यूहन्ना 11 - थुलुङ राईयेशूका लाजरसलाई सिमुलामका फम्डिम 1 लाजरस नङकाम कोले मु़चु़ नो़पा बाइडा। गु मरियम नुङ मार्था उमा रिचो़चिपनुङ बेथानिया देलडा बाइथाल्ला। 2 ओराम मरियमकाङा चङडा येशूकु खेलडा हापा थिकाम भ्रपा मुर्नेम्पा तेलका क्लक्तु़मा उमा सेमका बक्साड्डु़म बाइडा। उमा रिपाप लाजरस नो़पा बाइडा। 3 मेम्मा मे रिचो़चिपका येशूकाडा आरे र्वाक्पा सेला थु़र्ची, “ङाचो़, इनीमा द्वादीबुङ मु़चु़ नो़पा बु।” 4 ओराम ल्वा थो़म्डिमा येशूका र्वाम्डी, “ओराम नो़सी सिमुलामडा रेथिक्पा मेएँ। ओराम ने माम्चु़नीकु यु़म झ्वाम्सिमुकाम लागि सो़, मेम्साका ओरामलामका माम्चु़नीकु तारापाचो़काम यु़म झ्वासी।” 5 येशूका मार्था, उमा ल्वाक मरियम नुङ लाजरसलाई रिखाम बेम्थाल्मिडी। 6 लाजरस नो़पा बु र्वाक्पा थो़म्डी मा वो गुमी बान्ते बाम्डी मेसिन्डाङा आथावो नलेम बाम्डी। 7 मेकोतिमा गुमीका उनी सीसिपामिमनुङ र्वाम्डी, “दो, गुइ यहूदिया क्षेत्रथो़ ख्लोसिडी।” 8 सीसिपामिमका गुमीलाई र्वाम्डी, “सीपा, बास्ता-नेहोनेमङा यहूदीमिमका गानीलाई लुङका ओमु माल्निमिम बाइडा, मा वो गानी मेसिन्डाङा लमु माल्तो बोनी?” 9 येशूका र्वाम्डी, “हाम कोलेमका को-न (१२) घण्टा मेदु़म मा? नेप्सुङ बुलो लाम्दिपा मु़चु़का उमा खेल मेतुकु़, हेङालोने गुका ओराम सु़म्दिसेरकु ओल ल्वासु़। 10 लावो सिन्था लाम्दिपा मु़चु़का ने खेल तुकु़, हेङालोने मेराम मु़चु़नुङ ओल मेदु़म।” 11 मेकोतिमा येशूका र्वाम्डी, “इकीमा ङोप्सो़ लाजरस अम्चेड्डाम बु, लावो गुलाई ङोसिबेड्डा गो मेसिन्डा लङु।” 12 उनी सीसिपामिमका र्वाम्डी, “ङाचो़, अम्स्ताम माला नु़ल्या।” 13 येशूका लाजरस अम्चेड्डाम कोङङा र्वाम्डिम र्वाक्पा मेर्मिमका मिम्मिडी, लावो येशूका लाजरस सिडा र्वाम्डिम बाइडा। 14 मेम्मिमका येशूका मेर्मिमलाई जो़होमका र्वाम्डी, “लाजरस सिडा। 15 गानी थो़रबेनी र्वाक्साका इनीमा लागि गो मेसिन्डा मेबाङुवामडा गो गेर्सिक्पा बुङु। लावो लक्सी उमाडा।” 16 मेम्मा येशूकु सीसिपामिमगोडाम दिदुमस र्वाक्मा थोमाका उमा ङोप्सो़मिमनुङ र्वाक्ता, “दो, गुइ वो येशूनुङङा लक्सिमा सिमु बासी लोवो सिइ।” सिमुलाम बग्गेसी नुङ त्वारो़म येशू 17 येशू बेथानियाडा रोम्फाम्डिलो लाजरस सिडामा सु़लु़मगोनो जु़ल्मिडिम ब्ल लेम दु़स्ताम गुमीका चम्डी। 18 यरूशलेम शहरलामका बेथानिया देल सु किलोमिटर कोकोडा बाइडा। 19 मार्था नुङ मरियमकु रिपाप सिडामका हापा यहूदीमिम उचीमा न बसाड्डा रोम्डिम बाइडा। 20 येशू रोक्तोङा लेन्मी र्वाक्पा थो़स्तु़मा गुमीलाई क्रो़म्डा मार्था लस्ता। लावो मरियम ने नेमडाङा बाइडा। 21 मार्थाका येशूलाई र्वाक्ता, “ङाचो़, गानी आसिङा बानिवाम माला ने आमा रिपाप मेसियावा। 22 लावो ओम्लो वो गो चक्पु गानी माम्चु़नीनुङ हाम बिनी गुमीका ग्वानिमी।” 23 येशूका मार्थालाई र्वाम्डी, “इमा रिपाप आथावो बगे।” 24 मार्थाका र्वाक्ता, “हुक्पा थारीका सिमुलाम मु़चु़मिम बम्गेमिमिम नेम गु बगे र्वाक्पा गो चक्पु।” 25 येशूका गुलाई र्वाम्डी, “सिमुलाम बग्गेसी नुङ त्वारो़म गोङा। गोडला थो़रबेपा मु़चु़ सिडा माला वो सिमुलामका बगे। 26 उहेम मु़चु़ नु़ मा गोडला थो़र बु़, मेराम हेल्लो वो मेसि। हाम गाना ओराम ल्वा थो़रलु़ना?” 27 मार्थाका र्वाक्ता, “अँ ङाचो़, गो थो़रलु़ङु, ओराम सु़म्दिसेरडा योक्पा माम्चु़नीकु तारापाचो़ गानी ख्रीष्ट।” 28 आकोति र्वाक्तामा मार्था लस्ल्याड्डा, मा उमा ल्वाक मरियमलाई येड्डु़मा लिबावा र्वाक्ता, “सीपा रोम्फाम्डी, मा गानालाई येनामिम बुमी।” 29 ओराम ल्वा थो़स्तु़मा मरियम हुचु़ बक्तामा उनीमाडा लस्ल्याड्डा। 30 मेकोतिलोसम्म येशू मेराम देलडा रोम्फाम्डिम मेबायावा। मार्थाका क्रो़म्स्तु़म बायडाङा गुमी बाम्डी। 31 यहूदीमिमका मरियमलाई उमा नेमडा न बसाक्तोङा बेम्डी। गु बक्तामा पाखा लुक्ल्याड्डाम ल्वाम्डिमा मेर्मिम उमा चङचङ लम्डी। गु सु़लु़मडा ख्राप्डा लमिम र्वाक्पा मेर्मिमका मिम्सिम्डिम बाइडा। 32 मरियम येशू बाट्पा फार्डा रोक्थिड्डामा गुमीलाई ल्वास्तु़। मेम्मा उनीमा खेल चु़म्डु़मा र्वाक्ता, “ङाचो़, गानी आसिङा बानिवाम माला आमा रिपाप मेसियावा।” 33 येशूका मरियम ख्रापा मा गुनुङ रोक्पा यहूदीमिम वो ख्राप्मिडिम ल्वाम्डी। मेम्मा गुमी उनीमा न-गोडा छो़म मेभ्रम्सिप्मिवा, मा ङाली डम्डी। 34 गुमीका मेर्मिमलाई हिलाबेम्डी, “गानी लाजरसलाई बान्ते जु़ल्निम बु?” मेर्मिमका र्वाम्डी, “ङाचो़, बिक्नीमा रेप्नीका।” 35 येशू ख्राप्मिडी। 36 मेम्मा यहूदीमिमका र्वाम्डी, “रेप्नी, गुमीका गुलाई हाङको रिखाम बेम्थाल्मिडी।” 37 लावो मेर्मिमगोडाम कोङ-कोङका र्वाम्डी, “मिक्सीका मेल्वापा मु़चु़कु मिक्सी होर्साक्पाका ओराम मु़चु़लाई हेङा सिमु ग्वाम्डिम?” 38 येशू आथावो मेभ्रम्सिप्मिवा, मा सु़लु़मथो़ लम्डी। मेराम सु़लु़म बुडखुमगोडा बाइडा। मेराम सु़लु़म कोले लुङका ड्याक्मा बाइडा। 39 येशूका र्वाम्डी, “मे ख्रेमलुङ रिल्नी।” सिपा लाजरसकु रिचो़ मार्थाका गुमीलाई र्वाक्ता, “ङाचो़, ओम्लोसम्म ने मेराम मुर्नेम्पा दु़स्ता डे, हेङालोने मेराम सिडाम ब्ल लेम दु़म्मु दु़म्स्तु़।” 40 मेम्मा येशूका गुलाई र्वाम्डी, “गाना थो़रलु़न्ना माला माम्चु़नीकु यु़म-झ्वाक्सी ल्वाना र्वाक्साका हाम गो गानालाई र्वाङ्डोम मेएँ?” 41 मेर्मिमका सु़लु़मकु ख्रेमलुङ रिल्मिडी। मेकोतिमा येशूका पाह्रीथो़ रेप्मिडिमा र्वाम्डी, “पाआ, गो र्वाङडोम ल्वा गानी थो़ङसाङडिनिमकाम लागि आलासो़। 42 गो र्वाङुमिम ल्वा गानी हेल्लो लोवो थो़नी र्वाक्पा गो चक्पु। लावो आसिन्डा येम्तासिक्पा मु़चु़मिमकाम लागि गो र्वाङ्डोम। मेम्साका गानी गोलाई थु़र्ङिडिनिम र्वाक्पा ओर्मिमका थो़र बोमिनु़।” 43 गुमीका आरे र्वामु दु़म्मिडिमा डोक्पु लो़लामका येम्डी, “लाजरस, पाखा लुका।” 44 मे सिडाम मु़चु़ उमा ल्वा-खेल नुङ ङाली साङखिमका बन्थाट्माङा पाखा लुक्ता। येशूका मेर्मिमलाई र्वाम्डी, “मेरामकु साङखिम फ्रोन्साट्नी, मा गुलाई लमु ग्वाक्नी।” येशूलाई सेट्पा मुलु़ ( मत्ती २६:१-५ ; मर्कूस १४:१-२ ; लूका २२:१-२ ) 45 मरियमलाई क्रो़म्डा रोक्पा यहूदीमिम हापाका येशूका बेम्डिम ओराम खारी ल्वाम्डिमा गुमीडला थो़रबेम्डी। 46 लावो मेर्मिमगोडाम कोङनिम ने फरिसीमिमकाडा लम्डी, मा येशूका बेम्डिम खारीकु दुथाम सो़म्डी। 47 मेकोतिमा ङाउ डु़म्लाचो़मिम नुङ फरिसीमिमका डोक्पु-घ्रो़म्दीडाम मु़चु़मिमलाई येट्मिडिमा र्वाम्डी, “गुइ हाम बिइमिम? हेङालोने ओराम मु़चु़का हेल्लो वो मेल्वाम्मा यु़मखारीमिम हापा रेम्बेत्तोङा लेडु़। 48 ओरामलाई आरे बोमु ग्वाक्ती माला खोत्लेका गुडला थो़रबोमी। मेम्मा रोमी सिपाहीमिमका रोमिमा इकीमा सो़रनेम नुङ नेब्दी निफिङा छो़रो़प बोमी।” 49 मेर्मिमगोडाम कैयाफा र्वाक्मा मेथचेम डोक्पु ङाउ डु़म्लाचो़ बाइडा। गुका र्वाक्ता, “गानी हाम वो मेचनी। 50 खोत्ले नेब्दीङा छो़रो़प दु़म्मुडाम ने कोले मु़चु़ सिमु मु़चु़मिमकाम लागि जो़पा दु़म र्वाक्पा ल्वा गानी थेसिमेथेनी?” 51 ओराम ल्वा गुका उमा त्वाकु नका र्वाक्ताम मेएँ, गु मेथचेम डोक्पु ङाउ डु़म्लाचो़ दु़स्तामका यहूदीमिमकाम लागि येशू सिमु बासी र्वाक्साका माम्चु़नीलाम-जेस्ताम बाइडा। 52 नेब्दीकाम लागि कोङङा मेएँ, खोत्लेथो़ फोन्सिक्साका बाट्पा माम्चु़नीकु चो़मिमलाई कोदेप बोमु लागि र्वाक्मा बाइडा। 53 मेम्मा मेनेम आथाम मेर्मिमका येशूलाई सेट्पा मुलु़ बोमु चो़म्मिडी। 54 मेम्मिमका यहूदीमिमकु ङादोडा ल्वाहोमका येशू मेबामिवा। मेम्मेबेसाका, गुमी र्याङगो-र्याङगो फार्डाम एफ्राइम र्वाक्मा देलडा लम्डी। मेम्मा उनी सीसिपामिमनुङ मेसिन्डा बाम्डी। 55 यहूदीमिमकाम सेल्सिक्पा नेमकु चाड रोक्फाड्डाम बाइडा। मु़चु़मिम सेपा दु़म्मु लागि सेल्सिक्पा नेमकु चाड ङादो डु़म्ला होम्साका सेपा दु़म्मु लागि देल-देललाम यरूशलेम लम्डी। 56 मेर्मिमका येशूलाई माल्तोङा लेट्मिडी, मा सो़रनेमगोडा मेर्मिम येम्सिम्डिलो आरे र्वाबेम्डी, “गानी हे लु़नी? हाम गु चाडका मेरो?” 57 लावो कोङनिमका डार्मिडी माला सो़मिनु़। मेम्मा गुकु गुलाई चु़म्कु र्वाक्साका ङाउ डु़म्लाचो़मिम नुङ फरिसीमिमका र्वाम्डिम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.