यूहन्ना 4 - थुलुङ राईसामरी मेसेमनुङ येशूका ल्वा बेम्डिम 1 यूहन्नाडाम वो येशूका हापा सीसिपामिम बनेबेम्डी, मा कु-रु़दु़म ग्वाक्तोङा लेन्मी र्वाक्पा ल्वा फरिसीमिमका थो़म्डी। 2 (मेमङा लोवो येशू उनी त्वाका ने मेएँ, उनी सीसिपामिमका कु-रु़दु़म ग्वाम्थाल्मिडी।) 3 येशूका ओराम ल्वा चम्डिमा गुमी यहूदिया क्षेत्रलामका गालील क्षेत्रथो़ ख्लोम्सिम्डी। 4 सामरिया क्षेत्र दु़म्तो येशू लमु बासिक्पा बाइडा। 5 मेम्मा येशू सामरियाडाम सुखार र्वाक्मा देलडा रोम्फाम्डी। मेराम देल याकूबका उमा तारापाचो़ योसेफलाई ग्वाक्तु़म ये फार्डा बाइडा। 6 मेसिन्डा याकूबकु इनार बाइडा। लाम्दिप्डा-लाम्दिप्डा येशू घ्रु़म्मिडिमका मे इनार फार्डा गन्तासिट्मिडिम बाइडा। मेकोतिलो नेम्फुम को-न (१२) जेस्ताम बाइडा। 7 कोले सामरी मेसेम कु हड्डा मेसिन्डा रोक्ता। येशूका मे मेसेमलाई र्वाम्डी, “गोलाई कु डुमु ग्वाङनिका।” 8 मेकोतिलो उनी सीसिपामिम ने पोमु-डुमु भ्रेप्डा शहरथो़ लम्डिम बाइडा। 9 मे सामरी मेसेमका र्वाक्ता, “गानी यहूदी मा गो सामरी मेसेम, हेसाका रे कु डुमु आमाडा बिनिमिम?” (सामरीमिमडाम यहूदीमिम वाङ बुम्थाल्मी।) 10 येशूका मेराम मेसेमलाई र्वाम्डी, “गाना माम्चु़नीकु राप्लावा नुङ गानानुङ कु डुमु बिपा मु़चु़ सु़ र्वाक्साका छेनावाम माला ने गाना गुनुङ बिनावा। मेम्मा गुका गानालाई त्वारो़म ग्वाक्पा कु ग्वाक्नावा।” 11 मेराम मेसेमका गुमीनुङ र्वाक्ता, “ङाचो़, गानीनुङ कु वाम्खोप सोजाम वो मिबु, मा इनार वो हापा घ्लु़म्पा बु। बालामका गानी त्वारो़म ग्वाक्पा कु रेट्निवा? 12 हाम गानी इकीमा बेब-पाप याकूबडाम वो डोक्पु? गुका इनार धासाक्तिकी। मेम्मा गु उ चो़-चु़सु़मिमका नुङ उ हादी-बारामिमका ओराम इनारडामङा कु डुम्डिम बाइडा।” 13 येशूका मे मेसेमलाई र्वाम्डी, “ओराम कु डुपा खोत्ले मु़चु़मिम आथावो कोरा सिमी, 14 लावो गो ग्वाक्पुमिम कु सु़का डुङु़, मेराम हेल्लो वो कोरा मेसि। गो मेरामलाई ग्वाक्पुमिम कु मेसिपा त्वारो़म ग्वामु लागि गुगोडा हेल्लो लोवो पुट्पाम बाट्पा कु पुन्खोप खोम दु़म।” 15 मे मेसेमका गुमीनुङ र्वाक्ता, “ङाचो़, गोलाई मेराम कु ग्वाङनी, मा गो हेल्लो वो कोरा मेसिङुनु़। मेम्मा आसिन्डा कु हड्डा रोमुम बुमु मेबासी।” 16 येशूका मेराम मेसेमलाई र्वाम्डी, “लक्सामा इमा वोचु़लाई येडामा रेडा।” 17 मे मेसेमका र्वाक्ता, “आमा वोचु़ मिबु।” येशूका गुलाई र्वाम्डी, “इमा वोचु़ मिबु र्वाक्साका गाना जो़पाङा र्वाक्ना। 18 हेङालोने गाना ङोले मु़चु़नुङ लालीकुन्दा बोमु दु़म्नाम बु, मा ओम्लो गानानुङ बाट्पा वो इमा वोचु़ मेएँ। गाना आच्छाङा र्वाक्नाम बु।” 19 मे सामरी मेसेमका र्वाक्ता, “ङाचो़, गानी ने माम्चु़नीलाम-जेपा कोले मु़चु़ र्वाक्पा गो लु़ङु। 20 आकी बेब-पापमिमका ओराम पोप्चङडला माम्चु़नीकु सो़रलोले बेम्थाल्मिडी। लावो गानी यहूदीका माम्चु़नीकु सो़रलोले बेखोप खोम ने यरूशलेम र्वानी।” 21 येशूका मेराम मेसेमलाई र्वाम्डी, “ए छापा, गोडला थो़र बे। थारी रोक्तोङा लेडु़, पापकु सो़रलोले गानी ओराम पोप्चङडला वो मेबोनी, यरूशलेमडा वो मेबोनी। 22 गानी सामरीमिमका सु़कु सो़रलोले बोनी, मेराम आच्छाङा मेचनी। लावो गुकु यहूदीमिमका सु़कु सो़रलोले बोकु मेराम चकु। हेङालोने यहूदीमिमलामका सेल्सी रो। 23 लावो थारी रोक्तोङा लेडु़, मा मेराम थारी ओम्लोङा, हाङकोलो आच्छाङाकाम सो़रलोले बेपामिमका पापलाई पेलडा नुङ आच्छाङाका सो़रलोले बोमी। 24 माम्चु़नी पेल बुमी, मा उनीमा सो़रलोले बेपामिमका पेलडा नुङ आच्छाङाका सो़रलोले बोमु बासी।” 25 मे मेसेमका र्वाक्ता, “मसीह (मसीह र्वाक्मा ख्रीष्ट) योमी। मेम्मा गुमी योमिमा खोत्ले ल्वा गुकुनुङ सो़मी र्वाक्पा गो चक्पु।” 26 मेकोतिमा येशूका मे मेसेमलाई र्वाम्डी, “गानानुङ जेत्तोङा बेपा गो गुङा सो़।” 27 मेकोतिलोङा उनी सीसिपामिम ख्लोम्सीम्डिमा रोम्डी, मा गुमी कोले मेसेमनुङ जेत्तोङा बेम्डिम ल्वासाका ङाङाया दु़म्मिडी। लावो “गानी हाम माल्निमिम?” डे “गानी मे मेसेमनुङ हेङा ल्वा बोनिमबुनिमिम?” र्वाक्साका सु़का वो हिला मेबेमिवा। 28 मे मेसेमका उ लिप मेसिन्डाङा पार्जो़ल्लु़मा देलथो़ ख्लोसिड्डा। मेम्मा मु़चु़मिमनुङ र्वाक्ता, 29 “बिक्नी, कोले मु़चु़लाई रेप्नी, गो बेउतोम खोत्ले खारीकु दुथाम गुमीका गोलाई सो़म्डी। ख्रीष्ट गुमीङा ने मेएँ?” 30 मेम्मा देललाम मु़चु़मिम गुमीलाई रेप्डा उनीमाडा रोम्डी। 31 मेराम थारीकाङा उनी सीसिपामिमका गुमीलाई आरे र्वाम्डिम-र्वाम्डिमङा बेम्डी, “सीपा, हाम-हुम पेनीका।” 32 लावो येशूका मेर्मिमनुङ र्वाम्डी, “गोनुङ पोमु बु, मेरामकु दुथाम गानी मेचनी।” 33 उनी सीसिपामिमका आरे र्वाबेम्डी, “गुइ लस्तिलो कोङनिमका गुमीलाई पोमु-डुमु कोर्मिडी डे हाम ने?” 34 येशूका मेर्मिमलाई र्वाम्डी, “गोलाई थु़र्पाकु न होङङा बोमु नुङ उनी खारी बोम्सोमुङा आमा पोमु-डुमु सो़। 35 आरे र्वाक्मा गानी चनी ‘ख्लिइमिमकु ब्ल मुनामका मा-के हक्पा थारी रो।’ लावो गो र्वाङु, बक्निमा रेप्नी। ये-दडा मा-के थोक्ल्याड्डा, मा मा-के हमु थारी दु़स्ता। 36 मा-के हक्पाका उ ज्याला ल्वासु़, मा मेसिपा त्वारो़मकाम लागि मा-के खोप्डु़। मेम्मा मा-के ख्लिपा नुङ रु़पा कोयोङा गेर्सिन्ची। 37 ‘कोलेका मा-के ख्लियु़, मा कोङमीका मा-के खोप्डु़’ र्वाक्मा आच्छाङा सो़। 38 मा-के मेख्लिनिवाम खोमडा मा-के हप्डा गो थु़र्निनिम बु। वाङमिमकाङा ङादो खारी बेम्डिम बु, ओम्लो गानी मा-के हमु ल्वानी।” 39 मे मेसेमका “गो बेउतोम खोत्ले खारीकु दुथाम गुमीका गोनुङ सो़म्डी” र्वाक्पा ल्वा सो़यु़डु़मका मेराम देलडाम हापा सामरीका येशूडा थो़र बेम्डी। 40 मेम्मिमका सामरीमिम येशूकाडा रोम्डिलो येशूलाई मेर्मिमनुङङा बुमु र्वाम्डिम-र्वाम्डिमङा बेम्डी। मेम्मा गुमी मेसिन्डा नलेम बाम्डी। 41 मेम्मा उनी सिजेम थो़म्डिमका हापा मु़चु़का गुमीडला थो़र बेम्डी। 42 मेर्मिमका मे मेसेमलाई र्वाम्डी, “गाना र्वाक्नामका कोङङा गुकु थो़र बेत्तोकोम मेएँ, गुकु आकी त्वाकाङा थो़त्तोकोमका, मा गुमी आच्छाङा सु़म्दिसेरलाई सेल्पा मु़चु़ रेछा र्वाक्पा ल्वा चक्तोकोमका।” येशूका डोक्पु मु़चु़कु तारापाचो़ सबेट्मिडिम 43 नलेम चङडा येशू मेलामका गालीलथो़ लम्डी। 44 (येशू उनी त्वाकाङा र्वाम्डी, माम्चु़नीलाम-जेपा मु़चु़लाई उ त्वाकु देलडा हुनाखाना मेबोमी।) 45 गालीलडाम मु़चु़मिमका गुमीलाई आथावो हुनाखाना बेम्डी, हेङालोने सेल्सिक्पानेमकु चाडकाम थारीका मेर्मिम यरूशलेमडा बाम्डिम बाइडा। मेम्मा येशूका बेम्डिम खोत्ले मेर्मिमका मेसिन्डा ल्वाम्डिम बाइडा। 46 गुमी गालीलथो़ खिर्सिम्डिलो काना देलडा रोम्डी। मेसिन्डा गुमीका कु अङ्गूरकु बिलाम बनेम्डिम बाइडा। मेसिन्डाङा कफर्नहुम देलडा कोले डोक्पु मु़चु़ बाइडा। मेरामकु तारापाचो़ छो़म नो़पा बाइडा। 47 यहूदिया क्षेत्रलामका येशू गालील क्षेत्रडा रोम्डिम बु र्वाक्पा मे डोक्पु मु़चु़का थो़स्तु़, मा मेराम उनीमाडा लस्ता। मेम्मा येशू रोक्साका सिमु खापा उ तारापाचो़लाई सबेट्नी र्वाक्ताम-र्वाक्तामङा बु़डु़। 48 येशूका मेरामलाई र्वाम्डी, “हेल्लो वो मेल्वानिवाम छेखोपमिम नुङ यु़मखारीमिम मेल्वाथु़मसम्म गानी हेल्लो वो थो़र मेबोनी।” 49 मे डोक्पु मु़चु़का र्वाक्ता, “ङाचो़, आमा तारापाचो़ मेसिथु़म ओम्लोङा रोक्निका।” 50 येशूका मेरामलाई र्वाम्डी, “लक्सा, इमा तारापाचो़ नु़।” येशूका र्वाम्डिम ल्वाडा मे डोक्पु मु़चु़का थो़रबु़डु़मा उ नेम लाम्दीडा। 51 गु लाम्दीडा लक्तोङा बु़डु़लो उ डु़ल्चो़मिमका गुलाई लाम्दीडा क्रो़म्मिडिमा उ चो़ नु़डाम ल्वा थो़बेट्मिडी। 52 हाङकोलो आथाम मे उ चो़ समु चो़म्डु़ र्वाक्साका गुका मेर्मिमलाई हिलाबु़डु़। मेम्लो मेर्मिमका र्वाम्डी, “बास्ता नेम्फु कोले जेस्तालो आथाम गुलाई डार्चु़मोका डिड्डु़।” 53 येशूका गुलाई “इमा तारापाचो़ नु़” र्वाम्डिम थारीकाङा रेछा र्वाक्पा मे डोक्पु मु़चु़का चडु़। मेम्मा गु नुङ उमा नेमडाममिम खोत्लेका येशूडा थो़र बेम्डी। 54 यहूदिया क्षेत्रलामका गालील क्षेत्रडा रोम्डिमा येशूका बेम्डिम ओराम ननोम उनी छेखोप बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.