याकूब 5 - थुलुङ राईखाप्चीचो़मिमलाई माम्चु़नीका देन्दे ग्वामी 1 खाप्चीचो़नी, थो़नी, गानीडला रोमु खाप्डु़म छो़म मेझापा दु़खामिम मिम्नीमा येनी-दुनी मा ख्राप्नी। 2 इनीमा खाप्चीमिम म्वाड्डु़म बु, मा इनी ये-सेम तु़मका कोक्तु़म बु। 3 इनीमा सो़ना, मतोमिम घ्लो़स्तामा पारिमिम दु़स्ताम बु। मेरामङा गानी रारी बेन्निमकु दुथाम मेजो़पा सो़पा दु़म, मा मुका होम्साका इनीमा मिरो़म मेरामका पु़। हुक्पाथारीका गानी इनीमा खाप्ची फुट्निम बु। 4 इनीमा ये-दडा खारी बेप्साक्पा खारीचो़मिमलाई मेर्मिमका ल्वामु बासिक्पा खउलुङ मेग्वानिवा। रेप्नी, मेराम खउलुङकाङा डोक्पु लो़लामका इनीमा कोर्थो़लाम जे, मा खोत्लेडाम घ्ल्वापा मिप्रङमाका इनीमा खारीचो़ ख्राप्मिडिम थो़म्डिम बु। 5 सुबुडा गानी खाप्चीका लिट्पा बान्नी, मा इनीमा नका पु़डु़म ल्वामिमका गानी गेर्सिट्निम बु। गानी फल्मु लागि सो़ नु़बेन्सिट्निम हादीबारा होप्माम दु़म्निम बु। 6 इनीमा कोर्थो़लाम मेबक्पा जो़पा मु़चु़लाई गानी मुमा बेट्नीमा सेट्निम बु। दु़खा थारीका इम्सिसाका बुमु 7 मेम्मिमका वा-ल्वाकनी, ङाचो़ येशू मेयोक्थु़मसम्म इम्सिक्साका बानी। रेप्नी, हेसाका मा-के सिन्बेट्पा खारीचो़का वो उमा येडाम हापा नु़पा मा-के ल्वामु लागि मा-के ख्लिमु ङादो नुङ मेराम मा-केकु बुङदो ङादो व योक्पा थारी उ पाउ मेसोसाका छो़म लथाडु़। 8 मेम्साकाङा गानी वो इम्सिक्साका बानी मा इनी न-गो बन्थाट्नी। हेङालोने येशू योमु खाप्मिमिम बु। 9 वा-ल्वाकनी, कोलेका वाङमिमकु दुथाम सु़म्बुर्मा किट्नी माला गानी मुमा बेन्ला सो़न्सिनी। रेप्नी, निया बेपा ङाचो़ येशू ख्रीष्ट लाम्चोकोडा रोम्फाम्डिम होङङा गुमी ने योमुङा खाप्मिमिम बु सो़। 10 वा-ल्वाकनी, माम्चु़नीकु सिजेम थो़बेट्पा माम्चु़नीलाम-जेपा मु़चु़मिमलाई मिम्नी, मा मेर्मिमका दु़खा इम्साका बाम्डिम होम्साकाङा गानी वो बानी। 11 रेप्नी, उहेम इम्सिसाका बु गुलाई गुइ जिनुङमा सो़ र्वाकी। गानी अय्युबका उ दु़खा इम्डु़मकु दुथाम थो़न्निम बु, मा माम्चु़नीका मेरामलाई जि ग्वाम्डिम वो ल्वान्निम बु। गुमी हाङको छो़म न-थो़म नुङ दिदामनुङमा बुमी। 12 वा-ल्वाकनी, त्वाकु ल्वा आच्छाङा रेम्बोमु लागि खोत्लेडाम ङादो सुबु, पाह्री नुङ वाङमिम हामकाम वो कसम मेपेनी। लावो मुमा बेन्ला मेसो़म्सिमुकाम लागि गानी र्वानिमिम आच्छाङाकाम ल्वा आच्छाङा दु़म्नु़, मा मेएँ माला मेएँङा दु़म्नु़। थो़रनुङमा सो़म्दी 13 हाम गानीगोडा कोङनिमका दु़खा ल्वात्तोङा बु़? मेरामका माम्चु़नीडा सो़म्दी बु़नु़। हाम कोङनिम गेर्सिक्पा बु? मेरामका माम्चु़नीकु नङ कोक्साका काम्सो बु़नु़। 14 हाम गानीगोडाम कोङनिम नो़पा बु? मेरामका मण्डलीडाम एल्डरमिमलाई येट्नुमा एल्डरमिमका नो़पालाई तेलका क्लक्साका येशूकु नङडा सो़म्दी बोम्सामिनु़। 15 माम्चु़नीडा थो़रलु़साका बिइमिम सो़म्दीका नो़पामिम समी, मा माम्चु़नीका ङादोम होप्मामङा मेर्मिमलाई दु़म्बेन्मी। मेरामका छु़ल बु़डु़म बु लोवो गुमीका उमा छु़ल हेम्सामी। 16 मेम्मिमका गानी कोलेका कोलेनुङ इनी छु़ल न-गोलामका सो़बेनी। कोलेका कोलेनुङ त्वाका बेन्निम छु़लकु दुथाम सो़बेनिमा सो़म्दी बेनी, मेम्मा गानी सनी। माम्चु़नीकु न होम्साका दोपा मु़चु़कु सो़म्दीका छो़म डोक्पु खारी बु़। 17 एलिया वो गुइ होप्मामङा मु़चु़ बाइडा। व मेयोनु़ र्वाक्साका गुका छो़म सो़म्दी बु़डु़म बाइडा, मा सु थ रु मुनामसम्म इस्राएलडा व मेयोकावा। 18 आथावो गुका सो़म्दी बु़डु़मा धामुलामका व योक्ता मा ये-दडा मा-के सिड्डु़। 19 आमा वा-ल्वाकनी, गानीगोडाम कोङनिम मु़चु़ माम्चु़नीकु आच्छाङाकाम सिजेम डिसाका कोर्थो़ ललो मेरामलाई कोङनिमका माम्चु़नीडा ख्लोकु़ माला, 20 ओराम चनी: उहेमका कोले छु़लचो़लाई मेजो़पा लाम्दीलामका ख्लोकु़मा रेडु़, मेरामका मे छु़लचो़लाई सिमुलामका सेलु़, मा गुका मेरामकु हापा छु़लमिम माम्चु़नीलाम हेम्बेसाडु़। |
© Wycliffe Bible Translators, Inc. All rights reserved.
Wycliffe Bible Translators, Inc.