यूहन्ना 17 - थुलुङ राईउनी त्वाकाम लागि येशूकु सो़म्दी 1 येशूका आरे र्वामु दु़म्मिडिमा पाह्रीथो़ रेप्साका सो़म्दी बेम्डी: “पाआ, थारी रोक्फाड्डाम बु। इनीमा तारापाचो़कु यु़म झ्वाक्नी, मा तारापाचो़का इनीमा यु़म झ्वाक्नु़। 2 हेङालोने गानी गुलाई ग्वाक्निम खोत्ले मु़चु़लाई मेसिपा त्वारो़म ग्वाक्नु़मी र्वाक्साका खोत्ले मु़चु़डला गुलाई साखाम ग्वाक्निम बु। 3 मेसिपा त्वारो़म ल्वापा लाम्दी ओराम सो़: गानी कोलेङा आच्छाङाकाम माम्चु़नीलाई मेर्मिमका छेमु, मा गानी थु़र्निम येशू ख्रीष्टलाई वो छेमु। 4 गानी गोलाई बेबेट्ङिडिनिम खारी बेसोक्साका सुबुडा इनीमा यु़म झ्वाबेत्तोम बु। 5 पाआ, सु़म्दिमो ङादो गानीनुङ बाङ्डोलोम आमा यु़म-झ्वाक्सीका इनीमा ङादोडा यु़म झ्वाबेट्नी। सीसिपामिमकाम लागि येशूकु सो़म्दी 6 “सु़म्दिसेरलामका गानी गोलाई ग्वाङ्डिनिम मु़चु़मिमकाडा गो गानीलाई छेबेट्निनिम बु। मेर्मिम मु़चु़ इनीमाङा बाम्डी, मा मेर्मिम गोलाई ग्वाङ्डिनी। मेर्मिमका इनीमा सिजेम होम्साका दोम्डिम बु। 7 गानी गोलाई ग्वाङ्डिनिम खोत्ले ल्वा गानीलामका रोक्ताम र्वाक्साका मेर्मिमका चम्डिम बु। 8 हेङालोने गानी ग्वाङ्डिनिम सिजेम मेर्मिमलाई गो ग्वाक्तोमिम बु, मा मेर्मिमका मेराम रम्डिम बु। गानीलाम योङडोम र्वाक्पा आच्छाङा मेर्मिमका चम्डी, मा गानी गोलाई थु़र्ङिडिनिम र्वाक्साका मेर्मिमका थो़र बेम्डिम बु। 9 गो मेर्मिमकाम लागि सो़म्दी बेउ। सु़म्दिसेरकाम लागि गो सो़म्दी मेबेउ। लावो उहेम गोलाई ग्वाङ्डिनिम, मेर्मिमकाम लागि सो़म्दी बेउ, हेङालोने मेर्मिम इनीमाङा सो़। 10 गोनुङ बाट्पा खोत्ले इनीमाङा, मा गानीनुङ बाट्पा खोत्ले आमा। मेर्मिमलाम आमा यु़म झ्वास्ताम बु। 11 “गो सु़म्दिसेरडा मेबुङु, लावो मेर्मिम सु़म्दिसेरडा बुमी, मा गो ने इनीमाडा गेत्तोङा बेउ। सेपा पाआ, गानी गोलाई ग्वाङ्डिनिम इनीमा नङकु यु़मका मेर्मिमलाई बोनी-थार्निमी, मा गानी नुङ गो कोङसो़ बुचिमिम होङ्ङा मेर्मिम वो कोङसो़ दु़म्मिनु़। 12 गो आसिन्डा बाङडोम थारीका गानी ग्वाङ्डिनिम नङकु यु़मका मेर्मिमलाई बोत्तोमी-थार्तोमी, मा इनीमा सिजेम होङङा मेर्मिमगोडाम कोले कोङङा पुयु़लुस्ता। 13 “ओम्लो गो इनीमाडा गेत्तोङा लेट्पु। लावो गो सु़म्दिसेरडा आथावो बुङुलो ओर्मिम ल्वा र्वाङु, मेम्साका छो़म आमा न-गो भ्रसी मेर्मिमकु गोगोडा दु़म्नु़। 14 गो मेर्मिमलाई इनीमा सिजेम ग्वाक्तोमी, मा सु़म्दिसेरडाम मु़चु़मिमका मेर्मिमलाई मेद्वाक्मिवा, हेङालोने गो सु़म्दिसेरकाम मेएँ, मेप्माङा मेर्मिम वो सु़म्दिसेरकाम मेएँ। 15 मेर्मिमलाई सु़म्दिसेरलामका लक्नी र्वाक्साका मेएँ, लावो मेर्मिमलाई शैतानडाम बोनी-थार्नी र्वाक्साका गो गानीनुङ सो़म्दी बेउ। 16 गो सु़म्दिसेरकाम मेएँ, मेप्माङा मेर्मिम वो सु़म्दिसेरकाम मेएँ। 17 मेर्मिमलाई आच्छाङाम ल्वाडा सेपा दु़म्बेट्नी, इनीमा सिजेम आच्छाङाम बु। 18 गानी गोलाई सु़म्दिसेरडा थु़र्ङिडिनिम होङ्ङा मेर्मिमलाई सु़म्दिसेरडा थु़र्तोमिम बु। 19 “इनीमा आच्छाङाकाम ल्वाका मेर्मिम सेपा दु़म्मीनु़ र्वाक्साका गो आ त्वापलाई वो सेपा सासेसी दु़म्बेट्पु। थो़रलु़पामिम खोत्लेकाम लागि येशूकु सो़म्दी 20 “गो ओर्मिमकाम लागि कोङङा सो़म्दी मेबेउ। ओर्मिमकु सिजेमका सु़का गोडला थो़रलु़मी, मेर्मिमकाम लागि वो सो़म्दी बेउ। 21 मेम्साका मेर्मिम खोत्ले कोङसो़ दु़म्मिनु़, पाआ, हेसाका गानी गोगोडा बुनी, मा गो गानीडा बुङु। मेर्मिम इकीमाडा दु़म्मिनु़, मेम्साका गानी गोलाई थु़र्ङिडिनिम र्वाक्पा सु़म्दिसेरका थो़र बु़नु़। 22 “गानी गोलाई ग्वाङ्डिनिम यु़म-झ्वाक्सी मेर्मिमलाई ग्वाक्तोमिम बु। मेम्साका गानी नुङ गो कोङसो़ बुचिमिम होङ्ङा मेर्मिम कोङसो़ दु़म्मिनु़। 23 मेर्मिम खोत्ले कोले दु़म्मिनु़ र्वाक्साका गानी गोगोडा दु़म्निमा गो मेर्मिमडा दु़म्ङु। मेम्मा गानी गोलाई रिखाम बेङ्डिनिम होङ्ङा मेर्मिमलाई रिखाम बेनिमी र्वाक्पा नुङ गानी गोलाई थु़र्ङिडिनिम र्वाक्पा सु़म्दिसेरका च। 24 “पाआ, गानी गोलाई ग्वाङ्डिनिम मु़चु़मिम बान्ते गो बुङु, मेसिन्डा गोनुङ दु़म्मिनु़ र्वाक्पा आमा न बु। सु़म्दिमो ङादोङा गानी गोलाई रिखाम बेङ्डिनिमका ग्वाङ्डिनिम यु़म-झ्वाक्सी मेर्मिमका रेम्मिनु़ र्वाक्पा वो न बेउ। 25 “जो़पा खारी बेपा पाप, सु़म्दिसेरडाम मु़चु़मिमका गानीलाई मेछेनी, लावो गो गानीलाई छेनिनी। मेम्मा गानी गोलाई थु़र्ङिडिनिम र्वाक्पा मेर्मिमका चमी। 26 गोलाई बेङ्डिनिम इनीमा रिखाम मेर्मिमकाडा दु़म्नु़, मा गो आ त्वाप मेर्मिमकाडा दु़म्ङुनु़ र्वाक्साका गो गानीलाई थो़रलु़पामिमकाडा छेबेट्निनिम बु मा छेबेनिनिमिम बुङु।” |
© Wycliffe Bible Translators, Inc. All rights reserved.
Wycliffe Bible Translators, Inc.