याकूब 4 - थुलुङ राईत्वापलाई माम्चु़नीडा ग्वामु 1 गानीगोडा क्वाल्बा नुङ रिबुसीमिम हामका दु़म? इनीमा गोगोडा हेल्लो लोवो क्वाल्बा बेपाम बाट्पा त्वाप कोङङा नु़मु र्वाक्पा नमिमलामका मेर्मिम दु़म। 2 गानी हाम-हुम ल्वापा न बोनी, लावो मेल्वानी। गानी रारी बोनी मा मु़चु़ सेनी, लावो मेराम मेल्वानी। गानी रिबुसी किनी मा क्वाल्बा बोनी, लावो गानी न बोनिमिम होप्माम ल्वा गानीनुङ मेदु़म, हेङालोने गानी माम्चु़नीनुङ मेबिनी। 3 गानी बिनी लावो मेल्वानी, हेङालोने त्वाकु न गेर्सिबेन्मु लागि मेजो़पा नका बिनी। 4 नाम्सु़रु़ बेपानी, सु़म्दिसेरनुङ ङोप्सो़बुङ दु़म्मु माम्चु़नीलाई नाप्छु़न्मु सो़ र्वाक्पा ल्वा गानी मेचनी? उहेमका सु़म्दिसेरनुङ ङोप्सो़बुङ दु़म्मु न बु़, मेराम माम्चु़नीकु स्वाक्चिमो मु़चु़ दु़म। 5 माम्चु़नीकु सिजेमका “गुइलाई ख्लो़मु माम्चु़नीका उनी पेल थु़र्मिडी। गुमीका गुइ माम्चु़नीडाम फ्वासिडिनु़ र्वाक्पा न मेबोमी” र्वाक्पा गानी हाम होङङा वो मेलु़नी? 6 लावो आरेप्माम मेजो़पा नमिमकु कोर्थो़लाम बमु गुमीका गुइलाई छो़म दिदामका सासामी, मेराम माम्चु़नीकु सिजेमका आरे र्वा: “माम्चु़नी डोक्पु लिसिक्पामिमकु कोर्थो़लाम बमी, लावो याक्के दु़म्पामिमलाई दिदामका सान्मी।” 7 मेम्मिमका इनी त्वापलाई माम्चु़नीकु ल्वाडा जु़ल्नी। शैताननुङ क्वाल्बा बेप्डा बक्नी, मा मेराम गानीलामका स्वामा ल। 8 माम्चु़नीकु ङादोडा लक्नी, मेम्मा गुमी वो इनीमा ङादोडा रोमी मा गानीनुङ कोयोङा बुमी। माम्चु़नीकु सिजेम होम्साका मेदोपा छु़लचो़नी, इनी ल्वा सेपा बेनी। माम्चु़नी नुङ सु़म्दिसेर निफिथो़ङा न जु़ल्पा मु़चु़नी, इनीमा न-गो सेपा बेनी। 9 इनीमा ङाली डक्नी, ख्राप्नी मा येनी-दुनी, हेङालोने गानी छु़ल बेन्निम बु। रिमु डिसाका येनी-दुनी, मा गेर्सिमु डिसाका ङाली डक्नी। 10 माम्चु़नीकु ङादोडा इनी त्वापङा याक्के दु़म्नी, मेम्मा गुमीका गानीलाई डोक्पु मिम्निमी। 11 वा-ल्वाकनी, वाङमिमकु दुथाम कोर्थो़लाम मेजो़पा मेजेनी। उहेमका उमा ल्वाककु कोर्थो़लाम मेजो़पा जेसाका मुमा बेडु़, मेराम माम्चु़नीकाम डु़म्लाकु कोर्थो़लाम जेमिम दु़म, मा मेरामका डु़म्ला मुमा बेडु़। गानी डु़म्ला मुमा बेनी माला ने गानी डु़म्ला होम्साका दोपा मु़चु़ मेदु़म्नी, डु़म्लाकु निया बेपा रे दु़म्नी सो़। 12 डु़म्ला ग्वाक्पा नुङ निया बेपा ने माम्चु़नी कोङङा बुमी, मा माम्चु़नीका कोङङा सेल्मु नुङ पुयु़लुबेन्मु चाम्मी। मेम्मिमका त्वाकु साउखोरेलाई मुमा बेट्पा मु़चु़ गानी सु़ मा? 13 नो़ ल्वाक्थाक्साका आरे र्वाक्पामिमका थो़नी, “आनेप डे दिका गुइ कोले शहरडा लक्सी। मेसिन्डा को थ कोति बुइ मा ब्यापार बेसाका हापा खउलुङ डु़प्डी”, 14 दिका हाम दु़म र्वाक्पा वो गानी मेचनी। इनीमा मिरो़म ने हाम मा? गानी ने घरिकोङ रेम्बेसिक्पा मा दाम्ल्याक्पा सिखाप होप्मामङा सो़। 15 मेम्मिमका गानी मेम मेर्वाक्साका आरे र्वामु बासिक्पा बाइडा, “माम्चु़नीका न बेम्डी माला गुइ जेडी, मा होप्माम-मेप्माम बिइ।” 16 लावो गानी मिम्निमिम ल्वाडा इनी नो़ ल्वान्थानी, मा डोक्पु लिन्सिनी। आरेप्माम डोक्पु लिसिसी ने मेजो़पा सो़। 17 मेम्मिमका उहेमका जो़पा खारी बोमु बासी र्वाक्पा चक्साका वो मेबु़ माला गु छु़लचो़ सो़। |
© Wycliffe Bible Translators, Inc. All rights reserved.
Wycliffe Bible Translators, Inc.