यहूदा 1 - थुलुङ राईयहूदाकु सेव 1 येशू ख्रीष्टकु डु़ल्चो़ नुङ याकूबकु ल्वाक यहूदालामका– माम्चु़नी पापलामका थसिक्पा नुङ रिखाम ल्वापा मा येशू ख्रीष्टकाम लागि बोट्मा-थार्मामिम, 2 माम्चु़नीका न-थो़म, न-भ्रसी नुङ रिखाम छो़म बोनिमिनु़। माम्चु़नीकु लाम्दीडा लाममेदिपा मु़चु़मिमका देन्दे ल्वामी 3 द्वादीबुङ ङोप्सो़नी, गुइ खोत्लेकाम सेल्सिसीकु दुथाम छो़म आ र्यार्या द्वाक्पा बाङडो। लावो थो़रलु़पालाई कोखेप ग्वाक्साड्डामिलो हेल्लो लोवो दु़म्पा थो़र गेनी र्वाक्साका गानीलाई छो़म र्वामुमा र्यामु आमा नड्डा रोक्ता। 4 हेङालोने कोङनिम मु़चु़ उहेमका देन्दे ल्वामी र्वाक्साका माकेङा र्याक्मा बु मेर्मिम मु़चु़ लिबावा इनीमा थेतेगोडा हुम्डिम बु। मेर्मिम मु़चु़ माम्चु़नीकु लाम्दीडा लाममेदिपामिम सो़, मेर्मिमका माम्चु़नीकु दिदामलाई उनी नसीहोम बोमुथो़ हिम्डिम बु, मा इकीमा हप नुङ ङाचो़ येशू ख्रीष्ट र्वामु मेर्मिमका मेद्वामी। 5 गानी ओर्मिम खोत्ले ल्वा चक्निमङा बु लोवो गो गानीलाई मिम्बेनिनी। येशूका उनी मु़चु़मिमलाई मिश्र नेब्दीलामका फ्वाक्मिडिमा फिट्मिडी, लावो थो़रमेलु़पामिमलाई पुयु़लुबेट्मिडी। 6 त्वाकु साखामगोडा मेबासाका त्वाकु बाखोप डिट्पा मे पाह्रीचो़मिमलाई गुमीका हेल्लो वो मेभ्रसिक्पा सेलरिवाका बसाका मे डोक्पु नेमसम्मकाम लागि तुकुम्चिमगोडा जु़ल्थाप्मिमिम बु। 7 हेसाका सदोम शहर, गमोरा शहर नुङ मेर्चिपकु होनो-आथो़म शहरडाम मु़चु़मिमका मेघ्रेट्पा बेसाका वाङमिमनुङ अम्पा छो़म न बेम्डी। हेल्लो वो मेसिपा मुड्डा मेर्मिमका छो़म देन्दे ल्वासाका रेम्बेम्डिम बु। 8 मेप्मामङा इनी थेतेगोडा हुपा ओर्मिम मु़चु़ वो बुमी। मेर्मिम मु़चु़ ङिमा म्वामिमिम होम्साका दोमी मा छु़लका उनी त्वापलाई घ्राम्लु़पा बनेबोमी। मेर्मिमका माम्चु़नीकु साखाम मेद्वामी मा पाह्रीचो़मिमकु जो़प्सीकु दुथाम डक्साका जेमी। 9 डोक्पु पाह्रीचो़ मिखाएलका वो मोशाकु सिपा मिरो़मकु दुथाम शैताननुङ फइडालो गुलाई डक्साका जेत्तो मुमा बेन्मु मेचाप्साका आरे र्वाक्ताम बाइडा, “ङाचो़का गानालाई भुर्नामिनु़।” 10 लावो ओर्मिम मु़चु़का उनी त्वाकाङा मेचमिमिम सेम्ला बेन्मी। न मेबाट्पा हादी-बारामिम होङङा मेचक्साका बोमिमिम खारीलामकाङा मेर्मिम छो़रो़प दु़म्मी। 11 मेर्मिम ने हाउरेमा! हेङालोने मेर्मिमका कयिनकु लाम्दी ख्लम्डी, खउलुङकाम लागि बालामका बु़डु़म होङङा मेर्मिमका मेजो़पा खारी बेम्डी। कोरहकु रिबुसी किसि होङङा मेर्मिम पुयु़लुमी। 12 ङाचो़कु रिखाम मिम्साका पोनिमिम इनी सामाघ्रो़म्सीकु ग्रुला मेर्मिम मु़चु़नुङ पोनिलो मेर्मिम ने कुबी-बोक्सा फ्रु़प्सेसी बोमु चापा इनीमा लागि ङिमलु़पा दिपलुङ होप्माम सो़। मेर्मिम ने त्वापथो़ कोङङा नसोक्पा क्रो़म मान्थिम रेपा-क्रिपा होप्माम सो़। मेर्मिम बाय ड-ड हुट्पा व मेयोक्पा खासे होप्माम सो़। मेर्मिम नखेप सिपा छेस्ता-काक्ता बिलिम धक्सा होप्माम सो़, मेर्मिम धक्साका मा सिन्मेबेन्मी, मा उ सक्फारयु़मङा बुल्मा दु़म। 13 मेर्मिम ने दो़न्दो़न्या मेबाट्पा दिरिदिनकु बाबारिम होप्माम सो़। कुकु बाबारिमका जाजाब्लु़म ख्लुकु़मिम होङङा मेर्मिमका क्रो़मलु़पा खारी रेम्बोमी। मेर्मिम ताङताहेरथो़ लक्पा सोरलुङ होप्माम सो़, उहेमकाम लागि केकेयाम तुकुम्चिम हेल्लो लोवो रान्थाट्मा बु। 14 आदमडाम येतले पुस्ताडाम हनोकका वो माम्चु़नीलाम-जेस्ताम बाइडा। गुका र्वाक्ता, “रेप्नी, ङाचो़ छो़म सेर्पा सेपा उनी पाह्रीचो़मिमनुङ योक्तोङा लेन्मी, 15 गुमीका खोत्ले मु़चु़मिमकु निया बोमी। माम्चु़नीलाई डोक्पु मेबेपा बेसाका खोत्ले खारी बेपा माम्चु़नीकु लाम्दी लाममेदिपा खोत्ले मु़चु़लाई नुङ माम्चु़नीकु लाम्दीडा लाममेदिपा छु़लचो़मिमका उनी कोर्थो़लाम जेम्डिम उनी न-गो जक्पाकु दुथाम मुमा बेन्मी।” 16 मेर्मिम मु़चु़ रिबुसी किट्पामिम सो़। मेर्मिमका त्वाकु मेजो़पा न-गो होङङा बोमी, नो़ ल्वाक्थाक्साका जेमी मा उनी त्वाप नु़मुकाम लागि लागालेपा जेमी। थो़रलु़इमिम दु़म्मुम बुमु सो हन्बेसी 17 लावो द्वादीबुङ ङोप्सो़नी, इकी ङाचो़ येशू ख्रीष्टकु थु़र्मामिमका ङादोङा र्वाम्डिम ल्वामिम गानी मिम्नी। 18 मेर्मिमका र्वाम्डिम बाइडा, “हुक्पा थारी रोम्फामु खाप्डु़मिम बिलि सेम्ला बेट्पा मु़चु़मिम मेजो़पा उनी न होङङा दोमी।” 19 गानीलाई दु़मेबेट्पा, उनी त्वाकु नका दोपा मा माम्चु़नी-पेल मान्थिम मु़चु़ ओर्मिम सो़। 20 लावो द्वादीबुङ ङोप्सो़नी, छो़म सेपा इनी थो़रलु़सीडा बर्तो लक्नी, मा माम्चु़नी-पेलडा सो़म्दी बेनी। 21 इनी त्वापलाईङा माम्चु़नी रिखामगोडा जु़ल्नी मा मेसिपा त्वारो़म ल्वामु इकीमा ङाचो़ ख्रीष्टकु न-थो़म लन्थाट्नी। 22 उनी न-गोडा मुर्सिक्पा मु़चु़मिमलाई न-थो़ रेम्बेनी। 23 मु़चु़मिमलाई नियाकु मुड्डाम ख्लुक्साका सेल्नी। मु़चु़मिमडला न-थो़म रेम्बेनी, लावो छो़म चङको-चङकोका मेम बेनी। मेर्मिमकु छु़लका घ्राम्लु़पा दु़म्मुडाम वाङ बानी। जि-वा नुङ माम्चु़नीकु नङ कोक्सी 24 माम्चु़नी यु़मनुङमा बुमी मा गानीलाई छु़लडा वाम्मुडाम सेल्मु चापा बुमी। गानीलाई हाम वो मेख्लो़ट्पा दु़म्बेसाका नुङ छो़म भ्रसिबेसाका उनी यु़म-झ्वाक्सी ङादोडा रेन्मु चापा गुमी बुमी। 25 गुमी कोलेङा गुइलाई सेल्पा इकी माम्चु़नीकु यु़म-झ्वाक्सी, डोक्पु दु़प्सी, यु़म नुङ साखाम इकीमा ङाचो़ येशू ख्रीष्टलामका खोत्ले पुस्ता ङादो नुङ हेल्लो लोवो दु़म्नु़म बुनु़! आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.