यूहन्ना 21 - थुलुङ राईयेशू येतले सीसिपामिमकाडा रेम्बेम्सिम्डिम 1 मेकोतिमा तिबेरियस दिरिदिनकु फार्डा उनीमा सीसिपामिमकाडा येशू आथावो रेम्बेम्सिम्डी। गुमी आरेसाका रेम्बेम्सिम्डी: 2 सिमोन पत्रुस, दिदुमस र्वाक्मा थोमा, गालीलडाम काना देलडा बाट्पा नथानेल, जब्दियाकु नले तारापाचो़चिप, मा नले सीसिपाचिप कोदेप बाम्डी। 3 सिमोन पत्रुसका मेर्मिमनुङ र्वाक्ता, “गो ने ङो सेड्डा लक्तोङा बेउ।” मेर्मिमका र्वाम्डी, “गुकु वो गानानुङङा लकु।” मेर्मिम लम्डिमा कुबी-बोक्साडला हुम्डी, लावो मेराम सिन्था मेर्मिमका कोले वो ङो मेचु़म्मिवा। 4 नेमसोसोका येशू दिरिदिनकु सो़पडा येम्सिम्डी। लावो सीसिपामिमका गुमी येशू र्वाक्साका मेछेट्मिवा। 5 येशूका मेर्मिमलाई र्वाम्डी, “ङोप्सो़नी, गानीनुङ कोले वो ङो मिबु?” मेर्मिमका र्वाम्डी, “मिबु।” 6 गुमीका मेर्मिमलाई र्वाम्डी, “पालुङ कुबी-बोक्साकु जो़पलाम ओप्नी, मा किचो़ कोलोङ ङो डार्नी।” मेम्मा मेर्मिमका पालुङ ओप्मिडी, मा पालुङका ङो हापा हुप्डु़मका मेर्मिमका पालुङ थु़न्मु मेचाप्मिवा। 7 मेम्मा येशूका छो़म रिखाम बेम्डिम सीसिपाका पत्रुसलाई र्वाक्ता, “गुमी ने ङाचो़ रे रेछा।” सिमोन पत्रुसका “गुमी ने ङाचो़ रे रेछा” र्वाक्पा थो़स्तु़मा गुका उमा ब्लाङमा-ये कम्मरडा बड्डु़, हेङालोने गुका उमा ब्लाङमा-ये प्लु़स्तु़म बाइडा। मेम्मा दिरिदिनगोयु़ झुस्ता। 8 वाङमिम सीसिपामिम ने कुबी-बोक्साडलाङा गन्मिडिमा ङोका लिपा पालुङ पाखानो थु़त्तोङा लेट्मिडी। मेर्मिम दिरिदिनकु सो़पडाम हापा होनोवा मेबामिवा, को सङ (१००) मिटर कोको होनो बाम्डी। 9 दिरिदिनकु सो़पडा मेर्मिम लुम्डिमा मेर्मिमका ग्राग्राया वाक्पा गेलुङडला ङो नुङ सो़बेम ल्वाक्मा ल्वाम्डी। 10 येशूका मेर्मिमलाई र्वाम्डी, “गानी मालो चु़म्निम कोले-नले ङो फिट्नी।” 11 मेम्मा सिमोन पत्रुस कुबी-बोक्साडला हुङडामा पालुङ दिरिदिनकु सो़पथो़ थु़स्तु़। मेगोडा को सङ ङो-सुले (१५३) डोक्पुतो ङो बाम्डी। मेकोम हापा ङो बाम्डी लोवो मे पालुङ मेआ़क्सावा। 12 येशूका मेर्मिमलाई र्वाम्डी, “रोक्नीमा पेनी।” सीसिपामिम सु़कावो “गानी सु़” र्वाक्साका गुमीलाई हिलाबोमु मेचाप्मिवा। हेङालोने मेर्मिमका गुमी ङाचो़ र्वाक्साका छेट्मिडिम बाइडा। 13 येशू बिम्डिमा सो़बेम रम्डी, मा मेर्मिमलाई ग्वाम्डी। मेम्साकाङा ङो वो मेर्मिमलाई ग्वाम्डी। 14 सिमुलाम बम्गेम्डिम चङ्डा येशू उनी सीसिपामिमनुङ रेम्बेसिम्डिम ओराम सु खेपमिम थारी बाइडा। येशूका पत्रुसलाई ङादोम खुन्चु़म खुबेट्मिडिम 15 मेर्मिमका पोमु डु़म्मिडिमा येशूका सिमोन पत्रुसलाई र्वाम्डी, “यूहन्नाकु तारापाचो़ सिमोन, हाम ओर्मिमडाम हापा रिखाम गाना बोङी?” गुका र्वाक्ता, “मेमङा, ङाचो़, गो गानीलाई रिखाम बोनिनी र्वाक्पा गानी चनी।” गुमीका गुलाई र्वाम्डी, “आमा भेन्दाकु चो़मिमलाई पोमुडुमु ग्वाकामी।” 16 येशूका आथावो र्वाम्डी, “यूहन्नाकु तारापाचो़ सिमोन, हाम गाना आच्छाङा रिखाम बोङी?” गुका र्वाक्ता, “मेमङा, ङाचो़, गो गानीलाई रिखाम बोनिनी र्वाक्पा गानी चनी।” गुमीका र्वाम्डी, “आमा भेन्दामिमलाई रेप्डामी।” 17 गुमीका सु खेपडा र्वाम्डी, “यूहन्नाकु तारापाचो़ सिमोन, हाम गाना गोलाई रिखाम बोङी?” पत्रुसकाम छो़म उमा गो नो़डा, हेङालोने गुमीका सु खेप “हाम गाना गोलाई रिखाम बोङी?” र्वाक्साका हिलाबेम्डी। गुका गुमीलाई र्वाक्ता, “ङाचो़, गानी खोत्ले चनी, गो गानीलाई रिखाम बोनिनी र्वाक्पा चनी।” येशूका र्वाम्डी, “आमा भेन्दामिमलाई पोमु-डुमु ग्वाकामी। 18 आच्छाङा गो गानालाई र्वाङु, गाना स्वाला बान्नालो इ त्वाकाङा त्वाकु ये फन्थाल्सिट्ना, मा बान्ते इ लल द्वाक्ता, मेसिन्डा लक्ना। लावो गाना ङावा दु़म्नामा इ ल्वा हम्नामा बुना, मा कोङनिमका ये फबेनामी मा बान्ते इ लल मेद्वा मेसिन्डा मेलनामी।” 19 हेसाका सिसाका पत्रुसका माम्चु़नीकु यु़म झ्वाकु़ मेराम रेम्बोमु लागि येशूका आरे र्वाम्डिम बाइडा। मेम्मा गुमीका पत्रुसलाई र्वाम्डी, “आमा चङचङ लाम्दिया।” येशू नुङ गुमीका छो़म रिखाम बेम्डिम सीसिपा 20 पत्रुसका चङथो़ ख्लोसिड्डामा रेप्डु़लो येशूका छो़म रिखाम बेम्डिम सीसिपा चङचङ बिक्तोङा बेपा ल्वास्तु़। नेम्थाम ग्रुला पेम्डिलो येशूकु चङलाम थेर्तासिड्डामा “ङाचो़, गानीलाई भ्रेट्पा मु़चु़ सु़?” र्वाक्साका हिलाबेपा सीसिपा ओरामङा बाइडा। 21 पत्रुसका गुलाई ल्वास्तु़मा येशूनुङ हिलाबु़डु़, “ङाचो़, ओराम हे दु़म?” 22 येशूका पत्रुसलाई र्वाम्डी, “गो मेख्लोसिक्थु़मसम्म गु सामनुङमा बुनु़म बुनु़ र्वाक्पा आमा न बु, गानालाई हाम दु़स्ता? आमा चङचङ लाम्दिया।” 23 मेम्मिमका मेराम सीसिपा मेसि र्वाक्पा ल्वा सीसिपामिमगोडा फोन्सिड्डा। लावो गु मेसि र्वाक्साका येशूका र्वाम्डिम मेबायावा। गुमीका ने आरे र्वाम्डिम बाइडा, “गो मेख्लोसिक्थु़मसम्म गु सामनुङमा बुनु़म बुनु़ र्वाक्पा आमा न बु गानालाई हाम दु़स्ता?” 24 मेराम सीसिपाङा सो़ ओर्मिम ल्वाकु दुथाम सो़पा मा र्याक्पा। गुका र्वामिम ल्वा आच्छाङा र्वाक्पा गुइ च। 25 येशूका वाङमिम वो हापा खारीमिम बेम्डी। मेर्मिम खोत्ले र्याक्पाका माला मे र्याक्मा खाजेममिम हिसिक्पा खोम खोत्ले सु़म्दिसेरडा वो मेदु़प्सावा र्वाक्पा गो लु़ङु। |
© Wycliffe Bible Translators, Inc. All rights reserved.
Wycliffe Bible Translators, Inc.