हिब्रू 9 - थुलुङ राईसुबुडा माम्चु़नी रेम्बेसिक्पा बाखोप गोनो सो़रलोले 1 ङादोम सो़रख्रेप्सीडा सो़रलोले हेसाका बोमु बासी र्वाक्साका सीपा डु़म्लामिम बाइडा मा सुबुडा सो़रलोले बेपा सेपा खोम वो बाइडा। 2 माम्चु़नी रेम्बेसिक्पा कोले बाखोप बनेबेम्मा बाइडा। मेगोनो फ्वाक्साका नले बाखोप बनेबेम्मा बाइडा। कोले बाखोपगोडा धिप्री जु़ल्खोप, टेबल मा माम्चु़नीलाई ग्वाकिमिम सो़बेममिम जु़ल्मा बाइडा। मेराम खोमलाई सेपा बाखोप र्वाम्थाल्मिडी। 3 मेसिन्डा कोले रिपा-ये बाइडा। मेराम येका रिप्डु़म ननोम बाखोपलाई खोत्लेडाम सेपा खोम र्वाम्थाल्मिडी। 4 मेगोनो धूप चामु लागि बनेबेम्मा सो़नाकु सोजाम नुङ उडलामका सो़नाका ख्रेप्मा सो़रख्रेप्सीकु बाकस बाइडा। मे बाकसगोनो मन्न जु़ल्मा सो़नाकु सोजाम, लिम ओपा हारूनकु डु़लु़म्चो़ मा माम्चु़नीकु सो़रख्रेप्सी र्याक्मा नले लुङकु र्याखोप वो बाइडा। 5 करुब र्वाकिमिम यु़म झ्वासिक्पा पाह्रीचो़चिपका मेराम सो़रख्रेप्सीकु बाकसडलाम छु़ल हेपा ख्रेम उची लाप्तेरका फोप्थाक्चिम बाइडा। लावो ओम्लो मेर्मिम ल्वा पेन्तिका सो़मु मेझाम। 6 सेपाखोमगोनो खोत्ले आरेसाका बनेबेम्मा दु़स्थाल्ला। मेकोतिमा डु़म्लाचो़मिम पाखालाममिम सेपाखोमडा हेल्लो लोवो सो़रलोले बेप्डा लम्थाल्मिडी। 7 गोलाममिम खोत्लेडाम सेपा खोमगोनो ने डोक्पु डु़म्लाचो़ कोङङा हुमु ल्वासु़। मे वो को थका कोखेप कोङङा। गुका मेगोनो सिसि मेलक्साका हुमु मेल्वासु़। गु मेगोनो सिसि लक्साका लस्थाल्ला। मेराम सिसि उ त्वाका बु़डु़म छु़लमिम नुङ मु़चु़मिमका मेचक्साका बेम्डिम छु़ल हेम्मु लागि माम्चु़नीलाई ग्वाप्डा लस्थाल्ला। 8 सेपा बाखोपकाम पाखालाममिम सेपाखोम बुमिमसम्म गोलाममिम खोत्लेडाम डोक्पु सेपाखोमगोनो हुपा लाम्दी मेहोल्सी र्वाक्साका माम्चु़नी-पेलका रेम्बोमी। 9 ओराम ने ओम्लोम थारी रेम्बेपा ल्वा सो़। ओरामका माम्चु़नीलाई सासेसी नुङ ग्वा-ग्वा ग्वाक्साका सो़रलोले बेपा मु़चु़मिमकु न-गो सेपा दु़म्मु मेचाप्सु़ र्वाक्पा रेम्बु़। 10 माम्चु़नीलाई ग्वाक्मा ङादोम बेसी ने पोमु-डुमु नुङ सो़ल्सिमु डु़म्ला कोङङा सो़। माम्चु़नीकु लाले लाम्दी मेरोक्थु़मसम्म मेराम होम्साका लाम्दिमु लागि मेर्मिम ने मिरो़मकु नियममिम कोङङा बाइडा। 11 येशू ङादोङा रोमु दु़स्तु़म जो़पा ल्वामिमकु डु़म्लाचो़ दु़म्साका रोम्डिम बु। मेम्मा गुमी सेपा नुङ खोमडाम डोक्पु डु़म्लाचो़ सो़। उहेम सेपा खोम ओराम सुबुडा प्रङ्सिड्डाम मिबु मा मु़चु़कु ल्वाका बनेबेम्मा वो मेएँ। 12 येशू ख्रीष्ट खोत्लेडाम सेपा मेराम खोमडा हेल्लो लोवोकाम लागि कोखेपङा हुम्डी। गुइलाई हेल्लो लोवो सेल्सिक्पा बेसाका गुमी मे डोक्पु खोमगोनो छ्वारा नुङ बेनोकु सिसि लक्साका मेएँ उनीमा त्वाकु सिसिङा लक्साका मेगोनो हुम्डी। 13 मेसेपा मु़चु़मिमलाई छ्वारा नुङ बेनोकु सिसिका रमिमा मालोम पितु चासाका मेरामकु फोकाका फोसाका मेर्मिमकु मिरो़म सेपा दु़म्बेन्मी। 14 लावो येशूकु सिसिका ने ओरामडाम छो़म डोक्पु खारी बु़। येशू मुमा मान्थिम दु़म्साका हेल्लो लोवो दु़म्पाम बाट्पा माम्चु़नी-पेललाम माम्चु़नीडा सासेन्सिम्डी। उनीमा सिसिका सिमुलामथो़ लक्पा खारीलामका गुइलाई ख्लोक्सा मा इकीमा मेजो़पा न-गोलाई सेपा दु़म्बेडु़। मेम्मा गुइलाई हेल्लो लोवो दु़म्पा माम्चु़नीकु खारी बोमु चापा दु़म्बेसा। 15 माम्चु़नीका याचे जेम्डिम हेल्लो लोवो दु़म्पा जिवामिम गुमीका थुट्मिडिम मु़चु़मिमकाङा ल्वामिनु़ र्वाक्साका येशू ख्रीष्टका माम्चु़नीलाममिम लाले सो़रख्रेप्सी मु़चु़मिमगोडा रेट्मिडिम बु। ङादोम सो़रख्रेप्सी बाइडाम थारीका बेम्डिम छु़ललामका मु़चु़मिम सेल्सिमु ल्वामिनु़ र्वाक्साका ङाचो़ येशू सिम्डिम बु। 16 मु़चु़ सिमु ङादो गुका उमा त्वाकु नगोडाम ल्वा र्याकु़मा पार्जो़लु़मकु दुथाम र्याक्पा मु़चु़ आच्छाङा सिडाम बु र्वाक्पा रेम्बोमु बासी। 17 मु़चु़ मेसिथु़मसम्म गुका र्याक्तु़म ल्वा हाम ना हामकाम दु़म। गु सिमु ङादो र्याक्तु़म ल्वा गु सिमिम चङ्डा कोङङा गुका र्याक्तु़म होम्साका बोमु झाम। 18 मेम्मिमका ङादोम सो़रख्रेप्सी वो सिसिलामका आच्छाङा दु़स्ताम बाइडा। 19 मोशाका डु़म्लाडा र्याक्मा खोत्ले ल्वा र्वामु दु़म्स्तु़। मेम्मा छ्वारा नुङ बेनोकु सिसि हिसपकु ग्रेमडा भेन्दाकु लालाम बोलुङ बसाका मे सिसिगोयु़ प्लु़म्तो मु़चु़ नुङ डु़म्लाकु खाजेमडला रक्तु़। 20 मेम्मा गुका आरे र्वाक्ता, “माम्चु़नीडा गानीलाई गो र्वाङ्डोम होम्साका बोमु र्वाम्डिम सो़रख्रेप्सीकु सिसि ओरामङा सो़।” 21 मोशाका आरेसाकाङा सेपा बाखोप नुङ मेगोडा बाट्पा खोत्ले सोजामडला सिसि रक्तु़। 22 आच्छाङा र्वामु माला डु़म्लाका र्वामिम होम्साका ने खोत्लेमथोक सिसिका सेपा दु़म्बेडु़, मा सिसि मान्थि ने छु़ल मेहेम्सी। 23 पाह्रीला डार्सीमिम होप्माम मेराम ल्वामिमलाई सेपा बोमु लागि ने ओकोम डु़म्ला बोमु बासी माला, पाह्रीलाम आच्छाङाकाम ल्वामिम सेपा दु़म्बेन्मु मेरामडाम वो छो़म जो़पा सासेसी चाहेदु़म। 24 येशू ख्रीष्ट मु़चु़का बनेबेम्मा सेपा खोमगोनो मेहुमिवा, उहेम आच्छाङाकाम सेपा खोम होप्माम कोङङा सो़। लावो गुमी ने पाह्रीलाम आच्छाङाकाम सेपा खोमडा लम्डी। गुमी ओम्लो इकीमा लागि माम्चु़नीकु ङादोडा बुमी। 25 डोक्पु डु़म्लाचो़मिम हादीबारामिमकु सिसि लक्साका को थका कोखेप डोक्पु सेपा खोमगोनो हुम्थाल्मिडी। लावो येशू ख्रीष्ट ने थ-थका मेसासेन्सिमिवा। 26 आरेसाका हेल्लो लोवो लमु बासिक्पा माला ने सु़म्दिमोलो आथामङा गुमीका सिमुकु दु़खा इम्मु बासावा। लावो हुक्पा थारीका येशू ख्रीष्ट मु़चु़मिमकु छु़ल हेप्सी हेल्लो लोवो दु़म्नु़म बुनु़ र्वाक्साका उनी त्वापलाई कोखेपङा सासेन्ला सो़सिप्डा गुमी रेम्बेसिम्डी। 27 खोत्लेका ङा कोखेम सिमु बासी मा मेराम चङडा माम्चु़नीका उमा निया बोमी। 28 मेम्साका ङा येशू ख्रीष्टका हापा मु़चु़मिमकु छु़ल हेम्मु लागि कोखेप सासेन्ला सो़सिम्डी। गुमी आथावो योमी मेम्लो गुमी छु़ल हेप्डा मेएँ, लावो गुमीलाई लथाक्पा मु़चु़मिमलाई सेल्ला योमी। |
© Wycliffe Bible Translators, Inc. All rights reserved.
Wycliffe Bible Translators, Inc.