई गो मेछेपुमी।” 58 घरिकोङका कोले मु़चु़का पत्रुसलाई ल्वास्तु़मा र्वाक्ता, “गाना वो येशूनुङ लाम्दिपा मु़चु़मिमगोडाम कोले सो़।” लावो पत्रुसका र्वाक्ता, “ए वाआ, गो ने मेएँ।” 59 को घण्टा को-को चङडा कोलेका घ्ल्वाम फिस्तामा र्वाक्ता, “आच्छाङा ओराम मु़चु़ येशूनुङ लाम्दिपामिमगोडा बाइडा। हेङालोने ओराम मु़चु़ गालीलडाम ङा रेछा।” 60 लावो पत्रुसका र्वाक्ता, “गानी हाम सो़त्तोङा लेनी वाआ, गो ने मेचक्पु।” पत्रुस जेत्तोङा बु़डु़लो स्वारेपो ओक्ता। 61 मेकोतिलोङा ङाचो़ येशू ख्लोसिम्डिमा पत्रुसलाई रेप्मिडी। “थामा नेमसोसोका स्वारेपो ओमु ङादो गाना गोलाई सु खेप मेछेपु र्वाना” र्वाक्साका येशूका गुलाई र्वाम्डिम ल्वा पत्रुसका मिम्डु़। 62 मेम्मिमका पत्रुस देल्फुलामका लुक्तामा लस्ता, मा हुला ख्राम बु़डु़। येशूलाई नाले डाट्मिडिम 63 येशूलाई लपा सिपाहीमिमका गुमीलाई नाले डान्मु नुङ याल्मु चो़म्मिडी। 64 मेर्मिमका येशूकु मिक्सी येका ड्याम्साम्डिमा हिलाबेम्डी, “गाना माम्चु़नीलाम-जेसा, गानालाई सु़का याल्ना?” 65 मेकोतिमा मेर्मिमका गुमीलाई वाङमिम हापा ल्वालामका डक्साका जेम्डी। डोक्पु घ्रो़म्दीकु ङादोडा येशू ( मत्ती २६:५९-६८ ; मर्कूस १४:५५-६५ ; यूहन्ना १८:१९-२४ ) 66 नेम सोङडामा मु़चु़मिमकु ङाउमिम र्वाक्मा ङाउ डु़म्लाचो़मिम नुङ यहूदीकु डु़म्ला सीपा पातु़म्रीमिम कोदेप खोम्सिम्डिमा येशूलाई उनी डोक्पु घ्रो़म्दीडा रेट्मिडी। 67 मेम्मा गुमीलाई र्वाम्डी, “गाना ख्रीष्ट माला गुकुनुङ सो़या।” गुमीका मेर्मिमलाई र्वाम्डी, “गो गानीनुङ सो़उ लोवो गानी गोडला थो़र मेलु़नी। 68 गो गानीनुङ हिलाहिसी बेउतो माला गानी गोनुङ हाम वो मेसो़नी। 69 लावो आथाडा आनो मिनीचो़ यु़मनुङमा माम्चु़नीकु जो़पलाम गन।” 70 मेकोतिमा मेर्मिम खोत्लेका हिलाबेम्डी, “हाम गाना माम्चु़नीकु चो़?” गुमीका मेर्मिमलाई र्वाम्डी, “गानी र्वानिमिम ङा सो़ गो।” 71 मेर्मिम खोत्लेका र्वाम्डी, “गुइलाई ओराम मु़चु़कु कोर्थो़लाममिम ल्वाकु दुथाम सो़पा वाङमिम सु़ वो मेबासी। हेङालोने गुइ उ त्वाकु सिलामका ङा जेस्ताम थो़स्ल्याड्डी।” |
© Wycliffe Bible Translators, Inc. All rights reserved.
Wycliffe Bible Translators, Inc.