लूका 21 - थुलुङ राईअर्दोमेकु ग्वा-ग्वा ( मर्कूस १२:४१-४४ ) 1 येशू सो़रनेमगोनो बाम्डिलो खाप्चीचो़मिमका मेसिन्डाम ग्वा-ग्वा जु़ल्पा बाकसडा ग्वा-ग्वा फिम्डिम ल्वाम्डी। 2 मेकोतिमा कोले उ हाम वो मेबाट्पा अर्दोमे रोक्तामा नक पैसा ग्वा-ग्वा मेगोडा फिक्तु़म वो गुमीका ल्वाम्डी। 3 ओराम ल्वाम्डिमा येशूका उनी सीसिपामिमलाई र्वाम्डी, “आच्छाङा गो गानीलाई र्वाङु, ओराम उ हाम वो मेबाट्पा अर्दोमेका खोत्लेडाम हापा ग्वा-ग्वा फिक्तु़म बु। 4 हेङालोने खाप्चीचो़मिमका ने उनी त्वापलाई लिड्डु़मिमा घ्लेस्ताम खउलुङगोडाम कतिकलङ ग्वाम्डिम बु, लावो गु ने उ हाम वो मेबाट्पा बु मा वो गुनुङ बाट्पा खोत्लेङा खउलुङ ग्वाक्तु़म बु।” हुक्पाथारीकु छेखोपमिम ( मत्ती २४:१-३५ ; मर्कूस १३:१-३१ ) 5 जो़पात्तो लुङकाम बनेबेम्मा सो़रनेम नुङ मु़चु़मिमका ग्वाम्डिम ग्वा-ग्वाका ब्ल्वाट्मिडिम जो़पा सो़रनेमकु दुथाम येशूकु कोङ-कोङ सीसिपामिमका ल्वा बेत्तोङा लेट्मिडी। मेकोतिलोङा येशूका र्वाम्डी, 6 “कोलेम आरेप्माम थारी रो, ओम्लो गानी ल्वात्तोङा लेनिमिम नेममिम स्वाक्चिमो मु़चु़मिमका खोत्लेङा फाल्मी, मा मेगोडा चिर्मा लुङमिम कोले वो मेदु़म।” 7 मे सीसिपामिमका गुमीनुङ हिलाबेम्डी, “ङाचो़, आरेप्माम थारी हाम्सी रो? मा आरेप्माम थारी रोमु खाप्डु़लो हेप्माम छेखोपमिम दु़म?” 8 गुमीका मेर्मिमलाई र्वाम्डी, “चङचङया बानी वो, सु़का वो गानीलाई मेब्लो़म्निमिनु़। हेङालोने हापा मु़चु़मिम आमा नङडा, ‘गो ङा ख्रीष्ट’ र्वाक्तो रोमी। हुक्पाथारी रोक्फाड्डाम बु र्वामी लावो गानी मेर्मिमडला थो़र मेलु़नी वो। 9 मु़चु़मिम येपा-दुक्पा मा क्वाल्बा दु़म्पा ल्वा थो़नी लोवो गानी मेङिनी, हेङालोने हुक्पाथारी रोमु ङादो आरेप्माम दु़म्मुङा बासी। मेकोतिलोङा सु़म्दिसेर हुक्पाथारी ने मेरोल्या।” 10 मेकोतिमा गुमीका मेर्मिम नुङ आथावो र्वाम्डी, “उनी त्वाप-त्वापगोडाङा कोले सामा कोङमी सामानुङ क्वाल्बा बु़, मा कोले किब्दीका कोङमी किब्दीनुङ क्वाल्बा बु़। 11 छो़म डोक्पु सुबुरुक्सीमिम लमी। बान्ते मेनो मा-के हु, मा लामासाम रो। धामुलामका छो़म ङिमलु़पा ल्वा नुङ यु़मखारी दु़म। 12 “लावो ओर्मिम खोत्ले ल्वामिम दु़म्मु ङादो गानी आमा सीसिपा दु़म्निमका मु़चु़मिमका गानीलाई चु़म्नी, मा इनी थो़मतेर्मी। घ्रो़म्दीनेममिमबाडे रो़-रो़न्थु़त्तो लनिमी मा झ्यालखानडा चनिमी। मेम्मा हपमिम नुङ किब्दी साखामचो़मिमकु ङादोडा हिलाहिसी बेप्डा येम्सिबेनिमी। 13 लावो इनीमा लागि आमा दुथाम मेर्मिमनुङ सो़पा जो़पा थारी दु़म। 14 मेम्मिमका इनीमा लागि हाम सो़मु बासी र्वाक्साका मिम्ताम-सो़र्ताम मेबेनी। 15 हेङालोने मेकोतिलोङा गो गानीलाई नेप्ची ग्वानिनी। इनी कोर्थो़लाम बक्पा मु़चु़मिमका मेराम ल्वाकाम सि ख्लोमु मेचाम्मी मा इनी कोर्थो़लाम जेमु मेचाम्मी। 16 लावो इनी त्वाकु माम-पाप नुङ वा-ल्वाकमिम, इनी मु़चु़मिम, मा इनी ङोप्सो़मिमका ङा वो गानीलाई चु़म्बेनिमी, मा गानीगोडाम कोङ-कोङलाई मेर्मिमका सेन्मी। 17 गानी आमा सीसिपामिम दु़म्निमका खोत्ले मु़चु़मिमका गानीलाई मेद्वानी। 18 लावो इनी कोरिप सेमङा वो हेवो मेदु़म। 19 गानी गोडला थो़र लु़निम बुनिमिमका ङा त्वारो़म डार्नी। 20 “मेकोतिमा यरूशलेम शहरकु होनोलाम-आथो़लाम सिपाहीमिम खोम्सिमिमिम ल्वानिलो मेराम शहर सेकारिम्सिमु खाप्डु़ रेछा र्वाक्साका गानी चनी।” 21 मेकोतिमा यहूदिया इलाकाडा बाट्पा मु़चु़मिम पोप्चङथो़ स्वामिनु़। यरूशलेम शहरगोनो बाट्पा मु़चु़मिम पाखाथो़ स्वामिनु़, मा शहरकु होनो आथो़म देलडा बाट्पा मु़चु़मिम शहरगोनो मेहुमिनु़। 22 हेङालोने ओराम थारी माम्चु़नीका मु़चु़मिमलाई देन्दे ग्वाक्पा थारी सो़। आरेसाका माम्चु़नीकु सिजेमडा र्वाक्मा खोत्लेङा रोथी। 23 मेराम थारीका गोजु़मे दु़म्पा नुङ याक्के चो़च्चो़मिमलाई दु़दु़ थो़पा मेसेममिम ने नाम्नाम्चो़! हेङालोने ओराम बायडाम खोत्ले मु़चु़मिमका दु़खा ल्वामी, मा ओर्मिमलाई माम्चु़नीका छो़म इम्मु मेचापा देन्दे ग्वामी। 24 उनी स्वाक्चिमो मु़चु़मिमका मेर्मिमगोडाम कोङनिमलाई कातु़रु़का फल्मी, मा कोङनिमलाई बन्मिमा सुबुडाम नेब्दीडा लमी। मेकोतिमा वाङसामामिमकु उनी थारी मेहुक्थु़मसम्म मेर्मिमका यरूशलेम शहरलाई फाल्मी मा साखाम थो़मी। 25 “ख्लो़मु, नेम्सुङ मा सोरलुङमिमगोडा हेल्लो वो मेल्वाम्मा छेखोपमिम दो़। मेम्मा दिरिदिनडाम कुकु बाबारिम नुङ ब्लोजु़का सुबुडाम खोत्ले मु़चु़मिम ङिमी मा मिम्ताम-सो़र्ताम बोमी। 26 हेङालोने माम्चु़नीका धामुलाम सोरलुङमिमलाई रुबेन्मिमिमका सु़म्दिसेरडा हाम दु़म्मु खाप्डु़म र्वाक्पा ङिमुका उनी मु़चु़मिम न ना थो़मकाम दु़म्मी। 27 मेराम थारीका मिनीचो़ यु़म नुङ यु़म-झ्वाक्सीडा खासेडला योक्तोङा बेपा मेर्मिमका ल्वामी। 28 मेम्मिमका ओर्मिम ल्वा दु़म्मु चो़म्डु़मेडे गानी मेङिनी। मेकोतिमा बक्निमा गेले रेप्नी, हेङालोने गानी सेल्सिट्पा थारी रोक्फाड्डाम दु़म।” 29 मेकोतिमा येशूका उनी सीसिपामिमनुङ ओराम सीसि-सो़म्दी र्वाम्डी: “बैससीकु धक्सा नुङ वाङमिम खोत्ले धक्सामिमलाई रेप्नी, 30 मेर्मिमकु लिम ओप्डु़लो ग्वाल थारी रोक्फाड्डाम र्वाक्पा गानी चनी। 31 मेम्साकाङा ओर्मिम ल्वा दु़म्मु चो़म्डु़मिम ल्वानिलो माम्चु़नीकु किब्दी रोमुङा खाप्सु़ र्वाक्साका चनी। 32 “आच्छाङा गो गानीलाई र्वाङु, आथामबिलिम मु़चु़मिम दाम्मु ङादो आरेप्माम खोत्ले ल्वामिम दु़म। 33 सुबु नुङ धामु दाम्मा ल, लावो आमा सिजेम दाम्मा मेल। 34 “गानी चङचङया बानी, भ्रपा-भ्रपा पेत्तो नुङ डु़का सेसाका मा इनी मिरो़मकाम लागि मिम्ताम-सो़र्ताम बेपा मेदु़म्नी। मेम बेन्नी माला ने हादीबारामिम पेरडा हुमिमिम होङङा निया दु़म्पा थारी कोचोत्ति गानीडला रो। 35 हेङालोने सुबुडा बाट्पा खोत्ले मु़चु़मिमडला मेराम थारी मेम्साकाङा रो। 36 लावो आरेप्माम खोत्ले ल्वामिमडाम वाङ दु़म्साका मिनीचो़कु ङादोडा येम्सिमु चामु लागि चङचङया बात्तो सो़म्दी बेनिम बानी।” 37 हेल्लो लोवो येशूका नेम्फु सो़रनेमगोडा सीन्थाल्मिडी। मेम्मा हेल्लो लोवो सिन्था ने जैतून र्वाक्मा पोप्चङडला नेम सोसोसम्म बाप्डा लम्थाल्मिडी। 38 खोत्ले मु़चु़मिम उनी सिजेम थो़प्डा नेम सोसोकाङा सो़रनेमगोडा रोम्थाल्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.