याकूब 1 - थुलुङ राई1 माम्चु़नी नुङ ङाचो़ येशू ख्रीष्टकु डु़ल्चो़ याकूबलामका, नेब्दी-नेब्दीडा फोन्सिक्साका बाट्पा को-न (१२) दोचो़मिमलाई सेव! थो़र नुङ इम्सी 2 आमा वा-ल्वाकनी, गानीडला खाल-खालकाम दु़खामिम रोमिलो छो़म गेर्सी द्वाक्नी। 3 हेङालोने इनीमा थो़र छाम्सीका इम्मु चापा दु़म्नी र्वाक्पा गानी चनी। 4 गानी खोत्लेडा इम्मु सीसिट्नी, मा गानी हामकाम वो खेरेला मेदु़म्साका थेट्पा नुङ बोमु चापा दु़म्नी। 5 लावो गानीगोडाम कोङनिमलाई नेप्ची चाइदु़म्पा बु माला न-थो़मनुङमा माम्चु़नीनुङ मेरामका बियु़नु़, मा मेरामलाई गुमीका ग्वामी। हेङालोने गानी खोत्लेका बिनिमिम ल्वाडा गुमीका मेभुर्साका छो़म ग्वानिमी। 6 मेरामका उमा नडा हाम वो मेमुर्साका, लावो थो़रलु़साका बियु़नु़, हेङालोने नडा मुर्सिक्पा ने जुका भाल-आथो़ घ्रोक्पा दिरिदिनकु बाबारिम होप्माम सो़। 7 मेराम मु़चु़का माम्चु़नीलामका हाम-हुम ल्वापा न मेबु़नु़। 8 हेङालोने नले न बेसाका मुर्सिक्पा मु़चु़ ने खोत्ले उमा जेसी-दोसीडा वाङ-वाङ दु़म। आच्छाङाकाम खाप्चीचो़ 9 थो़रलु़पामिमगोडाम उ हाम वो मेबाट्पा याक्के मु़चु़लाई माम्चु़नीका डोक्पु बोमिमिम थारीकाम लागि गु छो़म गेर्सी द्वानु़, 10 मा खाप्चीचो़ ने माम्चु़नीका याक्के दु़म्बेन्मिमिमडा गेर्सी द्वानु़, हेङालोने सो़ब्दी बुङमा होम्साका गु मेकोतिङा दाम्मा ल। 11 नेप्सुङ ओप्डु़, मा घ्रु़पा साम दु़म्मा जेम साबेडु़, बुङमा आल, मा मेरामकु जो़प्सी दाम्मा ल। मेम्साकाङा खाप्चीचो़ वो उ त्वाकु खारी बेत्तो-बेत्तोङा दाम। 12 उ न-छाम्सिमिम थारीका इम्साका बाट्पा मु़चु़ङा जिनुङमा दु़म सो़। हेङालोने उ न-छाम्सिमु थारी हेप्डु़मिम चङडा माम्चु़नीका रिखाम बेपामिमलाई गुमीका ङादो ग्वानिनी र्वाम्डिम मुकुट मेरामका ल्वासु़, मेराम मुकुट र्वाक्मा हेल्लो वो मेसिपा त्वारो़म सो़। 13 मेजो़पा नका छाम्सिलो सु़का वो, “माम्चु़नीका मेजो़पा नका आमा न छाम्मिडी” मेर्वानु़। हेङालोने हामका वो माम्चु़नीकु न छाम्मु मेचाप्सु़, मा गुमीका वो मेजो़पा नका सु़काम वो न मेछाम्मी। 14 लावो खोत्ले मु़चु़मिम त्वाकु मेजो़पा नकाङा रारी बेसाका न छाम्ला सो़म्सिमी, 15 मा मेराम मेजो़पा ल्वा न-गोडा हु, मा छु़ल ग। छु़ल बर्तो लमा सिमुलाम रेडु़। 16 द्वादीबुङ वा-ल्वाकनी, इनीमा नड्डा मेजो़पा मिम्साका मेख्लो़ट्नी। 17 आच्छाङाकाम नुङ जो़पा खोत्ले राप्लावा पाह्रीलाममिम सो़। ओराम ओल प्रङ्पा माम्चु़नीलाम यो। ख्लोसिक्पाम बाट्पा रिम्जुङ होम्साका गुमी ने हेल्लो वो मेख्लोम्सिमी। 18 गुइ गुमीका प्रङ्मिडिमगोडाम खोत्लेडाम डोक्पु दु़म्सिनु़ र्वाक्पा नका गुमीका आच्छाङाकाम सिजेमका कक्साड्डामी। थो़मु नुङ बोमु 19 आमा द्वादीबुङ वा-ल्वाकनी, ओराम ल्वा थेट्नी: खोत्ले मु़चु़ दाला थो़पा, वाखा जेपा, मा छोक्चो इम्सिक्पा दु़म्मु बासी। 20 हेङालोने मु़चु़कु छोक्चोका माम्चु़नीकु न होप्माम जो़पा खारी बोमु मेचाप्सु़। 21 मेम्मिमका खोत्ले घ्रामलु़पा ल्वामिम नुङ मेजो़पा ल्वामिम पार्नी, मा इनीमा गोगोडा ख्लिम्थाट्मा माम्चु़नीकु सिजेम याक्के दु़म्साका रनी। मेरामका गानीलाई सेल्मु चाम्नी। 22 ओरामका र्वामिम होम्साका बेनी। सिजेम थो़पा कोङङा दु़म्साका नड्डा मेजो़पा मिम्निमा मेख्लो़ट्नी। 23 कोङ मु़चु़का माम्चु़नीकु सिजेम थो़सु़ लावो मेरामका र्वामिम होम्साका मेबु़ माला ने गु उ त्वाकु ङाली ऐनाडा रेपा होप्माम दु़म। 24 गुका उ त्वापलाई रेम्सीमा लल्या, मेकोतिमा गु हेप्माम बाइडा र्वाक्पा ल्वा दालाङा प्ल्वास्चेडु़। 25 लावो गुलाई फ्वाक्पा छो़म जो़पा डु़म्ला होम्साका उहेम लाम्दी, मा गुका थो़स्तु़म सिजेम मेप्ल्वासाका मेराम होम्साका खारी बु़ माला मेरामका बु़मिम खारीडा जि ल्वासु़। 26 कोङ मु़चु़का उ त्वाप माम्चु़नीकु सो़रलोले जो़होमका बेपा मिम्सी, लावो उमा लेम जो़होमका मेजु़लु़ माला उमा त्वाकु नड्डा मेजो़पा मिम्सी मा ख्लो़डु़। मेरामका माम्चु़नीकु सो़रलोले जो़होमका बु़मिम ने हाम ना हामकाम दु़म। 27 माम्चु़नीकु ङादोडा जो़पा नुङ सेपा उनीमा सो़रलोले बेसी ने ओराम सो़: रेचो़कुपा नुङ अर्दोमेमिमलाई उनी दु़खा थारीका रेमु, मा सु़म्दिसेरडाम मेजो़पा ल्वामिमडाम त्वाप वाङ बुमु। |
© Wycliffe Bible Translators, Inc. All rights reserved.
Wycliffe Bible Translators, Inc.