लूका 1 - थुलुङ राईछेम-ल्वा 1 द्वादीबुङ ङाचो़ थियोफिलस, येशूकु दुथाम गुकुगोडा हा-हाम ल्वा दु़स्ताम बाइडा मेर्मिम खोत्ले ल्वाकु दुथाम हापा मु़चु़मिमका र्यामु माल्मिडी। 2 माम्चु़नीकु जो़पा-सेला सो़पा उनी डु़ल्चो़मिमका ओर्मिम ल्वा गुकुनुङ सो़म्डिम बु। मे उनीमा डु़ल्चो़मिम ने येशूकु दुथाम नुङ येशूका खारी बोमु चो़म्मिडिलो आथाममिम ल्वा ल्वापा थो़पा बाम्डी, मा मे ल्वाम्डिम थो़म्डिम ल्वा वाङमिमनुङ सो़म्डी। 3 मेम्मा द्वादीबुङ ङाचो़ थियोफिलस, गो वो येशूकु दुथाम नुङ येशूका खारी बोमु चो़म्मिडिलो आथामङा खोत्ले ल्वा चङको चङको दु़म्साका माल्तो ख्लोक्तोम बु। मेर्मिम खोत्ले पेन्तिका गो गानीलाई र्यामु जो़पा लु़ङडो। 4 आथा ओराम खाजेम डानिमा गानीलाई सीट्मा ल्वामिम हाङको आछाङाकाम रेछा र्वाक्पा गानी चनी। कु-रु़दु़म ग्वाक्पा यूहन्ना ग र्वाक्साका सो़म्डिम 5 यहूदिया क्षेत्रडाम हप हेरोदका साखाम थो़ड्डु़म थारीका अबिया दलडाम डोक्पु डु़म्लाचो़ जकरिया र्वाक्मा कोले बाइडा। उमा नाइमे एलीशिबा वो डोक्पु हारूनकु दोचो़लाममिम बाइडा। 6 मेर्चिप निफि ङा माम्चु़नीकु न-गो होप्माम बाच्ची, मिप्रङमाका बेबेट्मिडिम खोत्ले खारी नुङ डु़म्ला जो़होमका बेपा मु़चु़ बाच्ची। 7 मेर्चिपकाम उची चो़ मेबामिवा हेङालोने एलीशिबाकाम चो़ मेदु़म्पा बाइडा, मा निफिकाम ङा उची दु लस्ताम बाइडा। 8 कोलेम डु़म्लाचो़का बोमु बासिक्पा उमा दलका बोमु थारी रोक्तालो जकरियाका सो़रनेमगोडा माम्चु़नीकु लाले-पाङके बेत्तोङा लेड्डु़, 9 सो़रनेमगोनो हुसाका मिप्रङमालाई धूप चापा खारी बोमु लागि मे डु़म्लाचो़मिमका बेम्खेम्डिम होङङा चिठ्ठा ओप्मिडिलो जकरियाकु नङडा दु़स्ता। 10 मेगोनो धूप घ्रु़डाम थारीका पाखानो खोम्सिम्डिम सेर्पा मु़चु़ खोत्लेका सो़म्दी बेत्तोङा लेट्मिडी। 11 मिप्रङमाकु कोले पाह्रीचो़ मे धूप चाखोपकु जो़पलामका जकरियानुङ रेम्बेसिड्डा। 12 मे पाह्रीचो़ ल्वास्तु़लो जकरिया ङिड्डामा उ लो़ दाम्स्ता। 13 लावो पाह्रीचो़का गुनुङ र्वाक्ता, “मेङिडा जकरिया, हेङालोने माम्चु़नीका इमा सो़म्दी थो़म्डिम बु। इमा नाइमे एलीशिबाका कोले तारापाचो़ कक्सु़, मा गाना मेरामकु नङ यूहन्ना बाबेन्मु सो़। 14 मेराम गमिमका गाना छो़म भ्रन्सिनामा गेर्सिद्वाना, मेम्मा हापा मु़चु़मिम गु गमिमडाम गेर्सिद्वामी। 15 हेङालोने गु मिप्रङमाकु मिक्सीलामडा डोक्पु दु़म। गुका अङ्गूरकु ग्वाल नुङ डु़ हेल्लो वो मेडुङु़। उ मामकु ङेलगोनो बुलो आथामङा गु माम्चु़नी-पेलका लु़न्सिक्पा दु़म। 16 गुका हापा इस्राएलीमिमलाई मेर्मिमकु माम्चु़नीथो़ ख्लोकु़मी। 17 गुका त्वारो़मडा नुङ यु़मका एलिया होप्मामङा दु़म्साका ङाचो़डाम ङादो यो, मा उनीमा लाम्दी बनेबु़। गुका पाप नुङ चो़मिम दु़बेडु़मी, मा र्वाकिमिम मेथो़पामिमलाई माम्चु़नीका र्वामिमिम थो़पा मु़चु़कु नेप्चीथो़ ख्लोकु़मी। आरेसाका गुका ङाचो़कु मु़चु़मिमलाई उनीमा लागि ङा झो़म्सिबेट्जो़लु़मी।” 18 जकरियाका मे पाह्रीचो़नुङ र्वाक्ता, “ओराम ल्वा आच्छाङा र्वाक्साका गो हेसाका थो़र लु़मु मा? हेङालोने गो नुङ आमा नाइमे निफिकाम ङा दु लमु दु़स्तु़म बु।” 19 पाह्रीचो़का गुनुङ र्वाक्ता, “माम्चु़नीनुङ दु़म्पा डोक्पु पाह्रीचो़ गो गब्रिएल सो़। गानानुङ ल्वा बेप्डा नुङ ओराम जो़पा-सेला थो़बेड्डा गुमीकाङा गोलाई थु़र्ङिडिमिम सो़। 20 लावो आमा ल्वाडा थो़र मेलु़नावामका चो़च्चो़ गमिमसम्म सि मेजेपा दु़म्नामा जेमु मेचाम्ना। हेङालोने गो जेङडोम ल्वा जो़पा थारीका रोथी।” 21 मेराम थारीका मु़चु़मिमका जकरियालाई पाखानो लम्थाट्मिडिम बाइडा, मा गु सो़रनेमगोनो छो़म छु़स्तामका मेर्मिम ङाङाया दु़म्मिडिम बाइडा। 22 जकरिया पाखानो लुक्तालो मेर्मिमनुङ जेमु ङा मेचाप्सु़वा, मा गुका सो़रनेमगोनो मिक्सीलाम ल्वास्तु़ र्वाक्पा मु़चु़मिमका चम्डी। गु उ सि मेजेपा दु़स्तामका गुका मेर्मिमलाई उ ल्वा थो़साका सीड्डु़मी। 23 जकरियाका सो़रनेमगोनो बोमुबासिक्पा उमा लाले-पाङके बोमु दु़म्स्तु़ मा उ नेम ख्लोसिड्डा। 24 मेकोतिमा उमा नाइमे एलीशिबा गोजु़मे दु़स्तामका ङो मुनामसम्म बान्ते वो मेलक्साका नेमडा ङा बाइडा, मा गुका आरे र्वाक्ता, 25 “मु़चु़मिमका गोलाई हाम ना हामकाम मेमिम्ङिमिनु़ र्वाक्साका मिप्रङमाका गोडला न-थो़म रेम्बेम्डिम।” येशू गमी र्वाक्साका सो़म्डिम 26 एलीशिबा गोजु़मे दु़स्तामकु रु (६) मुनामका माम्चु़नीका गब्रिएल पाह्रीचो़लाई गालीलडाम कोले नासरत र्वाक्मा देलडा थु़र्मिडी। 27 मे पाह्रीचो़ मरियम र्वाक्मा कोले कन्या मेसेमकाडा लस्ता। मे मरियम दाऊद हपकु चो़-चु़सु़लाममिम योसेफ र्वाक्मा कोले मु़चु़काडा बिम्डिम बाइडा। 28 पाह्रीचो़ मेराम कन्याकाडा लक्साका सेव साड्डु़मा र्वाक्ता, “ए माम्चु़नीलाम न-थो़म ल्वापा मेसेम!” 29 ओराम थो़स्तु़मा मरियम ङाङाया दु़म्तो र्वाक्ता, “ओ गो थो़उतोम ल्वाका र्वामु मालु़मिम ल्वा हाम डे?” 30 मेकोतिमा पाह्रीचो़का र्वाक्ता, “मेङिसा मरियम, माम्चु़नी गानानुङ गेर्सिम्डिम बु, 31 रेप्डा, गाना गोजु़मे दु़म्ना, मा कोले तारापाचो़ कना, मा उनीमा नङ येशू बाबेडा। 32 गुमी छो़म घ्ल्वापा दु़म्मी, मा खोत्लेडाम घ्ल्वापा माम्चु़नीकु तारापाचो़ र्वामी। मिप्रङमा माम्चु़नीका गुमीलाई उनीमा ङाउ-खुउ दाऊद होम्साकाङा कोले हप दु़म्बेन्मी, 33 मा गुमी हेल्लो लोवो याकूबकु चो़-चु़सु़मिमकु हप दु़म्मी, मा उनीमा किब्दी हेल्लो लोवो दु़महोम बु।” 34 मरियमका मे पाह्रीचो़नुङ र्वाक्ता, “गो ने कोले कन्या मेसेम बुङु, ओराम ल्वा हेसाका दु़म्मु चाप्सु़ मा?” 35 पाह्रीचो़का गुनुङ र्वाक्ता, “माम्चु़नी-पेल गानाडला योमी, मा खोत्लेडाम घ्ल्वापा माम्चु़नीकु यु़म गानागोडा दु़म। मेम्मिमका मे गक्पा चो़च्चो़ सेपा दु़म्मी, मा गुमीलाई माम्चु़नीकु तारापाचो़ र्वामी। 36 रेप्डा, इमा त्वाकु मु़चु़ एलीशिबाका वो उ ङामीदुडा गोजु़मे दु़स्तामा वोस्चो़ कक्पा दु़स्ताम बु। गुलाई खोत्लेका चो़ मेकक्सु़ र्वाम्डिम बाइडा। गु गोजु़मे दु़स्ताम रु (६) मुनाम दु़म्मु दु़म्स्तु़म बु। 37 हेङालोने माम्चु़नीका बोमु मेचाप्मिमिम हाम वो मिबु।” 38 मेकोतिमा मरियमका र्वाक्ता, “गो मिप्रङमाकु डु़ल्चो़मेलाई गानी र्वानिम होप्माम ङा दु़म्नु़।” मेकोतिमा मे पाह्रीचो़ मेलामका लस्ता। एलीशिबालाई क्रो़म्डा मरियम लस्ताम 39 कोलेम नलेम चङडा यहूदियाकु पोप्चङथो़म कोले देलडा मरियम दाला-दाला बासिक्साका लस्ता, 40 मा जकरियाकु नेमगोनो हुङडामा एलीशिबालाई सेव साड्डु़। 41 मरियमका सेव र्वाक्ताम थो़स्तु़ मेडे एलीशिबाकु ङेलगोनो बाट्पा चो़च्चो़ दोस्ता, मा एलीशिबा माम्चु़नी-पेलका लु़न्सिड्डा, 42 मेकोतिमा एलीशिबाका डोक्पु लो़लामका र्वाक्ता, “वाङमिम मेसेममिमगोडाम गाना आलाकाम सो़, मा गाना कनामिम चो़च्चो़ वो आलाकाम सो़। 43 आमा ङाचो़कु माम आमाडा रोम्डी। हेङामा माम्चु़नीका गोडला आकोम न-थो़म रेम्बेम्डी? 44 रेप्डा, गाना सेव र्वाक्नाम थो़उतो मेडे आमा ङेलगोनो बाट्पा चो़च्चो़ गेर्सिद्वाक्तो दोस्ता। 45 गाना आलाकाम सो़, हेङालोने मिप्रङमाका गानालाई र्वाम्डिम ल्वा रोथी र्वाक्साका थो़र लु़न्नाम बु।” मरियमका माम्चु़नीकु नङ कोमु काम्सो बु़डु़म 46 मेकोतिमा मरियमका र्वाक्ता, “आमा न-गोलामका ङा मिप्रङमाकु कोमु काम्सो बेउ, 47 मा गोलाई सेल्पा माम्चु़नीडा आमा गो भ्रसी। 48 हेङालोने गुमीका उनी त्वाकु डु़ल्चो़मे याक्के दु़म्ङोडोलो न-थो़म रेम्बेडिम बु, आथाडा आनो खोत्ले मु़चु़मिमका गोलाई आलाकाम र्वामी। 49 यु़मनुङमा माम्चु़नीका आमा लागि कोले डोक्पु खारी बेङसाङडिमिम बु। माम्चु़नीकु नङ सेपा बु। 50 उनीमा ङिमजु़ल्पामिमडला गुमीका हेल्लो लोवो न-थो़म चो़-चु़सु़लामका योयो-पेपेसम्म रेम्बोमी। 51 गुमीका उनीमा ल्वाका उनीमा यु़म रेम्बेम्डिम बु, मा डोक्पु लिसिक्पामिमकु नगोडाम डोक्पु लिसिसी पुयु़ लुट्मिडिम बु। 52 गुमीका साखामचो़मिमलाई हाम ना हामकाम दु़म्बेट्मिडिम बु, मा याक्के दु़म्पामिमलाई डोक्पु बेम्डिम बु। 53 गुमीका क्रु़मसिपामिमलाई जो़पा-भ्रपा पोमु-डुमु खोहोम ग्वाम्डिम बु, मा खाप्चीचो़मिमलाई होप्तोङा थु़र्मीडिम बु। 54 गुमीका उनीमा डु़ल्चो़ इस्राएलीमिमलाई मिम्साका न-थो़म रेम्बेम्डिम बु ख्लो़म्डिम बु, 55 मा इकीमा ङाउ-खुउमिमनुङ गुमीका ङादो र्वाम्डिम होम्साका ङा अब्राहाम नुङ उमा चो़-चु़सु़मिमडला हेल्लो लोवो उनीमा न-थो़म रेम्बेम्डिम बु।” 56 एलीशिबानुङ सु मुनाम कोकोवा बाइडामा मरियम उमा नेम ख्लोसिड्डा। कु-रु़दु़म ग्वाक्पा यूहन्ना गस्ताम 57 एलीशिबाकु चो़च्चो़ गक्पा थारी दु़स्तामा गुका कोले वोस्चो़ चो़ कस्तु़। 58 मिप्रङमाका गुडला न-थो़म रेम्बेम्डिम बु र्वाक्पा थो़म्डिमा उमा साउखोरे नुङ उमा त्वाकु मु़चु़मिम एलीशिबानुङ छो़म गेर्सिद्वाम्डी। 59 चो़च्चो़ गस्तामकु लेतलेम नेम उ खिरिरि क्रिप्डा मेर्मिम रोम्डी, मा मेरामकु नङ उमा पापकु नङ होप्माम ङा जकरिया बाबेन्मु खाप्मिडिम बाइडा। 60 लावो उ मामका र्वाक्ता, “मेएँ, ओरामकु नङ यूहन्ना बाबेन्मु बासी।” 61 मेर्मिमका गुनुङ र्वाम्डी, “इमा मु़चु़मिमगोडा आरेप्माम नङ बाट्पा मु़चु़मिम सु़ वो मेबुमी।” 62 मेर्मिमका मे चो़च्चो़कु पापलाई उनीमा ल्वा थो़न्मिडिमा चो़च्चो़कु नङ हाम जु़ल्पा न बु र्वाक्साका हिलाबेम्डी। 63 मेकोतिमा जकरियाका कोले र्याखोप पाटी बियु़डु़ मा, “मेरामकु नङ यूहन्ना सो़” र्वाक्साका र्याक्तु़। ओराम ल्वाम्डिमा मेर्मिम खोत्ले ङाङाया दु़म्मिडी। 64 मेकोतिलोङा गु जेमु चापा दु़स्ता, मा गुका माम्चु़नीकु नङ कोमु चो़म्डु़। 65 उ साउखोरेमिम खोत्ले ङिम्डी, मा यहूदियाडाम पोप्चङथो़म खोत्ले देलबाडे ओराम ल्वा थो़म्डी। 66 ओराम ल्वा थो़पा मु़चु़मिम खोत्लेका दिफु ओराम चो़च्चो़ हेप्माम दु़म? र्वाक्साका उनी नड्डा मिम्मिडी। हेङालोने मिप्रङमाकु यु़म मे चो़च्चो़नुङ बाइडा। जकरिया माम्चु़नीलाम जेस्ताम 67 यूहन्नाकु पाप जकरिया माम्चु़नी-पेलका लु़न्सिड्डा, मा माम्चु़नीलाम जेमु चो़म्डु़, 68 “इस्राएलडाम मिप्रङमा माम्चु़नीकु नङ कोसिनु़, हेङालोने गुमी योम्डिमा उनी त्वाकु मु़चु़मिमलाई सेल्मिडिम बु! 69 गुमीका इकीमा लागि उनी त्वाकु डु़ल्चो़ दाऊदकु चो़-चु़सु़मिमगोलामका सेल्पा कोले यु़मचो़ ग्वाक्साड्डामिम बु। 70 गुमीका माम्चु़नीलाम-जेपा सेपा उनीमा मु़चु़मिमकु सिलामका माके जेम्डी, 71 मेराम इकीमा स्वाक्चिमो मु़चु़मिमलामका नुङ मेद्वाक्पामिमलामका गुइलाई सेल्सामी, 72 गुमीका इकीमा ङाउ-खुउमिमडला न-थो़म रेम्बोमु लागि, मा सेपा उनीमा सो़रख्रेप्सी मिम्मु लागि, 73 इकीमा ङाउ-खुउ अब्राहामनुङ ससि बेम्डिम बाइडा। 74 मेराम इकीमा स्वाक्चिमो मु़चु़मिमलामका सेल्सिमु मा मेङिसाका, 75 माम्चु़नीकु लाम्दीडा लाम्दिसाका उनीमा लाले-पाङके इकी साम बुमिमसम्म सेपा दु़म्साका बोमु ल्वासिनु़। 76 ए आमा तारापाचो़, खोत्लेडाम घ्ल्वापा माम्चु़नीका गानालाई गुमीलाम जेपा दु़म्बेनामी, हेङालोने गाना ङाचो़कु ङादो-ङादो उनीमा लाम्दी बनेबेप्साड्डा लना। 77 उनीमा मु़चु़मिमलाई उनीमा छु़लमिम हेम्सिट्मी, मा सेल्सिमी र्वाक्पा न ग्वानामी। 78 हेङालोने माम्चु़नीकु छो़म न-थो़मका पाह्रीलामका नेप्सुङकु ओल होप्माम ख्रीष्ट इकीमाडा योमी, 79 मा तुकुम्चिमडा नुङ सिमुलाम खोपा मु़चु़मिमडला मेराम झ्वा, मेम्मा गुमीका इकीमा न भ्रसी बेन्मी।” 80 मे चो़च्चो़ यूहन्ना बर्तो लस्ता, मा माम्चु़नी-पेलका गुलाई यु़मचो़ दु़म्बेट्मिडी। मेकोतिमा इस्राएलीमिमनुङ रेम्मेबेसिथु़मसम्म गु र्याङगो-र्याङगोडाङा बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.