यूहन्ना 13 - थुलुङ राईयेशूका उनी सीसिपामिमकु खेल सो़ल्मिडिम 1 सेल्सिमुनेमकु चाड ङादो गुमीका ओराम सु़म्दिसेर डिसाका पापकाडा लक्पा उनी थारी रोक्फाड्डा र्वाक्साका येशूका चम्डी। गुमीका सु़म्दिसेरडा बाट्पा उनी सीसिपामिम खोत्लेलाई रिखाम बेत्तो मेर्मिमलाई चङ्डासम्म छो़म रिखाम बेम्डी। 2 येशू नुङ उनी सीसिपामिमका नेम्थाम ग्रुला पेत्तोङा बेम्डी। येशूलाई भ्रेन्मु लागि सिमोनकु तारापाचो़ यहूदा इस्करियोतलाई शैतानका ङादोङा कोस्तु़म बाइडा। 3 पापका खोत्ले ल्वामिमडला साखाम येशूलाई ग्वाम्डिम मा गुमी माम्चु़नीलाम योम्डिम, मा माम्चु़नीकाडाङा ख्लोसिक्तो लेट्पु र्वाक्पा गुमीका चम्डिम बाइडा। 4 मेम्मिमका गुमी उनी पेखोपलामका बम्डी, मा उनी हुम-ये प्लु़साका कोर्थो़ जु़ल्मिडी, मा कम्मरभाल तौली रिम्सिम्डी। 5 मेकोतिमा कोले सोजामडा कु अम्डिमा सीसिपामिमकु खेल सो़ल्मु चो़म्मिडी। मेम्मा गुमीका रिम्सिम्डिम तौलीका मेर्मिमकु खेल बम्साम्डी। 6 सिमोन पत्रुसकाडा येशू खेल सो़ल्ला रोम्डिलो गुका र्वाक्ता, “ङाचो़, हाम गानी आमा खेल सो़ल्निमिम?” 7 येशूका र्वाम्डी, “गो हाम बेत्तोङा लेट्पुमिम गाना ओम्लो थेसिमेथेना, लावो दिफु थेसिथेना।” 8 पत्रुसका र्वाक्ता, “गानी आमा खेल सो़ल्मु हेल्लो वो मेनु़।” येशूका र्वाम्डी, “गो इमा खेल मेसो़लुवा माला गाना आमा मेदु़म्ना।” 9 सिमोन पत्रुसका र्वाक्ता, “ए ङाचो़, मेम माला आमा खेल कोङङा मेएँ, आमा ल्वा नुङ बुइ वो सो़ल्साङनीका।” 10 येशूका र्वाम्डी, “सो़ल्सिमु दु़म्पा खेलडाम वाङमिम हाम वो सो़ल्मु मेबासी, खोत्ले मिरो़म छेको-छेकोम बु। गानी छेको-छेकोम बुनी, लावो गानीगोडाम खोत्ले ने मेएँ।” 11 हेङालोने सु़का गुमीलाई भ्रेन्मु खाप्डु़मिम मेराम मु़चु़लाई गुमीका छेम्डिम बाइडा। मेम्मिमका गानी खोत्ले ने छेको-छेकोम मेबुनी र्वाम्डिम। 12 गुमीका मेर्मिमकु खेल सो़ल्मु दु़म्मिडिमा उनी हुम-ये फम्सिम्डिमा बासी गन्मिडिमडा गन्मिडी। मेकोतिमा गुमीका मेर्मिमलाई र्वाम्डी, “गो इनीमा लागि बेउतोम गानी थेसिथेनी? 13 गानी गोलाई ‘सीपा’ नुङ ‘ङाचो़’ र्वानी, गानी र्वानिमिम मेराम जो़पाङा, हेङालोने गो गुङा सो़। 14 गो इनीमा ‘सीपा’ नुङ ‘ङाचो़’ दु़म्साका वो इनीमा खेल सो़ल्तो माला गानी इनीमा खेल सोल्बेबोमु बासी। 15 गो इनीमा लागि बेउतोम होम्साकाङा गानी वो बेनी र्वाक्साका गानीलाई रेम्बेट्निनिम सो़। 16 आच्छाङा गो गानीलाई र्वाङु, डु़ल्चो़ उमा नेमहपडाम डोक्पु मेदु़म। मेम्मा सेलाचो़ सेला थु़र्पाडाम डोक्पु मेदु़म। 17 गानी ओर्मिम ल्वा थेट्निमा मेराम होम्साका बेन्नी माला गानी आलाकाम सो़। येशूका उनी त्वाप भ्रेन्ला सो़सिक्पाकु दुथाम सो़म्डिम ( मत्ती २६:२०-२५ ; मर्कूस १४:१७-२१ ; लूका २२:२१-२३ ) 18 “गो गानी खोत्लेकु दुथाम र्वाङुमिम मेएँ। गो छेत्तोम कोले मु़चु़कु दुथाम गो चक्पु। लावो माम्चु़नीकु सिजेमका आरे र्वामिम होङङा दु़म: ‘गोनुङङा सो़बेम पेपा मु़चु़ङा आमा कोर्थो़लाम बक्ता।’ 19 “आरे दु़म्मु ङादोङा गो गानीलाई ओराम ल्वा र्वाङु, मेम्साका आरे दु़म, मा गो गुङा र्वाक्पा गानी थो़रलु़नी। 20 आच्छाङा गो गानीलाई र्वाङु, गो थु़र्तोमलाई रपाका गोलाई रङी, मा गोलाई रपाका गोलाई थु़र्पालाई रङु़।” 21 आरे र्वामु दु़म्मिडिमा येशू छो़म उनी न-गोडा मेभ्रसिप्मिवा, मा जो़होमका सो़म्डी, “आच्छाङा गो गानीलाई र्वाङु, गानीगोडाम कोलेका गोलाई भ्रेन्ङी।” 22 येशूका सु़कु दुथाम र्वाम्डिम मेराम मेचक्साका सीसिपामिमका उनी त्वाप-त्वापडा रेमरेम बेम्डी। 23 येशूका रिखाम बेम्डिम कोले सीसिपा ने येशूकु होनोलाम गन्तासिट्पा बाइडा। 24 सिमोन पत्रुसका लिबा तास्तु़ मा गुलाई हिलाबु़डु़, “गुमीका सु़कु दुथाम र्वामिमिम?” 25 येशूकु होनोलाम थेर्सिक्साका गुका गुमीनुङ हिलाबु़डु़, “ङाचो़, मेराम मु़चु़ सु़?” 26 येशूका र्वाम्डी, “थालयु़म सो़बेमकु फ्वाक्चो़ल डो़उमा गो उहेमलाई ग्वाक्पु, मेरामङा सो़ मेराम मु़चु़।” मेम्मा सो़बेमकु फ्वाक्चो़ल डो़म्डी, मा सिमोनकु तारापाचो़ यहूदा इस्करियोतलाई ग्वाम्डी। 27 यहूदाका सो़बेम रङडु़ मेडे उमा न-गोडा शैतान हुङल्याड्डा। मेम्मा येशूका मेरामलाई र्वाम्डी, “गाना हाम बोमु खाम्नामिम, मेराम दाला बे।” 28 लावो गुमीका हेङा मेरामलाई आरे र्वाम्डिम र्वाक्साका ग्रुला पेप्डा गन्पामिम सु़का वो थेसिमेथेट्मिवा। 29 हेङालोने कोङ-कोङका आरेप्माम मिम्मिडी, यहूदानुङ खउलुङकु फाजी बु, मा चाडकाम लागि चाहेदु़म्पा हाम-हुम भ्रेयु़नु़ रे उनी हाम वो मेबाट्पामिमलाई किचो़ ग्वाक्नु़मी र्वाक्साका येशूका र्वाम्डिम। 30 यहूदाका सो़बेम पोमु दु़म्स्तु़ मेडे पाखा लुक्ल्याड्डा। मेकोतिलो सिन्था दु़स्ताम बाइडा। पत्रुसका येशूलाई मेछेपु र्वा र्वाक्साका येशूका सो़म्डिम ( मत्ती २६:३१-३५ ; मर्कूस १४:२७-३१ ; लूका २२:३१-३४ ) 31 यहूदा मेलाम लस्ता, मा येशूका र्वाम्डी, “मिनीचो़कु यु़म झ्वामु खाप्डु़, मा गुलामका माम्चु़नीकु यु़म झ्वा। 32 माम्चु़नीकु यु़म मिनीचो़लामका झ्वासी माला मिनीचो़कु यु़म गुमीलामका झ्वाबेन्मी, मा दालाङा उमा यु़म झ्वाबेन्मी। 33 “ए चो़च्चो़नी, गो गानीनुङ घरिकोङ कोङङा दु़म्ङु। गानी गोलाई माल्ङिनी, मा यहूदीमिमलाई र्वाङ्डोम होङ्ङा गानीलाई वो र्वाङु, गो बान्ते लक्तोङा लेट्पु, मेसिन्डा गानी रोमु मेचाम्नी। 34 “गानीलाई कोले लाले ल्वा बेबेनिनी: रिखाम बेबेनी। गो गानीलाई रिखाम बेन्निनिम होम्साकाङा गानी वो रिखाम बेबोमु बासी। 35 गानी रिखाम बेबेन्नी माला ओरामलामका गानी आमा सीसिपा रेछा र्वाक्साका खोत्ले मु़चु़का चमी।” 36 सिमोन पत्रुसका गुमीनुङ हिलाबु़डु़, “ङाचो़, गानी बान्ते लनिमिम?” येशूका र्वाम्डी, “गो बान्ते लक्तोङा बेउ, मेनो ओम्लो आमा चङचङ लाम्दिमु मेचाम्ना, लावो दिफु ने आमा चङचङ लाम्दिना।” 37 पत्रुसका र्वाक्ता, “ङाचो़, हेङा गो ओम्लो इनीमा चङचङ लाम्दिमु मेचापु? इनीमा लागि गो आमा साम वो फ्यामु चापु।” 38 मेकोतिमा येशूका र्वाम्डी, “हाम गाना आमा लागि इमा साम फ्यानामिम? आच्छाङा गो गानालाई र्वाङु, स्वारेपो ओमु ङादो गाना गोलाई सु खेप मेछेपु र्वाना।” |
© Wycliffe Bible Translators, Inc. All rights reserved.
Wycliffe Bible Translators, Inc.