याकूब 3 - थुलुङ राईलेम जो़होमका जु़ल्मु 1 वा-ल्वाकनी, गुइ मण्डलीडा सीपा मु़चु़मिमकाम ने छो़म छो़पा निया दु़म र्वाक्पा चनी, मेम्मिमका गानीगोडाम खोत्लेका ने सीपा मु़चु़ दु़म्मु मेमाल्नी। 2 गुइ खोत्लेका हापा ल्वामिम ख्लो़डी। उहेमका गु जेमिम ल्वाडा मेख्लो़डु़ मेराम मु़चु़ जो़पा दु़म। मेप्माम मु़चु़का वाङमिम ल्वामिमडा वो मेख्लो़साका उ त्वापलाई जो़होमका जु़ल्मु चाप्सु़। 3 घोडा त्वाकु ल्वाडा बोमुलाई मेरामकु सिडडा सेल रिबाका बडि माला गुइ मेरामलाई बान्ते ललद्वा मेनोङा लमु झाम। 4 मेप्मामङा डोक्पु कुबी-बोक्सा वो डोक्पु ब्लोजु़का दोपा लोवो कोले याक्के थो़खोपका कुबी-बोक्सा थो़पा मु़चु़का बान्ते उ ललद्वा मेनोङा ल। 5 लेम वो मेप्मामङा सो़। ओराम मिरो़मडा याक्के बु लोवो डोक्पु-डोक्पु ल्वा बु़। रेप्नी, डोक्पु सो़ब्दी वो कोङ याक्के बिछेर्मुलामका रुकु ल। 6 लेम कोले बिछेर्मुङा सो़। ओराम सु़म्दिसेरडाम मेजो़पा खोत्ले ल्वामिम ओरामलामका लु मा खोत्ले इकीमा गोगोडा ओरामका मेजो़पा ल्वा फोडु़। ओरामका इकीमा त्वारो़मङा मुका बुलु़वाबेडु़। मेराम मु ने खादी गोयु़म सो़। 7 मु़चु़मिमका हादीबारामिम, सिकेवा-माङकेवामिम, सुसिसाका लाम्दिपा फुचु़-रोक्चु़मिम नुङ दिरिदिनडा बाट्पा खोत्लेलाई उनी ल्वाडा जु़ल्थाप्मिमिम, 8 लावो लेम ने सु़का वो जो़होमका जु़ल्मु मेचाप्सु़। ओराम हेल्लो लोवो दोसाका मेजो़पा ल्वा जेपा नुङ जो़होमका जु़ल्मु मेझापा, मा मु़चु़लाई सेट्पा ङेनुङमा होप्माम सो़। 9 ओराम लेमकाङा ङाचो़ नुङ माम्चु़नीकु नङ कोक्सी, मा ओराम लेमकाङा माम्चु़नीका उनी त्वाप होप्मामङा प्रङ्मिडिम मु़चु़मिमलाई वाइतो बेडिमी। 10 कोले सिलामकाङा नङ कोमु नुङ वाइतो बेन्मु ल्वा लु? आमा वा-ल्वाकनी, आरेप्माम ने दु़म्सिमेनु़। 11 हाम कोलेङा कु पुन्खोपलामका भ्रपा नुङ खेपा कु पु़डु़ मा? 12 आमा वा-ल्वाकनी, बैससीकु धक्साडा जैतून, अङ्गूरकु रो़लडा बैससी मेसिडु़, मा खेपा कु पुन्खोपलामका वो भ्रपा कु मेपु़डु़। आच्छाङाकाम नेप्ची 13 गानीगोडा नेप्चीनुङमा नुङ माम्चु़नीकु न थेसिथेट्पा सु़ बु? मेरामका जो़पा जेसी-दोसी नुङ याक्के दु़म्साका उमा खारीमिमलाम मेराम नेप्ची रेम्बु़नु़। 14 इनीमा न-गोडा नाचु़र नुङ त्वाप नु़पा ल्वा कोङङा बु माला गानी नेप्चीनुङमा र्वाक्साका डोक्पु मेलिन्सिट्नी। आच्छाङाकाम ल्वा थक्साका लिमा थेट्पा गानी दु़म्नी। 15 आरेप्माम नेप्ची ने पाह्रीलामका योक्पा मेएँ। लावो माम्चु़नीकु कोर्थो़लाम बक्पा शैतानलाम, सु़म्दिसेरलाम नुङ छु़लचो़मिमलाम रो। 16 हेङालोने बान्ते नाचु़र नुङ मेजो़पा ल्वामिम दु़म, मेसिन्डा मु़चु़मिम मेदु़मी, मा मेजो़पा खारीमिम बोमी। 17 लावो पाह्रीलामका योक्पा नेप्ची ने ङादोङा सेपा दु़म। मेकोतिमा मेराम न भ्रसिबेट्पा, याक्के दु़म्पा, खोत्लेनुङ दु़पा, छो़म न-थो़मनुङमा दु़म्साका जो़पा खारी बेपा, चोमिक्सी मेबेपा, मा हेल्लो लोवो वाङमिम मु़चु़कु दुथाम मिम्पा दु़म। 18 न-थो़म घ्रो़म्बेट्पामिमका न भ्रसी बेन्मिमिमका माम्चु़नीका मेर्मिमलाई जो़पा मिम्मी। |
© Wycliffe Bible Translators, Inc. All rights reserved.
Wycliffe Bible Translators, Inc.